1 Me yibi buch ni arame gag, Nephi, e gumuʼ ko numon ngakʼ Somoel, mug sul ko tent rokʼ e chitamag.

2 Me yibi buch ni arame non ngog, ni gaʼar: Amusap kug likʼay nag ba likʼay, ni ke motochiyel nag Somoel ngog riy ni gur nge walagem e ngam suloed nga Jerusalem.

3 Ya amusap, Laban e bay chipin e pi Jews rokʼ nge chipin e thaʼ ko pi chitamag ni kakrom, ni kan ker nga dakean e plate ni brass.

4 Ere arfan, ni ke motochiyel nag Somoel ngog ni gur nge walagem e thingar mu suloed nga tafen Laban, ngam gayed e pi chep nem, ngam feked ngam baed ngaray nga wuruʼ e binaw.

5 Ere chiney, amuguy, walagem e yow be nonnon, ni yow be yoeg ni ka yigi gel e moʼomawʼ ko rennʼey ni kugog ngorow ni ngar rinʼew, machane gathi gag e thin rog ni kugog ngorow ni ngar rinʼew, ya ba motochiyel rokʼ Somoel.

6 Ere ngam man, fakag, me gur e bayi falʼeg Somoel waʼatham, ya gur e damur un ko nonnon.

7 Me yibi buch ni arame gag, Nephi, e gguʼar ngakʼ e chitamag: gag e bay guwaen nggu rinʼ e pinʼen ni ke motochiyel nag Somoel, ya gumnang ni Somoel e dabi piiʼ e motochiyel ngakʼ e gidiiʼ, me pag ni dabi bing woʼen ngoraed ni nge yog ni ngar muguʼuliyed e pinʼen ni ke motochiyel nag ngoraed.

8 Me yibi buch u napʼan ni rungʼag e chitamag e pi thin ney me falfalaenʼ nib gel, ya ke nang ni ke falʼeg Somoel waʼathag.

9 Ere gag, Nephi, nge pi walageg e gu milekag gaed nga wuruʼ e binaw, ni kug feked e tent romaed, ni nggu waroed ko nam nu Jerusalem.

10 Me yibi buch u napʼan ni kug waroed iyaen ko nam nu Jerusalem, me gag nge walageg e gubaed gu puruyʼ gaed.

11 Ma gamaed towaliy—ni nge mudugil ko miniiʼ romaed e nge yaen nga tafen Laban. Me yibi buch ni ke dugil nga dakean Laman; ma arame yaen Laman nga tafen Laban, me non ngak u napʼan ni ke yaeni paer nga butʼ u naʼun rokʼ.

12 Me ning ngakʼ Laban fapi chep ni kan yoloey nga dakean e plate ni brass, ni bay chipin e thaʼ ko chitamag riy.

13 Ma aram, e yibi buch ni puwaenʼ Laban me yinʼ nga wean nge chuw u pʼoewchen; ya de magaenʼ ngay ni nge piiʼ e pi chep nem ngakʼ. Ere me gaʼar ngakʼ: Muguy, gur e gab moroʼroʼ, ere nggu liiʼem nga mumʼ.

14 Machane me miil Laman rokʼ, nge yibi yoeg ngomaed e pinʼen ni ke rinʼ Laban. Ma arame ri gel e kirbaenʼ romaed, me yaen ni nge sul walageg ngakʼ e chitamag nga wuruʼ e binaw.

15 Machane mug gaʼar ngoraed: Woed nib fos Somoel, nge woed ni gaed bafos, ma dabda suloed ngakʼ e chitamangdaed nga wuruʼ e binaw nge yaeni madaʼ ko ngiyalʼ ni ke yog ni ngad muguʼuliyed e pinʼen ni ke motochiyel nag Somoel ngodaed.

16 Ere arfan, ni ngad yulʼyulʼ gaed i koel falan e pi motochiyel rokʼ Somoel; ere nga daroed ko binaw rokʼ e chitamangdaed, ni ireram e gin ni pag e gol nge silber riy, nge gubin mit e falaʼab. Ma gubin e pinnʼey ni aray rogon ni ke rinʼ e bachan e pi motochiyel rokʼ Somoel.

17 Ya manang ni bayi mogothgoth yu Jerusalem, ni bachan e pi denen rokʼ e gidiiʼ.

18 Ya amusap, kar piiʼed keruʼraed ko thin rokʼ e pi profet. Ere, faʼanra nge paer e chitamag u lan e re binaw nem u tomuren ni kan motochiyel nag ngakʼ ni nge chuw riy, musap, arame kura un ko yamʼ. Ere arfan, nib tʼuf ni thingari chuw u lan e re binaw nem.

19 Ere aray rogon, ba gonop rokʼ Got ni thingar dafeked e pi chep ney, me yog ni ngad chaʼariyed e thin rokʼ e pi chitamangdaed ni fan ngakʼ e pi bitir rodaed;

20 Ma ngki yog ni ngad chaʼariyed ni fan ngakʼ e pi bitir rodaed e thin ni yoeg e pi profet nib thothup, ni kan piiʼ ngoraed u dakean e Kan ni Thothup nge gelingin Got, ni aram ko tabolngin e fayleng, nge yibi madaʼ ko chiney.

21 Me yibi buch niʼug non ngakʼ walageg ni aray rogon ni gomanga wurengaenʼraed ngar yulʼyulʼ gaed i koel falan e pi motochiyel rokʼ Got.

22 Me yibi buch ni gu waroed ko binaw ni tafenmaed, ma gamaed kunkunuy nga taʼabang e pi gol romaed, nge silber romaed, nge gubin e pi chugum romaed nib tolang puluwon.

23 Me tomuren ni kug kunkunuyed e pinnʼey nga taʼabang, ma gamaed yaen bayay nga tabnaew rokʼ Laban.

24 Me yibi buch ni gu waroed ngakʼ Laban, ni gamaed be athapeg ni nge piiʼ fapi chep ni kan yoloey nga dakean e plate ni brass, ma gamaed piiʼ ngakʼ e pi gol romaed, nge silber romaed, nge gubin e pi chugum romaed nib tolang puluwon.

25 Me yibi buch u napʼan ni guy Laban e chugum romaed, ni aram fini yoʼor, me chogow nag ni rib gel, me yinʼmaed nga wean, me lʼoeg e pi tapigpig rokʼ ni ngan liiʼmaed nggu mʼaed, ya nge yog ni nge fek e chugum romaed.

26 Me yibi buch ni gu miil gaed ni be tulufmaed e pi tapigpig rokʼ Laban, ma aram mug digeyed e chugum romaed nga tomur, ma arame yaeni paer ni ke aw nga paʼ Laban.

27 Me yibi buch ni gu miil gaed nga wuruʼ e binaw, ma deyog ni koelmaed e pi tapigpig rokʼ Laban, ma gamaed miith nga thilin bang i war.

28 Me yibi buch ni arame ri damomuw Laman ngog nib gel, ma ki damomuw ngakʼ e chitamag; nge Lemuel, ya be fol ko thin rokʼ Laman. Ere Laman nge Lemuel e bayoʼor e thin nib gel ni u roegew ngomow, e gal nib bitir i walagrow, muʼur liiʼew gamow nga baley i gakʼiy.

29 Me yibi buch u napʼan ni yow be liiʼmow nga baley i gakʼiy, me yib ba angel rokʼ Somoel nge yibi sakʼiy nga pʼoewchrow, me non ngorow ni be gaʼar: Mang ni gimew be liiʼ walagmew nib bitir nga baley i gakʼiy? Dam nangew ni Somoel e ke melʼeg niʼir e nge mang gaaʼ romew, ni rennʼey e aray rogon ni bachan e denen romew? Ere musap gaed, ngam suloed nga Jerusalem bayay, ya fare Somoel e bayi piiʼ Laban nga paʼmed.

30 Ma tomuren ni ke non fare angel ngomaed, me yaen.

31 Ma tomuren ni ke yaen fare angel, ma Laman nge Lemuel e kur tabab nigew bayay e nonnon, ni yow be gaʼar: Uw rogon ma rayog ni nge piiʼ Somoel Laban nga paʼadaed? Ya ir beeʼ nib moʼon nib gaaʼ gilʼilungun, ni rayog ni nge lʼoeg wugem i gidiiʼ, arragon, ma rayog ni nge liiʼ wugem i gidiiʼ; ere mang fan ni dabiyog ni nge liiʼdaed?