1 Tuhsruhk, liye, ke lwen sahflah, kuh ke in pacl luhn mwet Gentile—ahok, liye muhtuhnfacl nuhkwewa luhn mwet Gentile ac oacyacpac mwet Jew, kwewana elos suc fah tuhkuh nuh fin acn se inge ac elos suc ac fah muhta ke acn sahyac, ahok, finne fin acn nuhkwewa fin facluh, liye, elos fah sruhilac ke ma koluk ac kain in ma sruhngwacyuck nuhkwewa—

2 Ac ke lwen sac fah tuhkuh elos fah fahsriyuck sin Leum luhn Un Mwet Mweun, ke puhlahl ac ke kusrusr, ac ke sie puhsra luhlahp, ac ke pahkah, ac ke noa tuh, ac fihrihr luhn e in esuhkwack.

3 Ac muhtuhnfacl nuhkwewa ma mweun lain Zion, ac ma lokoalok nuh sel, ac fah oacna sie mwemwe in aruhruhma ke fong uh; ahok, ac fah ohinge nuh selos, in oacna nuh ke sie mwet masrinsrwacl suc mwemwe, ac liye el mongo tuhsruhk el muhtwaclihk ac nguhnal aloal; kuh in oacna nuh ke sie mwet maluh suc mwemwe, ac liye el nihm kof tuhsruhk el muhtwaclihk ac liye el muhlallah, ac nguhnal masrinsrwacl; ahok, ac fah ohinge nuh sin un mwet ke muhtuhnfacl nuhkwewa ma mweun lain Ohl Zion.

4 Tuh liye, kowos nuhkwewa suc oruh ma koluk, kowos muhta ac nuhnkuh, tuh kowos fah wowoyak, ac tuhng; ahok, kowos fah sruhilac tuhsruhk tiac ke wine, kowos fah tikuclkuclyak tuhsruhk tiac ke mwe nihmnihm fokoko.

5 Tuh liye, Leum El okwaclah nuh fowos nguhn luhn mutul folosuwohs. Tuh liye, kowos kaliyac motowos, ac kowos sruhnga mwet pahluh; ac mwet kol lowos, ac El afuhnlah mwet liyactwen ke srihpen koluk lowos.

6 Ac ma inge fah sikyak tuh Leum God El fah sang nuh suwos kahs ke sie puk, ac ma inge fah kahs lalos suc mutul.

7 Ac liye puk sac fah siliyucki; ac lin puk sac ac fah oasr sie fwackyuck sin God, e ke muhtwacwacackiyacn facluh nuh ke sahflahiyac.

8 Ohinge, ke srihpen ma suc siliyucki, ma suc siliyucki fah tiac utuckuh ke pacl luhn ma koluk ac ma sruhngwacyuck luhn mwet uh. Ohinge puk sac fah sruokyucki luhkwelos.

9 Tuhsruhk puk sac fah utuckuh nuh sin sie mwet, ac el fah sang kahs luhn puk sac, suc pa kahs lalos suc tuh mutul infohk uh, ac el fah sang kahs inge nuh sin sie pac;

10 Tuhsruhk el fah tiac sang kahs ma siliyucki, el fah tiac sang puk sac. Tuh puk sac fah siliyucki ke kuh luhn God, ac fwackyuck se ma siliyucki ah fah likiyucki lin puk sac ne ke na pacl Leum El pakiyac, tuh ma inge in tuhkuh; tuh liye, ma inge ahkkahlwemye ma nuhkwewa ke na pwelucng luhn facluh me ne ke na sahflahiyac.

11 Ac lwen sac tuhkuh ke kahs ke puk se ma tuh siliyucki ah fah ritiyuck fin lohm uh; ac ma inge fah ritiyuck ke kuh luhn Kraist; ac ma nuhkwewa fah ahkkahlwemyeyuck nuh sin tuhlihk nuhtin mwet suc nuh oacna inge inmahsrlon tuhlihk nuhtin mwet, ac fah nuh oacna inge ne ke na sahflahiyacn facluh.

12 Ohinge, ke lwen sac puk sac fah utuckuh nuh sin sie mwet suc nga sruhmuhn kac, puk sac fah wihkihnyucklac liki muhtuhn facluh, tuh wacngihn kuhtwena muhtah fah liye sahyacn na mwet loh tolu suc fah liye ma inge, ke kuh luhn God, sahyacl suc puk sac fah ituckyang; ac elos fah fahkwack ke pwacyeiyacn puk sac ac ma sihmlac loac.

13 Ac wacngihn mwet sahyac fah liye ma inge, sahyacn na mwet ekahsr in oacna nuh ke luhngse luhn God, in fahkwack luhlahlfongi ke kahs lal nuh sin tuhlihk nuhtin mwet; tuh Leum God El fahk lah kahs luhn mwet luhlahlfongi ac sruhmuhn oacna in ma tuhkuh sin mwet misac me.

14 Ohinge, Leum God El fah tahfwelah in sang kahs ke puk sac; ac ke oalin mwet loh pucspucs ma El liye tuh fal wo El fah oakiyac kahs Lal; ac we nuh sel suc sruhnga kahs luhn God!

15 Tuhsruhk liye, tukun ma inge Leum God El fah fahk nuh sel suc El fah sang puk sac nuh se: Eis kahs inge ma tiac siliyucki ac sang nuh sin sie pac, tuh elan kuh in ahkkahlwemye nuh selos suc eis etwacack, fahk: Riti ma inge, nga kwacfe suwos. Ac mwet eis etwacack fah fahk: sang ingena puk sacn, ac ngwac riti.

16 Ac inge, ke srihpen wolacna luhn facluh ac in eis ma yohk kac elos fah fahk ma inge, ac tiac nuh ke wolacna luhn God.

17 Ac mwet sac fah fahk: Nga tiac kuh in us puk sac, tuh ma inge siliyucki.

18 Na mwet eis etwacack sac fah fahk: Nga tiac kuh in riti.

19 Ohinge tukun ma inge, Leum God El fah sifilpac sang puk sac ac kahs kac ah nuh sel suc wacngihn etuh la; ac mwet se suc wacngihn etuh la ah fah fahk: Nga tiac na eis etwacack.

20 Na Leum God El fah fahk nuh sel: Mwet eis etwacack fah tiac riti ma inge, tuh elos sruhnga ma inge, ac Nga kuh in oruh orekma Luhk sifacna; ohinge kom fah riti kahs ma Nga fah acsot nuh sum.

21 Nikmet kahl ma suc siliyucki, tuh Nga fah sang ma inge ke pacl Luhk sifacna; tuh Nga fah ahkkahlwemye nuh sin tuhlihk nuhtin mwet lah Nga kuh in oruh orekma Luhk sifacna.

22 Ohinge, ke kom riti kahs ma Nga sapkihn nuh sum kac, ac eis mwet loh suc Nga olwelah nuh sum, na fah kom sifilpac siliyac puk sac, ac okanlah nuh Sihk, tuh Ngan kuh in karuhnguhnwacng kahs ma kom soenna riti, ne ke na Nga liye tuh fal nuh ke lahlmwetmwet Luhk sifacna in ahkkahlwemye ma nuhkwewa nuh sin tuhlihk nuhtin mwet.

23 Tuh liye, Nga pa God; ac Nga pa God luhn mwenmwen; ac Nga fah ahkkahlwemye nuh sin facluh lah Nga oacna sie ekweah, mihsenge, ac ne tok ma pahtpaht; ac Nga tiac orekma inmahsrlon tuhlihk nuhtin mwet sahyacn na in fal nuh ke luhlahlfongi lalos.

24 Ac sifilpac tukun ma inge Leum El fah fahk nuh sel suc fah riti kahs ma fah ituckyang nuh sel uh:

25 Yohk na ke mwet inge fototome nuh Yuruk ke oacluhlos, ac inngoasrolos ahkfuhlwactyeyuc, tuhsruhk insiaclos som loes likiyuc, ac sahngweng lalos nuh Sihk lutiyuck ke luti luhn mwet—

26 Ke ma inge, Nga fah fahlacna in oruh sie orekma wolacna inmahsrlon mwet inge, ahok, sie orekma na wowo ac sie ma wolacna, tuh lahlmwetmwet luhn mwet suhmaht ac mwet eis etwacack lalos fah wacngihnlac, ac etatwen luhn mwet okak lalos fah wihklac.

27 Ac we nuh selos suc suk na upac in okanlah kihsen kahsruh lalos liki Leum! Ac orekma lalos orek ke lohsr uh; ac elos fahk: Suc liye kuht, ac suc etwekuht? Ac elos oacyacpac fahk: Pwacyena, ekuhlwaclihk lowos ke ma uh fah luhmweyuck in oacna fohk fuhrahrrahr luhn mwet orek ahluh ke fohk uh. Tuhsruhk liye, Nga fah ahkkahlwemye nuh selos, Leum luhn Un Mwet Mweun El fahk, tuh Nga etuh orekma lalos nuhkwewa. Tuh orekma uh fah fahkuhlwack suc oraclah ma inge, yac el tiac oreyuclac? Kuh yac ma suc fremiyucki uh fahk kacl suc fremiyac, yac el tiac kahlwem kac?

28 Tuhsruhk liye, Leum luhn Un Mwet Mweun El fahk: Nga fah ahkkahlwemye nuh sin tuhlihk nuhtin mwet lah ac kihtin pacl na ac acn Lebanon fah eklac nuh ke sie acn ruhkruhk ke imac in fahko ac imac in fahko uh fah luhmweyuck in oacna sie innimac.

29 Ac ke lwen sac mwet sohlohng fah lohng kahs ke puk sac, ac muhtuhn mwet kun fah liye ke lohsr uh ac liki lohsr uh.

30 Ac mwet puhsisacl fah oacyacpac puhseni, ac engan lalos fah oan in Leum, ac mwet suhkahsruhp inmahsrlon mwet uh fah enganwack sin El suc Muhtahl luhn Israel.

31 Tuh pwacyena lah oacna ke Leum El moul elos fah liye tuh el suc koluk el tiac utuckuh, ac mwet ahkkoluk fah isisyak, ac mwet nuhkwewa suc suk ma koluk uh lihsyucklac;

32 Ac elos suc oruh tuh sie mwet in sie mwet oraclah ma koluk ke sie kahs, ac oakiyac sie sruhf nuh sel suc kalyeiyuck ke muhtuhn pot uh, ac fohrohkuhnlah mwet suwohs ke ma wacngihn srihpac.

33 Ke ma inge, Leum El fahk ohinge, suc molwellah Abraham, kacn tuhlihk nahtuhl Jacob: Jacob el fah tiac mwekihn inge, kuh muhtahl fah tiac pac sruhsrahlah.

34 Tuhsruhk ke el liye tuhlihk nahtuhl, orekma luhn Pouk, inmahsrlol, elos fah ahkmuhtahlye Inek, ac ahkmuhtahlye El suc Muhtahl lal Jacob, ac fah sahngweng sin God luhn Israel.

35 Elos pac suc tahfonglac ke nguhn fah eis etatwen, ac elos suc tohrkahskahs fah lotwelah mwe luti uh.