1 Me yibi buch u tomuren ni Gag, Nephi, e ke fekeg fare Kan ni Thothup, ma kug guy urngin e pinnʼey, mug sul ko tent rokʼ e chitamag.

2 Me yibi buch ni gag e gguy walageg, ni yaed be leleʼeg morngaʼagen fapinʼen ni ke weliy e chitamag ngoraed.

3 Ya rib yoʼor bogi banʼen ni ke weliy ngoraed, ni rib moʼomawʼ ni ngan nang fan, ma kemus ni faʼanra ning beeʼ e ayuw riy ngakʼ Somoel; ma yaed e kar ʼelʼel niged gumʼirchaʼraed, ere dar sap gaed ngakʼ Somoel ni boed rogon ni thingar rinʼed.

4 Ere chiney e gag, Nephi, e ke kireb anʼug ni bachan e kar ʼelʼel niged gumʼirchaʼraed, nge ku, bachan fa pinʼen ni kug guy, ma kug nang ni dabiyog i tileg ni dabi yib ni bachan e pi denen rokʼ e gidiiʼ.

5 Me yibi buch ni kug waer ni bachan e pi kirbaenʼ rog, ya gube lemnag ni tirog e kirbaenʼ e thʼabi gel u fithikʼ e pi kirbaenʼ, ni bachan e gafgow ni ke tay e gidiiʼ rog, ya kug guy ni kar mul gaed.

6 Me yibi buch u tomuren ni ke sul gelingig ngog mug non ngakʼ piwalageg, ni gube athapeg ni gomanga gunang tapgin e maleʼeg thin roraed.

7 Mar gaʼar gaed: Musap, dagur nanged fan e fapi thin ni ke weliy e chitamangdaed u morngaʼagen papaʼngin fare ke gakʼiy ni olive, nge ku aram rogon nga morngaʼagen fapi Gentiles.

8 Mug gaʼar ngoraed: Kam deʼeriyed Somoel riy?

9 Mar gaʼar gaed ngog: dawor; ya Somoel e darma tamilang nagmaed ko pinnʼir.

10 Ere, gguʼar ngoraed: Mang e rinʼ ni daryog ni ngam fol gaed ko pi motochiyel rokʼ Somoel? Buʼuw rogon ni ngam paged gimed ngam mʼaed ni bachan e ʼelʼel u gumʼirchaʼmed?

11 Dakir yib ngaenʼmed fapinʼen ni ke yoeg Somoel ni gaʼar?—Faʼanra dab mu ʼelʼel niged gumʼirchaʼmed, ma ngam ninged ngog u fithikʼ e mich, nibe mich u wunʼmed ni rayog ngomed, ma gimed be fol ko pi motochiyel rog, me ere rayog ni ngan guy rogon ni ngam nanged fan e pinnʼey.

12 Ere musap gaed, gu be yoeg ngomed, ni fapi gidiiʼ ku Israel e kan taʼareb nag rograed nga bake gakʼiy ni olive, u dakean fare Kan ni Thothup rokʼ Somoel ni bay rokʼ e chitamangdaed; ere musap gaed, gathi kad chuw gaed ko fapi gidiiʼ ku Israel, ma gathi gadaed boech fapi gidiiʼ ku Israel?

13 Ere chiney, pinʼen nibe yipʼ e chitamangdaed fan u morngaʼagen i puthuy fayupaʼ i gakʼiy u fithikʼ e fapi Gentiles ni poloʼ, e, u napʼan e tin tomur e rran, ko ngiyalʼ ni pifakdaed e kar pired ni kar palog gaed ko mich, arragon, nib yoʼor e duw nʼumngin i napʼan, nge mfen nib yoʼor nga tomuren fare Messiah ni yibi mʼug ni bay doewngin ngakʼ e gidiiʼ, ma aram e bay fini yib fare gospel nib gaaʼ angin ngakʼ fapi Gentiles, me yaen rokʼ fapi Gentiles ngakʼ e piʼin ni ke magaey u pifakdaed—

14 Ma re rran nem ra nang riy e piʼin ni ke magaey u pifakdaed ni rabaed rokʼ fapi gidiiʼ ku Israel, mar nanged ni yaed fapi gidiiʼ rokʼ Somoel ni falʼeg ba mʼag nga thilraed; ma aram mi yaedra nang morngaʼagen e llowaenʼ rokʼ e pi chitamangraed ni kakrom, nge ku aram rogon nge llowaenʼ ko fare gospel rokʼ e Tabiyul roraed, niʼir e tawaʼath nag e pi chitamangraed ngay; ere, yaedra nang morngaʼagen e llowaenʼ rokʼ e Tabiyul roraed nge pi yuguruy e machib rokʼ, ni nge yog ni ngar nanged rogon ni ngar baed ngakʼ mar thap gaed.

15 Ma napʼan e re rran nem e gathi yaedra falfalaenʼ mar oged e magaer ngakʼ e Got roraed ni dabimus biʼid, niʼir e war roraed nge woʼen e thap roraed? Arragon, binem e rran, e gathi ra yib gelingraed nge yongoʼol raed ko gin riyulʼ e mileayʼ? Arragon, ma gathi yaedra yib ko bin riyulʼ e ulung rokʼ Got?

16 Musap, gube yoeg ngom ni, Arragon; bay kun nangraed bayay u fithikʼ fapi gidiiʼ ku Israel; min puthuyraed, nib paʼ i paʼangin fare ke gakʼiy ni olive, nga faken riyulʼ e gakʼiy ni olive.

17 Ere ireray e pinʼen ni yipʼ e chitamangdaed fan; ma be yipʼ fan ni dabi buch nge madaʼ nga tomuren ni ke garareg raed fapi Gentiles; me be yipʼ fan ni yib ngakʼ e pi Gentiles, ni nge yog ni dag Somoel gelingin ngakʼ e pi Gentiles, ni bachan e ra piiʼ fapi Jews keruraedʼ ngakʼ, ara fapi gidiiʼ ku Israel.

18 Ere, chitamangdaed e gathi kemus ni yigoʼ pifakdaed e ke weliy morngaʼagen, ya ku aram rogon ngakʼ gubin fapi gidiiʼ ku Israel, nibe dugliy ko tin ngan e mʼag e bayi muguʼul ko tin tomur e rran; ni fare mʼag ni tay Somoel ngakʼ e chitamangdaed i Abraham, ni gaʼar: U dakean pifakam e yira tawaʼath nag gubin e pi mfen nu fayleng riy.

19 Me yibi buch ni gag, Nephi, e boʼor banʼen nug weliy ngoraed ni morngaʼagen e pinnʼey; arragon, gu weliy ngoraed morngaʼagen fare sulyarmen ko fapi Jews u lan e tin tomur e rran.

20 Mugog ngoraed fapi thin rokʼ Isaiah, niʼir e weliy morngaʼagen e sulyarmen ko fapi Jews, ara fapi gidiiʼ ku Israel; ma tomuren ni kan sulwegraed ma arame dab ki balyang laniyaenʼraed, ara kur garar gaed bayay. Me yibi buch ni gag e guweliy bogi thin nib yoʼor ngakʼ piwalageg, ma arame munguy laniyaenʼraed mar sobutʼ niged yaed u pʼoewchen Somoel.

21 Me yibi buch ni kur non gaed ngog bayay, ni yaed be gaʼar: Mang e be yipʼ fan e rennʼey ni ke guy e chitamangdaed u malkʼay? Mang e be yipʼ fan fare ke gakʼiy ni ke guy?

22 Me lingug ngoraed: Be yipʼ fan fare ke gakʼiy ko yafos.

23 Mar gaʼar gaed ngog: Mang e be yipʼ fan fare lay i wasey ni faʼan ni guy e chitamangdaed, nib sor iyaen ko fare ke gakʼiy?

24 Mugog ngoraed ni ireram fare thin rokʼ Got; ma piʼin ra motoyil ko thin rokʼ Got, mar chechʼeyed paʼaraed riy, e dabra mʼaed; ma ku dabiyog ni nge yib e pi lumel nge sabaenbaen rokʼ moʼoniyanʼ i maʼew nagraed, me wawliyraed iyaen ko gafgow.

25 Ere, gag, Nephi, e gu chiyliy ngoraed ni ngar motoyil gaed ko thin rokʼ Somoel; arragon, gu chiyliy ngoraed u poloʼ i gelingig, u rogon e pi llowaenʼ ni kug guy ma kug rungʼag nge nangaenʼ ni bay rog, ni gomanga ra motoyil gaed mar fol gaed ko thin rokʼ Got me paer u wunʼraed ni ngar fol gaed ko motochiyel rokʼ ni gubin e ngiyalʼ u fithikʼ gubin banʼen.

26 Mar gaʼar gaed ngog: Mang e be yipʼ fan fare lulʼ i raen niʼir faram e ke guy e chitamangdaed?

27 Mugog ngoraed ni re raen nem ni guy e chitamag e ba kireb mab sunsungor; ma kub yoʼor boech banʼen ni liiʼ e lem rokʼ ma dakiyog ni guy e kireb nge sunsungor ko re raen nem.

28 Mugog ngoraed ni ireram fare loew nib gaaʼ, niʼir e be kiiʼeg e piʼin kireb ko fare ke gakʼiy ko yafos, nge pi gidiiʼ rokʼ Got.

29 Mugog ngoraed nibe yipʼ fan fare infierno, niʼir e ke yoeg fare angel ngog ni kan tay ni tafen e piʼin kireb.

30 Mugog ngoraed ni chitamangmaed e ki guy ni fare justice rokʼ Got e kiiʼeg e piʼin kireb rokʼ e piʼin nib matʼaw; ma raʼen nibe gaelgael e boed rogon fini gaelgael raʼen e nifiy nibe dramrom, ni be yaen ngakʼ Got ngalang ni manemus ni dariy tungun.

31 Mar gaʼar gaed ngog: Fan e biney e fare gafgow ni bayi aw ko fare dowef u lan e pi rran ni kan piiʼ ni ngan monʼog riy, fa be yipʼ fan e ngiyalʼ ni kemus rogon fare yaʼel ni poloʼ u tomuren e yamʼ ni ke tay e dowef, fa be weliy morngaʼagen e pinʼen nib lʼeag rogon ko paer u fayleng?

32 Me yibi buch ni gu weliy ngoraed nibe yipʼ fan e pinʼen nib lʼeag rogon ko paer u fayleng nge tin nib lʼeag rogon ko yaʼel; ya fare rran e ra yib ni thingar ni pufthin nagraed ko muruwel roraed, arragon, ni pi muruwel ni i rinʼ fare dowef u napʼan e pi rran ni kan piiʼ ni ngan monʼog riy.

33 Ere, faʼan yaedra yimʼ nga fithikʼ e denen roraed ma ku yira chuwegraed ni dabisiy, ko pinʼen nib lʼeag rogon ko yaʼel, ni pinʼen nib lʼeag rogon ko tin nib matʼaw; ere, dabisiy ni yira fekraed ngar sakʼiy gaed nga pʼoewchen Got, ni ngan pufthin nagraed ko ngongol roraed; ma faʼanra ngongol roraed e ba kireb ma yaedra paer nib kireb ni dabisiy; ma faʼanra yaed ba kireb ma arame dabiyog ni ngar pired ko gin gilʼilungun Got; ya faʼanra dangay meʼere kub kireb e gin gilʼilungun Got.

34 Machane muguyed, gube yoeg ngomed ni gin gilʼilungun Got e de kireb, ma dariy banʼen nib alit ni rayog ni nge yaen ko gin gilʼilungun Got; ere dabisiy ni bay bayang ni tafen e kireb ni kan falʼeg ni fan ko tin kireb banʼen.

35 Ma baʼ bangi banʼen ni kan falʼeg rogon, arragon, ni fare infierno niʼir faram e kug weliy morngaʼagen, ni fare moʼoniyanʼ e ire ke yarmiy rogon; ere rangi dodow ni tomur nra taw e yaʼel ko gidiiʼ ngay e ngar pired nga langgin gilʼilungun Got, ara ngan tharbograed nga wuruʼ ni bachan fare justice ni kug weliy morngaʼagen.

36 Ere, piʼin denen e ngan kiiʼegraed ko piʼin nib matʼaw, nge ku fare ke gakʼiy ko yafos, ni waʼamngin e rib gaʼfan ma thʼabi felʼ lamen u fithikʼ urngin mit e waʼamngin; arragon, ma ire thʼabi felʼ ko gubin e pi tawaʼath rokʼ Got. Ere ireray e pinʼen ni kug weliy ngakʼ piwalageg. Amen.