१ अनि अब, हेर, मेरा प्रिय बन्धुहरू, म ठान्दछु कि तिमीहरूले बाटोमा प्रवेश गरेपछि तिमीले गर्नुपर्ने तिनको बारेमा तिमीहरूका हृदयहरूमा केही चिन्तन गरेका होऔला। तर, हेर, तिमीहरू यी कुराहरूका बारेमा तिमीहरूका हृदयहरूमा किन चिन्तन गर्छौ?

२ के तिमीहरू सम्झँदैनौ कि मैले तिमीहरूलाई तिमीहरूले पवित्र आत्मा प्राप्त गरेपछि तिमीहरू स्वर्गदूतहरूका भाषामा बोल्न सक्छौ भनेर भनेको? अनि अब, पवित्र आत्माद्वारा बाहेक तिमीहरू स्वर्गदूतहरूका भाषामा कसरी बोल्न सक्छौ?

३ स्वर्गदूतहरू पवित्र आत्माको शक्तिद्वारा बोल्दछन्; यसकारण, तिनीहरू ख्रीष्टका वचनहरू बोल्छन्। यसकारण, मैले तिमीहरूलाई भनें, ख्रीष्टका वचनहरूमा भोज गर; किनकि हेर, ख्रीष्टका वचनहरूले तिमीले गर्नुपर्ने सबै कुराहरू भन्नेछन्।

४ यसकारण, अब मैले यी वचनहरू बोलेपछि, यदि तिमीहरूले त्यसलाई बुझ्न सक्दैनौ भने यो किनकि तिमीहरूले सोध्दैनौ, न त तिमीहरूले ढक्ढक्याएका छौ; यसकारण तिमीहरूलाई प्रकाशमा ल्याइएको छैन, तर अन्धकारमा नाशिनु पर्दछ।

५ किनकि हेर, फेरि म तिमीहरूलाई भन्दछु कि यदि तिमीहरूले बाटोबाट प्रवेश गऱ्यौ भने, अनि पवित्र आत्माको प्राप्ति गऱ्यौ भने, तिमीहरूले गर्नुपर्ने सबै कुराहरू यसले तिमीहरूलाई देखाउनेछ।

६ हेर, यो ख्रीष्ट को सिद्धान्त हो, अनि उहाँ आफैँ शरीरमा प्रकट नभइन्जेलसम्म अरु कुनै सिद्धान्त दिइने छैन। अनि जब उहाँ आफैँ तिमीसामु शरीरमा प्रकट हुनुहुन्छ, जुनकुराहरू उहाँ भन्नुहुनेछ ती कुराहरू तिमीहरूले गर्नू।

७ अनि अब, म नफी, अरु भन्न सक्दिनँ; आत्माले मेरो अभिव्यक्ति रोक्दछ, अनि मलाई मानिसहरूका अविश्वास, अनि दुष्टता, अनि अज्ञानता, अनि हठीपनका कारण शोक गर्न मात्र बाँकी छ;किनकि तिनीहरूले ज्ञानको खोजी गर्नेछैनन्, न त महान् ज्ञानलाई बुझ्दछन्, जब कि यो उनीहरूलाई सरलतामा दिइएको छ, वचन जति सरल हुनसक्छ त्यतिसम्म समेत।

८ अनि अब, मेरा प्रिय बन्धुहरू, म ठान्दछु कि तिमीहरू अझै हृदयहरूमा मनन गर्दैछौ; अनि यसले मलाई चिन्ता दिन्छ कि मैले यी कुराहरूका बारेमा बोल्नुपर्छ। किनकि यदि तिमीहरूले आत्मालाई सुन्यौ जसले मानिसलाई प्रार्थना गर्न सिकाउँदछ, तिमीहरूले जान्नेछौ कि तिमीहरूले प्रार्थना गर्नुपर्छ; किनकि दुष्ट आत्माले मानिसलाई प्रार्थना गर्न सिकाउँदैन, तर उसलाई सिकाउँदछ कि उसले प्रार्थना गर्न हुँदैन।

९ तर हेर, म तिमीलाई भन्छु कि तिमीले सदैव प्रार्थना गर्नुपर्दछ, अनि कम्जोर हुनुहुँदैन; कि पहिला पितासमक्ष ख्रीष्टको नाउँमा प्रार्थना नगरीकन परमप्रभुसामु कुनै पनि कार्य निर्वाह गर्नु हुँदैन, कि उहाँले तिम्रो कार्यलाई तिम्रो निम्ति पवित्रीकृत गर्नुहुनेछ; कि तिम्रो कार्य तिम्रो आत्माको कल्याणको निम्ति होओस्।