1 Ngan yana nahitabo nga kahuman nga ako, hi Nephi, in natapos paghimangraw ngadto han akon kabugtoan nga mga lalaki, nangalas, hira nagsiring ha akon: Ikaw in nagyayakan ha amon hin magkuri nga mga pulong, nga dire namon akus mailob.

2 Ngan nahitabo nga ako nagsiring ha ira nga maaram ako nga nagyakan ako hin mabugat nga mga pulong kontra han magraot, subay han kamatuoran; ngan an magtadong akon ginpawaray sala, ngan nagpamatuod nga hira in pag-aalsahon ha urhi nga adlaw; sanglit, an nakasala in kinakarawat an kamatuoran nga magkuri, kay nakakasamad han ira balati-an.

3 Ngan yana mga kabugtoan ko, kun kamo matadong ngan karuyag manmati han kamatuoran, ngan magsunod hito, ngan maglakat hin matadong ha atubangan han Diyos, ngan dire kamo magngorotob tungod han kamatuoran, ngan magsiring: Ikaw in nagyayakan hin magkuri nga mga pulong kontra ha amon.

4 Ngan nahitabo nga ako, hi Nephi, in nagsagdon ha akon kabugtoan nga mga lalaki, ha ngatanan nga kamadoroto, nga magsunod han mga kasugoanan han Ginoo.

5 Ngan ine nahitabo nga hira nagin mapainobsanon ha atubangan han Ginoo; sanglit ako nagmalipayon ngan dako an paglaum ha ira, nga hira magsusunod han dalan han pagkamatadong.

6 Ngan yana, ine ngatanan nga mga butang in ginluwas ngan ginbubuhat samtang an akon amay nag-uukoy dida han tolda ha kapatagan nga iya gintawag nga Lemuel.

7 Ngan ine nahitabo nga ako, hi Nephi, in kumuha hin usa han mga anak nga babaye ni Ismael agud magin asawa; ngan liwat, an akon kabugtoan nga mga lalaki in kumuha han mga anak nga babaye ni Ismael nga magin asawa; ngan liwat hi Zoram in kumaha han suhag nga anak nga babaye ni Ismael nga magin asawa.

8 Ngan nasugad nga an akon amay in nagtuman han ngatanan nga mga kasugoanan han Ginoo nga iginhatag ha iya. Ngan liwat, ako, hi Nephi, in ginbendisyonan han Ginoo hin damo.

9 Ngan ine nahitabo nga an tingog han Ginoo in nagyakan ngadto han akon amay ha gabi, ngan nagsugo ha iya nga kinabuwasan kinahanglan nga lumakat hiya ngadto ha kamingawan.

10 Ngan ine nahitabo nga samtang an akon amay in bumuhat ha aga, ngan nagsingadto han purtahan han tolda, ngan ha kadako han iya paghipausa nakita niya dida ha tuna in lidong nga bola nga maupay an pagkahimo; nga hinimo tikang hin pino nga tumbaga. Ngan ha sakob han bola in mayada duha nga turo-tudlo; nga an usa in nagtutudlok kun hain kami kakadto ha kamingawan.

11 Ngan ine nahitabo nga amon gintirok an bisan ano nga mga butang nga amon pagdadad-on ngadto ha kamingawan, ngan an ngatanan nga nahisalin nga mga gamit nga iginhatag han Ginoo ha amon; ngan nagdara kami hin liso han ngatanan nga klase nga amon madadara ha kamingawan.

12 Ngan ine nahitabo nga gindara namon an amon mga tolda ngan lumakat tipakadto ha kamingawan, nga tabok han salog han Laman.

13 Ngan ine nahitabo nga naglalakaton kami ha sakob hin upat kaadlaw, nga harani ha timog-timog sinirangan nga ruta, ngan amon gin-otro pagtindog an amon mga tolda; ngan amon ginngaranan an lugar nga Shazer.

14 Ngan ine nahitabo nga amon dara an amon mga bawog ngan amon mga pana, ngan nagsingadto kami ha kamingawan pannganop hin makakaon han amon pamilya; ngan katapos namon makakuha hin pagkaon para han amon pamilya omoli kami ngadto han amon pamilya ha kamingawan, ha lugar nga Shazer. Ngan kami in otro pumakadto ha kamingawan, ha pareho gihapon nga ruta, ngan nag-ukoy han pinakamatambok nga tuna ha parte han kamingawan, nga aada han ginkatakipan harani han Mapula nga Dagat.

15 Ngan ine nahitabo nga kami in naglalakaton hin damo kaadlaw, pannganop para may makaon dida han amon gin-aagian, pinaagi hin paggamit han amon mga bawog ngan amon nga pana han amon mga bato ngan amon mga santik.

16 Ngan amon ginsunod an mga direksyon han bola, nga nagtutudlok ngadto han pinakamatambok nga tuna ha parte han kamingawan.

17 Ngan kahuman namon maglalakaton hin damo ka adlaw, amon gintukod an mga tolda hin kadaliay para liwat makapahuway an amon mga kalugaringon ngan makakuha hin makakaon han amon pamilya.

18 Ngan ine nahitabo nga hi ako, hi Nephi, in lumakat para mannganop hin makakaon, makaparaid, nabari an akon bawog nga hinimo tikang hin maupay nga asero; ngan han mabari an akon bawog, dagmit, nga an akon mga kabugtoan in nasina ha akon tungod han pagkabari han akon bawog, kay dire na kami makakakuha hin pagkaon.

19 Ngan ine nahitabo nga kami in bumalik ngadto han amon pamilya nga waray dara nga pagkaon, ngan duro an kakapoy, tungod han ira paglinakat, hira in duro pagkuri tungod han pagkinahanglan hin pagkaon.

20 Ngan ine nahitabo nga hi Laman ngan Lemuel ngan an mga anak nga lalaki ni Ismael in nagtikang pagngorotob hin duro, tungod han ira kakurian ngan kasakitan ha kamingawan; ngan pati liwat an akon amay in nagtikang pagngorotob kontra han Ginoo nga iya Diyos; oo, ngan ngatanan hira in duro an kabido, ngada han an ngatanan ha ira in nangorotob kontra han Ginoo.

21 Ngan ine nahitabo nga ako, hi Nephi, in nagsakit upod an akon kabugtoan nga mga lalaki tungod han pagkawara han akon bawog, ngan an ira mga bawog in nawad-an hin higot, ngan dida hine nagtikang an masyado nga kakurian, ngan liwat, kun sugad waray na kami pakakakuha hin pagkaon.

22 Ngan ine nahitabo nga ako, hi Nephi, in naghimangraw hin maiha han akon kabugtoan nga mga lalaki, mahitungod kay ira na liwat ginpatig-a an ira mga kasingkasing, ngada nga hira an nagreklamo kontra han Ginoo nga ira Diyos.

23 Ngan ine nahitabo nga ako, hi Nephi, in naghimo hin bawog tikang han kahoy, ngan pana tikang hin tadong nga talibugsok; sanglit, nagkaada ako hin bawog ngan pana, upod han santik ngan han mga bato. Ngan nagsiring ako ngadto han akon amay: Hain ako kakadto para makakuha hin pagkaon?

24 Ngan ine nahitabo nga an akon amay in nagpakiana ha Ginoo, kay nagpamainobsanon hira tungod han akon mga tugon; kay damo nga mga pulong an akon ginyakan ngadto ha ira ha kusog han akon kalag.

25 Ngan ine nahitabo nga an tingog han Ginoo in nahibatian han akon amay; ngan hiya in ginsirotan tungod han iya pagnginorotob kontra han Ginoo, ngada nga nadara hiya ngadto ha duro nga kabidu-on.

26 Ngan ine nahitabo nga an tingog han Ginoo in nagsiring ha iya: Kitaa an bola, ngan hunahunaa an mga pulong nga nahisurat dida.

27 Ngan ine nahitabo nga han an akon amay in kinita hadton mga pulong nga nakasurat dida ha bola, hiya nahadlok ngan nanngurog hin duro, ngan sugad man an akon mga kabugtoan ngan han mga anak nga lalaki ni Ismael ngan an amon mga asawa.

28 Ngan ine nahitabo nga ako, hi Nephi, in kumita hadton nagtutudlok dida han bola, kay ito in nakiwa subay han pagtuo ngan kamadoroto ngan pagsugot nga amon iginhatag ngadto ha ira.

29 Ngan mayada liwat nakasurat dida nga bag-o nga sinurat, nga masayon basahon, nga naghahatag ha aton nga mahibaroan mahitungod han mga paagi han Ginoo, ngan ine nahisurat ngan ginbabag-o ha oras-oras, subay han pagtuo ngan kamadoroto nga amon iginhahatag hito. Sanglit amon nakikita nga ha gutiay nga pamaagi an Ginoo in makakahimo hin dagko nga mga hitabo.

30 Ngan ine nahitabo nga ako, hi Nephi, in nagsingadto ha pungkay han bukid sugad han direksyon nga ihinatag dida han bola.

31 Ngan ine nahitabo nga nagpatay ako hin ihalas nga mga hayop, sanglit nakakakuha ako hin pagkaon para han amon pamilya.

32 Ngan ine nahitabo nga omoli ako ngadto han amon mga tolda, dara an mga hayop nga akon ginpatay; ngan yana han makita nira nga maydara ako nga pagkaon, duro an ira kalipay! Ngan nahitabo nga hira in nagpainobsanon ha Ginoo, ngan naghatag hin pasalamat ngadto ha iya.

33 Ngan ine nahitabo nga kami in otro nga naglalakaton, nagagi hin pareho nga ruta han tinikangan; ngan kahuman namon maglalakaton hin damo ka adlaw gintukod otro an amon mga tolda, nga agod kami mag-ukoy hin halipot nga panahon.

34 Ngan ine nahitabo nga hi Ismael namatay, ngan iginlubong dida han lugar nga ginngaranan nga Nahom.

35 Ngan ine nahitabo nga an mga anak nga babaye ni Ismael in nabido hin duro, tungod han pagkawara han ira amay, ngan tungod han ira kasakitan didto ha kamingawan; ngan hira in nangorotob kontra han akon amay, kay tungod hira in gindara tipagawas han tuna han Jerusalem, nga nasiring: An amon amay in patay na; oo, ngan kami in naglinakat hin duro ka kamingawan, ngan kami nagantos hin duro nga kasakitan, gutom, kauhaw, ngan kakapoy; ngan kahuman hine nga kakurian kami in mamamatay hin gutom ha kamingawan.

36 Ngan ha sugad hine nangorotob hira kontra ha akon amay, ngan pati ha akon; ngan karuyag nira nga bumalik ngadto ha Jerusalem.

37 Ngan nagsiring hi Laman kan Lemuel ngan ngadto han mga anak nga lalaki ni Ismael: Pamati, pataya naton an aton amay, ngan an aton bugto nga hi Nephi, nga ginhimo an iya kalugaringon nga aton punoan ngan aton magturutdo, nga iya kamagurangan.

38 Ngan yana, nagsiring hiya nga an Ginoo nakipaghimangraw ha iya, ngan sugad man han mga anghel in nag-alagad ha iya. Pero tuod, maaram kita nga nagbibinuwa hiya ha aton; nga nagsusumat hiya hine nga mga pulong ha aton, kay nagbubuhat hiya hin damo nga mga hitabo pinaagi hin panlimbong nga paagi, para malisbotan niya an aton mga mata, ha panhuna-huna, siguro, nga iya kita madara ngadto ha makaharadlok nga kamingawan; ngan kahuman pagdad-a ha aton hin harayo, hihimoon an iya kalugaringon nga hadi ngan magbaralaod labaw ha aton, nga hiya maghimo subay han iya hingyap ngan kalipay. Ha sugad hine nga mga pulong ginaghat han akon bugto nga hi Laman an ira mga kasingkasing para masina.

39 Ngan ine nahitabo nga an Ginoo in gapil ha aton, ngan liwat, bisan an tingog han Ginoo in nahibatian, ngan nagyakan hin damo nga mga tugon ha ira ngan ginsirotan hira hin duro; ngan kahuman hira sirotan han tingog han Ginoo in nahingalimtan an ira kasina, ngan nagbasul han ira mga sala, ngan nasugad ngan ginbendisyonan na liwat kami han Ginoo hin pagkaon, nga dire kami mamatay.