1 Me yibi buch ni fare Somoel e motochiyel ngog, mug ngongoliy e plates ko wasey ni fan ko nge yog ni ngug ker e pi chep ko gidiiʼ rog nga dakean. Ngo dakean fapi plates ni kug ngongoliy e guker e chep rokʼ e chitamag nga dakean, nge kupi milekag romaed nu lan wuruʼ e binaw, nge pi prophecy rokʼ e chitamag; nge tin yoʼor ko pi prophecy rog e kug ker nga dakean.

2 Ma da ugnang ko ngiyalʼ nem nug ngongoliy e tinem ni bayi motochiyel nag Somoel ngog ni nggu ngongoliy e tiney e plates; ere, pi chep rokʼ e chitamag, nge chep ni morngaʼagen e pi chitamangin, nge oren ni salapmaed u lan wuruʼ e binaw e ni ker nga dakean e tin sommʼon e plates niʼir e kug weliy morngaʼagen; ere, pinʼen ni mʼug u mʼon ni nggu ngongoliy e tiney e plates e rib riyulʼ, nib gaaʼ ni tin baʼaram ni kan weliy morngaʼagen u dakean e tin sommʼon e plates.

3 Ma tomuren ni kug ngongoliy e tiney e plates ni bachan e kan motochiyel nag ngog, i gag, Nephi, me taw ba motochiyel ngog ni fare muruwel nge fapi prophecy, ni tin ba tamilang mab gaʼfan riy, e thingar ni yoloey nga dakean e tiney e plates; ma pinʼen ni kan yoloey e thingar ni chaʼariy ni fan ko powoʼ ngakʼ e gidiiʼ rog, ni bay ra tafnayed faregi nam, ma ku fan nga boech banʼen nib gonop, ni bogi gonop ni Somoel e manang fan.

4 Ere gag, Nephi, e gu ngongoliy reb e chep nga dakean yug yu yang e plates, ni be dag babyoren, ara be dag nib tamilang babyoren e pi mael nge pi maleʼeg thin nge pi gafgow ko gidiiʼ rog. Ma pinnʼey e kug rinʼ, mug motochiyel nag ngakʼ e gidiiʼ rog e nʼen ni ngar rinʼed u tomuren ni kug chuw; ma pi plates ney e thingari afu rebo mfen nga reb, ara rebo profet nga reb, nge madaʼ ko ngiyalʼ niki piiʼ Somoel boech e motochiyel.

5 Ma reb e chep ni morngaʼageg nug falʼeg e yungney e plates e bay fin nni piiʼ; ere, musap gu tabab ngay ni boed ni gu weliy; ma gurinʼ e pinnʼey ni fan ko nge yog ni tin ba thothup banʼen e ngan chaʼariy ni fan ko naʼab rokʼ e gidiiʼ rog.

6 Machane, dagur yoloey bogi banʼen ni demutrug nga dakean e pi plates ney ma kemus ni faʼanra gube lemnag ni bogi banʼen nib thothup. Ere chiney, faʼanra kug oloboch, ma kuboed ngakʼ e piʼin kakrom; gathi gube gay e towaey ni bachan boech e gidiiʼ, machane bachan e moʼowaer ni bay rog, u rogone dagur, e gube siroʼ nag.

7 Ya pinʼen niʼir e be lemnag boech e gidiiʼ ni rib gaʼfan, ko yaʼel nge dagur, e ma lemnag boech e gidiiʼ ni de gaʼfan ma kar tayed nga butʼ nga ranoed u dakean. Arragon, ni boed rogon fare Got ku Israel ni tay e gidiiʼ nga butʼ nga u ranoed u dakean; gu be yoeg, ni ka ranoed u dakean machane nggu piliyeg i yoeg—kar nʼiged fan, ma darur fol gaed ko pi fanow rokʼ.

8 Ere musap bay yib, ni boed rogon ni yoeg fare angel, u lan nelʼ miriʼay e duw ko ngiyalʼ ni chuw e chitamag u Jerusalem.

9 Ma fapi gidiiʼ nu fayleng, ni bachan e pi denen roraed, e yaedra pufthin nag u banʼen ni dariy fan; ere yaedra toey, ma be athamgil; ma yaedra liiʼ, ma be athamgil. Arragon, mi yaedra thuw nga dakean, ma be athamgil, ni bachan e murnguy rokʼ nib sumunguy nge gumʼaenʼ rokʼ ngakʼ e gidiiʼ.

10 Ma fare Got rokʼ e pi chitamangdaed, nni powiʼiyraed nga wuruʼ yu Egypt, nga wuruʼ e kalbus, ma i ayuwegraed ma be matangiyraed u lan wuruʼ e binaw, arragon, fare Got ku Abraham, nge Isaac, niʼir fare Got ku Jacob, ni piiʼ ir, ni boed rogon ni yoeg fare angel, ni beeʼ nib moʼon, nga lan paʼ e pi gidiiʼ ni kireb, ni ngan kruth nag ngalang, ni boed rogon ni yoeg Zenock, ni bay ni kruth nag, ni boed rogon ni yoeg Neum, ma bay ni kʼeyag nga langgin e loew, ni boed rogon ni yoeg Zenos, ni weliy ni morngaʼagen fare dalip i rran ni paer nib nepʼ, ni ireram e pow riy ko yamʼ ni tay ngakʼ e piʼin ni yaedra tafnaʼ e pi donguch u lan e day, ma bagaʼ nni piiʼ ni fan ko piʼin ni gidiiʼen yu Israel.

11 Ya gaʼar fare profet: Fare Somoel ni Got e rra yib ngakʼ gubin fapi gidiiʼ ku Israel ko re rran nem, bochi yaed e ra yib ngoraed u dakean e thin rokʼ, ni bachan e yaed ba matʼaw, nge madaʼ ko ngiyalʼ ni kar falfalaenʼ gaed ma kar thap gaed, ma boechi yaed e ra yib ngoraed u gelingin e dirraʼ ni be choeb nge pi uluch ni be mat, ni yokoʼ, nge nifiy, nge ath, nge lumor, nge yabaʼal ni ra tay e fayleng, nge pi burey ni bayi sum.

12 Ma gubin e pinnʼey e riyulʼ nra yib, ni yoeg fare profet i Zenos. Nge pi war nu fayleng e rra pilpil; ma bachan lingan e fayleng ni be migir, mab yoʼor e pi pilung ko fapi donguch u maday ni bayi thogthog fare Kan ni Thothup rokʼ Got u dakeanraed, me lungraed: Fare Got ko fayleng e ke gafgow ko amith.

13 Ma piʼin ni yaed bay u Jerusalem, e gaʼar fare profet, bayi gafgow nagraed gubin e gidiiʼ, ni bachan e kar kruth niged fare Got ku Israel, ma kar chefeged gumʼirchaʼraed, ni yaed be fek yathin e pi pow nge pi maʼangʼang, nge fare gelingin nge falʼngin fare Got ku Israel.

14 Nge bachan e kar chefeged e gumʼirchaʼ roraed, ni yoeg fare profet, ma kar dariy fan niged Fachaʼ nib Thothup ku Israel, ere yaedra garbael u lan e biney e yafos, ma yaedra yimʼ, mar manged e hiss nge tabnathin, min fananikayraed u gubin e pi nam.

15 Yug aram rogon machane, napʼan ni ra yib e re rran nem, ni yoeg fare profet, ni bay dab kur chefeged e gumʼirchaʼ roraed nge togopluw ngakʼ Fachaʼ nib Thothup ku Israel, ma arame bay fini yib ngaenʼ fapi mʼag ni tay ngakʼ e pi chitamangraed.

16 Arragon, ma arame fini yib ngaenʼ fapi donguch nu maday, arragon, nge gubin fapi gidiiʼ ku Israel, ni bay gu kunuy raed nga taʼabang, ni yoeg fare Somoel, ni boed rogon fapi thin ni yoeg fare profet i Zenos, ko fare aningeg i tabthungen e fayleng.

17 Arragon, nge fayleng ni poloʼ e bayi guy fare woʼen e thap rokʼ Somoel, ni yoeg fare profet; gubin e pi nam, nge pi mfen, nge pi gidiiʼ ma ra felʼ waʼathraed.

18 Ma gag, Nephi, e kug yoloey e pinnʼey ngakʼ e pi gidiiʼ rog, ni fan ko gomanga yigi yog nug pingegaenʼraed ngar lemniged fare Somoel ni Tabiyul roraed.

19 Ere, gube non ngakʼ gubin e gidiiʼ ku Israel, ni faʼanra thap e pinnʼey ngoraed.

20 Ya musap, kug rinʼ e muruwel nib lʼeag rogon ko yaʼel, ni ke yib nag e magaer ngog ni gubin e ʼulʼul u doewag make magaf, ya piʼin ni yaed bay u Jerusalem; ni faʼan gomanga dariy e murnguy rokʼ Somoel, ni nge dag ngog e pinʼen ni morngaʼagraed, ni boed ko pi profet ni kakrom, ma kug ra un ko yamʼ.

21 Ma riyulʼ ni dag ngakʼ e pi profet ni kakrom gubin banʼen ni morngaʼagraed; ma ku aram rogon niki dag ngakʼ boʼor e gidiiʼ morngaʼagmaed; ere, dabisiy nib tʼuf ni nggu nanged morngaʼagraed ya kan yoloey nga dakean fapi plate ni brass.

22 Ere chiney e yibi buch ni gag, Nephi e gufil ngakʼ walageg e pinnʼey; me yibi buch ni gag e gu biʼeg boʼor banʼen ngoraed, ni kan ker nga dakean fapi plates ni brass, ni gomanga ra nanged morngaʼagen e pi muruwel rokʼ Somoel u boech e nam, u fithikʼ e gidiiʼ ni kakrom.

23 Ere gag e gubiʼeg boʼor banʼen ngoraed ni kan yoloey nga langgin e babyor ku Moses; ni gomanga yog nug pingeg laniyaenʼraed nge michaenʼraed ngakʼ fare Somoel ni Tabiyul roraed gag e gubiʼeg ngoraed e pinʼen ni yoloey fare profet i Isaiah; ya gube taʼareb nag gubin e chep nib thothup ngomaed, ni gomanga felʼ rogmaed riy nge naʼab romaed.

24 Ere gunon ngoraed, ni gube gaʼar: Mmotoyil gaed ko thin ko fare profet, gimed e piʼin ni kam magaey gaed ko gidiiʼ ku Israel, ni ba paʼ i paʼangin ni mʼing, mmotoyil gaed ko thin ko fare profet, ni yoloy ni nge yaen ngakʼ gubin e gidiiʼ ku Israel, ma ngam taʼareb niged gimed ngoraed, ni gomanga yog e athap ngomed ni boed rogon pi walagmed ni yaed e mu chuw gaed roraed; ya aray rogon ni yoloey fare profet.