1 Tuh Leum El fah pahkotwen nuh sel Jacob, ac fah sifilpac sulaclah mwet Israel, ac likiyac elos in muhta ke facl selos sifacna; ac mwet sac fah weluhlos, ac elos fah kuhpahsryang nuh yurun tuhlihk nahtuhl Jacob.

2 Ac mwet uh fah eisaclos ac usacloslac nuh ke acn selos; ahok, liki acn loesuhllah nuh facluh nohfohn; ac elos fah fohlohk nuh ke acn in wuhlwelah selos. Ac mwet Israel kuhmahkuhnuhlos, ac acn luhn Leum fah ma nuh sin mwet kuhlwacnsap ac mwet in sapsapkihnyuck; ac elos fah eisuhlos srohoh nuh selos suc elos tuh srohoh se; ac elos fah kol faclos suc ahkkweokyaclos.

3 Ac ma inge fah sikyak tuh ke lwen sac Leum El fah acsot nuh suwos monglac, ke ahsor lowos, ac ke sahngweng lowos, ac ke srohoh upac ma kowos oreklac in kuhlwacnsap kac.

4 Ac ma inge fah sikyak tuh ke lwen sac, ke kowos fah sruhkwack soa kahs se inge in lain tohkohsrah luhn Babylon, ac fahk: Mwet ahkkweokye uh tulokihnyucki fuhkah, siti kol sac wacngihnlac!

5 Leum El kotweyac sikucl luhn mwet koluk, sikucl yucnlac luhn mwet kol.

6 El suc srihngihl mwet uh ke kasrkuhsrak ke puohpoh ma fahfahlac na, el suc kol muhtuhnfacl uh ke kasrkuhsrak, el kalyeiyuck, ac wacngihn mwet kosrwaclah.

7 Facluh nohfohn monglac, ac mislac; elos wowoyak on.

8 Ahok, sahk fir uh kaksakihn kowos, ac oacyacpac sahk situcr luhn Lebanon, fahk: Ke kowos kuhtangyucklac wacngihn mwet tuhkuh in lain kuht.

9 Facl luhn mwet misac mukwiyak nuh suwos in ohsun nuh suwos ke tuhkuh lowos an; ac moklweack mwet misac nuh suwos, finne elos suc yohk wal la fin facluh; tohkohsrah luhn muhtuhnfacl nuhkwewa ac tuyak liki tron lalos.

10 Ma nuhkwewa elos fah sruhmuhn ac fahk nuh suwos: Yac kom oacyacpac muhnahslah oacna kuht? Yac kom eklac oacna kuht?

11 Eye lom isyucki nuh ten nuh ke kuclyuck uh; puhsren on ke harp nuhtum tiac lohngyuck; wet uh maelihk yeim, ac wet uh afihnkomlac.

12 Yac kom puhtatlac fuhkah liki inkuhsrao, O Lucifer, wen nuhtin litutacng! Yac kom pakpucki nuh ten nuh infohkoh uh, suc ahkmuhnahsyelah muhtuhnfacl uh!

13 Tuh kom tuh fahk ke insiom: Nga fah soack nuh inkuhsrao, nga fah oruh tron luhk in fuhlwact liki itu luhn God; nga fah muhta pac fin eohl luhn un mwet uh, ke lacfahl nuh acir;

14 Nga fah soack nuh lucng liki puhkuhnyeng uh; nga fah oacna El Suc Fuhlwact Liki Nuhkwewa.

15 Tuhsruhk kom fah itucki nuh ten nuh ke hell, nuh ke sisken luhf loallacna.

16 Elos suc liye kom ac fah ngwetoht sikomi, ac fah nuhnkwe kom, ac fah fahk: Yac pa inge mwet se ma oruh facluh in kusrusr, ma tuh osrokwack tohkohsrahi?

17 Ac oraclah facluh in oacna sie acn mwesis, ac kuhnahoslah siti we, ac tiac ikacslah lohm sin mwet srohoh lal?

18 Tohkohsrah nuhkwewa luhn muhtuhnfacl uh, ahok, elos nuhkwewa, oan ke wolacna, kais sie selos nuhkwewa ke lohm sel sifacna.

19 Tuhsruhk kom sisilac liki kuclyuck lom oacna sie lah sruhngwacyuck, ac elos suc luhlah selos suc acnwucki, ma fakfuhki ke sie katlas, ma som nuh ten nuh ke yot ke luhf; oacna ke sie mahno misac ma niyac uh longyac.

20 Kom fah tiac weluhlos puckpucki, ke srihpen kom kuhnahoslah acn lom ac uniyac mwet lom; fihtac luhn mwet orekma koluk fah tiacna esamyuck.

21 Ahkolah ahkmas luhn tuhlihk nahtuhl ke ma koluk luhn pahpah tuhmwaclos, tuh elos in tiac tuyak, kuh in tiac sruok acn uh, kuh in tiac nwacklah facluh ke siti.

22 Tuh Nga fah tuyak lainuhlos, Leum luhn Un Mwet Mweun El fahk, ac eislah ine, ac mwet luhlah we, ac wen, ac wen nuhtin wiyac liki Babylon, Leum El fahk.

23 Nga fah oacyacpac oruh tuh in sie acn in muhta luhn won, ac luhluh in kof; ac Nga fah imohmelah ke purum in kuhnahoslah, Leum luhn Un Mwet Mweun El fahk.

24 Leum luhn Un Mwet Mweun El olwelah, fahk: Pwacyena lah oacna ke Nga nuhnkuh, ac fah sikyak; ac oacna ke Nga lwemlwemi, ac fah oreklac—

25 Tuh Nga fah use mwet Assyria nuh ke acn sihk, ac lolongilyac ye niyac fin finohl Luhk; na fah srenenuh lal puhtatlac luhkwelos, ac ma toasr lal puhtatlac liki fin pihsaclos.

26 Pa inge srihpac se ma lwemlwemiyuck nuh fin facluh nohfohn; ac pa inge paho se ma ahsroeyucklac nuh fin muhtuhnfacl nuhkwewa.

27 Tuh Leum luhn Un Mwet Mweun El lwemlwemi, ac suc ac fah ikolyac? Ac pahol ahsroeyucklac, ac suc ac fah furohkuhnlah?

28 Ma toasr inge ma ke yac se ma tohkohsrah Ahaz el misac ah.

29 Nikmet kowos kaksak, mwet Philistia nuhkwewa, ke srihpen sahk in srihngsrihng soko lal ma sang unikowos ah kaptelihk; tuh snek pwacsin fah tuhkuh liki okahn serpent uh, ac fahko la fah soko serpent ngosr e sohk.

30 Ac tuhlihk isuslac se met nuhtin mwet suhkahsruhp fah mongo, ac mwet kwacoh fah ona nuh ten ke mislac; ac Nga fah uniyac okah lowos ke sie sracl, ac el fah uniyac mwet luhlah lowos.

31 Wowoyak, O muhtuhnpot; tuhng, O siti; kowos, mwet Philistia nuhkwewa, kuhnausyucklac; tuh sie fofosr fah tuhkuh acir me, ac wacngihn kuhtwena mwet fah muhkwena ke pacl pakpucki lal.

32 Na fah meac top nuh sin mwet utuck pweng luhn muhtuhnfacl uh? Lah Leum El muhsaheack Zion, ac mwet suhkahsruhp sin mwet Lal fah luhlahlfongi kac.