1 Ere musap gaed, i yibi buch ni fare Somoel e non ngakʼ e chitamag, arragon, i non ngakʼ u malikʼay, ni gaʼar ngakʼ: Nge felʼ waʼatham gur Lehi, ni bachan e pinʼen ni kam rinʼ; nge bachan e kam yulʼyulʼ, ma kamoeg ko pi gidiiʼ ney fapi nʼen nug tay chilen ngom, ere, mar lemniged ni ngar feked e pogofan rom.

2 Me yibi buch ni motochiyel nag Somoel ngakʼ e chitamag, ni non ngakʼ u malikʼay, ni thingari fek e tabinaew rokʼ ngar chuw gaed nga ranoed nga wuruʼ e binaw.

3 Me yibi buch ni i fol ko thin rokʼ Somoel, ere rinʼ ni boed rogon ni chiyliy Somoel ngakʼ.

4 Me yibi buch ni arame chuw nge yaen nga wuruʼ e binaw. Me digey e naʼun rokʼ, nge binaw ni ire tafen, nge gol rokʼ, nge silber rokʼ, nge pinʼen nib tʼuf rokʼ, ma dariy banʼen ni fek nge un ngakʼ, ma kemus ni chon e tabinaew, nge ggan, nge pi tent rokʼ, me chuw nge yaen nga wuruʼ e binaw.

5 Me yib u charen e dappʼelʼay ko Red Sea; me milekag u wuruʼ e binaw nib chugur nga mathil ko Red Sea; ma aram ma ur milekag gaed e tabinaew rokʼ, ni arame ninaʼ rog, i Sariah, nge walageg nib ilal, ni Laman, Lemuel, nge Sam.

6 Me yibi buch ni ke gaman dalip e rran ni ke milekag u wuruʼ e binaw, me toey e tent rokʼ u lan ba loway u taʼaben ba lulʼ.

7 Me yibi buch ni ufung ba altar ni malang, me piiʼ e maligach ngakʼ Somoel me pining e magaer ku Somoel ni Got romaed.

8 Me yibi buch ni tunguy fithingan e re lulʼ nem ni, Laman, ni yaen nge yaeni pooʼ nga langgin e Red Sea; ma fare loway e baʼ u mathil nib chugur nga langan e re lulʼ nem.

9 Ma napʼan ni guy e chitamag ni raen e re lulʼ nem e yaeni og nga fithikʼ fare alublub i raen u Red Sea, me non ku Laman, ni gaʼar: O ayugum boed e re lulʼ ney, ni gubin e ngiyalʼ ni be yaen i mapʼ nga fithikʼ alubluben gubin mit e felʼ.

10 Maki gaʼar ngakʼ Lemuel: O ayugum boed ere loway ney, nib dugil u butʼ ni dar mithmith ma dar chef nga orel ko motochiyel rokʼ Somoel!

11 Chiney e yoeg e pinnʼey ni bachan e gelyuwan rokʼ Laman nge Lemuel; ya boʼor banʼen ni yow be nonnon nag nib togopluw ngakʼ e chitamangrow, ni fan e ba moʼon ni yima piliyeg e changar rokʼ nge guy boech banʼen, ma ke wawliyraed nga wuruʼ e nam nu Jerusalem, ni kar paged e binaw roraed, nge gol roraed, nge silber roraed, nge pinʼen nib tʼuf roraed, ni ngar mʼaed u wuruʼ e binaw. Ma ka roegew e pinnʼey ni ke rinʼ ni bachan e meechiyang u laniyaenʼ.

12 Ma yug aray rogon ni Laman nge Lemuel, e yow ba ilal, ma kar nonnon gow nib togopluw ngakʼ e chitamangrow. Ra nonnon gow ni bachan e darur nangew fan e muruwel rokʼ Got ni ire sunmiyrow.

13 Ma kude mich u wunʼrow ni yu Jerusalem, ni re nam nem nib gaaʼ e rayog ni ngan gatheay ni boed rogon ni ke yoeg e pi profet. Ma ku taʼab rogrow ngakʼ e pi Jews ni ur moyed u Jerusalem, ni ur gayed rogon ni ngar feked e pogofan rokʼ e chitamag.

14 Me yibi buch ni non e chitamag ngorow u lan e loway ni Lemuel, nib gel, ni ke sug ko fare Kan ni Thothup, nge yaeni madaʼ ko ngiyalʼ ni kar tʼon gow u pʼoewchen. Me thang e thin u lʼugunrow, ma dakiyog ni ngar nonow nib togopluw ngakʼ; ere rrinʼew ni boed rogon e tin ni ke chiyliy ngorow.

15 Ma arame paer e chitamag u lan e tent.

16 Me yibi buch ni gag, Nephi, ni rigub bitir, machane gub gaaʼ ni gidiiʼ, ma kug baʼadag ning gu nang urngin e pi riyulʼ rokʼ Got nib miith, ere, mug yoer ngakʼ Somoel; me piiʼ ngog, me munguy nag gumʼirchaʼeg ma aram me mich u wunʼug urngin e thin ni ke weliy e chitamag; ere dag togopluw ngakʼ ni boed rogon walageg.

17 Mug non ngakʼ Sam, ni nge nang fapi nʼen ni dag Somoel ngog u dakean e Kan ni Thothup rokʼ. Ma aram me mich u waenʼ e pi thin rog.

18 Machane, amuguy, Laman nge Lemuel e dabra motoyil gow ko thin rog; ere gelingin e kirbaenʼ rog ngorow ni bachan e kar ʼelʼel nigew e gumʼirchaʼ rorow, mug yoer ngakʼ Somoel ni fan ngorow.

19 Me yibi buch ni non Somoel ngog, ni gaʼar: Nge felʼ waʼatham gur, Nephi, ni bachan e mich rom, ya gabe gay rogon ni ngam fol rog, u fithikʼ e sobutʼaenʼ.

20 Ma nʼumngin i napʼan ni bay um fol ko pi motochiyel rog, ma gara monʼog, ma yira wawliyem nga bangi nam nni michmicheg; arragon, nga bangi nam ni kug yarmiy ni fan ngom; arragon, bangi nam ni thʼabi felʼ u fithikʼ e pi nam.

21 Ma nʼumngin i napʼan ni bay i togopluw gal walagem ngom, ma yow ra palog rokʼ Somoel.

22 Ma nʼumngin i napʼan ni bay um fol ko motochiyel rog, me gur e bay mu paer ni gab gaaʼ ma gab tafanow rokʼ walagem.

23 Ya amusap, u lan e re rran nem ni yow ra togopluw ngog, ma bay gu kireb nag waʼathrow, ni rib gel ma arame dakuriy gelingrow ni ngar gagyeg nigew pifakam, ma ra buch ni faʼan ku yaedra togopluw ngog.

24 Ma faʼanra yaen i chey ni kar togopluw gaed ngog, ma bay ra pired nga ur gafgow niged pi fakam, ni nge yib nag ngaenʼraed e pinʼen ni kakrom.