1 Ac inge nga, Jacob, sifilpac sramsram nuh suwos, mwet sacohk wiyuck, ke lah suwohswohs se inge ma nga sramsramkihn kac ah.

2 Tuh liye, olwelah ma kuht eis ac pa olweacng nuh sesr ma fal nuh ke moul in mahno; ohinge, oacna ke ahkkahlwemyeyuck nuh sihk lah puhkantwen sin tuhlihk nahtuhsr fah misac ke mahno ke srihpen suhlahlahlfongi, ne ohinge, God El fah pahkotwen nuh sin mwet pucspucs; ac tuhlihk nahtuhsr fah sifilpac fohlohkihnyuckyak, tuh elos in kuh in tuhkuh nuh ke ma suc ac fah sang nuh selos etwacack pwacye ke Mwet in Molwelah lalos.

3 Ohinge, oacna ke nga fahk nuh suwos, enenuh in fal tuh Kraist—tuh ke fong tari ah sie lipufacn sramsram nuh sihk lah ac pa inge Inel—enenuh in tuhkuh inmahsrlon mwet Jew, inmahsrlolos suc ma ke ipin acn ma yohk ma koluk la fin facluh; ac elos fah sruhpsruhlwack—tuh ohinge ma inge fal nuh sin God lasr, ac wacngihn kuhtwena muhtuhn facl fin facluh kuh in sruhpuhsrwack God lalos.

4 Tuh fin ma usrnguck yohk sikyak inmahsrlon kuhtwena muhtuhn facl sahyac elos ac auliyak, ac etuh lah El pa God lalos.

5 Tuhsruhk ke srihpen orekma kuhtasrihk luhn mwet kol alu ac ma koluk, elos suc oasr fin acn Jerusalem fah ahkkwekweyelah inkwacwaclos in lainuhl, tuh Elan acnwucki.

6 Ohinge, ke srihpen ma koluk lalos, kuhnausyucklac, sracl in mongo, mas, ac ahkmas fah tuhkuh nuh faclos; ac elos suc fah tiac na kuhnausyucklac fah fahsrelihk inmahsrlon muhtuhn facl nuhkwewa.

7 Tuhsruhk liye, ohinge Leum God El fahk: Ke lwen sac tuhkuh tuh elos fah luhlahlfongiyuc, tuh Nga pa Kraist, na Nga tuh olweacng nuh sin pahpah tuhmwaclos tuh elos fah sifilpac fohlohkihnyuck me ke ikoac, fin facluh, nuh ke acn in usru selos.

8 Ac ma inge fah sikyak ke elos fah orekeni tukun fahsrelihk na loeloes lalos, liki tuhka fin kof uh, ac liki ip ahkosr ke facluh; ac muhtuhn facl luhn mwet Gentile fah wo ye Muhtuhk, God El fahk, in usacloslac nuh ke acn in usru selos.

9 Ahok, tohkohsrah luhn mwet Gentile fah pahpah in karihngihn nuh selos, ac kasra lalos fah ninac in karihngihn; ohinge, olweacng luhn Leum yohk nuh sin mwet Gentile, tuh El fahklah ma inge, ac suc kuh in lain?

10 Tuhsruhk liye, acn se inge, God El fahk, fah sie acn in usru lowos, ac mwet Gentile fah ahkinsewowoyeyuck fin acn uh.

11 Ac acn se inge fah sie acn in sukohsohk nuh sin mwet Gentile, ac e fah wacngihn tohkohsrah fin acn uh, suc fah tuhfweyucklac nuh sin mwet Gentile.

12 Ac Nga fah luhsruhngwack acn se inge liki kuhtwena muhtuhn facl nuhkwewa sahyac.

13 Ac el suc mweun lain Zion fah misac, God El fahk.

14 Tuh el suc tuhfahlah sie tohkohsrah in lainyuc fah misac, tuh Nga, Leum, tohkohsrah luhn inkuhsrao, fah tohkohsrah lalos, ac Nga fah sie kahlwem nuh selos ne tok ma pahtpaht, suc lohng kahs Luhk.

15 Ohinge, ke srihpac se inge, tuh wuhlweacng Luhk in ahkpwacyeiyuck ma Nga oraclah nuh sin tuhlihk nuhtin mwet, tuh Nga fah oruh nuh selos ke elos moul in mahno, Nga enenuh in kuhnahoslah orekma lukmac luhn lohsr uh, ac ke ahkmas, ac ke ma sruhngwacyuck uh.

16 Ohinge, el suc mweun lain Zion, kwewana mwet Jew ac mwet Gentile, kwewana mwet srohoh ac mwet sukohsohk, kwewana mukul ac muhtwacn, fah misac; tuh elos pa muhtwacn kosro fin facluh nohfohn; tuh elos suc tiac wiyuc uh lainyuc, God El fahk.

17 Tuh Nga fah ahkpwacyei olwelah Luhk ma Nga oraclah nuh sin tuhlihk nuhtin mwet, tuh Nga fah oruh nuh selos ke elos moul in mahno—

18 Ohinge, mwet sacohk wiyuck, ohinge God lasr El fahk: Nga fah ahkkweokye fihtac lowos ke poun mwet Gentile; ne ohinge, Nga fah ahkfihsrwacsryelah insiacn mwet Gentile, tuh elos fah oacna sie pahpah nuh selos; ohinge, mwet Gentile fah ahkinsewowoyeyuck ac oacwaclah inmahsrlon mwet Israel.

19 Ohinge, Nga fah akmuhsraelah acn se inge nuh sin fihtac lowos, ac elos suc fah oacwaclah inmahsrlon fihtac lowos, ne tok ma pahtpaht, nuh ke acn in usru lalos; tuh ac sie acn sacohk, God El fahk nuh sihk, wo liki kuhtwena acn nuhkwewa sahyac, ohinge Nga fah oruh tuh mwet nuhkwewa suc muhta we tuh elos in fah alu nuh Sihk, God El fahk.

20 Ac inge, mwet sacohk wiyuck, liye lah God pahkotwen lasr El use nuh sesr etwacack na yohk ke ma inge, lwelah kuht in esamuhl, ac fihliyac nuh sahyac ma koluk lasr, ac tiac suwollac insifacsr nuh ten, tuh kuht tiac lihsyucklac; ne ohinge, kuht lihsyucklac liki acn in usru lasr; tuhsruhk kuht kolyucklac nuh ke sie acn wo liki, tuh Leum El oraclah tuh meoa uh in inkacnek lasr, ac kuht muhta fin sie tuhka fin kof uh.

21 Tuhsruhk yohk olwelah luhn Leum nuh selos suc muhta ke tuhka fin kof uh; ohinge ke fahk muh tuhka uh, enenuh in puhs liki na inge, ac tuhka inge nwacnwaclah pac ke mwet wiyacsr.

22 Tuh liye, Leum God El kohllah ke pacl nuh ke pacl liki mwet Israel, in fal nuh ke kena ac luhngse Lal. Ac inge liye, Leum El esamuhlos nuhkwewa suc kihpatlah liki, ohinge El esam kuht pac.

23 Ke ma inge, ahkenganye insiowos, ac esam lah kowos sukohsohk in mukwikwi nuh suwos sifacna—in sulaclah inkacnek luhn misac ma pahtpaht kuh inkacnek luhn moul ma pahtpaht.

24 Ohinge, mwet sacohk wiyuck, sifacna fohlohkyang nuh ke luhngse luhn God, ac tiac nuh ke luhngse luhn devil ac ke mahno; ac esam, tukun kowos fohlohkyang nuh yurun God, tuh ke luhng kuhlwacng luhn God muhkwefanna tuh kowos moliyucklac.

25 Ohinge, lwelah God Elan ulkowosyak liki misac ke kuh luhn sifilpac moulyak, ac oacyacpac liki misac ma pahtpaht ke kuh luhn iwaclah, tuh kowos in kuh in eisyuck nuh ke tohkohsrahi ma pahtpaht luhn God, tuh kowos in kuh in kaksakuhnuhl ke luhng kuhlwacng muhtahl. Amen.