O Filifiliga ma le Tali Atu mo A’u Lava

Ina filifili ia outou i le aso nei, po o ai tou te auauna i ai; … a o a’u nei ma lo’u aiga, matou te auauna ia Ieova (Iosua 24:15).

O le a ou filifilia le lelei mai le leaga ma o le a ou taliaina le avea o a’u faaiuga ma o’u tiutetauave.

O Mea Faatonuina e Fai Mo Le Tulaga Faatauaina

Fai ia uma mea faatonuina nei e tolu mo le tulaga faatauaina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

1. E mafai e se afafine o le Atua ona faia ni faaiuga poto ma foia faafitauli. Faitau le 1 Nifae 15:8; 2 Nifae 32:3; Alema 34:19–27; Eteru 2–3; ma le Mataupu Faavae ma Feagaiga 9:7–9. Mulimuli i se faatulagaga lelei o le suesue e le aunoa i tusitusiga paia ma tatalo ina ia maua ai se fesoasoani mo le faia o au lava faaiuga e pei o le filifilia o uo lelei, agalelei i isi, vave ala, po o isi foi faaiuga. Talanoa i se tasi o ou matua po o taitai pe na faapefea ona fesoasoani lou suesue e le aunoa i tusitusiga paia ma tatalo e te faia ai ni faaiuga sao.

2. Faitau le tamaitusi o le Mo Le Malosi o le Autalavou. Ia lisi i lau api o talaaga tulaga faatonuina taitasi o le amiotonu o loo otooto mai i le tusi, ma tusia ai pe aisea e taua ai le ola i na tulaga faatonuina. Faataitai ona ola ai tulaga tonu ua faatonuina, e ala i lou filifilia o ni tulaga se tolu e manaomia lou faaleleia atili. Atonu o le a e manao e te filifilia ma le faaeteete polokalama o le televise, musika, tusi, po o isi ala o faasalalauga, pe faaleleia foi le faiga o ou lavalava, o upu, po o le faamaoni foi. A maea le tolu vaiaso, ona faamatala lea o lou alualu i luma i lou aiga, lau vasega, po o se taitai.

3. O le faitalia, po o le tomai e filifili ai, o se tasi o meaalofa sili a le Atua i Ana fanau. Faitau e uiga i filifiliga o loo i le Iosua 24:15; 2 Nifae 2; ma le Mataupu Faavae ma Feagaiga 82:2–10. Ia talanoaina ma se tasi o ou matua po o se taitai, ia faamanuiaga ma tiutetauave e o faatasi ma le faitalia. Ia tusia i lau api o talaaga, lou malamalamaaga i le faitalia ma taunuuga o na filifiliga ma faatinoga.

Nisi Mea E Fai Mo Le Tulaga Faatauaina

Fai ia uma nisi mea se tolu mo le tulaga faatauaina. E mafai ona e filifilia mai i mataupu nei pe tusia ni au lava mea e fai e oo atu i le lua. E tatau ona faamaonia e se tasi o ou matua po o se taitai, mea na e tusi e oe lava ae e te le i amataina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

4. Faitau e uiga i le salamo i le Isaia 1:18; Alema 26:22; 34:30–35; Moronae 8:25–26; ma le Mataupu Faavae ma Feagaiga 19:15–20; 58:42–43. Ia tusia i lau api o talaaga pe o le a le uiga o le salamo, ia te oe lava ia. Aoao i le faagasologa o le salamo, tatalo mo se taitaiga, ma faaaoga mataupu faavae o le salamo i lou olaga.

5. O le a fesoasoani le Agaga Paia ina ia e faia filifiliga sao. Aoao atili e uiga i le Agaga Paia i le faitau ma talanoaina faatasi ma se tasi o ou matua, taitai, po o se uo, le Esekielu 36:26–27; Ioane 14:26; 16:13; Kalatia 5:22–25; 2 Nifae 32:5; Moronae 10:4–5; ma le Mataupu Faavae ma Feagaiga 11:12–14. Ona tusia lea i lau api o talaaga pe mafai faapefea ona fesoasoani le Agaga Paia ia te oe e fai faaiuga lelei i lou olaga i aso taitasi. Tatalo mo le mafutaga a le Agaga Paia ma ia e agavaa mo lea mafutaga.

6. Suesue i le autu a Tamaitai Talavou ma mea o loo aoao atu ai ia te oe pe o ai oe, pe o a mea e tatau ona e faia, ma pe aisea foi e tatau ai ona e faia. Ia lisi i lau api o talaaga mea o le a e faia i aso taitasi e tusa ai ma le faia faalelei o lavalava, tafaoga faamasani, ma ala o faasalalauga ina ia ola mama ai ma agavaa e ulu atu i le malumalu. Ia tusia i lau api o talaaga pe faapefea ona fesoasoani nei filifiliga e te tumau saoloto ai ma fiafia.

7. O le faia o filifiliga o se vaega lea o le fuafuaga a le Tama Faalelagi mo i tatou. Faitau le Mose 4:1–4; 7:32; ma le 2 Nifae 9:51. Ia atamalia se faatulagaga lelei o le puleaina o tupe, e ala lea i le faia o se paketi mo le teuina ma le faaaluina o au tupe, e aofia ai ma le totogiina o le sefuluai. Ia e ola ai i lau paketi lena ia le itiiti ifo i le tolu masina. Ia faatulaga lelei mea e ave i ai le faamuamua ia mafai ai ona e taulimaina muamua tulaga aupito taua e te manaomia a o le’i faamalieina ou manao i mea e te le o manaomia moni. Ia tusia i lau api o talaaga mea na e aoaoina ma pe faapefea i lou mulimuli i nei faatulagaga ona faamanuiaina ai pea lou olaga.

Ia Faatatau Ia Te Oe Lava Ia Mea E Fai Mo Le Tulaga Faatauaina

Galuega Faatino o le Tulaga Faatauaina

A uma ona e faia uma mea e ono e fai mo le tulaga faatauaina o filifiliga ma le tali atu mo a’u lava, ona amatalia loa lea o se galuega faatino o le a fesoasoani ia te oe e te faataunuuina ai mea sa e aoaoina. O se taumafaiga taua tele lea e tatau ona alu ai itula e le itiiti ifo i le sefulu e faamaea ai. Ia e saili ma le agaga tatalo mo le taitaiga a le Agaga Paia e te filifilia ai se galuega faatino e tele sona aoga.

Ia faamaonia e se tasi o ou matua po o se taitai le galuega faatino ae e te lei amataina. Ia e tusia foi se iloiloga pe a maea ona e faia. O nisi nei o manatu mo se galuega faatino o se tulaga faatauaina.

• Faaaoga le tusi Mo Le Malosi o le Autalavou ma i lalo o taitaiga a ou matua po o taitai, ia e faatulagaina pe auai foi i le faatinoina o se vaega e talanoaina se mataupu, se faaaliga ofu, po o se isi mea e fesoasoani ai ia te oe ma isi talavou ia ola ai i tulaga faatonuina a le Alii.

• I lalo o le taitaiga a ou matua po o taitai, ia e fesoasoani e fuafua ma taitai se siva a le autalavou po o se isi gaoioiga, e tulimata’ia ai faatonuga talafeagai o siva ma musika lelei, o moli, ma le siosiomaga.

• Toe iloilo lou faaaogaina o ala faasalalau ma tekinolosi. Ia amatalia ma faagaoioi se fuafuaga e taofia ai faasalalauga le talafeagai mai le ofi atu i totonu o lou aiga. Ia mautinoa o loo uunaia e lau fuafuaga le faaaogaina lelei o televise, ata tifaga, musika, komepiuta, Initoneti, telefoni feaveai, ma isi ala o faasalalauga i le aiga. Fetufaai atu i lou aiga ma isi ou manatu.

• Aoao i suisuiga faigofie ma tomai tau suisui mo le faaleleia o ofu, a o e taumafai e suia ou lavalava i tulaga faatonuina mo le faiga faalelei o ou lavalava.

• Filifili ina ia sili atu le faatulagaina lelei o mea e te faia i lou aiga, e ala i le faamaeaina o se galuega faatino faamama pe faatulaga sea galuega. Ia tusia i lau api o talaaga pe na faapefea ona fesoasoani lenei mea i isi vaega o lou olaga.

O la’u galuega faatino o le:

O la’u fuafuaga e faia ai la’u galuega faatino o le:

Faamaoniga

Aso ua fuafua e faamaea ai

O la’u iloiloga o le galuega faatino e (ia aofia ai ou lagona ma pe ua faateleina faapefea lou malamalama i filifiliga ma le tali atu mo [oe] lava):

Saini a se tasi o matua po o taitai

Aso

Aofai o itula na faaalu ai