Galuega Lelei

O le mea lea ia faapea ona pupula atu ai lo outou malamalama i luma o lenei nuu, ina ia latou iloa a outou galuega lelei ma vivii atu ai i lo outou Tama o i le lagi (3Nifae 12:16).

O le a ou fesoasoani i isi ma atiina ae le malo e ala i galuega amiotonu.

O Mea Faatonuina e Fai Mo Le Tulaga Faatauaina

Fai ia uma mea faatonuina nei e tolu mo le tulaga faatauaina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

Aoao pe aisea e avea ai le auauna atu ma mataupu faavae taua o le talalelei. Faitau le Mataio 5:13–16; 25:34–40; Kalatia 6:9–10; Iakopo 1:22–27; Mosaea 2:17; 4:26; ma le 3 Nifae 13:1–4. E masani ona tuuina mai e isi ni auaunaga ae e te le iloa, e pei o le saunia o se meaai, faitau atu o tusi pe ua’i atu foi i fanau iti, suisui o ofu masaesae, pe fesoasoani foi i se uso po o se tuagane. Ia tusia i lau tusi talaaga mo ni vaiaso se lua, ni galuega auauna atu e le leoa, e fai e tagata o lou aiga po o nisi foi. Ia e faailoa atu a latou auaunaga i se ala taua ma le lelei.
O le auauna atu o se mataupu faavae taua lea o le olaga faaleaiga. Fesoasoani e fuafua meaai a lo outou aiga, alu e aumai meaai, ma saunia se vaega o a outou meaai mo le lua vaiaso. O le taimi foi lena, ia e taumafai e faapotopoto lo outou aiga e aai faatasi. Lipoti i la outou vasega mea sa e aoaoina.
Faitau le Mosaea 18:7–10, ona e tusia lea i lau api o talaaga ni auala se tolu e mafai ona e faamafanafana ai i isi, pe fesoasoani ai foi e tauamo faatasi ma i latou a latou avega. Fai mea na e tusia i lau lisi, ona e faamatalaina lea i se tasi o lo outou aiga po o se taitai le mea na e oo i ai, ma pe na faapefea foi ona suia ou uiga faaalia ma lou malamalamaaga.

Nisi Mea E Fai Mo Le Tulaga Faatauaina

Fai ia uma nisi mea se tolu mo le tulaga faatauaina. E mafai ona e filifilia mai i mataupu nei pe tusia ni au lava mea e fai e oo atu i le lua. E tatau ona faamaonia e se tasi o ou matua po o se taitai, mea na e tusi e oe lava ae e te le i amataina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

Aoao atu se lesona e uiga i auaunaga i se afiafi faaleaiga po o se isi foi nofoaga. Faaaoga ata, musika, faataitaiga, po o faatinoga i lau lesona. Atonu e te fia faaaogaina lau tusi lesona O Le Aoao Atua, E Leai Se Isi Valaauga e Sili Ai e fai ma au punaoa.
Faitau le Mataupu Faavae ma Feagaiga 58:26–28. Mafaufau i auala e mafai ai e se tamaitai talavou, faapea foi se ava ma se tina, ona faaaoga lenei mau i lona aiga. Ia amatalia se faatulagaga o le auauna atu i lou olaga, e ala i le filifilia o se tagata o lou aiga e mafai ona e fesoasoani i ai. Ia e auauna atu i lena tagata ia le itiiti ifo i le tasi le masina. Ia tusia i lau api o talaaga mea na e faatinoina ma ou lagona e uiga i lea mea na e faia ma pe na faapefea ona faaleleia ai le lua sootaga ma lena tagata.
Ia le itiiti ifo o le tolu itula e te faaaluina e te auauna atu ai i nisi tagata tou te le aiga. Fesili i le peresitene o le Aualofa o la outou paranesi po o le uarota po o se taitai foi o le nuu mo ni fautuaga e faatatau i galuega auauna atu. Mo se faataitaiga, e mafai ona e tausia ma vaaia tamaiti a o malaga matua i le malumalu; alu e faaputuputu, gaosia, pe toe faalelei ni meataalo po o taaloga mo se vasega pepe; ia e taliaina se tofiga e faamama le falelotu; pe alu e fai feau mo se tagata ua nofofale ua le mafai ona toe fealuai pe faitau i ai ni tusi, po o nisi foi tagata o loo manaomia le fesoasoani. Ia tusia i lau api o talaaga ia lagona o le tagata na e auauna i ai ma ni sini talafeagai mo ni avanoa i le lumanai e auauna atu ai.
E ala atu i au galuega lelei, o le a vaai isi i au faataitaiga ma mananao e fia iloa atili e uiga i le talalelei. Tatalo mo se aafiaga faafaifeautalai. Faitau le Mataio 24:14; 28:19; ma le Mataupu Faavae ma Feagaiga 8:81. Valaaulia se uo e le auai i le Ekalesia po o se tasi foi ua le toaga mai lua te o i se sauniga faale-Ekalesia po o se gaoioiga. Ia faafeiloai atu lau uo i isi ma ia mautinoa ua faaaofia ai o ia. Fetufaai atu i ai lau molimau e uiga i le talalelei ma valaaulia o ia e toe sau.

Ia Faatatau Ia Te Oe Lava Ia Mea E Fai Mo Le Tulaga Faatauaina

Galuega Faatino o le Tulaga Faatauaina

A uma ona e faia uma mea e ono e fai mo le tulaga faatauaina o galuega lelei, ona amatalia loa lea o se galuega faatino o le a fesoasoani ia te oe e te faataunuuina ai mea sa e aoaoina. O se taumafaiga taua tele lea e tatau ona alu ai itula e le itiiti ifo i le sefulu e faamaea ai. Ia e saili ma le agaga tatalo mo le taitaiga a le Agaga Paia e te filifilia ai se galuega faatino e tele sona aoga.

Ia faamaonia e se tasi o ou matua po o se taitai le galuega faatino ae e te lei amataina. Ia e tusia foi se iloiloga pe a maea ona e faia. O nisi nei o manatu mo se galuega faatino o se tulaga faatauaina.

Fesoasoani ma auai i le faatinoina o se galuega e faamama ai pe faamatagofie ai lo outou nuu.
Sauniuni e avea ma se tausiaiga i le faaputuputuina lea o fua o kuka, faia o faatauga o meaai, ma saunia meaai mo lo outou aiga.
Galulue ma se tagata o lo outou aiga e ao mai igoa o nisi ua maliliu o le tou aiga ae lei avea ma tagata o le Ekalesia. Saili o latou aso fanau ma aso na maliliu ai ma saunia e ave o latou igoa i le malumalu. Fesoasoani i le fuafuaina o se malaga i le malumalu ma faia papatisoga mo na tagata o lou aiga.
Ia e saunia e auauna atu i isi e ala i lou aoaoina o se tomai e faaaoga i tulaga mo faalavelave faafuasei, e pei o fesoasoani muamua, faamanavaina o se tagata, po o tomai e faaaoga i le laveaiina o ola.
Auauna atu i isi. Ofo atu e galue fua i lo outou nuu, faaputuputu ni mea e faafetaiaia ai tulaga manaomia e tagata, ia tele se taimi e faaaoga e fesoasoani ai i se tamaitiiti po o se matua tausi, pe faiaoga fesoasoani foi i se aoga po o lo outou nuu.

O la’u galuega faatino o le:

O la’u fuafuaga e faia ai la’u galuega faatino o le:

Faamaoniga

Aso ua fuafua e faamaea ai

O la’u iloiloga o le galuega faatino e (ia aofia ai ou lagona ma pe ua faateleina faapefea lou malamalama i galuega lelei):

Saini a se tasi o matua po o taitai

Aso

Aofai o itula na faaalu ai