Namba Tu Buk Bilong Nifai

1 Na nau em i kamap we, bihain mi, Nifai i pinis long lainim ol brata bilong mi, papa bilong mipela, Lihai, tu i bin autim planti samting long ol brata bilong mi, na toktok gen long ol, wanem bikpela ol samting Bikpela i bin wokim long olgeta long kisim ol i kamaut long graun bilong Jerusalem.

2 Na papa bilong mipela i bin tokaut long ol brata bilong mi long pasin bik het na les long havim tok bilong ol long solwara, na long marimari bilong God long larim ol i stap, olsem ol i no bin go aninit long solwara.

3 Na tu em i bin tokaut long ol brata bilong mi long graun em i bin promisim, olsem ol i kisim pinis—long wanem Bikpela i bin marimari long tok lukaut long mipela olsem mipela mas ronawe long graun bilong Jerusalem.

4 Long wanem, lukim, papa bilong mi i bin tok, mi bin lukim wanpela visen, we mi save olsem Jerusalem i bagarap pinis, na sapos yumi i stap yet long Jerusalem, yumi tu bai idai.

5 Tasol, em i tok, inap mipela i bin kisim pen tasol, mipela kisim pinis graun em i bin promisim, wanpela nambawan graun tru long olgeta narapela graun, wanpela graun em God Bikpela i bin promisim wantaim mi olsem ol lain pikinini bilong mi bai kisim long ol yet. Ye, Bikpela i bin promisim dispela graun long mi, na long ol lain pikinini bilong mi long stao olgeta oltaim, na tu long olgeta lain em Bikpela bai lidim ol long kamaut long ol narapela kantri wantaim han bilong em.

6 Olsem na, mi, Lihai profesai olsem long Spirit em i wok insait long mi olsem nogat wanpela man bai kam nating long dispela graun, tasol long ol lain em Bikpela bai kisim ol i kam wantaim han bilong em.

7 Long wanem, dispela graun em i bin dediketim long man em Bikpela yet bai kisim em i kam. Na sapos ol manmeri em Bikpela i bringim ol bai sevim em long bihainim ol lo em i bin givim, dispela graun bai kamap graun bilong fridom long ol. Long wanem, ol i bai i no inap moa karim ol i go daun long kalabus, sapos olsem, em bikos long sin bilong ol, long wanem, sapos sin i kamap bikpela tru, kes bai kamap long graun bikos long ol, tasol Bikpela bai blesim dispela graun long ol stretpela lain oltaim.

8 Na lukim, em long bikpela save bilong Bikpela olsem na em i haitim dispela graun long ai bilong ol narapela nesen, long wanem lukim, planti nesen ol bai pulap long dispela graun, olsem na tupela bai nogat ples long kisim bilong ol tumbuna bilong ol.

9 Olsem na, mi, Lihai i gat promis olsem sapos ol lain em God Bikpela kisim ol i kam long graun bilong Jerusalem ol bai bihainim ol lo bilong em, sindaun bilong ol bai kamap gutpela long pes bilong dispela graun, na bai haitim ol long olgeta narapela nesen olsem ol bai kisim dispela graun long ol i yet. Na sapos ol i bihainim ol lo bilong Bikpela, em bai blesim ol long pes bilong dispela graun, na nogat wanpela man bai bagarapim ol, o kisim graun bilong ol, na ol bai i stap gut oltaim.

10 Tasol lukim, taim i kam we bilip bilong ol bai paul isi isi na i go olgeta, bihain ol i kisim bikpela blesin tru long han bilong Bikpela—na ol i bin gat save long kriesen, bilong graun na olgeta man, na ol i bin save long bikpela na naispela wok tru bilong Bikpela long taim em i bin krietim graun, pawa em i bin givim long ol long wokim olgeta samting wantaim bilip, ol i bin gat olgeta lo long taim bilong i stat tru, na ol i bin karim i kam wantaim bikpela pawa tru bilong Bikpela i nogat arere long dispela graun em bin promisim i dia tumas—Lukim, mi tok, sapos de bai kam we ol bai les long Em Wanpela Holi Tasol bilong Israel, tru tru Mesaia, Ridima na God bilong ol, lukim, ol jasmen bilong man em i stret bai kamap long ol.

11 Ye, Bikpela bai karim i kam ol narapela nesen long ol, na em bai givim pawa long ol narapela nesen, na em bai tekawe long ol, ol graun bilong ol, na em bai mekim ol narapela nesen raus nabaut na paitim ol.

12 Ye, ol blut bai kapsait taim wanpela jeneresen bai pinis, i go long narapela, wantaim bikpela mekim save tru namel long ol, olsem na, ol pikinini bilong mi, mi laikim olsem yupela bai tingim, ye, mi laikim olsem yupela bai harim ol toktok bilong mi.

13 O, mi laikim tru olsem yupela bai kirap, long taim yupela slip idai, ye, tru tumas long slip bilong hel, na tromoi ol sen nogut tru ol i bin pasim yupela wantaim, ol wankain sen ol i save pasim ol lain pikinini bilong ol man, olsem ol lain pikinini bilong ol man ol i bin karim ol i go daun long kalabus long baret bilong bikpela pen na sore oltaim oltaim.

14 Kirap! na sanap long das, na harim ol toktok bilong papa mama em i guria, na pandaun na bodi bilong em i no long taim yupela mas putim i go daun insait long kolpela matmat na ples nogat nois, long hul nogat wanpela man bilong raun i save go na kam bek gen, i no long taim na mi bai bihainim rot bilong olgeta graun.

15 Tasol lukim, Bikpela i bin kisim bek sol bilong mi long hel, mi i bin lukim glori bilong em, na ol han bilong lav bilong em i raunim mi oltaim oltaim.

16 Na mi laik olsem yupela mas tingim long bihainim ol lo wantaim ol jasmen bilong Bikpela, lukim; dispela i bin strongpela laik bilong sol bilong mi long i stat tru.

17 Bel bilong mi i bin hevi wantaim sore long wanwan taim, bikos mi poret nogut bikos long yupela kamapim belhat bilong yupela, Bikpela God bilong yupela bai kamaut wantaim olgeta belhat bilong em long yupela, olsem bai yupela bai lus long pes bilong Bikpela na bagarap oltaim oltaim;

18 O, olsem kes bai kamap long yupela wantaim lain pikinini bilong yu long longpela taim, na yupela bai kisim bagarap wantaim naip bilong pait, na wantaim taim bilong hangre, na ol narapela nesen bai ol i les long yu, na tewel bai lidim yu go long bihainim laik na kalabus bilong em.

19 O ol lain pikinini man bilong mi, mi laikim olsem ol dispela samting bai i no inap kamap long yupela, tasol, mi laikim olsem yupela bai kamap wanpela nambawan pipol em Bikpela bai laikim tru. Tasol lukim, laik bilong em mas kamap, long wanem, ol rot bilong em i stretpela tru oltaim, oltaim.

20 Na Bikpela i bin tokaut olsem: Sapos yu bai bihainim olgeta lo bilong mi, yu bai kamapim gutpela sindaun bilong yu long graun, tasol sapos yu bai i no inap bihainim olgeta lo bilong mi, yu bai lus long pes bilong mi.

21 Na nau olsem sol bilong mi bai amamas long yupela, na olsem bel bilong mi bai lusim dispela graun wantaim amamas bikos long yupela, olsem mi bai i no inap karim i go daun long matmat wantaim pen na sore, kirap long das, ol pikinini man bilong mi, na kamap olsem ol man, na kamap strong wantaim wanpela het na wanpela bel, bung wantaim long olgeta samting, inap long yupela bai i no inap kam daun long kalabus;

22 Olsem yupela bai i no inap kisim kes wantaim kes nogut tru na tu olsem yupela bai i no inap kirapim kros bilong stretpela God bilong yupela, long bagarapim yupela, ye, long bagarapim sol wantaim bodi long oltaim.

23 Opim ai, ol pikinini man bilong mi, putim klospait bilong stretpela pasin. Tromoi ol sen ol i bin pasim yupela wantaim, na kamaut long ples hait, na kirap long das.

24 No ken les long harim tok moa long brata bilong yupela, ol visen bilong em i bin gutpela tru, na em i bin kipim ol lo long i stat tru taim mipela lusim Jerusalem, na em i bin kamap wanpela wokman long ol han bilong God, long karim yumi kam long graun em i bin promisim, long wanem, inap mipela bai idai long hangre long ples we nogat man i stap, sapos em i no bin i stap, tasol, yupela bin tingting long rausim laip bilong em, ye, na em i bin kisim pen wantaim bikpela sore bikos long yupela.

25 Na mi poret na guria nogut tru bikos long yupela, nogut em bai kisim pen gen, long wanem, lukim, yupela i bin sutim tok long em olsem em i bin ting ting long abrusim yupela long kisim pawa na atoroti, tasol mi save olsem em i no bin ting ting long abrusim yupela long kisim pawa o atoroti, tasol em i bin ting ting long glori bilong God, wantaim sindaun bilong yupela yet long oltaim oltaim.

26 Na yupela i bin tok baksait bikos em i bin tokaut klia long yupela. Yupela tok olsem em i bin yusim strongpela toktok, yupela tok olsem em i bin belhat wantaim yupela, tasol lukim, strongpela toktok bilong em i strongpela toktok bilong pawa bilong toktok bilong God, i bin i stap insait long em, na samting yupela kolim belhat em i tok tru na dispela tok tru em i save i stap long God, na brata bilong yupela i no inap long holim bek dispela tok tru, olsem na brata bilong yupela i bin soim klia ol pasin nogut bilong yupela.

27 Na i mas gat as olsem pawa bilong God mas i stap wantaim em, inap long em i mas tokim yupela olsem yupela mas bihainim. Tasol lukim, i no em, tasol Spirit bilong Bikpela em i bin i stap insait long em, na em i bin opim maus bilong em long tokaut, olsem na em i no inap pasim maus.

28 Na nau pikinini bilong mi Leman, na tu Lemuel wantaim Sem, na tu ol pikinini man bilong mi em ol pikinini man bilong Ismael, lukim, sapos yupela bai harim long maus bilong Nifai, yupela bai i no inap idai. Na sapos yupela harim em mi bai lusim long yupela wanpela blesin, ye, tru tumas em bai nambawan blesin bilong mi.

29 Tasol, sapos yupela bai i no inap harim em, mi bai kisim bek nambawan blesin bilong mi, ye, tru tumas blesin bilong mi, na dispela blesin bai kam antap long em.

30 Na nau, Joram, mi tok long yu: Lukim, yu em wok boi bilong Leban, tasol, ol i bin karim yu kam out long graun bilong Jerusalem, na mi save olsem yu em wanpela poroman tru tru bilong pikinini bilong mi, Nifai, oltaim oltaim.

31 Olsem na, bikos yu bin strong yet, ol lain pikinini bilong yu bai kisim blesin wantaim ol lain pikinini bilong Nifai, olsem ol i stap wantaim gutpela sindaun longpela taim long pes bilong dispela graun, na nogat wanpela samting,olsem pasin nogut namel long ol, bai bagarapim gutpela sindaun bilong ol long pes bilong dispela graun oltaim oltaim.

32 Olsem na, sapos yu wantaim ol lain tumbuna bilong yu bai bihainim ol lo bilong Bikpela, Bikpela i bin makim na dediketim dispela graun long gutpela sindaun bilong ol lain pikinini bilong yu, wantaim ol lain pikinini bilong pikinini man bilong mi.