1 Ne ohinge, lohsrlohsr uh fah tiac oacna kasrkuhsrak lal, emet ke el kahkahsrihk in ahkkweokye acn Zebulun, ac acn Naphtali, ac tohkohyang ahkkweokye in upaclah ke inpohlohn Meoa Sruhsrah fahlac ahluhkwelah acn Jordan e Galilee ke muhtuhnfacl we.

2 Mwet suc fuhfahsryucsr in lohsr uh liye sie kahlwem luhlahp; elos suc muhta ke acn luhn nguhnan misac, faclos suc kahlwem uh tohlwack.

3 Kom ahkpuhsye muhtuhnfacl uh, ac ahkyohkye engan—elos engan ye motom fal nuh ke engan ke pacl in kosrwacni, ac in oacna ke mwet uh kaksak ke elos kihtaclihk ma wap.

4 Tuh kom kotwaclihk srenenuh luhn ma toasr lal, ac sikucl ke fin pihsacl, osra luhn mwet lokoalok lal.

5 Tuh mweun nuhkwewa luhn mwet mweun uh oasr wohwohn fohsack se kac, ac nuknuk uh aflah ke srah; tuhsruhk ma se inge fah isisyak ac mwe ta e.

6 Tuh nuh sesr sie tuhlihk El isuslac, nuh sesr sie Wen El utuckuh; ac kafucrmacn fah oan fin pihsacl; ac Inel fah pahngpahng, Wolacna, Mwet Pwacpa, God Kuhlacna, Pahpah Ma Pahtpaht, Fihsrack luhn Mislac.

7 Ke kapkapwack luhn kafucrmacn ac mislac uh wacngihn sahflahiyac, fin tron lal David, ac fin tohkohsrahi lal in sapkihn, ac in oakiyac kac ke nuhnuhnkuh ac ke nuhnuhnkuh suwohs ingelac, finne ne tok ma pahtpaht. Luhngse luhn Leum luhn Un Mwet Mweun fah oruh ma se inge.

8 Leum El suhpwaclah kahs Lal nuh sel Jacob ac ma inge kahlmwelihk fin acn Israel.

9 Ac mwet nuhkwewa fah etuh, finne Ephraim ac mwet muhta Samaria, ma fahk ke inse fuhlwact ac fihlacng luhn insiac:

10 Simacn plak uh mokuklac, tuhsruhk kuht fah muhsah ke yot tuhfahl; sahk sikamor uh pakpucki nuh ten, tuhsruhk kuht fah ahollah nuh ke sahk situcr.

11 Ke ma inge Leum El fah puhrakwack mwet lokoalok lal Rezin in lainuhl, ac toweniyac mwet lokoalok lal nuh sie;

12 Mwet Syria met ac mwet Philistine tok uh; ac elos fah ohkohmlah Israel ke inwacl mahngwelihk. Tuh ke ma inge nuhkwewa kasrkuhsrak Lal tiac tui, tuhsruhk pahol srwackna ahsroeyucklac.

13 Tuh mwet uh tiac foracng nuh Sel suc kalyeilos, a elos tiac pac suk Leum luhn Un Mwet Mweun.

14 Ke ma inge Leum El fah otwelah liki Israel sifac ac puhla, lah ac srohpoh ke lwen sefanna.

15 Mwet mahtuh emet ah, el pa sifac sac; ac mwet pahluh ma luti ma kikiacp, el pa puhla sac.

16 Tuh mwet kol luhn mwet inge ahktahfongyeloslac; ac elos suc kolyuck selos kuhnausyucklac.

17 Ke ma inge Leum El fah tiac insewowo sin mukul fuhsr lalos, El fah tiac pac pahkotwen nuh sin tuhlihk muhkahimtacl ac katinmas lalos; tuh kais sie selos nuhkwewa mwet wosounkacs ac mwet oruh ma koluk, ac inwacl nuhkwewa sramsram lahlfon. Ke ma inge nuhkwewa kasrkuhsrak Lal tiac tui, tuhsruhk pahol srwackna ahsroeyucklac.

18 Tuh ma koluk fihrihr oacna e uh; e fah esuhkwack kokul ac puhlah, ac fah esuhkwack insack, ac e fah ngutyak oacna sruen kuhlahsr uh.

19 Ke kasrkuhsrak luhn Leum luhn Un Mwet Mweun acn uh lohsrlah, ac mwet uh fah oacna mwe ta luhn e uh; wacngihn kuhtwena mwet fah molwelah mwet wiyacl.

20 Ac el fah saplak ke lacpo lacyot ac masrinsrwacl; ac el fah mongo ke lacpo lacsac ac elos fah tiac kihpi; elos nuhkwewa fah kang ikoacn pahol sifacna—

21 Manasseh, Ephraim; ac Ephraim, Manasseh; elos fah tuhkweni lain Judah. Tuh ke ma inge nuhkwewa kasrkuhsrak Lal tiac tui, tuhsruhk pahol srwackna ahsroeyucklac.