1 Ol toktok bilong Jekop, brata bilong Nifai, em i bin autim long ol pipol bilong Nifai:

2 Lukim, ol lain brata bilong mi, mi save lavim, God i bin singautim mi, Jekop, na odenim mi long holi oda bilong em na i bin dediketim wantaim han bilong Nifai, brata bilong mi long em yupela lukim em olsem king o wanpela man bilong lukautim yumi, na long em i stap na yupela i stap, lukim, yupela save olsem mi bin autim long yupela planti samting tumas.

3 Tasol, mi toktok long yupela gen, long wanem mi yet mi gat laik long gutpela sindaun long sol bilong yupela. Ye, mi gat bikpela wari long yupela, na yupela yet save olsem mi wari long yupela olgeta taim. Long wanem, mi bin strongim gutpela toktok long yupela wantaim olgeta strong, na mi bin lainim ol toktok bilong papa bilong mi long yupela, na mi bin toktok long yupela long olgeta samting mi bin raitim, long taim dispela graun Bikpela i bin krietim.

4 Na nau, lukim, mi laik toktok long yupela long ol samting em i stap nau na em bai kam long bihain taim, olsem na, mi bai ritim long yupela ol toktok bilong Aisaia. Na dispela i ol toktok em brata bilong mi i bin laikim olsem mi mas toktok long yupela. Na mi toktok long yupela bikos long sindaun bilong yupela, olsem yupela bai save na amamasim nem bilong God bilong yupela.

5 Na nau, ol toktok em mi bai ritim em ol toktok em Aisaia i bin toktok long olgeta haus bilong Israel, olsem na, ol toktok bilong Aisaia i karamapim yupela wantaim, long wanem, yupela i wanlain long haus bilong Israel. Na i gat planti samting Aisaia i bin toktok em ken karamapim yupela, bikos yupela i wanlain long haus bilong Israel.

6 Na nau, ol toktok i olsem: God Bikpela i tok olsem: Lukim, mi bai litimapim han bilong mi long ol lain bilong Jentail, na sanapim stretpela wei bilong mi long ol pipol, na ol bai bringim ol pikinini man bilong yu long han bilong ol, na ol bai karim ol pikinini meri bilong yu long solda bilong ol.

7 Na ol king bai kamap papa bilong yu long lukautim yu, na ol kwin bilong ol bai kamap mama bilong yu long lukautim yu, ol bai nil daun long yu wantaim pes bilong ol go daun long graun, na klinim wantaim tang das long ol lek bilong yu, na yu bai save olsem mi em Bikpela, long wanem ol lain ol i wetim mi bai ol i no inap sem.

8 Na nau mi, Jekop, laik toktok liklik long dispela toktok bilong Aisaia. Long wanem, Bikpela i bin soim mi olsem ol lain ol i stap long Jerusalem, long we mipela i bin kam, sampela ol ibin kilim ol i idai na sampela ol i bin karim ol i go long kalabus.

9 Tasol, Bikpela i bin soim mi olsem ol bai go bek gen long graun bilong ol. Na tu, em i bin soim mi olsem God, Bikpela, Em wanpela Holi Tasol bilong Israel, bai soim em yet long ol long skin, na bihain em bai soim em yet, ol bai givim pen long em na krusifaim em, olsem wanpela ensel i bin tokim mi.

10 Na bihain ol bai kamapim belhat bilong ol na kamapim bik het long Em wanpela Holi Tasol bilong Israel, lukim, ol jasmen bilong Em wanpela Holi Tasol bilong Israel, bai kamap long ol. Na de bai kam we ol lain bilong Jentail bai paitim ol na givim pen long ol.

11 Long wanem, bihain long ol i bin ronim ol i go i kam, long wanem, olsem ensel i bin tok planti bai kisim pen long skin, na bai ol i no inap idai, bikos long beten bilong ol bilip lain, ol bai go nabaut, na paitim na bagarapim ol, tasol, Bikpela bai marimari long ol, olsem ol bai bung wantaim gen long graun bilong ol yet, taim ol i bilip long Ridima bilong ol.

12 Na ol lain bilong Jentail ol i bin kisim blesin, ol lain long em profet i bin raitim, long wanem, lukim, sapos ol i tanim bel na ol i no pait wantaim Saion, na ol i no bung wantaim ol yet long dispela bikpela giaman na nogut sios tru, ol bai kisim selvesen, bikos God Bikpela bai mekim kamap tru ol promis bilong em, em i bin mekim wantaim ol lain pikinini bilong em, na profet i bin raitim ol dispela samting, long dispela as.

13 Olsem na, ol lain ol i bin pait wantaim Saion na ol promis pipol bilong Bikpela, bai klinim wantaim tang, ol das long lek bilong ol, na ol pipol bilong Bikpela bai ol i no inap sem. Long wanem, ol pipol bilong Bikpela, em ol lain ol i wetim em long wanem, ol i wet yet long Mesaia long kam.

14 Na lukim, olsem profet i bin tok, Mesaia bai kam bek gen long nambatu taim long kisim ol, long wanem, em bai soim em yet long ol wantaim pawa na bikpela glori tru long bagarapim ol birua bilong ol, taim dispela de i kam taim ol bai bilip long em, na Bikpela bai i no inap bagarapim man em ol bilip long em.

15 Na ol lain ol i no bilip long em bai em i bagarapim ol wantaim paia, na tu wantaim bikpela win na guria, na blut bai kapsait, ol kainkain sik na taim bilong hangre. Na ol bai save olsem Bikpela i God, Em wanpela Holi Tasol bilong Israel.

16 Long wanem, inap long ol samting ol i bin winim long bikpela pait na bai ol i rausim long han bilong strongpela man tru, o inap ol kalabusman bai ol i rausim ol long kalabus?

17 Tasol, Bikpela i tok olsem: Tru tumas, ol kalabusman bilong ol strongpela man tru bai ol i rausim ol long han bilong ol, na ol samting ol i bin winim long bikpela pait bilong ol man nogut tru em bai ol i rausim, long wanem, Strongpela God tru bai sevim ol promis pipol bilong em. Long wanem, Bikpela i tok olsem: Mi bai pait wantaim ol lain em ol i pait wantaim yu—

18 Na mi bai givim long ol lain em ol i givim pen long yupela skin bilong ol yet long kaikai, na ol bai spak wantaim blut bilong ol yet wankain olsem ol i spak wantaim switpela wain, na olgeta manmeri bai save olsem mi, Bikpela, i Sevia na Ridima bilong yu, Em wanpela Strongpela Tru Tasol bilong Jekop.