Amio Sa’o

Seia oo lava i lou oti, ou te le faateaina lava la’u amio sa’o (Iopu 27:5).

O le a ou lototele e fai mea ou te faia ina ia ogatasi ma lo’u malamalama i le sa’o ma le sese.

O Mea Faatonuina e Fai Mo Le Tulaga Faatauaina

Fai ia uma mea faatonuina nei e tolu mo le tulaga faatauaina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

O le amio sa’o o le naunautaiga ma le manao lea e ola i o tatou talitonuga ma tulaga faatonuina. Faitau le Moronae 10:30–33 ma mafaufau i le uiga o le “ia teena e outou le amioletonu uma.” Faitau le tamaitusi Mo Le Malosi o le Autalavou. Mafaufau i le eseese o tulaga faatonuina a le Alii mai tulaga o le lalolagi. Ia e tusia i lau api o talaaga tulaga talafeagai mo amioga, o ou ofu, ma talanoaga, faapea foi ma tusi, tifaga, televise, Initoneti, musika, telefoni feaveai, ma nisi faasalalauga. Ia e tusia ai foi lau fuafuaga e faatumauina lou ola mama ma le agavaa e ulu atu i le malumalu. A maea ona e tausia ou tulaga ia le itiiti ifo ma se masina, ona e tusia lea o ou lagona i lau api o talaaga ma faaauau pea ona tausisia lau tautinoga.
Ia e faia sau lava iloiloga mo lou lava amio sa’o. Ia e fesili ifo ia te oe lava i fesili nei: Pe ou te aloese ea mai le faitala, faia o talatausua e le talafeagai, palauvale ma upu masoa, ma le manatu faatauvaa i mea paia? Pe o o’u sa’o atoatoa ea, ola mama, faamaoni, faatuatuaina, ma talitonuina au i au meaaoga ma isi gaoioiga? Tatalo i aso taitasi mo le malosi ma mo le taitaiga a le Agaga Paia ia fesoasoani ia e ola i le amio sa’o. Ia tusia i lau api o talaaga ia mea e mafai ona e faia e faaleleia ai lau lava amio sa’o ma ia le itiiti ifo i le tasi se amio masani fou e te manao e atiina ae.
O le Faaola o se faataitaiga sili lea o le amio sa’o; Na ia faataunuuina le mea na Ia folafola atu i le Tama o le a Ia faia. Faitau le 3 Nifae 11:10–11. Suesue i olaga o nisi o tagata i tusitusiga paia o e na soifua i le amio sa’o. Faitau le Kenese 39; le tusi a Eseta; Iopu 2:3; 27:3–6; Tanielu 3 ma le 6; Galuega 26; Mataupu Faavae ma Feagaiga 124:15; ma le Talafaasolopito—Iosefa Samita 2:21–25. Ia tusi i lau api o talaaga ala na faaalia ai e nei tagata le amio sa’o. Mafaufau i se taimi na e maua ai le lototele e faaalia ai le amio sa’o, aemaise o le taimi sa lei faigofie pe amanaiaina ai. Faamatala le mea na e oo i ai ma ou lagona i se sauniga molimau po o se lesona pe faamatala foi i se tasi o matua po o se taitai.

Nisi Mea E Fai Mo Le Tulaga Faatauaina

Fai ia uma nisi mea se tolu mo le tulaga faatauaina. E mafai ona e filifilia mai i mataupu nei pe tusia ni au lava mea e fai e oo atu i le lua. E tatau ona faamaonia e se tasi o ou matua po o se taitai, mea na e tusi e oe lava ae e te le i amataina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

Vaai le uiga o le upu amio sa’o i se lomifefiloi. Faatalanoa lou tina, tinamatua, po o se isi tamaitai e te faaaloalogia e uiga i lona malamalamaaga i le faaaogaina o le upu. Fai se lisi o auala e mafai ona e faaogatasia ai au amioga ma lou malamalama i le sao ma le sese ma tusi i lau api o talaaga le uiga o le amio sa’o ia te oe lava ia.
Aoao e uiga i le tu atu e fai ma molimau. Faitau le Mosaea 18:9. Ona e tusia lea i lau api o talaaga pe mafai faapefea e oe lava ia ona e “tu atu [e fai ma molimau] a le Atua i aso uma ma mea uma, atoa ma nuu uma”. Filifili sau lava amio e te manao e faaleleia ina ia mafai ai ona avea oe ma se faataitaiga e sili atu ona lelei. Ia atiina ae le amio sa’o i lou olaga a o e faataitaia lau amio fou mo vaiaso e tolu. Ia tusia le tulaga o lou alualu i luma i lau api o talaaga.
O le ola i le tulafono o le anapogi o se avanoa lea e faataitai ai le amio sa’o. I se Aso Sa anapogi faatulagaina, aua e te ai pe inu i aiga sosoo e lua ma ia fesoasoani i lou aiga i le totogiina o le taulaga anapogi. Ia i ai se faamoemoega patino i lou mafaufau a o e anapogi. E mafai ona e anapogi mo se uo o ma’i, ia faatoilaloina sau amio masani leaga, ia maua se faamanuiaga faapitoa mo oe lava po o se isi tagata, pe tuuina atu ai foi le faafetai. Ia amata ma faaiu lau anapogi i se tatalo.
Fai se lisi o mataupu, o mea ua lolo atu i ai, ma faafitauli ua faavaivaia ai le aiga. Faitau le savali a le Au Peresitene Sili o loo i le itulau 1 o le tusi lenei, “O Le Aiga: O Se Folafolaga i le Lalolagi” (tagai itulau 101), ma le vaega i aiga i le tusi Mo Le Malosi o le Autalavou. Ona saili lea i mekasini a le Ekalesia ia fautuaga a i latou na tatou siilima i ai e avea o ni perofeta, tagatavaai ma talifaaaliga. Ia tusi i lau api o talaaga lau fuafuaga e faamalosia ai lou aiga o loo i ai nei ma tulaga taua ma mea e masani ai e te manao e faatulaga mo lou aiga i le lumanai.

Ia Faatatau Ia Te Oe Lava Ia Mea E Fai Mo Le Tulaga Faatauaina

Galuega Faatino o le Tulaga Faatauaina

A uma ona e faia uma mea e ono e fai mo le tulaga faatauaina o le amio sa’o, ona amatalia loa lea o se galuega faatino o le a fesoasoani ia te oe e te faataunuuina ai mea sa e aoaoina. O se taumafaiga taua tele lea e tatau ona alu ai itula e le itiiti ifo i le sefulu e faamaea ai. Ia e saili ma le agaga tatalo mo le taitaiga a le Agaga Paia e te filifilia ai se galuega faatino e tele sona aoga.

Ia faamaonia e se tasi o ou matua po o se taitai le galuega faatino ae e te lei amataina. Ia e tusia foi se iloiloga pe a maea ona e faia. O nisi nei o manatu mo se galuega faatino o se tulaga faatauaina.

Tusi faamaumau ni auala na faaalia ai e tagata o lou aiga le uiga taua o le amio sa’o i o latou olaga.
O le i ai o le amio sa’o o lona uiga o le tausia lea o au tautinoga. Ia amatalia ma tausia au tautinoga i isi pe a e auai ma avea oe o se tasi o se ‘au po o se faalapotopotoga po o se tulaga o se taitai i lau aoga po o lou nuu.
Faaaoga le 1 Timoteo 4:12 e fai ma ou taiala, ona e faatulagaina lea ma fai se gaoioiga e fesoasoani ai ia te oe, ina ia e ola “o se faataitaiga o tagata e talitonu.”
O le osia ma tausia o feagaiga o le malumalu e manaomia ai le amio sa’o. Sauniuni e osia feagaiga faalemalumalu i lou faia lea ma faaaoga se ofu e ogatasi ma tulaga faatonuina o le faia lelei o lavalava, e pei ona faamalamalama mai i le tamaitusi o le Mo Le Malosi o le Autalavou faapea foi afioga tulei a perofeta soifua.
I lauga na tuuina mai e le Au Pulega Aoao, ia suesue atili i autu o le amio sa’o ma le faamaoni. Aoao pe aisea ua matua taua ai nei mataupu faavae mo lou fiafia ma au sauniuniga mo le malumalu. Fai se mea (e pei o se ata, se tusi o upusii, po o se kolose) e faamanatu atu ai ia te oe i aso uma lau tautinoga ina ia e faamaoni ma sa’o i taimi uma ma ia iloaina lou lava amio sa’o.

O la’u galuega faatino o le:

O la’u fuafuaga e faia ai la’u galuega faatino o le:

Faamaoniga

Aso ua fuafua e faamaea ai

O la’u iloiloga o le galuega faatino e (ia aofia ai ou lagona ma pe ua faateleina faapefea lou malamalama i le amio sa’o):

Saini a se tasi o matua po o taitai

Aso

Aofai o itula na faaalu ai