An Syahan Nga Libro Ni Nephi
An Iya Pagdumara Ngan Pag-Alagad
An pangasoy ni Lehi ngan han iya asawa nga hi Sariah, ngan han iya upat nga mga anak nga lalaki, nga ginngangaranan, (tikang ha suhag) Laman, Lemuel, Sam ngan Nephi. An Ginoo nagpasabot hin kataragman kan Lehi nga bumaya ha Jerusalem, kay nagtatagna hiya han mga tawo hiunong han ira mga karaotan ngan karuyag nira nga patayon hiya. Tulo ka adlaw hiya nga naglalakaton ha kamingawan upod an iya pamilya. Gin-upod ni Nephi an iya mga kabugtoan ngan bumalik ha tuna han Jerusalem agud kuhaon an sinurat han mga Judiyo. An pangasoy han ira kakurian. Kinuha nira an mga anak nga babaye ni Ismael agud magin asawa. Ira gindara an ira pamilya ngan lumakat ngadto ha kamingawan. An ira mga pag-antos ngan kakurian ha kamingawan. An rumbo han ira mga paglakaton. Umabot hira ha haluag nga katubigan. An mga kabugtoan ni Nephi nakiglaris kontra ha iya. Ginpanggupong hira, ngan naghimo hin sarakyan pandagat. Gintawag nira an ngaran han lugar nga Kahuraan. Tumabok hira ha haluag nga katubigan tikadto ha iginsaad nga tuna, ngan unhan pa didto. Ine in sugad ha pangasoy ni Nephi; ha lain nga pulong, ako, hi Nephi, an nagsurat hine nga sinurat.
Capitulo 1
Gintikangan ni Nephi an iya pagsurat han sinurat han iya mga tawo — Nakita ni Lehi ha bisyon an usa nga harigi nga kalayo ngan hiya in nagbasa ha usa nga libro han panagna — Gindayaw niya an Diyos, nagsumat han tiarabot nga Mesiyas, ngan nagtagna hiunong han pagkaguba han Jerusalem — Gintimaraot hiya han mga Judiyo.
1 Ako, hi Nephi, nga iginanak ha buotan nga mga kag-anak, sanglit natutdoan ako han ngatanan nga nahibaroan han akon amay; ngan kay nakita ko an damo nga mga kasakitan ha paghagos han akon mga henerasyon, bisan kun sugad, duro ako kapinaurog han Ginoo ha ngatanan han akon mga henerasyon; ngan liwat, ngan kay nagkamayada ako hin dako nga hibaro han kaupayan ngan han mga misteryo han Diyos, sanglit naghimo ako hin pagsurat han sinurat han akon mga gin-agian han akon mga henerasyon.
2 Ngan liwat, ako in naghimo hin usa nga pagsurat han sinurat ha yinaknan han akon amay, nga kinuha tikang han mga kinaadman han mga Judiyo ngan ha yinaknan han mga taga Egipto.
3 Ngan maaram ako nga an sinurat nga akon ginhimo in tinuod; nga ginhimo ko ito pinaagi han akon kamot; ngan ito akon ginhimo subay han akon kinaadman.
4 Ngan ine nahitabo han pagtikang han una nga tuig han pagdumara ni Sedekias, hadi han Juda, (an akon amay, hi Lehi, nga nag-ukoy ha Jerusalem ha ngatanan han iya mga henerasyon); ngan hadto nga tuig umulpot in damo nga mga propeta, nga nagtatagna ngadto han mga tawo nga kinahanglan hira magbasul, o an dako nga siyudad han Jerusalem in magugun-ob.
5 Salit ine nahitabo nga an akon amay, hi Lehi, samtang hiya nagpaharayo nag-ampo ngadto ha Ginoo, sugad man; ha bug-os han iya kasingkasing, para ha kaupayan han iya mga tawo.
6 Ngan ine nahitabo nga samtang hiya nag-aampo ha Ginoo, may inulpot nga usa nga harigi nga kalayo nga umukoy ha bawbaw han bato ha atubangan niya; ngan damo an iya nakita ngan nahibatian; ngan tungod hine nga mga bisyon nga iya nakita ngan nahibatian hiya in nabantad ngan nangurog hin duro.
7 Ngan ine nahitabo nga binmalik hiya ngadto ha iya kalugaringon balay ha Jerusalem; ngan iginlabog niya an iya kalugaringon ngadto han iya higdaan, kay tungod nga nadaog hiya ha Espiritu han mga bisyon nga iya pinanhikit-an.
8 Ngan tungod kay nadaog han Espiritu, hiya in nadara ha usa nga bisyon, bisan nga nakita niya nga an kalangitan in naabrehan, ngan nakahuna-huna hiya nga nakita niya an Diyos nga nalingkod ha iya trono, napapalibotan hin dire maihap nga mga sakop nga anghel ngan an panuyo in pagkanta ngan pagdayaw han ira Diyos.
9 Ngan ine nahitabo nga nakita niya in Usa nga nalusad ha butnga han kalangitan, ngan nasabotan niya nga an iya kasilaw labaw pa han naudto.
10 Ngan iya liwat nakita an dose pa nga nasunod ha iya, nga an ira kapawa labaw pa han mga bitoon ha langit.
11 Ngan linmusad hira ngan nagkadto ha bawbaw han kalibutan; ngan an usa dumaop ngan tumukdaw ha atubangan han akon amay, nga iginhatag ha iya an usa nga libro, ngan hiya ginsidngan nga kinahanglan nga hiya magbasa.
12 Ngan ine nahitabo nga samtang hiya nagbabasa, hiya in napuno han Espiritu han Ginoo.
13 Ngan ginbasa niya, nga nasiring: Kairo, kairo, han Jerusalem, kay nakita ko an iya binuhatan nga mangil-ad! Oo, ngan damo pa nga mga pulong an nabasa han akon amay hiunong han Jerusalem — nga angay ito gubaon, ngan an nangungukoy hito; damo an angay mapuo pinaagi hin espada, ngan damo an angay nga madadara nga bihag ngadto ha Babylon.
14 Ngan ine nahitabo nga han mabasa han akon amay ngan mahikit-an an damo nga urusahon nga mga bisyon, hiya in nagyakan hin damo nga mga pulong ha Ginoo; sugad: Han darayawon ngan urusahon an imo mga binuhatan, O Ginoo nga Diyos nga Makagarahum! An imo trono hataas ha kalangitan, ngan an imo gahum, ngan kaupayan, ngan kaluoy nahingangada ha ngatanan nga mga nangungukoy ha kalibutan; ngan, tungod kay ikaw maloloyon, dire nimo pababay-an nga an mga nadaop ha imo nga hira magkamagtay!
15 Ngan ha sugad hine nga paagi an pagyakan han akon amay ha pagdayaw han iya Diyos; kay an iya kalag nalipay, ngan an iya bug-os nga abilidad napuno, ngan liwat tungod han mga bisyon nga iya nahikit-an, oo, nga kanan Ginoo iginpakita ngadto ha iya.
16 Ngan yana ako, hi Nephi, waray maghimo han bug-os nga pangasoy han mga nahuna-huna nga nahisurat han akon amay, kay damo nga mga bisyon an iya nahisurat nga iya nakita ha mga bisyon ngan ha mga inop; ngan damo liwat an iya iginsurat nga mga pulong nga iya igintagna ngan iginyakan ngadto han iya mga anak, nga diin ako waray maghimo han bug-os nga pangasoy.
17 Pero ako in mag-aasoy han akon mga binuhatan hadton akon mga henerasyon. Kamatuoran, ako in naghimo han usa nga mga iginpahalipot nga kabugosan nga sinurat han akon amay, ha mga lamina nga akon ginhimo pinaagi han akon kalugaringon nga mga kamot; sanglit kahuman ko mapahalipot an sinurat han akon amay hihimoon ko naman an usa nga pangasoy han kalugaringon ko nga kinabuhi.
18 Sanglit, karuyag ko mahibaroan niyo nga kahuman igpakita han Ginoo an damo nga mga urusahon nga mga bisyon ha akon amay, nga hi Lehi, ngan liwat, hiunong han pagkaguba han Jerusalem, tinuod hiya kumadto ha mga tawo, ngan nagtikang pagtagna ngan pagsumat ha ira hiunong han mga bisyon nga iya nakita ngan nahibatian.
19 Ngan ine nahitabo nga gin biay-biay hiya han mga Judiyo tungod han mga nahuna-huna nga iya iginpamatuod ha ira; kay matuod nga iya ginpamatuoran an ira karaotan ngan mangil-ad nga binuhatan; ngan iya ginpamatud-an nga an mga bisyon nga iya nahikit-an ngan nabatian, ngan sugad man an mga bisyon nga iya nabasa ha libro, yana nga nagpapakita han pagabot han Mesiyas, ngan sugad man han pagtubos han kalibutan.
20 Ngan han pakabati han mga Judiyo hine nga mga pulong nasina hira ha iya; sugad man, han mga propeta han una nga panahon, nga ira ginpagawas, ngan ginbato, ngan ginpatay; ngan ira liwat gin ungara nga patayon hiya. Kundi kitaa, ako, hi Nephi, an makakagpamatuod ha iyo nga an mahumok nga kaluoy han Ginoo in nahingangada hadton ngatanan nga iya mga pinili, tungod han ira pagtuo, agud himoon hira nga makusog bisan ha gahum han katalwasan.