Sapta 7
Jacob el tahfwelah in riti ke Isaiah: Isaiah el sramsram ke Messiah—Messiah El fah sramsram oacna lohun mwet lahlmwetmwet—El fah sang fintohkohl nuh sin mwet srihngsrihng—El fah tiac tulokihnyucki—Kapsra Isaiah 50. Sahp ke yac 559–545 Met Liki Kraist.
1 Ahok, tuh ohinge Leum El fahk: Yac Nga fihlikomlac, kuh lihskomyak ne tok ma pahtpaht? Tuh ohinge Leum El fahk: Piyac pwepuh in sahf luhn ninac kiom an? Yac Nga fihlikomlac nuh sin suc, kuh nuh sin suc kac sin mwet misac Sihk nga kuhkwackihnkowoslac nuh se? Ahok, Nga kuhkwackihnkowoslac nuh sin suc? Liye, ke ma koluk lowos kowos sifacna kuhkwackihnkowoslac, ac ke tahfonglac lowos oruh ninac kiowos fihliyucklac.
2 Ohinge, ke Nga tuhkuh, wacngihn mwet; ke Nga pahng, ahok, wacngihn mwet in topuk. O mwet Israel, yac Pouk fototolaclac tuh in tiac kuh in molwelah, kuh yac wacngihn kuh Luhk in molwelah? Liye, ke kai Luhk Nga ahkpahoyelah meoa, Nga oraclah infacl lalos in sie innimac ac ik uh in pusrohsr ke srihpen kof uh paholah, ac elos misac ke srihpen maluh.
3 Nga nohkohmlah inkuhsrao ke lohsr, ac Nga oruh mah in nuknuk in ahsor lalos in nukumyuck.
4 Leum God El use nuh sihk lohun mwet lahlmwetmwet, tuh ngwacn etuh in sramsram fuhkah ke sie kahs ke puhlan pacl nuh suwos, O mwet Israel. Ke kowos ullac El tuhkahkwek lututacng nuh ke lututacng. El okaswack insrek in lohng oacna mwet lahlmwetmwet.
5 Leum God El ikacslah insrek, ac nga tiac lain, kuh forlah liki.
6 Nga sang fintukuk nuh sin mwet srihngsrihng, ac lihkihn tuhpuhk nuh selos suc sihksihk sifac. Nga tiac wihkihn muhtuhk liki mwekihn ac acni.
7 Tuh Leum God El fah kahsreyuc, ke ma inge nga fah tiac tulokihnyucki. Ke ma inge nga oruh muhtuhk in oacna sie yot kwekwe, ac nga etuh tuh nga fah tiac mwekihn.
8 Ac Leum El fototome, ac El ahksuwohsyeyuc. Suc ac fah ahkfohsyeyuc? Lwelah kuht in tuhkweni tu. Suc mwet lokoalok luhk? Lwelah elan tuhkuh fototo nuh yuruk, ac nga fah kalyeiluhl ke kuh luhn oaclihk.
9 Tuh Leum God El fah kahsreyuc. Ac elos nuhkwewa suc fah sruhngwacyuc, liye, elos nuhkwewa fah mahtuhoh oacna sie ipin nuknuk, ac watihl uh fah kanglah kuhlawi.
10 Suc inmahsrlowos sahngweng sin Leum, suc ahkos puhsren mwet kuhlwacnsap Lal, suc fahsr ke lohsr uh ac wacngihn kahlwem la?
11 Liye kowos nuhkwewa suc esuhkwack e uh, ma raunikowoslac ke usren e, fuhfahsryucsr ke kahlwem luhn e lowos ac ke usren e ma kowos esuhkwack. Ma inge kowos fah eis ke pouk—kowos fah oan nuh ten ke ahsor.