1 Ere chiney e yibi buch u tomuren ni gag, Nephi, e napʼan nug muʼ ko numon ngakʼ walageg, ma aram mar gaʼar gow ngog: Gur e kamoeg ngomow e tin nib moʼomawʼ banʼen, ni ke pag rogon ni ra yog romow.

2 Me yibi buch nugog ngorow ni gumnang ni kug weliy bogi banʼen nib togopluw ngakʼ e piʼin nib denen, u rogon e pinʼen nib riyulʼ; ma piʼin nib mangil e ke mudugil ma gube micheg ni yira chibiyraed ngalang ko bin tomur e rran; ere, piʼin ni kireb e roraed e yaed ma buluʼ nag e tin riyulʼ, ya be kaenkaen ngoraed.

3 Ere chiney, gal walageg, faʼan gomanga um rinʼew e tin nib matʼaw mab mʼagaenʼmew ni ngam motoyil gow ko tin riyulʼ, mag me fol riy, ni nge yog ni ngam marow nib matʼaw u pʼoewchen Got, ma arame dab mu nonnon gow ni bachan e tin riyulʼ, ni kam gaʼar gow: Gur e kamoeg ngomow e tin nib moʼomawʼ banʼen.

4 Me yibi buch ni gag, Nephi, e gu ning chilen ngakʼ walageg ni ngar gonopiyew rogon ngar fol gow ko pi motochiyel rokʼ Somoel.

5 Me yibi buch ni kar sobutʼ nigew yow u pʼoewchen Somoel; ni aram rogon fan nug falfalaenʼ me gaaʼ e athap rog ngorow, ni nga ranow ko pi kanawoʼ nib matʼaw.

6 Chiney, gubin e pinnʼey e unoeg ma un rinʼ u napʼan ni i paer e chitamag u lan e tent u loway ni ke tunguy fithingan ni Lemuel.

7 Me yibi buch ni gag, Nephi, e gufek rebe ppin ni fak Ishmael nggu leʼengiy; nge ku piwalageg e kur feked e pi ppin ni fak Ishmael ngar leʼengiyed; nge ku aram rogon ngakʼ Zoram ni fek e bin thʼabi ilal e ppin ni fak Ishmael nge leʼengiy.

8 Ma aray rogon ni muguʼuliy e chitamag gubin e motochiyel rokʼ Somoel ni ke piiʼ ngakʼ. Ma ku gag, Nephi, e ke tawaʼath nigeg Somoel nib noemow.

9 Me yibi buch ni fare lam rokʼ Somoel e non ngakʼ e chitamag nib nepʼ, me motochiyel nag ngakʼ ni nge rebo rran riy me tabab nag e milekag rokʼ iyaen nga wuruʼ e binaw.

10 Me yibi buch ni arame napʼan ni od e chitamag ni kakadbul, me yaen nga langan e mab ko tent, me gin oewchen ngab batʼ nib lulubuy ni bay u butʼ ni rib felʼ rogon nni ngongoliy; ni falʼeg ko brass. Ma langgin e re batʼ nem e bay lʼagruw wochi lay i wasey riy; ni bay reb ni be yalʼuwegraed ko gin ni nga ur sor gaed ngay u wuruʼ e binaw.

11 Me yibi buch ni arame gu kunuyed nga taʼabang e pinʼen ni nggu feked iyaen nga wuruʼ e binaw, nge gubin e tin ni ke magaey e chugum ni ke piiʼ Somoel ngomaed; ma gamaed fek gubin e awoch ko gubin mit nggu feked nga wuruʼ e binaw.

12 Me yibi buch ni gufeked e tent romaed ma gamaed yaen nga wuruʼ e binaw, nug thʼaebed fare lulʼ ni Laman.

13 Me yibi buch nug milekag gaed ni aningeg e rran, ni gamaed be sor iyaen nib chuchugur nga lan e yimuch ni ngek, ma arame gu toeyed e tent romaed bayay; ma gamaed tunguy fithingan e ginnʼem ni Shazer.

14 Me yibi buch nug feked e gatʼing nge gane gatʼing romaed, ma gamaed yaen nga wuruʼ e binaw ni nggu koeled e gamanman ni nge kay chon e tabinaew romaed; ma tomuren ni kug koeled e gamanman ni gan chon e tabinaew romaed ma aram ma gamaed sul ngakʼ pifakmaed bayay u lan wuruʼ e binaw, ko farengi nʼen ni Shazer. Ma kug waroed bayay nga wuruʼ e binaw, ni gamaed be leak fagin ni gu waroed ngay fayanem, ni gamaed be yaen ko yungin nib dammol u wuruʼ e binaw, ni ireram e yungin ni bay nga mathil nib chuchugur nga Red Sea.

15 Me yibi buch ni arame gu milekag gaed nib yoʼor e rran, ni gamaed be yaen ma gamaed ma mokol gamanman ni ggan, ko gatʼing nge gane gatʼing romaed nge malang ni gane gawul nge gawul romaed.

16 Ma gamaed be yaen ko gin ni be yibi mʼug u dakean fare batʼ, nibe powiʼiymaed ko yungin nib dammol u wuruʼ e binaw.

17 Me tomuren ni kug milekag gaed nib yoʼor e rran, ma gamaed toey e tent romaed u bingyalʼ i nʼen, ni nge yog nug toffan gaed mu kug gayed e ggan ni fan ko chon e tabinaew romaed.

18 Me yibi buch u napʼan ni gag, Nephi, e guwaen ni nggu kol e gamanman ni nge mang ggan, mamusapgaed, mug tʼaer e gatʼing rog, nni falʼeg ko wasey ni thʼabi felʼ; me tomuren ni kug tʼaer e gatʼing rog, ma arame me, puwaenʼ walageg ngog ni bachan e ke kireb e gatʼing rog, ma dakiyog ni nge yog e ggan ngomaed.

19 Me yibi buch ni arame gu suloed ni dariy e ggan romaed ngakʼ chone tabnaw romaed, ni kar magaer gaed ma kar magaf gaed, ni bachan e milekag roraed, ere ri gele gafgow roraed i athapeg e ggan.

20 Me yibi buch ni Laman nge Lemuel nge fapi pagael ni fak Ishmael e ra tabab niged e nonnon nib gel, ni bachan e gafgow nge kirbaenʼ roraed u lan wuruʼ e binaw; nge ku arragon e chitamag ni ke tabab nag e nonnon nib togopluw ngakʼ Somoel ni Got rokʼ; arragon, ma riyaed gubin ni ke kirbaenʼraed nib gel, ni riyulʼ ni kar nonnon gaed nib togopluw ngakʼ Somoel.

21 Chiney e yibi buch ni gag, Nephi, e kug un ngakʼ walageg ko kirbaenʼ ni bachan e ke tagan e gatʼing rog, ma tiroraed e gatʼing e ke lalwur e gaf riy, ma aram tabolngin e gafgow ni gel ngomaed, arragon, ni arame dakiyog e ggan ngomaed.

22 Me yibi buch ni gag, Nephi, e boʼor banʼen ni gu weliy ngakʼ walageg, ya bachan e kar ʼelʼel nigew e gumʼirchaʼ rorow bayay, ni arame ur nonow nib togopluw ngakʼ Somoel ni Got rorow.

23 Me yibi buch ni gag, Nephi, e gu ngongoliy rebe gatʼing nib gakʼiy, nge gane gatʼing u bochi laey i gakʼiy nib kikʼiy; ere, gufek e gatʼing nge gane gatʼing rog, nge ba gawul nge malang. Mug gaʼar ngakʼ e chitamag: Buʼuw e gin ni nggu sor ngay ko mogow ggan?

24 Me yibi buch ni meybil ngakʼ Somoel nge fith, ya kar sobutʼ niged laniyaenʼraed ni bachan e thin rog; ya boʼor banʼen ni gu weliy ngoraed u poloʼ i gelingig.

25 Me yibi buch ni yib laman Somoel ngakʼ e chitamag; mari gel e sobutʼaenʼ rokʼ ni bachan e nonnon ni tay nib togopluw ngakʼ Somoel, ni arame ni chuchuy nga butʼ nga fithikʼ e kirbaenʼ.

26 Me yibi buch ni yib laman Somoel i gaʼar ngakʼ: Musap ko fare batʼ, ngam guy e pinʼen ni kan yoloey ngay.

27 Me yibi buch u napʼan ni guy e chitamag e pinʼen ni kan yoloey ko fare batʼ, me tʼon ni murus nib gel, nge ku aram rogon ngakʼ walageg, nge fapi pagael ni fak Ishmael nge pi ppin ni leʼengimaed.

28 Me yibi buch ni gag, Nephi, e gguy fagali nʼen ni ma puluweg e gin ni ngan sor ngay u langgin fare batʼ, ni kemus ni yow ra muruwel u rogon e mich, nge lʼagaenʼ nge motoyil ni gamaed be tay ngay.

29 Ma kubay boech banʼen nib biech ni kun yoloey nga dakean, ni rib tamilang ni yira biʼeg, ni be piiʼ ngomaed e tamilang u rogon woʼen Somoel; ni yibe yoloey ma be thil u bingyalʼ ngo bingyalʼ, u rogon e mich nge gonop ni gamaed be tay ngay. Ere kadguyed ni pinʼen nib achichig ni yibe rinʼ e ma gagyeg nag Somoel ni nge yib e tin nib gaʼfan riy.

30 Me yibi buch ni gag, Nephi, e guwaen nga dakean pʼebugul e burey, u rogon ni be yibi mʼug ko fare batʼ.

31 Me yibi buch ni guwaen gu liiʼ e gamanman ni malboch, ni aram rogon ni gu yognag e ggan ngakʼ chon e tabinaew romaed.

32 Me yibi buch ni kug sul ko pi tent romaed, ni gube fek fapi gamanman ni kug liiʼ; ma ngiyalʼ ney u napʼan ni kar guyed gag ni kug fek e ggan, mari gel e falfalaenʼ roraed! Me yibi buch ni arame ra sobutʼ niged yaed u pʼoewchen Somoel, mar pininged e magaer ngakʼ.

33 Me yibi buch ni kug milekag gaed bayay, ni gamaed be sor iyaen nib chugur ko fagin niʼug sorgaed ngay ko sommʼon; me tomuren ni kug milekag gaed ni ke yoʼor e rran ma gamaed toey e tent romaed bayay, ni nggu toffan gaed bingyalʼ.

34 Me yibi buch ni yimʼ Ishmael, min kʼeyag u bangi nʼen ni kanoeg Nahom ngay.

35 Me yibi buch ni arame kirbaenʼ fapi ppin ni fak Ishmael ni rib gel, ni bachan e chitamangraed ni ke yimʼ, nge ku bachan e gafgow roraed u lan wuru e binaw; ma arame ra nonnon gaed nib togopluw ngakʼ e chitamag, ni bachan e ke fekraed nga wuruʼ e nam nu Jerusalem, ni yaed be gaʼar: Ke yimʼ e chitamangmaed; arragon, ma kug malog gaed u lan wuruʼ e binaw, ma kug gafgow gaed ko kirbaenʼ, makʼiy, balel, nge magaer ni magaf; nge tomuren gubin e pi gafgow ney ma arame bay gumʼaed u lan wuruʼ e binaw ni makʼiy.

36 Ma aray rogon ni ur nonnon gaed nib togopluw ngakʼ e chitamag, nge kugag ni ur togopluw gaed ngog; ni yaed baʼadag ni ngar suloed bayay ko nam nu Jerusalem.

37 Me non Laman ngakʼ Lemuel nge fapi pagael ni fak Ishmael ni gaʼar: Ere musap gaed, maroed ngad liiʼed e chitamangdaed nge yimʼ, nge walagdaed i Nephi, niʼir e kefek nga dakean ni nge mang gaaʼ rodaed nge tafanow rodaed, ni gadaed pi walagen nib ilal.

38 Chiney, e be yoeg ni ke non Somoel ngakʼ, nge pi angel ni kur pigpig gaed ngakʼ. Machane muguyed, gaed manang ni be baen nagdaed; ma be yoeg ngodaed e pinnʼey, ma boʼor banʼen ni be rinʼ u rogon e pi salap rokʼ, ni gomanga baen nag e changar rodaed, nge lem rodaed, ni gomanga yog ni wawliy daed nga palog nga langgin yungi wuruʼ e binaw ni dannang morngaʼagen; nge tomuren ni ke wawliy daed nga palog, ma ke lemnag ni nge mang pilung nge gaaʼ rodaed, ni gomanga yog ni rinʼ ngodaed e pinʼen nib mʼag u waenʼ ma baʼadag. Ere ireray rogon ni kʼaring walageg i Laman e damomuw nga langgin gumʼirchaʼraed.

39 Me yibi buch ni bay Somoel romaed, arragon, nriyulʼ ni yib laman Somoel me yibi weliy boʼor banʼen ngoraed, ma ribe puwaenʼ ngoraed; ma tomuren ni ke puwaenʼ Somoel ngoraed mar chuweged e damomuw roraed, mar kalgaed ngaenʼraed kopi denen roraed, ni aram rogon me yog ni tawaʼath nagmaed Somoel bayay ko ggan, ma arame gu pired ni dag mʼaed.