1 Ya yibi buch u tomuren ni kug athapeg ni nggu nang fapinʼen ni ke guy e chitamag, mab mich u wunʼug ni ra ayuwegeg Somoel nggu nang, ere napʼan ni kug paer nga butʼ ni gube athapeg e pinnʼey u gumʼirchaʼeg me fekeg fare Kan ni Thothup rokʼ Somoel, arragon, i fekeg iyaen ngab burey ni rib tolang, ni dawor gguy biʼid, ma ku dawor guyitʼ biʼid.

2 Me gaʼar fare Kan ni Thothup ngog: Musap, mang e ga baʼadag?

3 Mu gguʼar: Gu baʼadag ni ngug guy e pinʼen ni ke guy e chitamag.

4 Ma ki gaʼar fare Kan ni Thothup ngog: Be mich u wunʼum ni ke guy e chitamam fare ke gakʼiy niki i weliy morngaʼagen?

5 Mu gguʼar: Arragon, gur e gamnang nib mich u wunʼug urngin e thin rokʼ e chitamag.

6 Ma napʼan ni kug muʼ i yoeg e pi thin ney, me tolul fare Kan ni Thothup ni rib gaaʼ laman, ni be gaʼar: Soerokʼ Somoel, ni fare Got ni thʼabi tolang; ya ire Got ko fayleng ni poloʼ, arragon, ko gubin banʼen. Ma nge felʼ waʼatham gur, Nephi, ni bachan e be mich u wunʼum ngakʼ fachaʼ ni Fak fare Got ni thʼabi tolang; ere ngam guy e pinʼen ni gabe athapeg ni ngam guy.

7 Ma musap, pinnʼey e ngan dag ngom ni fan nga ba pow, u tomuren ni kam guy fare ke gakʼiy ni bay waʼamngin ni ke riiʼ e chitamam lamen, ma bay kum guy beeʼ nib moʼon ni bay yib u tharmiy nga butʼ, niʼir e bay muguy; me tomuren ni kam guy mag falʼeg babyoren niʼir fak Got.

8 Me yibi buch ni gaʼar fare Kan ni Thothup ngog: Musap! Mug sap mug guy fare ke gakʼiy; ni boed rogon fare ke gakʼiy ni ke guy e chitamag; ma usun e rib thumʼ nga wuruʼ fini felʼ, arragon, rib felʼ nga urngin mit e usun; ma fini wechwech e rib gel e wechwech riy ko snow.

9 Me yibi buch u tomuren ni kug guy fare ke gakʼiy, Mug gaʼar ngakʼ fare Kan ni Thothup: Kug nang ni gur e kam dag ngog fare ke gakʼiy niʼir e thʼabi felʼ u fithikʼ gubin mit.

10 Me gaʼar ngog: Mang e gabe athapeg?

11 Mu gguʼar ngakʼ: Nggu nang ko mang e be yipʼ fan—ya kug non ngakʼ ni boed beeʼ ni be non; ya kug guy ni boed yaʼan beeʼ nib moʼon; ma yug aram rogon, ma gumnang niʼir fare Kan ni Thothup rokʼ Somoel; me non ngog ni boed ruw niiʼ ni yow be non.

12 Me yibi buch ni gaʼar ngog: Musap! Mug sap ni gowa nggu sap ngakʼ, ma dag guy; ya ke yaen ke chuw ko gin ni gubay riy.

13 Me yibi buch nug sap mug guy fare nam nib gaaʼ nu Jerusalem, nge ku boech e nam. Mug guy fare nam nu Nazareth; ma lan e re nam nem nu Nazareth e gguy beeʼ nib rugod riy ni dawori nang e pumoʼon, ma rib pidorang mab miraʼ.

14 Me yibi buch nug guy e tharmiy ni ke mab; me yib ba angel nga butʼ nge yibi sakʼiy nga pʼoewcheg; me gaʼar ngog: Nephi, mang e gabe guy?

15 Mu gguʼar ngakʼ: Ba rugod niʼir e thʼabi pidorang u fithikʼ urngin e pi rugod.

16 Me gaʼar ngog: Gamnang rogon e adag rokʼ Got?

17 Mu gguʼar ngakʼ: Gumnang ni baʼadag e bitir rokʼ ni gubin; machane, dagnang fan gubin banʼen.

18 Me gaʼar ngog: Musap, fare rugod ni dawori nang e pumoʼon ni kam guy e ire chaʼ ni chitiningin fachaʼ ni Fak Got, ni bay doewngin.

19 Me yibi buch nug guy ni fare Kan ni Thothup e kefek fare ppin nga palog; me tomuren ni kefek fare Kan ni Thothup fare ppin nga palog u bingyalʼ i banʼen, me non fare angel ngog, ni gaʼar: Musap!

20 Mug sap mug guy bayay fare rugod ni dawori nang e pumoʼon, ni ke dibey bbitir nga paʼ.

21 Me gaʼar fare angel ngog: Amuguy fare Saaf ku Got, arragon, rriyulʼ niʼir fare Tir ni Fak fachaʼ ni Chitamangiy ni Gubinfen! Kamnang fan fare ke gakʼiy ni guy e chitamam?

22 Mug fulweg lungun ni gguʼar: Arragon, ri ir fare adag rokʼ Got, ni ke yung nga langgin gumʼirchaʼen e pi bitir ni fak e gidiiʼ; ere, ri ire thʼabi athap u fithikʼ urngin mit banʼen.

23 Me non ngog, ni gaʼar: Arragon, ma ri ire ma yibnag e falfalaenʼ ko yaʼel.

24 Me tomuren ni ke yoeg e pi thin ney, me gaʼar ngog: Musap! Mug sap, mug guy fachaʼ ni fak Got nibe yaen u fithikʼ e pi bitir ni fak e gidiiʼ; mug guy ni boʼor i yaed e aw nga butʼ nga charen e rifrif rokʼ nga ur liyoer gaed ngakʼ.

25 Me yibi buch nug guy ni fare lay i wasey, niʼir faram e guy e chitamag, ni ire thin rokʼ Got, nib sor iyaen ko fare alublub i raen, ara ko fare ke gakʼiy ko yafos; ni re raen nem e be yipʼ fan e adag rokʼ Got; ma kug guy ni fare ke gakʼiy ko yafos e ku be yipʼ fan e adag rokʼ Got.

26 Ma fare angel e ki gaʼar ngog bayay: Musap ngam guy rogon e adag rokʼ Got!

27 Mug sap mug guy fare Tabiyul ko fayleng, niʼir faram e ke weliy e chitamag morngaʼagen; ma kug guy fare profet niʼir e bayi mʼon nge yarmiy woʼen. Ma fare Saaf ku Got e yaen ngakʼ nge tawfe nag; me tomuren ni kan tawfe nag, mug guy e tharmiy ni ke mab, me yib fare Kan ni Thothup u tharmiy nga butʼ nge yibi aw nga dakean ni boed yaʼan ba buloegol.

28 Ma kug guy ni iyaen nibe pigpig ko gidiiʼ, nib gaaʼ angin mab mangingʼ ma rib tamilang; me moʼolung e gidiiʼ nib yoʼor nga taʼabang ngar motoyil gaed ngakʼ; mu kug guy ni kur chuweged u fithikʼraed.

29 Ma kug guy ragag nge lʼagruw niiʼ ni yaed be leak. Me yibi buch ni chuwegraed fare Kan ni Thothup u pʼoewcheg, ma dakug guyraed.

30 Me yibi buch ni non fare angel ngog bayay, ni gaʼar: Musap! Mug sap, mug guy e tharmiy ni ke mab bayay, mug guy e angel ni karbaed ngakʼ e pibitir ni fak e gidiiʼ; mar pigpig gaed ngoraed.

31 Ma kinon ngog bayay ni gaʼar: Musap! Mug sap, mug guy fare Saaf ku Got nibe yaen u fithikʼ e pibitir ni fak e gidiiʼ. Mug guy yu ulung i gidiiʼ ni kar mʼar gaed, ma kur gafgow gaed ko urngin mit e mʼar, nge pi moʼoniyanʼ nge yaʼel ni kireb ni ke gabliyraed; ireray gubin e pinʼen ni yoeg me dag fare angel ngog. Ma kur gol gaed u dakean gelingin fare Saaf ku Got; ma fapi moʼoniyanʼ nge yaʼel ni kireb e ni chuweg roraed.

32 Me yibi buch niki non fare angel ngog, ni gaʼar: Musap! Mug sap mug guy fare Saaf ku Got, ni fapi gidiiʼ e kar feked; arragon, fare Tir ni fak fare Got ni manemus e pi gidiiʼ nu fayleng e ra pufthin niged; nug gguy mug yoloey chipin.

33 Me Gag, Nephi, e gguy ni kan tining ngalang u kuruth min liiʼ ngemʼ ni bachan e pi denen ko gidiiʼ nu fayleng.

34 Ma tomuren ni kan liiʼ ngemʼ mug guy fapi yu ulung i gidiiʼ nu fayleng, ni kar kunuyed yaed nga taʼabang ni ngar cham gaed e pi apostle rokʼ fare Saaf; ya ireram faragag nge lʼagruw niiʼ ni piningraed fare angel rokʼ Somoel.

35 Ma fare ulung nu fayleng e mukun nga taʼabang; mug guy ni yaed bay u langgin ba naʼun ni rib gaaʼ nib gaaʼ, ni boed fare naʼun ni guy fachaʼ ni chitamag. Me non fare angel rokʼ Somoel ngog, ni gaʼar: Musap ngam guy fare fayleng nge llowaenʼ riy; arragon, mag guy fapi gidiiʼ ku Israel ni kar mukun gaed nga taʼabang ni ngar cham gaed fare ragag nge lʼagruw i apostle rokʼ fare Saaf.

36 Me yibi buch ni kug guy mug yoloey chipin, ni fare naʼun ni rib gaaʼ nib gaaʼ e ir fare ufʼuf nu fayleng; ni puth, ma puth ni tay e rib almarin. Ma fare angel rokʼ Somoel e kinon ngog bayay, ni gaʼar: Ere aray rogon e mogothgoth ni ra aw ko gubin e pi nam, mfen, thin, nge gidiiʼ, ni yaedra cham nge lʼagruw i apostle rokʼ fare Saaf.