1 Porongeyuc, kowos suc fasr tukun ma suwohswohs. Ngwet nuh ke yot se ma kowos taflweyucklac kac, ac nuh ke luhf se ma kowos puhkanwack.

2 Ngwet nuh sel Abraham, pahpah tomowos, ac nuh sel Sarah, el suc oswekowoslac; tuh Nga pahnglol muhkwena, ac ahkinsewowoyacl.

3 Tuh Leum El fah ahkkweye Zion, El fah ahkkweye acn koluk nuhkwewa lal; ac El fah oruh innimac lal in oacna acn Eden, ac yen paho lal in oacna imac luhn Leum. Pwacr ac engan fah sukokyak we, sang kuloh ac puhsren on.

4 Porongeyuc, mwet Luhk; ac lohngyuc, O muhtuhn facl Luhk; tuh sie masap fah fahlac likiyuc, ac Nga fah oruh nuhnuhnkuh Luhk in fihliyucki tuh in sie kahlwem nuh sin mwet uh.

5 Suwohswohs Luhk apkuhran me; molwelah Luhk ahkfahsryeyuck, ac pouk fah nuhnuhnkuh mwet uh. Tuhka uh fah sanweyuc, ac pouk elos fah luhlahlfongi.

6 Ngwetwack nuh inkuhsrao, ac liye facluh ten; tuh kuhsrao fah wacngihnlac oacna kuhlahsr uh, ac facluh fah kuhlawi oacna sie ipin nuknuk; ac elos suc muhta we fah misac oacpacna. Tuhsruhk lango Luhk fah oan ne tok ma pahtpaht, ac suwohswohs Luhk fah tiac tui.

7 Porongeyuc, kowos suc etuh ma suwohswohs, mwet suc Nga suhmuhslah masap Luhk ke insiaclos, nikmet kowos sahngweng ke kaiyuck luhn mwet, kuh nikmet kowos sahngweng pac ke ahkkoluk lalos.

8 Tuh watihl uh fah kanguhloslac oacna sie ipin nuknuk, ac wet uh fah kanguhltahllah oacna unen sip uh. Tuhsruhk suwohswohs Luhk fah oan ne tok ma pahtpaht, ac lango Luhk ke fihl nuh ke fihl.

9 Nguhtwaclihk, nguhtwaclihk! Orekmakihn kuh, O poun Leum; nguhtwaclihk in oacna ke pacl omeet ah. Yac tiac kom pa pakpakilyac Rahab, ac kantweyac dragon soko ah?

10 Yac tiac kom pa ahkpahoyelah meoa, kof ke acn loal upac; suc oraclah soko inkacnek ke acn loal meoa uh nuh sin mwet moliyucklac in fahsr sahslah kac?

11 Ke ma inge, mwet moliyucklac luhn Leum fah fohlohk, ac on tuhkuh nuh Zion; ac engan ac muhtahllacna fah oan fin sifaclos ma pahtpaht; ac elos fah eis pwacrack ac enganwack; ahsor ac sahsaho fah wacngihnlac.

12 Nga pa El; ahok, Nga pa El suc ahkkweye kowos. Liye, suc kowos uh, tuh kowos in sahngweng sin mwet, suc fah misac, ac sin wen nuhtin mwet, suc fah oreklac oacna mah uh?

13 Ac muhlkuhnlah Leum suc orekowoslac, suc laknwelihk kuhsrao, ac oakiyac pwelucng luhn facluh, ac sahngweng pacl nuhkwewa ke lwen nuhkwewa, ke srihpen folo luhn mwet in ahkkweok, oacna fin el ahkolah in kuhnahoslah? Ac piyac folo luhn mwet in ahkkweok?

14 Sie mwet srohoh el sa na ahksukohsohkyeyucklac, tuh elan kuh in sukohsohklah, ac tuh elan tiac misac lin luhf uh, kuh mongo nwacl in tiac lihsr.

15 Tuhsruhk Nga pa Leum God lowos, suc noa la ngihrngihr; Leum luhn Un Mwet Mweun pa Inek.

16 Ac Nga fihliyac kahs Luhk nuh inwaclumtacl, ac loangwekowoslac ke lulin pouk, tuh Nga in kuh in oakiyac kuhsrao ac oakiyac pwelucng luhn facluh, ac fahk nuh sin Zion: Liye, kowos mwet Luhk.

17 Nguhtwaclihk, nguhtwaclihk, tuyak, O Jerusalem, suc nuhmlah ke poun Leum ke kuhp in folo Lal—kowos nuhmlah koanon kuhp in rarrar ma fulohfohllah—

18 Ac wacngihn mwet in pwacnuhl inmahsrlon wen nuhkwewa suc el use; wacngihn sie selos in sruokyac pahol, sin wen nuhkwewa suc el tuhfahlah.

19 Wen luo inge tuhkuh nuh yurum, suc fah pahkomotom—ahsor ac kuhnausyucklac lom, ac sracl ac katlas—ac sin suc Nga fah orekmakihn in ahkkweye kom?

20 Wen nuhtum sruhilac, sahyacn ma luo inge; elos oan ke muhtuhn acn ke inkacnek nuhkwewa; oacna soko kaho mukul lwemnak ma srohoh lun sie nwek, elos sesseslah ke folo luhn Leum, kalyeiyuck luhn God lom.

21 Ke ma inge lohng ingena nuh ke ma se inge, kowos mwet kweok, ac sruhi, ac tiac ke wine:

22 Ohinge Leum lowos El fahk, Leum ac God lowos El loangwelah mwet Lal; liye, Nga eislah liki pouwos kuhp in rarrar, koanon kuhp in folo Luhk; kowos fah tiac sifilpac nihm kac.

23 Tuhsruhk Nga fah fihliyac nuh in paholos suc ahkkweokye kowos; suc fahk nuh sin nguhnuwos: Kuhi nuh ten, tuh kuht in kuh in fahlac fac—ac kowos in toplac in oan infohk uh ac oacna inkacnek uh nuh selos suc fahlac fac.

24 Nguhtwaclihk, nguhtwaclihk, orekmakihn kuh lom, O Zion; nokomwacng nuknuk oaskuh lom, O Jerusalem, siti muhtahl; tuh inge fahlac ac fah wacngihn mwet tiac kohsrkohsrlah ac fohkfohk e tuhkuh nuh yurum.

25 Osroklah liki kom kutkut uh; tuhkahkwek, muhta nuh ten, O Jerusalem; tuhlwekomlac liki mwe kapihr ke inkwacwom an, O acn srohoh nuhtin Zion.