1 Ngan ine nahitabo nga nagampo hira ha Ginoo, ngan umopod hira ha akon; ngan kami in naghimo hin mga tabla nga maupay an pagkahimo. Ha oras-oras iginpapakita han Ginoo kun ano nga paagi in kinahanglan ko nga buhaton han mga tabla han sarakyan pandagat.

2 Ngan yana ako, hi Nephi, in waray maghimo hin mga tabla subay han paagi nga nahibaroan han tawo, ngan waray ko himoa an sarakyan pandagat subay han pamaagi hin tawo; kundi ginhimo ko ito subay han pamaagi nga igin pakita ha akon han Ginoo; tungod hine, dire ine subay han pamaagi han tawo.

3 Ngan ako, hi Nephi, in agsub kumadto ha bukid ngan agsub ako magampo han Ginoo; tungod hine iginpakita ha akon han Ginoo an mahinungdanon nga mga kiritaon.

4 Ngan ine nahitabo nga katima ko mahuman an sarakyan pandagat, subay han mga mando han Ginoo, nasabotan han akon kabugtoan nga mga lalaki nga ito in maupay, an pagkahimo hine in duro gud hin kamaupay; sanglit, hira in nagpamainobsanon na liwat ha atubangan han Ginoo.

5 Ngan ine nahitabo nga an tingog han Ginoo in nahibatian han akon amay, nga kami in kinahanglan bumuhat ngan sumakay han sarakyan pandagat.

6 Ngan ine nahitabo nga kinabuwasan, kahuman namon igandam an ngatanan nga mga butang, damo nga prutas ngan karne tikang ha kamingawan, ngan damo nga dugos hin putyukan, ngan iba nga mga butang nga gagamiton subay han iginsugo ha amon han Ginoo, kami in sumakay han sarakyan pandagat, dara an ngatanan nga darad-on an amon mga liso, ngan bisan ano nga butang nga madadara namon, kada usa subay han iya edad; sanglit, kami ngatanan in sumakay han sarakyan pandagat, upod an amon mga asawa ngan han amon mga anak.

7 Ngan yana, an akon amay in nagkaada hin duha nga anak ha kamingawan; an magurang in ginngaranan nga Jakob ngan an manghud in hi Jose.

8 Ngan ine nahitabo nga katima namon ngatanan makasakay han sarakyan pandagat, ngan madara an ngatanan nga kinahanglanon ngan han mga butang nga iginpapadara ha amon, kami in nagbiyahi ha dagat ngan iginpadpad han hangin tipakadto ha katunaan nga iginsaad.

9 Ngan katapos namon igpadpad han hangin ha sakob hin damo nga mga adlaw, makabirido, an akon kabugtoan ngan han anak nga mga lalaki ni Ismael ngan han ira mga asawa in nagtikang paglipay, nga nasugad nga hira in nagtikang pagsayaw, ngan pagkanta, ngan magyakan hin sobra ka turahos, oo, ngan ngada nga hira in nahingalimot kun ano nga gahum nga hira in nadara ngadto; oo, hira in nadara ngadto hin labis nga turahos.

10 Ngan ako, hi Nephi, in nagtikang hin kahadlok hin duro bangin an Ginoo in masina ha amon, ngan sirotan kami tungod han amon pakasala, ngan kami in kaonon han kahiladman han dagat; sanglit, ako, hi Nephi, in nagtikang pagyakan ha ira hin inongod; pero makabirido hira in nasina ha akon, ngan nagsiring: Dire namon karuyag nga an amon manghud nga lalaki in maghadi ha amon.

11 Ngan ine nahitabo nga ginrabnot ako ni Laman ngan hi Lemuel ngan gingapos ako hin lubid, ngan ira ako ginlupiglupig; bisan pa man, pinabay-an ine han Ginoo agud ipakita an iya kagamhanan, ngada han katuman han iya mga panagna nga iya iginsiring hiunong han mga magraot.

12 Ngan ine nahitabo nga kahuman ako igapos nga dire ako makagkiwa, an kompas, nga igin-andam han Ginoo, in umukoy hin pagkiwa.

13 Dara hine, dire hira maaram kun tipakain an sarakyan pandagat, ngan nasugad nga nagkaada hin tiarabot nga makusog nga bagyo, sugad man, dako ngan makaharadlok nga unos, ngan kami in gintabog tipabalik ha katubigan ha sakob hin tulo ka adlaw; ngan hira nagtikang hin kahadlok hin duro bangin hira in malunod ha dagat; bisan pa man waray la gihapon nira ako buhi-i.

14 Han ikaupat ka adlaw, nga kami in ginpadpad tipabalik, an unos in nagtikang hin sobra kakusog.

15 Ngan ine nahitabo nga kami in haros kaonon han kahiladman han dagat. Ngan kahuman kami igpadpad tipabalik ha katubigan ha sakob hin upat ka adlaw, nagtikang hin pag-abat an akon kabugtoan nga mga lalaki han mga paghukom han Diyos nga nahingada ha ira, ngan hira in mamatay labot la kun magbasul hira han ira mga sala; sanglit, dumaop hira ha akon, ngan ginbadbad an gapos han akon panglayan, ngan tuod ine in nahubag hin duro; upod an akon mga buko-buko, ngan duro in paghubag, ngan an kaol-ol hadto.

16 Bisan pa man, ako in naglaum ha Diyos, ngan nagdayaw ha iya ha bug-os nga adlaw; ngan waray ako pagnginorotob kontra han Ginoo tungod han akon mga kakurian.

17 Ngan yana an akon amay, hi Lehi, in nagyakan hin damo nga mga pulong ha ira, ngan ha mga anak nga lalaki ni Ismael; pero, waray kaluoy, hira in nagyayakan hin pagtarhug kontra han hin-o man nga nagyayakan para ha akon; ngan an akon mga kaganak in tigurang na, ngan nagantos hin damo nga kabidoan tungod han ira mga anak, hira in duro an kagu-ol; ngan liwat, bisan ha ira mga higdaan han kasakitan.

18 Tungod han ira duro nga pagkabido ngan sobra nga pagkamasulub-on, ngan an sala han akon kabugtoan nga mga lalaki, hira in harani na ha kamutangan ngan haros in harani na makigkita han ira Diyos; oo, ngan an ira magbusag nga mga buhok in haros magkataktak ha tuna; oo, bisan hira in harami na mahulog nga may kabidoon ha tubigon nga lubnganan.

19 Hi Jakob ngan hi Jose liwat, tungod kaybata pa, in nanginginahanglan hin damo nga pagkaon, in nagmasolob-on dara han mga kabidoon han ira iroy; upod an akon asawa nga may luha ngan pagampo, ngan an akon mga anak, ginhimo nga dire magmadarahug ha akon kabugtoan nga mga lalaki nga buhian ako.

20 Ngan waray iba nga butang kundi an gahum han Diyos, nga nakagtarhug han ira pagkaguba, nga nahimo nga hira dire magmadarahug; sanglit, han makita nira nga hira in lalamoyon han kahiladman han dagat nagbasul hira han mga hitabo nga ira nabuhat, sanglit ira ako ginbuhi-an.

21 Ngan ine nahitabo nga kahuman nira ako buhian, urosahon, kinuha ko an kompas, ngan ine in gumios bisan hain ko karuyag. Ngan ine nahitabo nga ako in nagampo ha Ginoo; ngan kahuman ko mag-ampo an hangin in umukoy, ngan an bagyo in umukoy, ngan nagkaada hin kalinaw.

22 Ngan ine nahitabo nga ako, hi Nephi, an naggiya han sarakyan pandagat, ngan kami in nagsakay liwat tipakadto ha tuna nga iginsaad.

23 Ngan ine nahitabo nga kahuman namon magbeyahe ha sakob hin damo ka adlaw umabot kami ngadto ha tuna nga iginsaad; ngan kami in dumoong ha tuna, ngan gintukod namon an amon mga tolda; ngan amon ine ginngaranan nga tuna nga iginsaad.

24 Ngan ine nahitabo nga kami nagtikang pag-uma han tuna, ngan kami in nagtikang pagtanom han amon mga liso; ngan liwat, igintanom namon an amon ngatanan mga liso dida han tuna, nga dara namon tikang han katunaan ha Jerusalem. Ngan ine nahitabo nga ine tumobo hin maupay; sanglit, ginbendisyonan kami hin kahuraan.

25 Ngan ine nahitabo nga amon nahitad-an an tuna nga iginsaad, ha paglinalakat namon ha kamingawan, nga mayada ngatanan nga klase hin mga hayop ha kagurangan, sugad han baka ngan todo, ngan asno ngan kabayo, ngan kanding ngan ihalas nga kanding, ngan an ngatanan nga klase nga ihalas nga hayop, para han paggamit han tawo. Ngan amon nahitad-an an ngatanan nga klase hin mina, sugad han bulawan, ngan salapi, ngan tumbaga.