1 Na nau lukim, ol brata bilong mi, mi save lavim, mi laik toktok long yupela, bikos mi, Nifai, i no laikim yupela long ting olsem yupela i moa beta long ol lain bilong Jentail. Long wanem, lukim, sapos yupela i no bihainim ol lo bilong God, yupela bai idai wankain olsem ol lain bilong Jentail, na bikos long ol toktok, ol i bin autim yupela i no ken ting olsem Bikpela bai bagarapim olgeta lain bilong Jentail.

2 Long wanem, lukim, mi tokim yupela olsem planti long ol lain bilong Jentail bai kamap pipol em i bin promisim bilong Bikpela; taim ol i tanim bel, na planti long ol lain bilong Juda bai rausim ol i go ausait sapos ol i no tanim bel, bikos Bikpela i no save wokim promis wantaim ol manmeri ol i no tanim bel na bilip long Pikinini man bilong em, husat Em wanpela Holi Tasol bilong Israel.

3 Na nau, mi laik profesai liklik moa long ol lain bilong Juda na long ol lain bilong Jentail. Long wanem, bihain long dispela buk em mi bin toktok long bai kamaut, na Bikpela bai raitim wantaim han bilong ol lain bilong Jentail, na bai haitim gen dispela buk bilong em, planti lain bai bilip long ol toktok em i bin raitim, na ol bai kisim ol toktok i bin raitim i go long ol wanwan tumbuna pikinini bilong yumi.

4 Na em bai kamap we ol wanwan tumbuna pikinini bilong yumi bai kam long save long yumi, olsem mipela i bin kamaut long Jerusalem, olsem wanem, na olsem ol tumbuna pikinini bilong ol lain bilong Juda.

5 Na ol lain bilong Jentail bai autim gutnius bilong Jisas Krais long ol wanwan tumbuna pikinini bilong yumi, olsem na, ol bai kamap long save gen ol tumbuna papa bilong ol, na tu kamap long save long Jisas Krais, em ol tumbuna papa bilong ol i bin save bipo namel long ol.

6 Na bihain long dispela, ol wanwan tumbuna pikinini bilong yumi bai amamas, long wanem, ol bai save olsem em i wanpela blesin i kam long ol long han bilong Bikpela, na ol grile bilong tudak bai i stat long pundaun long ol ai bilong ol, na i no planti jeneresen bai pinis namel long ol, na planti long ol bai kamap klinpela na naispela pipol tru.

7 Na tu, em bai kamap we, ol lain bilong Juda ol i bin go nabaut bai ol i stat long bilip long Krais, na ol bai i stat long bung long pes bilong graun, na planti long ol lain bilong Juda ol bai bilip long Krais na bai ol i kamap naispela pipol tru.

8 Na em bai kamap we, God Bikpela bai stat long wokim wok bilong em namel long olgeta nesen, hauslain, tok ples na pipol, long bringim bek ol pipol bilong em long olgeta hap long graun.

9 Na God Bikpela bai jasim ol man nogat moni lain wantaim stretpela pasin, na tok strong long gutpela sindaun bilong ol malumalum lain bilong graun. Na em bai paitim graun wantaim stik long maus bilong em, na em bai kilim ol pasin nogut lain wantaim win long maus bilong em.

10 Long wanem, taim i kam hariap tru we God Bikpela bai brukim long namel ol pipol bilong graun, na em bai bagarapim ol pasin nogut lain, na em bai larim ol pipol bilong em, ye, tru tumas, inap long Bikpela bai bagarapim ol pasin nogut lain wantaim paia.

11 Na stretpela pasin bai kamap rop bilong pasim raun long sangana bilong em, na pasin strongpela bilip bai kamap rop bilong bosim em.

12 Na bihain long dispela, wail dok bai i stap wantaim pikinini sipsip, na lepat bai slip wantaim liklik pikinini, na pikinini bulmakau wantaim yangpela laion na patpela enimol bai i stap wantaim, na liklik pikinini bai lidim ol.

13 Na bulmakau na bea bai kaikai wantaim, ol yangpela bilong ol bai slip wantaim, na laion bai kaikai gras olsem bulmakau.

14 Na liklik pikinini dring susu bai pilai wantaim hul bilong liklik poisen snek, na liklik pikinini em i wokabaut bai putim han bilong em long haus bilong poisen snek.

15 Olgeta manmeri na olgeta samting bai i no inap kisim pen o bagarap long olgeta hap long holi maunten bilong mi, long wanem, graun bai pulap wantaim save bilong Bikpela, wankain olsem ol wara karamapim solwara.

16 Long wanem, Bikpela bai mekim kamap long ples klia, ol samting bilong olgeta nesen, ye, em bai mekim kamap long ples klia olgeta samting long lain pikinini bilong ol man.

17 Nogat wanpela samting bai hait, i stap, tasol olgeta samting bai kamap long ples klia, nogat wanpela wok bilong tudak bai i stap, tasol olgeta bai kamap long lait, na nogat wanpela wok bin pasim long graun bai i stap, tasol Bikpela bai slekim olgeta.

18 Olsem na, olgeta samting em i bin soim long ol lain pikinini bilong ol man bai soim long dispela de, na Satan bai i no moa gat pawa long winim bel bilong ol lain pikinini bilong ol man long longpela taim. Na nau, ol brata bilong mi, mi save lavim, mi pinisim ol toktok bilong mi.