1 Na wanpela kuru bai kamaut long stik bilong Jesi, na wanpela han diwai bai kamap long ol as diwai bilong em.

2 Na Spirit bilong Bikpela bai i stap wantaim em, spirit bilong bikpela save wantaim luksave, spirit bilong kaunsel wantaim strong, spirit bilong save na bilong poret long Bikpela.

3 Na Spirit bilong Bikpela bai mekim em long kamap long save hariap long poret long Bikpela, na em bai i no inap lukluk wantaim ai bilong em long jasim o em bai i no inap harim wantaim iyau bilong em long painim rong.

4 Tasol em bai jasim ol man nogat moni na ol gutpela samting lain wantaim stretpela pasin, na sanap long nem long ol bel malumalum lain bilong graun long painim rong, na em bai paitim graun wantaim stik bilong maus bilong em, na em bai kilim pasin nogut lain wantaim win long maus bilong em.

5 Na stretpela pasin bai kamap rop long pasim raun long sangana bilong em, na strongpela bilip bai kamap rop na pasim raun long em long holim.

6 Wail dok tu bai i stap wantaim pikinini sipsip, na lepat bai slip wantaim liklik pikinini, na pikinini bulmakau wantaim yangpela laion na patpela enimol bai i stap wantaim, na liklik pikinini bai lidim ol.

7 Na bulmakau na bea bai kaikai wantaim, ol yangpela bilong ol bai slip wantaim, na laion bai kaikai gras olsem bulmakau.

8 Na liklik pikinini dring susu bai pilai wantaim long hul bilong liklik poisen snek, na liklik pikinini em i wokabaut bai putim han bilong em long haus bilong poisen snek.

9 Olgeta manmeri na olgeta samting bai i no inap kisim pen o bagarap long olgeta hap long holi maunten bilong mi, long wanem, graun bai pulap wantaim save bilong Bikpela, wankain olsem ol wara karamapim solwara.

10 Na long dispela de wanpela as diwai bilong Jesi bai sanap olsem wanpela mak long ol pipol, na ol lain bilong Jentail bai kam long em long bihainim, na em bai kisim glori long malolo.

11 Na em bai kamap long dispela de we Bikpela bai soim han bilong em gen long nambatu taim long kisim bek wanwan lain long ol pipol bilong em ol i bin lusim ol i stap long Asiria, na long Isip, na long Patros, na long Kas, na long Ilam, na long Sina, na long Hamat, na long ol ailan long solwara.

12 Na em bai sanapim wanpela mak long ol nesen, na em bai bungim ol lain bilong Israel em ol i bin go ausait, na bung wantaim ol lain bilong Juda em ol i bin go nabaut long olgeta hap long graun.

13 Mangal pasin bilong Efraim tu bai idai pinis, na ol birua lain bilong Juda bai lus, Efraim bai i no inap mangalim Juda, na Juda bai no inap givim trabel long Efraim.

14 Tasol ol bai flai antap long ol solda long ol lain bilong Filistia i go long hap bilong wes, ol bai bagarapim ol lain long hap bilong is, ol bai putim han bilong ol long Idom na Moap, na ol lain pikinini bilong Amon bai bihainim toktok bilong ol.

15 Na Bikpela bai bagarapim olgeta tang long solwara bilong Isip, na Bikpela bai sakim han bilong em long kirapim traipela win antap long wara, na em bai paitim long sevenpela liklik wara, na mekim ol man long wokabaut long drai su.

16 Na wanpela haiwe bai kamap, long ol wanwan lain long ol pipol bilong em ol i bin lusim i stap long Asiria, wankain olsem long Israel long dispela de, em i bin kamaut long graun bilong Isip.