1 Ma toasr luhn Babylon, ma Isaiah wen nahtuhl Amoz el tuh liye.

2 Kowos in kohlwack sie flwack fin soko finohl fuhlwact, sralwack puhsra nuh selos, usruk paho, tuh elos in kuh in som nuh ke muhtuhnpot luhn mwet kahsruhp.

3 Nga sapkihn nuh sin mwet ahkmuhtahlyeyuck Luhk, nga oacyacpac pahngon mwet fokoko luhk, tuh kasrkuhsrak Luhk tiac oasr yohrohlos suc kaksak ke fuhlwactlacna Luhk.

4 Puhsren wohwohn luhn un mwet finohl uh oacna sie un mwet na pucspucs, sie puhsra luhlahp luhn tohkohsrahi luhn muhtuhnfacl ma toweni nuh sie, Leum luhn Un Mwet Mweun El ahkno un mwet mweun.

5 Elos tuhkuh liki acn loesuhllah, liki sahflahiyacn kuhsrao, ahok, Leum, ac kuhfwen mwe mweun luhn kasrkuhsrak Lal, in kuhnahoslah facl sac nohfohn.

6 Kowos in tuhng wowoyak, tuh lwen luhn Leum apkuhranme; ac fah tuhkuh oacna sie ma kuhnausyucklac sin El Suc Kuhlacna.

7 Ke ma inge paho nuhkwewa fah muhnahslah, insiacn mwet nuhkwewa fah muhlwesrlac;

8 Ac elos fah sahngweng; kweok ac ahsor fah oan faclos; elos fah lut sie sin sie; muhtahlos fah oacna sruhsrahlah se ke e uh.

9 Liye, lwen luhn Leum tuhkuh, fol upac kwewana ke kasrkuhsrak ac ahngyahng upac, in oraclah acn uh in pihsaclah; ac El fah kuhnahoslah mwet koluk we liki acn we.

10 Tuh itu inkuhsrao ac un itu nuhkwewa fah tiac sang kahlwem lalos; faht uh fah lohsrlah ke takwack uh, ac mahlwem uh fah tiac oruh kahlwem la in sreyac.

11 Ac Nga fah kalyei facluh ke ma koluk la, ac mwet koluk ke ma koluk lalos; Nga fah oruh inse fuhlwact luhn mwet inse fuhlwact in tui, ac fah toanyac nuhnak fuhlwact luhn mwet koluk.

12 Nga fah oruh tuh sie mwet in sacohk liki kol wowo; finne sie mwet liki na plak in kol luhn Ophir.

13 Ke ma inge, Nga fah usruk kuhsrao, ac facluh fah usrusrlac liki acn e oan we, ke kasrkuhsrak luhn Leum luhn Un Mwet Mweun, ac ke lwen in ahngyahng upac Lal.

14 Ac e fah oacna soko deer ukweyuck, ac oacna soko sip ma wacngihn mwet sruhkwack; ac mwet nuhkwewa elos fah foracng nuh sin mwet lal sifacna, ac mwet nuhkwewa fah kahingwelihk nuh ke acn sel sifacna.

15 Mwet nuhkwewa suc inse fuhlwact fah fakfuhki; ahok, ac mwet nuhkwewa suc kuhpahsryang nuh sin mwet koluk fah misac ke katlas uh.

16 Tuhlihk nahtuhlos fah oacyacpac tuktukuh ipelihk ye muhtahlos; lohm selos fah wapiyucklac ac muhtwacn kiyaclos sruhinkuhiyuck.

17 Liye, Nga fah puhrakwack mwet Media in lainuhlos, suc fah tiac mwelkihn selfuh ac kol, kuh elos fah tiac pwacrkihn.

18 Mwe pihsr nahtuhlos fah oacyacpac uniyac mwet fuhsr in ipelihk; ac fah wacngihn pahkomuhta lalos ke fahkon pihtuctuc; muhtahlos fah tiac loangwelah tuhlihk uh.

19 Ac Babylon, wolacna luhn tohkohsrahi uh, oaskuh luhn mwet fuhlwact Chaldea, ac fah oacna ke God El kuhnahoslah Sodom ac Gomorrah.

20 Ac fah wacngihn mwet sifilpac muhta we, kuh ac fah wacngihn pac mwet muhta we ke fihl nuh ke fihl: kuh mwet Arabia ac fah tiac tulohkohnwack lohm nuknuk we; kuh mwet liyacacng sip elos fah tiac liyacacng un sip nahtuhlos we.

21 Tuhsruhk kosro lwemnak ke innimac uh fah muhta we; ac lohm selos fah sesseslah ke ma orahkrahk suhpwacr; ac won owl uh fah muhta we, ac nacni fah yucwot yucme we.

22 Ac kosro lwemnak fin tuhka uh fah tuhng ke lohm pihsaclah selos, ac dragon ke acn wowo selos; ac pacl lal apkuhranme; ac lwen lal fah tiac kohtlah. Tuh Nga fah sa na in kuhnahosuhllah; ahok, tuh Nga fah pahkotwen nuh sin mwet Luhk, tuhsruhk mwet koluk fah misac.