Autalavou
O se Vaaiga Aoao mo Tamaitai Talavou

O se Vaaiga Aoao mo Tamaitai Talavou

O Le Faamoemoega o le Polokalama o le Alualu i Luma o le Tagata Lava Ia

O le Polokalama o le Alualu i Luma o le Tagata Lava Ia o le a fesoasoani ia te oe e faamalosia lou faatuatua ma le molimau ia Iesu Keriso ao e aoao ai i Ana aoaoga ma faaaoga e le aunoa i lou olaga. O le a fesoasoani ia te oe e faamalosia ai lou aiga i le taimi nei ma lou aiga i le lumanai. O le a fesoasoani ia te oe e saunia e osia ma tausia feagaiga paia ma maua ia sauniga o le malumalu. Ma o le a saunia ai oe e avea ma se tagata faatuatua, ma saofagā i Le Ekalesia a Iesu Keriso o le Au Paia o Aso e Gata Ai.

O le polokalama o le Alualu i Luma o le Tagata Lava Ia e faaaoga ai tulaga e valu e faatauaina e Tamaitai Talavou, e fesoasoani ai ia te oe ia e saga malamalama atoa ai pe o ai oe, pe aisea ua e i ai i le fogaeleele, ma pe o a mea e tatau ona e faia i le avea ai o oe ma se afafine o le Atua ina ia e saunia ai mo le aso e te ulu atu ai i le malumalu e osia feagaiga paia. O le a fesoasoani ai ia te oe ia e saunia mo au matafaioi i le lumanai o se tamaitai faamaoni, o se ava, tina, ma se taitai i le malo o le Atua. O le auai i le polokalama lea o le Alualu i Luma o le Tagata Lava Ia e aoaoina ai oe ina ia faia ni tautinoga, ia faataunuuina, ma lipoti atu lou alualu i luma i se tasi o ou matua po o se taitai. O faatulagaga o le a e faatuina ao e galue i lau polokalama o le Alualu i Luma o le Tagata Lava Ia —e pei o le tatalo, o le suesue i tusitusiga paia, o auaunaga, ma le teuina o se api o talaaga—o le a avea lea ma au amioga masani i aso uma. O nei amioga masani o le a faamalosia ai lau molimau ma fesoasoani ia te oe e aoao ma faalelei atili ai i lou olaga atoa.

Tulaga Manaomia

Ina ia faamaeaina la lau polokalama o le Alualu i Luma o le Tagata Lava Ia, e tatau ona e:

  • Auai i sauniga faamanatuga e le aunoa (pe a mafai).

  • Ola i tulaga faatonuina o loo ta’ua i le tusi Mo Le Malosi o le Autalavou.

  • Fai ia maea ia mea e fai ma galuega faatino mo tulaga faatauaina taitasi e valu.

  • Tusia ma teu sau api o talaaga.

  • Auai atu i le seminare pe fai lava sau suesuega tumaoti (pe a mafai).

  • Faitau e le aunoa le Tusi a Mamona.

  • Tusia ma faamaumau lau molimau e uiga i le Faaola o Iesu Keriso.

A maea ona e faia tulaga manaomia nei, ua tatau loa ona e mauaina le taui o le Aloaiaina o le Tulaga Faatamaitai Talavou pe a maea se faatalanoaga o le agavaa e lou epikopo po o le peresitene o le paranesi.

O Le Amataina

E mafai ona amata lau polokalama o le Alualu i Luma o le Tagata Lava Ia i le 12 o ou tausaga po o le taimi foi o lou papatisoga pe afai ua i le va o le 12 ma le 18 ou tausaga. O tamaitai talavou e le o ni tagata o Le Ekalesia a Iesu Keriso o le Au Paia o Aso e Gata Ai e talia foi e auai.

Ao amata [lau polokalama], o le a e maua se filifili o le sulu o loo i ai le tagavai a Tamaitai Talavou. O le asoaina o lenei filifili e faailoa atu ai lau tautinoga e faasusulu atu lou malamalama ma tu atu mo le upumoni ma le amiotonu.

Fai i ou matua e fesoasoani atu ia te oe i le fuafuaina ma le faamaeaina o lau polokalama o le Alualu i Luma o le Tagata Lava Ia. O le fetufaai o nei aafiaga, e mafai ai ona faamalosia la outou sootaga ma i la’ua. E mafai ona oulua galulue faatasi ma lou tina po o se isi tina o loo avea ma faataitaiga lelei ia te oe i lau polokalama o le Alualu i Luma o le Tagata Lava Ia, ma e mafai ona oulua mauaina faatasi le [taui] o le Aloaiaina o le Tulaga Faatamaitai Talavou. E mafai ona e fetuuna’ia mea e fai ma galuega faatino e tusa ai ma ou lava tulaga patino, o mea e te fiafia i ai, ma mea o loo e manaomia ae e tatau ona faamaonia muamua mai e ou matua po o taitai o Tamaitai Talavou, po o se isi tagata matua.

E mafai ona avea mea lelei o loo e faia i le fale, o le lotu, o le aoga, seminare, ma le nuu, ma vaega o le Alualu i Luma o le Tagata Lava Ia. Faaaoga le faasino autu o loo i tua o lenei tusi e sue ai se autu faapitoa e te fiafia i ai ma aoao pe faapefea ona faaaoga o se vaega o le polokalama o le Alualu i Luma o le Tagata Lava Ia. Manatua e tuuina atu ia te oe lava ia se taui mo mea lelei uma e te faia i aso taitasi. “O mea faatauvaa ma mea faavalea ua faataunuuina ai mea tetele” (Alema 37:6).

Taiala

E ono ni aafiaga e te faamaeaina (e tolu e faatonuina atu ma le tolu e te filifilia), ma ia tofu tulaga faatauaina e fitu a Tamaitai Talavou, ma se galuega faatino se tasi e fai ai, ma e tatau ona sefulu itula e faaalu i le faatinoina o ia galuega taitasi. Mo le tulaga faatauaina o le mama, e fa ni aafiaga e faatonuina atu e te faamaeaina ma le galuega faatino faatonuina o le faitauina o le Tusi a Mamona. Soo se tulaga faatauaina lava e mafai ona e amata ai, ma soo se faasologa foi e te galue ai.

A maea sau mea e fai mo le tulaga faatauaina po o se galuega faatino, ona e toe iloiloina lea faatasi ma se tasi o ou matua, o se taitai, po o se isi tagata matua. Ia saini ai lena tagata i se aafiaga ua maea ona fai i totonu o lau tusi o le Alualu i Luma o le Tagata Lava Ia. Ia tusi faamaumau lou alualu i luma i le Pepa e Faamaumau ai le Alualu i Luma o le Tagata Lava Ia (tagai i le itulau e 77).

O Mea E Fai Mo Tulaga Faatauaina

  • E fautuaina ina ia fai muamua mea ua faatonu atu o se tulaga faatauaina, ae e te le i agai atu e fai mea ua e filifilia mo lena lava tulaga faatauaina.

  • I mea ua filifilia e fai mo tulaga faatauaina, e mafai ona oo atu i le lua ni au lava mea e fai e te tusia mai tulaga faatauaina taitasi pe faaaoga mea e fai ua tusia atu ia fetaui ma mea e te fiafia i ai, o sini, po o ou tulaga. Vaai se tasi o ou matua, o se taitai, po o se isi tagata matua e faamaonia nei mea ae e te le’i amataina.

Galuega Faatino o le Tulaga Faatauaina

  • Ia faamaea aafiaga o loo manaomia mo se tulaga faatauaina, a o le’i faia le galuega faatino o lena tulaga faatauaina, e le aofia ai le tulaga faatauaina o le mama. E mafai ona e amata faitauina le Tusi a Mamona i soo se taimi.

  • Ia faamaonia e se tasi o ou matua, se taitai, po o se isi tagata matua ia galuega faatino taitasi ae e te le’i amataina.

  • E mafai ona e valaaulia isi e fesoasoani ia te oe i au galuega faatino, ae ia le itiiti ifo i le sefulu ou lava itula e faaalu i le galuega faatino e tasi.

O Le Vave ma le Aloaiaina

  • E pule lava oe pe o le a le vave e te galue ai, ae e tatau e le aunoa ona e galue ia le itiiti ifo i le tasi se mea e fai po o se galuega faatino. Ua fautuaina mea o loo taua i lalo:

    • Ia le itiiti ifo i le tasi se mea e fai e faamaeaina i le masina ma se galuega faatino e tasi i le tai ono masina (e lua galuega faatino i le tausaga).

    • Ia auai e le aunoa i sauniga faamanatuga ma auai i le seminare (pe a mafai).

    • Ia feiloai atu i se sui o le au epikopo ia le itiiti ifo ma le tausaga e talanoa ai lou tulaga faamanuiaina i le polokalama o le Alualu i Luma o le Tagata Lava Ia, o au taumafaiga e ola ai i tulaga faatonuina o loo taua i le tusi Mo Le Malosi o le Autalavou, ma nisi au fesili e ono i ai.

  • A maea uma ia aafiaga ma le galuega faatino mo se tulaga faatauaina, o le a faailoa aloaia e lou taitai lau taumafaiga i se sauniga a Tamaitai Talavou ma tuuina atu ia te oe se faailoga e faapipii i le itulau o le Faataunuuga o Tulaga Faatauaina o le Alualu i Luma o le Tagata Lava Ia i totonu o lenei tusi (tagai i le itulau 78) ma se lipine e tuu i totonu o au tusitusiga paia.

  • O le a e maua le avanoa e fetufaai atu ai au taumafaiga i le polokalama o le Alualu i Luma o le Tagata Lava Ia i tausaga taitasi i le taimi o le polokalama a Tamaitai Talavou i le Tulaga Aupito Sili.

  • O lou tulaga faamanuiaina i le polokalama o le Alualu i Luma o le Tagata Lava Ia e ono mafai foi ona aloaia pe a e maua lau tusi faamaonia mai le Ofagapi, Maea Maite, ma le Lora pe a e siitia atu mai lea vasega i lea vasega.

Faamaeaina [o le polokalama] o le Alualu i Luma o le Tagata Lava Ia

  • A maea ona e faia uma ia mea e fai mo tulaga faatauaina ma galuega faatino, ia tusia ma faamaumau lau molimau e uiga i le Faaola o Iesu Keriso i le itulau e 79. Toe faamanatu faatasi ma se tasi o ou matua, se taitai, po o se isi tagata matua, o vaega o le “Aloaiaina o le Tulaga Faatamaitai Talavou” i le tusi lenei (itulau 76). Ona faatulaga lea o se faatalanoaga ma lou epikopo ina ia mafai ona ia sainia le fautuaga i le itulau 82) ma faatulaga ai le avanoa mo le tauaaoina atu o lou tusi faamaonia o le Aloaiaina o le Tulaga Faatamaitai Talavou ma lau asoa.

  • E fautuaina atu ina ia e galue i le polokalama o le Alualu i Luma o le Tagata Lava Ia, i le taimi atoa e te i ai i Tamaitai Talavou e tusa lava foi pe ua uma ona e mauaina lou taui o le Aloaiaina o le Tulaga Faatamaitai Talavou. O fautuaga i auala e faaauau ai pea ona alualu i luma o loo i le vaega “O Le a Le Mea Ou te Faia Pe a Maea Lau Polokalama o le Alualu i Luma o le Tagata Lava Ia? (itulau 83). Ia toe iloiloina ma se tasi o ou matua, se taitai, po o se isi tagata matua. E mafai ona e filifili e maua se taui o le asoa o le Pi Faamamaluina e tuu i lau filifili e o faatasi ma lau asoa [lea na maua muamua], pe e te toe amataina faalua le polokalama atoa. Ua fautuaina foi oe e fesoasoani i isi tamaitai talavou i a latou polokalama o le Alualu i Luma o le Tagata Lava Ia. E ala i le faaauauina pea o lou alualu i luma, o le a e tumau ai i le auala i le malumalu ma atiina ae ni uiga o le a fesoasoani ia te oe i lou olaga atoa.