1 En dit het gebeur dat die engel vir my gesê het: Kyk, en aanskou jou saad en ook die saad van jou broers. En ek het gekyk, en die land van belofte gesien. En ek het skares mense gesien, ja, en wel as’t ware in getal so veel soos die sand van die see.

2 En dit het gebeur dat ek menigtes bymekaar versamel gesien het om oorlog te voer, die een teen die ander; en ek het oorloë gesien, en gerugte van oorloë, en groot slagtinge met die swaard onder my volk.

3 En dit het gebeur dat ek baie geslagte sien verbygaan het, volgens die verloop van oorloë en twiste in die land; en ek het baie stede gesien, ja, en wel dat ek hulle nie kon tel nie.

4 En dit het gebeur dat ek ’n miswolk van donkerheid op die aangesig van die land van belofte gesien het; en ek het weerligte gesien, en ek het donderslae gehoor, en aardbewings, en allerhande rumoere; en ek het die aarde en die rotse gesien, dat hulle skeur; en ek het berge in stukke sien tuimel; en ek het die vlaktes van die aarde gesien, dat hulle verbrokkel was; en ek het baie stede gesien dat hulle weggesink het; en ek het baie gesien dat hulle met vuur verbrand was; en ek het baie gesien wat op die aarde neergeval het vanweë die skudding daarvan.

5 En dit het gebeur nadat ek hierdie dinge gesien het, het ek die mis van die duisternis gesien, dat dit vanaf die aangesig van die aarde verbygegaan het; en kyk, ek het menigtes gesien wat nie geval het vanweë die groot en verskriklike oordele van die Here nie.

6 En ek het die hemele sien oopgaan, en die Lam van God neerdaal uit die hemel; en Hy het neergedaal en Homself getoon aan hulle.

7 En ek het ook gesien en getuienis gelewer dat die Heilige Gees op twaalf ander neergedaal het; en hulle is deur God geordineer en gekies.

8 En die engel het met my gespreek, en gesê: Aanskou die twaalf dissipels van die Lam wat gekies is om jou saad te dien.

9 En hy het vir my gesê: Jy onthou die twaalf apostels van die Lam? Kyk, dit is hulle wat die twaalf stamme van Israel sal oordeel; daarom sal die twaalf dienaars van jou saad deur hulle geoordeel word; want julle is van die huis van Israel.

10 En hierdie twaalf dienaars wat jy sien, sal jou saad oordeel. En kyk, hulle is regverdig vir ewig; want vanweë hul geloof in die Lam van God is hulle kleding wit gemaak in sy bloed.

11 En die engel het vir my gesê: Kyk! En ek het gekyk en gesien dat drie geslagte heengaan in regverdigheid; en hulle kleding was wit soos dié van die Lam van God. En die engel het vir my gesê: Hulle word wit gemaak in die bloed van die Lam, vanweë hulle geloof in Hom.

12 En ek, Nefi, het ook baie van die vierde geslag gesien wat heengegaan het in regverdigheid.

13 En dit het gebeur dat ek die menigtes van die aarde versamel gesien het.

14 En die engel het vir my gesê: Aanskou jou saad, en ook die saad van jou broers.

15 En dit het gebeur dat ek gekyk en die mense van my saad gesien het, wat versamel het in menigtes, teenoor die saad van my broers; en hulle het versamel om oorlog te maak.

16 En die engel het met my gespreek, en gesê: Aanskou die fontein van vieslike water wat jou vader gesien het; ja, en wel die rivier waarvan hy gespreek het; en die dieptes daarvan is die dieptes van die hel.

17 En die miswolke van duisternis is die versoekings van die duiwel, wat die oë verblind, en die harte van die kinders van mense verhard, en hulle weglei in breë weë, dat hulle vergaan en verlore is.

18 En die groot en ruim gebou, wat jou vader gesien het, is ydele inbeeldinge en die hoogmoed van die kinders van mense. En ’n groot en ’n verskriklike kloof skei hulle; ja, en wel die woord van geregtigheid van die Ewige God, en die Messias wat die Lam van God is, van wie die Heilige Gees getuienis lewer, vanaf die begin van die wêreld tot nou toe, en van nou af en vir ewig.

19 En terwyl die engel hierdie woorde gespreek het, het ek gekyk en gesien dat die saad van my broers geveg het teen my saad, volgens die woord van die engel; en vanweë die hoogmoed van my saad, en die versoekinge van die duiwel, het ek gesien dat my broers se saad die volk van my saad oorweldig het.

20 En dit het gebeur dat ek gekyk, en gesien het dat die volk van my broers se saad my saad oorweldig het; en hulle het uitgegaan in menigtes oor die aangesig van die land.

21 En ek het hulle in skares sien versamel; en ek het oorloë en gerugte van oorloë onder hulle gesien; en in oorloë en in gerugte van oorloë het ek baie geslagte sien heengaan.

22 En die engel het vir my gesê: Kyk hulle sal kwyn in ongeloof.

23 En dit het gebeur dat ek gesien het, dat nadat hulle gekwyn het in ongeloof, hulle ’n donker, en ’n verfoeilike en ’n vieslike volk geword het, vol luiheid en allerlei gruwels.