Poto

Ia saili i le aoao, e faapea foi i le suesue ma le faatuatua (MFF 88:118).

O le a faaauau pea ona ou sailia avanoa ou te aoao ma tuputupu a’e ai.

O Mea Faatonuina e Fai Mo Le Tulaga Faatauaina

Fai ia uma mea faatonuina nei e tolu mo le tulaga faatauaina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

Aoao e uiga i le taua o le maua o le poto i le faitauina lea o le Faataoto 1:5; 4:7; 2 Nifae 28:30; ma le Mataupu Faavae ma Feagaiga 88:78–80, 118; 90:15; 130:18–19; 131:6. Mafaufau pe tatau i se a ona e maua ai le poto ma le malamalama i auala e mafai ona faaaoga ai mataupu faavae o le talalelei i le olaga o lou aiga ma le auaiga i le taimi nei ma le lumanai. Ia tusia i lau api o talaaga mea ua e aoaoina e uiga i le poto ma talatalanoa ai ma se tasi o lou aiga po o se taitai o Tamaitai Talavou.
Ia lisi i lau api o talaaga au taleni ma nisi foi taleni e te manao e atiina ae. Faitau le Mataio 25:14–30. Aoao se tomai po o se taleni fou o le a fesoasoani ia te oe e tausia ai lou lava aiga i le lumanai po o lou auaiga (mo se faataitaiga, tata piano, pese, faiga o le paketi, faaaogaina tatau o taimi, kuka, suisui, po o le tausiga o le fanau). Fetufaai ma lou aiga, vasega, po o le taitai o Tamaitai Talavou mea sa e aoaoina.
Tauloto le Mataupu Faavae lona sefulu ma le tolu o le faatuatua ona e faia lea i se tasi o ou matua, se taitai, po o se isi tagata matua. Ona e asiasi lea i se falemataaga po o se faaaliga pe alu foi i se faafiafiaga o fai ai ni siva, musika, lauga, po o se tala faatino. Faaaoga le mataupu faavae lea o le faatuatua e avea ma taiala, ona e faia lea o se iloiloga o mea na e vaai ma faalogo i ai. Ia tusia ou mafaufauga i lau api o talaaga pe mafai faapefea e lenei mataupu faavae o le faatuatua ona avea o se taiala mo mea uma e te faia ina ia avea ai pea le Agaga Paia ma au soa tumau. Faasoa atu ou manatu i se tasi o ou matua po o se taitai.

Nisi Mea E Fai Mo Le Tulaga Faatauaina

Fai ia uma nisi mea se tolu mo le tulaga faatauaina. E mafai ona e filifilia mai i mataupu nei pe tusia ni au lava mea e fai e oo atu i le lua. E tatau ona faamaonia e se tasi o ou matua po o se taitai, mea na e tusi e oe lava ae e te le i amataina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

Filifili se mataupu faavae o le talalelei e te manao e malamalama atili i ai (mo se faataitaiga, faatuatua, salamo, alofa, aiga e faavavau, po o feagaiga o le papatisoga). Faitau mau ma afioga tulei a perofeta o aso e gata ai, e faatatau i le mataupu faavae lena. Ia saunia se tautalaga e lima minute e uiga i le mataupu, ma lauga i se sauniga faamanatuga, se sauniga a Tamaitai Talavou, i lou aiga, po o lau vasega foi. Tusi i lau api o talaaga pe faapefea ona e faaaogaina lenei mataupu faavae o le talalelei i lou olaga.
Aoao e uiga i se ituaiga galuega po o se auaunaga e te fiafia i ai. Talanoa i se tagata o loo faigaluega i lena ituaiga o galuega, ina ia e iloa ai pe o a tiutetauave o le galuega a lena tagata, pe o a aoaoga po o le maualuga o le atamai e tatau ona maua e le tagata ina ia faigaluega ai i lena galuega, ma pe o le a foi se sao o le galuega a lena tagata i nuu ma alalafaga. Ia tusi i lau api o talaaga mea o le a e aoaoina mai.
Tauloto ni viiga se lua e sili ona e fiafia i ai mai le tusipese. Aoao le taimiina sa’o o viiga (tagai Viiga, “00,” [383]–“00,” [85]) ona e taitaia lea o ia viiga ia le itiiti ifo ma le faalua i se afiafi faaleaiga, se sauniga a Tamaitai Talavou po o se isi sauniga faale-Ekalesia, po o le seminare foi. Faitau mau o loo tusia i le pito i lalo o na viiga taitasi.
E te aoaoina i le tolauapiga a Tamaitai Talavou ia tomai i le fesoasoani muamua, saogalemu, tumama, ma le soifua pea. Toe iloilo nei aoaoga mai lau Tusi Lesona o Tolauapiga a Tamaitai Talavou ma tusi i lau api o talaaga pe faapefea ona e faaaogaina i totonu o lou aiga e faasaoina ai i latou. Ia atiina ae se lisi o sapalai autu o le a manaomia e lou aiga i tulaga o se faalavelave faafuasei. Aoao atu se lesona i se afiafi faaleaiga pe fetufaai foi ma se taitai o Tamaitai Talavou i mea na e aoaoina ma ni tomai faaopoopo e te manao e aoao ina ia e saunia ai mo faalavelave faafuasei.

Ia Faatatau Ia Te Oe Lava Ia Mea E Fai Mo Le Tulaga Faatauaina

Galuega Faatino o le Tulaga Faatauaina

A uma ona e faia uma mea e ono e fai mo le tulaga faatauaina o le poto, ona amatalia loa lea o se galuega faatino o le a fesoasoani ia te oe e te faataunuuina ai mea sa e aoaoina. O se taumafaiga taua tele lea e tatau ona alu ai itula e le itiiti ifo i le sefulu e faamaea ai. Ia e saili ma le agaga tatalo mo le taitaiga a le Agaga Paia e te filifilia ai se galuega faatino e tele sona aoga.

Ia faamaonia e se tasi o ou matua po o se taitai le galuega faatino ae e te lei amataina. Ia e tusia foi se iloiloga pe a maea ona e faia. O nisi nei o manatu mo se galuega faatino o se tulaga faatauaina.

Aoao pe faapefea ona faatulaga, faamama, ma tausia se fale mai lou tina, tinamatua, po o se isi tamaitai e te viia. Ona faaaoga lea o mea na e aoaoina i totonu o lou aiga.
Sauniuni mo se isi laasaga faaleaoaoga e maualuga atu, ma saili ni tomai e manaomia tele e ala i lou sailia o tulaga manaomia e ulufale ai i se kolisi po o aoga faamatata eseese, sikolasipi, pili o le aoga, ma isi tupe faaalu. Talosaga mo lou ulufale atu i ai pe a oo i le taimi talafeagai.
Faitau le Mataupu Faavae ma Feagaiga 89. Mafaufau pe o le a se mea e mafai ona e faia e te malosi atili ai faaletino. Ia faaleleia lou ola maloloina e ala i le atiina ae ma amata se polokalama faifai pea o faamalosi tino, ma aoao e kuka ma ‘ai meaai e maua ai le ola maloloina.
Aoao e uiga i le tausia lelei o lavalava, e aofia ai pe faapefea ona tata, auli, ma faia ni suisuiga faigofie mo le faaleleia. Faaaoga ia tomai na e aoaoina i le tausia lelei o ou lavalava.
Ao oulua galulue ma lou tina, tinamatua, po o se tamaitai o la outou uarota po o le paranesi, ia e puemauina se tomai faatausiaiga na te aoao atu ia te oe.

O la’u galuega faatino o le:

O la’u fuafuaga e faia ai la’u galuega faatino o le:

Faamaoniga

Aso ua fuafua e faamaea ai

O la’u iloiloga o le galuega faatino e (ia aofia ai ou lagona ma pe ua faateleina faapefea lou malamalama i le poto):

Saini a se tasi o matua po o taitai

Aso

Aofai o itula na faaalu ai