O Le a Le Mea Ou te Faia Pe a Maea Lau Polokalama o le Alualu i Luma o le Tagata Lava Ia?

O le faamaeaina o le polokalama o le Alualu i Luma o le Tagata Lava Ia o se sitepu taua lea i le faamalosia o lo’u faatuatua ma le molimau ma saunia ai mo feagaiga o le malumalu. Ua uma ona e aoaoina le ala e faia ai ni tautinoga, faataunuuina, ma lipotia lou alualu i luma. E tatau ona faaauau ai pea lenei faatulagaga ao e tumau ai i le ala e agai atu i le malumalu ma faaauau ai pea e atiina ae ni uiga lea o le a fesoasoani ia te oe i lou olaga atoa. E mafai ona e alualu ai pea i luma i le mauaina o se [asoa] o le Pi Faamamaluina, pe e te toe amataina faalua le polokalama o le Alualu i Luma o le Tagata Lava Ia.

Mauaina o se [asoa o le] Pi Faamamaluina

O le asoa o le Pi Faamamaluina sa tuuina atu i aso ua mavae i tamaitai talavou o e na naunau e faia mea e sili atu nai lo mea e manaomia. Ina ia faaauau ai pea lou alualu i luma, e mafai ona e maua se asoa o le Pi Faamamaluina e o faatasi ma lau pine o le Aloaiaina o le Tulaga Faatamaitai Talavou. E mafai ona e maua se asoa o le Pi Faamamaluina pe a maea uma mea nei e manaomia:

1. Toe faitau le Tusi a Mamona. O se amioga masani o le suesue e le aunoa i tusitusiga paia o le a faamalosia ai lou faatuatua ma fesoasoani ia e mauaina se musumusuga patino ma taiala i lou olaga atoa. Afai e te faitau i le na o le lima minute i le aso, e mafai ona e faitauina atoa le Tusi a Mamona i le tasi le tausaga.

2. Auauna atu i isi mo le aofaiga e 40 itula. Pe a talafeagai ai, o nisi o nei itula e tatau ona aofia ai le fesoasoani atu i se isi tamaitai talavou i lana polokalama o le Alualu i Luma o le Tagata Lava Ia. E tatau ona faia i lalo o le taitaiga a le au peresitene o Tamaitai Talavou a le uarota po o le paranesi. Ao e fesoasoani atu i se isi tamaitai talavou, atonu e te manao:

   • Ia avea oe ma ana uo.

   • Ia avea oe ma se faataitaiga o se afafine amiotonu o le Atua.

   • Faamalosiau ia te ia e galulue ma ona matua i le filifilia o mea e fai ma galuega faatino mo tulaga faatauaina.

   • Fesoasoani ia te ia e faamaea mea e fai ma galuega faatino mo tulaga faatauaina.

   • Fesoasoani i ai i le tusia ma teu faamaumauga o mea e fai ma galuega faatino mo tulaga faatauaina.

   • Fesoasoani i ai ia malamalama i mataupu faavae o le talalelei o loo aoao mai i mea e fai ma galuega faatino mo tulaga faatauaina.

   • Faamalosiau ia te ia e faitau le Tusi a Mamona, ma talatalanoa i mea o loo ia faitauina.

   • Faamalosiau i ai e fetufaai ma lona aiga i mea e fai ma galuega faatino mo tulaga faatauaina.

Toe Amata le Polokalama o le Alualu i Luma o le Tagata Lava Ia

E mafai ona e toe amataina le polokalama atoa o le Alualu i Luma o le Tagata Lava Ia ma maua se asoa lona lua o le Aloaiaina o le Tulaga Faatamaitai Talavou.