१ बेबिलोनको बोझ, जुन आमोजका छोरा यशैयाले देखे।

२ अग्ला पर्वतमा तिमीहरू एउटा ध्वजा उचाल, उनीहरूसामु उच्च स्वर उचाल, हात हल्लाओ, ताकि तिनीहरू सुप्रतिष्ठित व्यक्तिहरूका मूल द्वारमा जानेछन्।

३ मेरा पवित्र जनलाई आज्ञा गरेको छु, मैले मेरा शक्तिशालीहरूलाई पनि बोलाएको छु, किनकि मेरो रिस तिनीहरूमा छैन जो मेरो उच्चतामा खुशी मनाउँछ।

४ पर्वतहरूमा भीडको हल्ला महान् मानिसहरूका झैँ सुनिन्छ, एकसाथ भेला भएका राष्ट्रहरूका अधिराज्यहरूका कोलाहलपूर्ण आवाज, सैन्यहरूका अधिपति लडाइँका निम्ति सैन्यहरू जुटाउनुहुन्छ।

५ तिनीहरू टाढाको देशबाट आउँछन्, स्वर्गको अन्त्यबाट, हो, परमप्रभु र उहाँको क्रोधका हतियारहरू, सारा भूमिलाई विनाश गर्न।

६ तिमीहरू डाँको छोडी रोओ, किनकि परमप्रभुको त्यो दिन नजिकै छ; सर्वशक्तिमान्‌का तर्फबाट विनाशका रुपमा त्यो आउनेछ।

७ त्यसकारण सबै हातहरू कमजोर हुनेछन्, हरेक मानिसका हृदय पग्लिनेछन्;

८ अनि तिनीहरू डराउनेछन्, वेदनाहरू र दु:खहरूले तिनीहरूलाई समाउँदछ; तिनीहरू एक अर्कामा चकित हुनेछन्; तिनीहरूका अनुहार आगोको ज्वालाझैँ हुनेछ।

९ हेर, परमप्रभुको त्यो दिन आउँछ, दुबै क्रोध र भयङ्कर रिसका साथ निर्दयी, त्यो भूमिलाई उजाड बनाउन; र उहाँले त्यहाँ भएका पापीहरूलाई त्यहाँबाट विनाश गर्नुहुनेछ।

१० किनकि स्वर्गका ताराहरू र त्यहाँका तारामण्डलहरूले आफ्नो प्रकाश दिने छैनन्, सूर्य आफ्नो उदयमा अँध्यारो हुनेछ र चन्द्रमाले आफ्नो ज्योति चम्कन दिनेछैन।

११ अनि म संसारलाई दुष्ट्याइँका निम्ति दण्ड दिनेछु र दुष्टहरूलाई तिनीहरूका दुष्टताका निम्ति; म घमण्डीहरूका घमण्डलाई रोक्नेछु र भयानकहरूका सेखी झार्नेछु।

१२ म मानिसलाई असली सुनभन्दा बढी बहुमूल्य बनाउनेछु; मानिसलाई ओपीरको सुनभन्दा समेत अझै बहुमूल्य।

१३ त्यसकारण, म स्वर्गहरूलाई हल्लाउँछु र पृथ्वी आफ्नो ठाउँबाट हट्नेछ, सैन्यहरूका अधिपतिका क्रोधमा र उहाँको भयङ्कर रिसको दिनमा।

१४ अनि त्यो खेदिएको हरिणझैँ र कोही मानिसले नलैजाने भेँडाझैँ हुनेछ र ती प्रत्येक मानिस उसको आफ्नै मानिसकहाँ फर्कनेछ र प्रत्येक जन उसको आफ्नै भूमिमा भाग्नेछ।

१५ प्रत्येक जन जो घमण्डी छ हतियारले रोपिनेछ; हो र प्रत्येक जन जो दुष्टहरूसँग सम्मिलित हुन्छ तरबारले मारिनेछ।

१६ तिनीहरूका छोराछोरीहरूलाई पनि तिनीहरूका आँखाअगाडि पछारेर छिल्लीबिल्ली पारिनेछ; तिनीहरूका घरहरू लुटिनेछन् र तिनीहरूका श्रीमतीहरूलाई बलात्कार गरिनेछ।

१७ हेर, म मादीहरूलाई तिनीहरूका विरुद्ध भड्काउनेछु, जसले चाँदी र सुनलाई महत्व दिँदैनन्, न त तिनीहरू यसमा आनन्दित नै हुन्छन्।

१८ तिनीहरूका धनुहरूले जवान मानिसहरूलाई पछारेर छिल्लीबिल्ली पार्नेछन्; र तिनीहरूले कोखको फलमाथि दया गर्नेछैनन्; तिनीहरूका आँखाहरूले बालबालिकाहरूलाई छाड्नेछैनन्।

१९ अनि बेबिलोन, अधिराज्यहरूका महिमा, कल्दीहरूका सर्वोत्कृष्टताका सुन्दरता, परमेश्वरले सदोम र गमोरालाई पछार्दाको समयझैँ हुनेछ।

२० त्यहाँ कहिल्यै कोही वास गर्नेछैन, न त त्यहाँ एक पिँढीदेखि अर्को पिँढीसम्म कोही बस्नेछ: न त अरबीले त्यहाँ आफ्नो पाल टाङ्छ; न त गोठालाहरूले त्यहाँ तिनीहरूका गोठ बनाउनेछन्।

२१ तर मरुभूमिका जङ्गली जनावरहरू त्यहाँ विश्राम गर्नेछन्; र तिनीहरूका घरहरू शोकाकूल प्राणीहरूले भरिनेछन् र लाटोकोसेराहरूले त्यहाँ बास गर्नेछन् र बोकाहरू त्यहाँ नाच्नेछन्।

२२ अनि टापुहरूका जङ्गली जनावरहरू आफ्ना उजाड घरहरूमा कराउनेछन् र भयानक जीवहरू तिनीहरूका रमाइलो महलहरूमा; र त्यसको समय नजिकै आएको छ, त्यसको दिन लम्ब्याइने छैन। किनकि म त्यसलाई छिट्टै नाश गर्नेछु; हो, किनकि म मेरा जनमाथि कृपालु हुनेछु, तर दुष्टहरूको नाश हुनेछ।