1 Me yibi buch nug milekag gaed bayay nga langgin wuruʼ e binaw; ma gamaed milekag nib chugur ni nge yalʼuw nga lan e ngek ko ngiyalʼ nem iyaen. Ma gu milekag gaed ma gamaed be yaen u fithikʼ e gafgow ni kirbaenʼ u lan wuruʼ e binaw; nge pi ppin romaed e ra fakyed e bitir u lan wuruʼ e binaw.

2 Ma rib yoʼor e pi tawaʼath rokʼ Somoel ni ke piiʼ ngomaed, ko ngiyalʼ ni kemus ni yigoʼ ufin e gamaed be kay u lan wuruʼ e binaw, me yog ni tathuth nag e pi ppin romaed pifakraed, ma yaed be paer ni yaed ba gel, arragon, ri boed rogon e piʼin pumoʼon; ma arame yog nra athamgiliyed e milekag roraed ni dakur nonnon gaed.

3 Ere kadguyed ni pi motochiyel rokʼ Got e thingari buch ni boed rogon ni midil nag. Ma faʼanra fol e gidiiʼ ko pi motochiyel rokʼ Got ma ra monʼog nagraed, me gel nagraed, me bing woʼen ngoraed rogon me yog ni ngar muguʼuliyed e pinnʼen ni motochiyel nag ngoraed; ere, bing woʼen ngomaed e pinnʼen nib tʼuf romaed u napʼan ni gamaed be milekag u lan wuruʼ e binaw.

4 Mug milekag gaed nib yoʼor e duw, arragon, ni meruk e duw u lan wuruʼ e binaw.

5 Mu gubaed gu taw gaed nga bayang i binaw nug tunguyed fithingan ni Galwog, ni bachan e bayoʼor e waʼamngin nge honey riy; ma gubin e pinnʼey e yarmiy Somoel nge tay ni fan ngomaed ni nga dab gu mʼaed. Ma gamaed guy e day, nug tunguyed fithingan ni Irreantum, ni yira piliyeg i yoeg minoeg ni, bangi day nib gaaʼ.

6 Me yibi buch nug toeyed e pi tent romaed u dappʼeyanʼ; ma yug aram rogon machane kuggu madaʼ niged e gafgowaenʼ nge pi moʼomawʼ, arragon, ni rib yoʼor ni dabiyog i yoloey ni gubin, ere rib gel e falfalaenʼ nug tayed u napʼan nug taw gaed nga dappʼelʼay; ma gamaed tunguy fithingan e ginnʼem ni Galwog, ni bachan e waʼamngin nib yoʼor riy.

7 Me yibi buch u tomuren ni gag, Nephi, e kug paer u lan farengi binaw ni Galwog ni ke yoʼor e rran, me yib laman Somoel ngog ni be gaʼar: Mu sakʼiy ngam man nga dakean e burey. Me yibi buch nug sakʼiy nggu waen nga dakean e burey, mug meybil ngakʼ Somoel.

8 Me yibi buch ni non Somoel ngog, ni gaʼar: Gur e ngam toey bbarkow, u rogon ni bay gu dag ngom, ni nge yog ni ngam fek e gidiiʼ rom riy ngar thʼibed e rigi day ney nga barbaʼ.

9 Mug gaʼar: Somoel, uw e nggu sor ngay me yog nug pirʼeg e ore ni ngan ranraen nag, ni nge yog nug ngongoliy talin e muruwel ni nggu toey fare barkow ngay u rogon ni kam dag ngog?

10 Me yibi buch ni yoeg Somoel ngog e gin ni nggu sor ngay mug pirʼeg e ore, ni nge yog ni nggu ngongoliy e pi talin e muruwel.

11 Mi yibi buch ni gag, Nephi, e gu ngongoliy e ripow ni ngan ripoy e nifiy ngay, nni falʼeg ko keruʼ e gamanman; ma tomuren ni kug muʼ i ngongoliy e ripow, ni nge yog banʼen ni nggu ripoy e nifiy ngay, mug chafneg lʼagruw i malang nga taʼabang ni nge yog nug afweg e nifiy riy.

12 Ya Somoel e kiyibi madaʼ ko ngiyalʼ ney ma dawori pag maed nggu ngongoliyed e nifiy, u napʼan ni gamaed be milekag u lan wuruʼ e binaw; ya gaʼar: I gag e bay gu falʼeg lamen e ggan romed, ni nge dab kun lith;

13 Ma kubay gu mang magael romed u lan wuruʼ e binaw; ma bay gu falʼeg e woʼ romed, ni faʼan gimed ra fol ko motochiyel rog; ere, nʼumngin i napʼan ni bay um fol gaed ko motochiyel rog ma bay ni powiʼiymed iyaen ko farengi nam nni michmicheg; ma arame bay mu nanged ni gag e ʼug powiʼiymed.

14 Arragon, me gaʼar Somoel ngog; tomuren ni kam taw nga langgin farengi nam nni michmicheg ma bay mu nang ni gag, fare Somoel, e gag Got; ma gag, fare Somoel, e gu chuwegmed u fithik e gafgow; arragon, ni gag e gu fekmed nga wuruʼ e nam nu Jerusalem.

15 Ere, gag, Nephi, e gu athamgil ngu ʼug fol ko pi motochiyel rokʼ Somoel, mug chiyliy ngakʼ walageg ni ngar yulʼyulʼ gow mar gonop gow.

16 Me yibi buch nug ngongoliy talin e muruwel ko ore ni kug ranraen nag ko war.

17 Ma napʼan ni guyeg walageg ni kug waen ni nggu toey ba barkow, mar tabab gow ko nonnon nib togopluw ngog, ni yow be gaʼar: Walagdow e rib aliliy, ya be lemnag ni rayog ni nge toey ba barkow; arragon, ma ku be lemnag ni rayog ni nge thʼaeb e rigi day ney nib gaaʼ nga barbaʼ.

18 Ere aray rogon ni i togopluw walageg ngog, ma yow baʼadag ni dabra muruwel gow, ya dar mich u wunʼrow ni rayog ni nggu toey ba barkow; ma ku dar mich u wunʼrow ni ke yoeg Somoel rogon ngog.

19 Me yibi buch ni gag, Nephi, e ri kireb anʼug ni bachan e kar ʼelʼel nigew gumʼirchaʼrow; ere chiney e napʼan ni ruguyew ni arame kari kireb anʼug me falfalaenʼ gumʼirchaʼrow, ni arame ka ri falaenʼrow ngog, ma yow be gaʼar: gamow manang ni dabiyog ni ngam toey ba barkow, ya gamow manang ni dariy e gonop rom; ere, dabiyog ni ngam muguʼuliy ba muruwel nib gaaʼ.

20 Me gur e ri taʼareb rogom ngakʼ e chitamangdaed, ni gumʼirchaʼen nib meechiyang e wawliy nga orel; arragon, ke wawliy daed nga wuruʼ fare nam nu Jerusalem, ma kad malog gaed u lan wuruʼ e nam ni ke araʼ urngin e duw; nge pi ppin rodaed ni ur muruwel gaed nib gel ni yaed ba diyen; ma kur gargel niged e bitir u lan wuruʼ e binaw ma ur gafgow gaed ni urngin mit, ma kemus ni yigoʼ ku yamʼ e kabay; ere kab felʼ ni gomanga ramʼaed u mʼon ni ngar chuw gaed u Jerusalem ko bin baʼaray ni ngar gafgow gaed u fithikʼ e tiney e kirbaenʼ.

21 Musap, aray urngin e duw nib yoʼor ni kad gafgow gaed u lan wuruʼ e binaw, ni manga boech ma kad falfalaenʼ gaed ko pi chugum rodaed nge binaw ni tafadaed; arragon, ni manga boech ma kad falfalaenʼ gaed.

22 Ma gamow manang ni pi gidiiʼ ni ur moyed u lan e binaw nu Jerusalem e bogi gidiiʼ nib matʼaw; ya ur fol gaed ko pi yalen nge pi gonop rokʼ Somoel, nge gubin e pi motochiyel rokʼ, nrogon e motochiyel rokʼ Moses; ere, gamow manang ni yaed bogi gidiiʼ nib matʼaw; ma chitamangaed e ke turguy u waenʼ ko mang e yaed mrinʼ, ma ke wawliy daed nga palog ni bachan e gadaed be motoyil ko thin rokʼ; arragon, nge walagmow e ku taʼareb rogon ngakʼ. Ere aray rogon e thin ni i nonnon nag walageg ma yow be togopluw nag ngomow.

23 Me yibi buch ni gag, Nephi, e gunon ngorow nug gaʼar: Be mich u wunʼmew ni pi chitamangdaed, ni yaed fapi gidiiʼ ku Israel, e yog ni ngan powiʼiyraed ngar chuw gaed u paʼ fapi Egyptian ni faʼanra dar fol gaed ko thin rokʼ Somoel?

24 Arragon, gimew be lemnag ni rayog ni ngan chuwegraed u kalbus, ni fare Somoel e gomanga de motochiyel nag ngakʼ Moses ni nge powiʼiyraed nga wuruʼ e kalbus?

25 Chiney e gimew manang ni fapi gidiiʼ ku Israel e ur moyed u kalbus; ma gimew manang nni piiʼ e muruwel ngoraed nib moʼomawʼ, ni rib gel e gafgow ni ur tayed riy; ere, kam nangew ni banʼen nib mangil nib tʼuf roraed, ni ngan chuwegraed u kalbus.

26 Chiney e gimew manang ni Moses e motochiyel Somoel ngakʼ ni nge rinʼ e binem e muruwel ni rib gaaʼ; ma gimew manang nu dakean e thin rokʼ me saey farengi day ni Red Sea nge yaen barbaʼ aray me yaen barbaʼ aram, ma ranoed nga barbaʼ u dakean e buutʼ nib malikʼ.

27 Machane gimew manang ni fapi Egyptian e ra lumoch gaed u lan e Red Sea, ni yaed fapi salthaw rokʼ Pharaoh.

28 Ma gimew manang ni un piiʼ garaed ni manna u lan wuruʼ e binaw.

29 Arragon, ma kagmew manang Moses, ni thin rokʼ u dakean gelingin Got ni bay rokʼ, me bilig bangi war, me yibe raen riy, ngar unumed fapi gidiiʼ ku Israel nge mʼay e balel roraed.

30 Ma yug aram rogon ni powiʼiyraed, ni fare Somoel ni Got roraed, ma Tabiyul roraed, e be mʼon, nga i powiʼiyraed ni rran ma be gaelʼ woʼraed ni nepʼ, ma be rinʼ ngoraed gubin banʼen nib tʼuf ni ngan rinʼ ko gidiiʼ, machane ra ʼelʼel niged e gumʼirchaʼ roraed mar maʼew niged laniyaenʼraed, mar togopluw gaed ngakʼ Moses nge fare Got nib riyulʼ ma ba fos.

31 Me yibi buch nu dakean e thin rokʼ me liiʼraed; ngo dakean e thin rokʼ me powiʼiyraed; ngo dakean e thin rokʼ me rinʼ gubin banʼen ni fan ngoraed; ma dariy banʼen ni irinʼ ni derinʼ u dakean e thin rokʼ.

32 Me tomuren ni kar thʼaebed fare lulʼ ni Jordan nga barbaʼ me piiʼ gelingraed ngar tulufed e gidiiʼ ko rangi nam nem, arragon, mar werwer gaed min liiʼraed.

33 Ere chiney, gimew be lemnag ni gidiiʼ ko rangi nam ney, ni ur moyed u lan farengi nam nni michmicheg, ni tulufraed e pi chitamangdaed, gimew be lemnag ni yaed ba matʼaw? Musap gow, gube gaʼar ngomew, Dangay.

34 Gimew be lemnag ni manga boech ma rayog ni nge tʼuf e pi chitamangdaed ngoraed ni faʼan manga ur pired nib matʼaw e paer roraed? Gube gaʼar ngomew, Dangay.

35 Musap gow, fare Somoel e gubin e gidiiʼ ma taʼareb u waenʼ; chaʼ nib matʼaw e ngongol rokʼ e ba mʼagaenʼ Got ngakʼ. Machane muguyew, tiney e gidiiʼ e kar keruʼuyed gubin e thin rokʼ Got, ma kar loel gaed nga fithikʼ e kireb; ma damomuw rokʼ Got ni poloʼ e ke garar nga dakeanraed; me Somoel e kireb nag waʼathan e gi nam nem ni fan ngoraed, me tawaʼath nag ni fan ngakʼ e pi chitamangdaed; arragon, i kireb nag ni fan ngoraed mar gafgow gaed, me tawaʼath nag ngakʼ e pi chitamangdaed me milsuwon ngoraed.

36 Musap gow, fare Somoel e ke sunmiy e fayleng ni ngan paer riy; ere me sunmiy e pi bitir rokʼ ni ngar tafanyed.

37 Ma ire ma kunuy e gidiiʼ nib matʼaw, ma mathang mit e gidiiʼ nib kireb.

38 Ma ire ma powiʼiy e piʼin nib matʼaw nga lan e nam ni thʼabi felʼ, me thang mit e piʼin kireb, me kireb nag e binaw ni bachraed.

39 Ire suwon e tharmiy, ni bachan e ireram gilʼilungun, ma re fayleng ney e ireray tagilʼ i ay.

40 Mab murnguy e piʼin ni yaed be tay niʼir e Got roraed. Musap gow, ma tʼufeg e pi chitamangdaed, make falʼeg ba mʼag nga thilraed, arragon, ni boed Abraham, Isaac, nge Jacob; ma kubay u waenʼ e pi mʼag ni tay; ere, fekraed ngar chuw gaed u lan fare nam nu Egypt.

41 Ma i yalʼuwegraed u lan wuruʼ e binaw nga rogon e gechig ni piiʼ ngoraed; ya kar ʼelʼel niged gumʼirchaʼraed, ni boed rogon ni gimew be rinʼ; ma fare Somoel e gechig nagraed ni bachan e denen roraed. I piiʼ e porchoyog ni be dramrom nge changeg iyaen nga fithikʼraed; ma tomuren ni kan kʼaedraed me bing woʼen ngoraed ni nge yog ni ngar gol gaed; ma nʼen ni ngar rinʼed e ngar sap gaed; ma bachan e kemus ni rib moem e kanawoʼ riy, ara rib moem, ere boʼor iyaed e yimʼ.

42 Ma ra ʼelʼel niged gumʼirchaʼraed u bayay ngo bayay, mar togopluw gaed ngakʼ Moses, ma kur togopluw gaed ngakʼ Got; machane, gimew manang ni powiʼiyraed ko farengi nam nni michmicheg u gelingin ni dariy puluwon.

43 Ma chiney, tomuren gubin e pinnʼey, make taw nga napʼan ni kar almarin gaed ko kireb, arragon, ni ke chugur ni ngar loel gaed nga fithikʼ; ma gag e dagnang machane ireray e ngiyalʼ ko biney e rran ni bay ni liiʼraed; ya gag e gumnang ni fare rran ni thingar ni liiʼraed e ra yib, ma kemus ni buchʼuw iyaed e ra magaey, ni bay ni fekraed nga palog nga kalbus.

44 Ere, fare Somoel e motochiyel ngakʼ e chitamag ni thingari chuw nge yaen nga langgin wuruʼ e binaw; nge fapi Jews e ku ur gayed rogon ni ngar feked e yafos rokʼ; arragon, nge gimew ni kuʼum gayew rogon ni ngam fekew e yafos rokʼ; ere, gimew e tamathang pogofan u lan gumʼirchaʼmew ma ku taʼab rogmew ngoraed.

45 Gimew ba papay i rinʼ e ngongol ni kireb mab sagaʼal ni nge yib ngaenʼmew fare Somoel ni Got romew. Kam guyew ba angel, make non ngomew; arragon, kam rungʼagew laman bayay ngo bayay; ma ke non ngomew nib sumunguy ni be kathkath, machane damur nangew fan, ya dar yog ni ngam thamiyew e thin rokʼ; ere, ke non ngomew ni boed gaʼangin ni lingan e dirraʼ, ni rurug e fayleng ni gowa nge saey nge ruw rabaʼ.

46 Ma kagmew manang nu dakean gelingin e thin rokʼ ma rayog ni nge gatheay e fayleng; arragon, ma gimew manang nu dakean e thin rokʼ ma rayog ni nge pacheg yungi banʼen nib madodngol, nge yungin ba tagpas ni nge madardar. O, ere, uw rogon, ma be yoeg ni ngam ʼelʼel nigew gumʼirchaʼmew?

47 Musap gow, kari gafgow e yaʼel rog ko amith ni bachmew, nge gumʼirchaʼeg ni dab ki bung ko amith; ya gube rus nri chey min chuwegmew ni dariy nʼumngin i napʼan. Musap gow, kug sug ko fare Kan ni Thothup rokʼ Got, ni arame be mʼay gelingin dugreg.

48 Ere chiney e yibi buch u napʼan nugog e pi thin ney mar damomuw gow ngog, mar athapegew ni ngar yinʼew gag nga maday nib toʼaer; ma napʼan ni rabow ni ngar koelew gag mug non ngorow, ni gguʼar: U dakean fithingan fare Got ni Gubin ma rayog rokʼ, e gube chiyliy ngomew ni dab mu math gow ngog, ya bay gelingin Got rog, ni ke chugur ni muʼuruf dugreg; ma chaʼ ni ra math ngog e ra malikʼ ni boed bagaf i yuwan e gakʼiy; ma ire dabiyog ni nge taʼareb gelingrow Got, ya Got e rayog ni nge liiʼ.

49 Me yibi buch ni gag, Nephi, e gu weliy ngorow ni nga dab kur nonnon gow nib togopluw ngakʼ e chitamangrow; ma ku dabra telegew e ayuw rorow ngog, ya Got e ke motochiyel nag ngog ni thingar gutoey bbarkow.

50 Mu gguʼar ngorow: Faʼanra ke motochiyel nag Got ngog ni nggu rinʼ gubin banʼen ma rayog ni nggu rinʼ. Faʼanra motochiyel ngog ni ngog ko rangi day ney, ni nge binaw, ma ra binaw; ma faʼan gura yoeg, ma ra buch.

51 Ere chiney, faʼanra Somoel e bay ba gelingin rokʼ ni aray rogon, ma bayoʼor bogi maʼangʼang ni ke rinʼ u fithikʼ e gidiiʼ, meʼere buʼuw rogon ni dabiyog ni midil nag ngog ni nggu toey bbarkow?

52 Me yibi buch ni gag, Nephi, e bayoʼor bogi banʼen nug weliy ngakʼ walageg, ni arame gechigaenʼrow ma dakiyog ni ngar togopluw gow ngog; ma ku daki gaʼaraenʼrow ni ngar mathegew paʼrow ngog, fa ngar mathegew buguli paʼrow ngog, ni bukun e rran. Ere chiney e daki gaʼaraenʼrow ni ngar rinʼew e rennʼey ni bachan e kar rus gow ni yow ra fangfengʼ u pʼoewcheg, ere rib gel madgun fare Kan ni Thothup rokʼ Got; ere aray rogon ni gagyeg nga dakeanrow.

53 Me yibi buch ni gaʼar Somoel ngog: Mu kʼiyeg paʼam bayay ngakʼ walagem, ma dabra malikʼ gow u pʼoewchem, machane bay gu rurugrow, ni yoeg Somoel, ma biney e gura rinʼ, ni bachan e ngar nangew ni gag fare Somoel ni Got rorow.

54 Me yibi buch nug kiyeg paʼag ngakʼ walageg, ma dar malikʼ gow u pʼoewcheg, machane fare Somoel e rurugrow, ni boed rogon e thin ni i yoeg.

55 Ere chiney, e ra gaʼar gow: Kug nangew ni riyulʼ ni bay Somoel rom, ya kug nangew ni gelingin fare Somoel e ke rurugmow. Mar awgow nga butʼ u pʼoewcheg, ma ranow ni ngar siroʼ gow ngog, machane dag pagrow, mu gguʼar: I gag walagmew, arragon, ni walagmew nib bitir; ere, mu siroʼ gow ngakʼ fare Somoel ni Got romew, ma gimew liyoer ngakʼ e chitamangmew nge chitiningmew, ni gomanga yog ni nʼuw napʼmew u dakean farengi nam ni bayi piiʼ fare Somoel ni Got romew ngomew.