1 Ac inge, Jacob, nga sramsram nuh sum: Kom pa tuhlihk isuslac se emet nuhtihk ke lusen lwen in kweok luhk ke yen mwesis. Ac liye, ke kom matwacn tuhlihk kom kweokkihn ma upac ac ahsor yohk, ke srihpen koluk luhn tamuhlwel wiyom.

2 Ne ohinge, Jacob, tuhlihk isuslac se emet nuhtihk ke yen mwesis, kom etuh wolacna luhn God; ac El fah akmuhsraelah kweok lom nuh ke kapkapwack lom.

3 Ohinge, nguhnum fah ahkinsewowoyeyuck, ac kom fah muhta karihngihnyuckyang yurun tamuhlwel se wiyom, Nephi; ac lusen lwen lom fah eisyuckyang in kuhlwacnsapuh God lom. Ohinge, nga etuh lah kom moliyucklac, ke srihpen suwohswohs luhn Mwet in Molwelah lom; tuh kom liye lah ke fohnlah luhn pacl uh El tuhkuh in use molwelah nuh sin mwet uh.

4 Ac kom liye ke matwac fuhsr lom ke wolacna Lal; ohinge, kom ahkinsewowoyeyuck oacna elos suc El fah luti ke mahno; tuh Nguhn uh oacna sie, ekweah, mihsenge, ac ne tok ma pahtpaht. Ac inkacnek uh ahkoeyucklac e ke puhtatlac luhn mwet, ac wacngihn molin molwelah uh.

5 Ac mwet uh lutiyuck fal tuh elos in etuh ma wo liki ma koluk. Ac masap uh ituckyang nuh sin mwet uh. Ac ke masap uh wacngihn mwet kuh in kahinglac liki mwacta; kuh, ke masap uh mwet uh lihsyucklac. Ahok, ke masap suhkawihl elos lihsyucklac; ac oacyacpac, ke masap kawihl elos fuhlweack ma suc wo, ac eklac suhpwacr ne tok ma pahtpaht.

6 Ohinge, molwelah uh tuhkuh ke ac kacl Messiah Muhtahl; tuh El sesseslah ke luhng kuhlwacng ac pwacye.

7 Liye, El esuhlwacng sifacna in sie kihsac nuh ke ma koluk, in topuk sahflahiyacn masap, nuh selos nuhkwewa suc inse muhsahl ac toasr in nguhn; ac wacngihn kuhtwena mwet sahyac kuh in topuk sahflahiyacn masap uh.

8 Ohinge, fuhkah yohk srihpaciyac in oraclah ma inge in etweyuck nuh sin mwet nuhkwewa fin facluh, tuh elos in kuh in etuh lah wacngihn mahno kuh in muhta yurun God, fin tiac ke ohiyac wo, ac pahkotwen, ac luhng kuhlwacng luhn Messiah Muhtahl, suc fihliyac moul Lal in fal nuh ke mahno, ac sifilpac eis ke kuh luhn Nguhn, tuh Elan kuh in ahkfahsrye sifilpac moulyak luhn mwet misac, tuh El pa emet in moulyak uh.

9 Ohinge, El pa fahko se emet nuh sin God, oacna ke El fah oruh iwe nuh sin tuhlihk nuhkwewa nuhtin mwet; ac elos suc luhlahlfongel fah moliyucklac.

10 Ac ke srihpen iwe nuh sin mwet nuhkwewa, mwet nuhkwewa tuhkuh nuh yurun God; ohinge, elos tu ye Muhtahl, in nuhnuhnkweyuck Sel fal nuh ke ma pwacye ac muhtahl ma oasr Yohrohl. Ohinge, sahflahiyacn masap ma El suc Muhtahl El use, nuh ke ahkfahsryelah luhn kaiyuck ma ituckyang, suc kaiyuck ma ituckyang inge siena liki engan ma ituckyang uh, in topuk sahflahiyacn iwaclah—

11 Tuh enenuh se na, tuh in oasr kihsruhngyacn ma nuhkwewa. Fin tiac, tuhlihk isuslac se emet nuhtihk ke yen mwesis, ma suwohswohs uh tiac kuh in sikyak, kuh ma koluk, kuh ma muhtahl kuh suhpwacr, kuh ma wo kuh koluk. Ohinge, ma nuhkwewa enenuh in asuhpangi; ohinge, ac fin enenuh in sie mahno na enenuh in misac na, tiac moul kuh misac, kuh koluk kuh wo, pwacr kuh suhpwacr, kuh in puhla kuh in tiac puhla.

12 Ohinge, enenuh se na in oreklac nuh ke sie ma suc wacngihn srihpac; ohinge ac tuh wacngihn srihpen sahflahiyacn oreklac la uh. Ohinge, ma se inge enenuh in kuhnahoslah lahlmwetmwet luhn God ac srihpac ma pahtpaht Lal, ac oacyacpac kuh, ac pahkotwen, ac nuhnuhnkuh suwohs luhn God.

13 Ac kom fin fahk lah wacngihn masap, kom fah oacyacpac fahk lah wacngihn ma koluk. Kom fin fahk lah wacngihn ma koluk, kom fah oacyacpac fahk lah wacngihn suwohswohs. Ac fin wacngihn suwohswohs na wacngihn engan. Ac fin wacngihn suwohswohs kuh engan na wacngihn kaiyuck kuh suhpwacr. Ac ma inge fin wacngihn na wacngihn God. Ac fin wacngihn God na kuht wacngihn, ac wacngihn pac facluh; tuh ac wacngihn oreklac luhn ma uh, kuh in tiac pac orekma kuh in orekmakihnyuck; ohinge, ma nuhkwewa ac enenuh se na in wacngihnlac.

14 Ac inge, wen nuhtihk, nga sramsram nuh suwos ke ma inge nuh ke kapkapwack ac etwacack lowos; tuh oasr sie God, ac El oraclah ma nuhkwewa, kwewana inkuhsrao ac facluh, ac ma nuhkwewa ma oasr loac, kwewana ma in orekma ac ma in orekmakihnyuck.

15 Ac in sang srihpac ma pahtpaht Lal nuh ke sahlfahiyacn mwet uh, tukun El oraclah ninac se emet kiyacsr ac pahpah se emet tuhmwacsr, ac kosro lwemnak fin mah uh ac won yen engyeng uh, ac in ahkkahlwemye, ma nuhkwewa ma oreklac, enenuh se na in oasr sie ma kihsruhng; finne fukun sahk oal in lain sahk in moul; sie emwem ac ma se sahyac ah mohkohl.

16 Ohinge, Leum God El sang nuh sin mwet tuh elan orekma nuh sel sifacna. Ohinge, sie mwet el tiac kuh in orekma nuh sel sifacna sahyacn na el srihfeyuck ke sie kuh ke ma se sahyac.

17 Ac nga, Lehi, in oacna nuh ke ma suc nga riti, enenuh in nuhnkweyuck lah sie lipufacn luhn God, in oacna nuh ke ma sihmihsyucklac, tuh puhtatlac liki inkuhsrao; ohinge, el eklac sie devil, suc suk ma koluk ye muhtuhn God.

18 Ac ke srihpen el tuh puhtatlac liki inkuhsrao, ac tuh eklac suhpwacr ne tok ma pahtpaht, el suk pac suhpwacr luhn mwet nuhkwewa. Ohinge, el fahk nuh sel Eve, ahok, finne serpent mahtuh soko ah, suc pa devil, suc pa pahpah tuhmwacn kikiacp nuhkwewa, ohinge el fahk: Ipeis ke fukun sahk oal, ac kom fah tiac misac, tuhsruhk kom fah oacna God, etuh ma wo ac koluk.

19 Ac tukun Adam ac Eve tuh ipeis ke fukun sahk oal sac elos tuh lihsyucklac liki imac Eden, in imaci fohk uh.

20 Ac elos oswelah tuhlihk; ahok, finne sucu luhn facluh nohfohn.

21 Ac lusen lwen luhn tuhlihk nuhtin mwet uh ahkloesyeyuck, in oacna nuh ke luhngse luhn God, tuh elos in kuh in auliyak ke moul in mahno; ohinge, ohiyaclos eklac nuh ke sie puhlan pacl in srihkeyuck, ac pacl lalos ahkloesyeyuck, in oacna nuh ke masap ma Leum God El sang nuh sin tuhlihk nuhtin mwet. Tuh El sang masap tuh mwet nuhkwewa enenuh in auliyak; tuh El ahkkahlwemye nuh sin mwet nuhkwewa lah elos tuhlac, ke srihpen tahfonglac luhn ninac kiyaclos ac pahpah tuhmwaclos.

22 Ac inge, liye, Adam el fuhnuh tiac tahfonglac el luhkuhn tiac puhtatlac, tuhsruhk el luhkuhn srwackna muhta ke imac Eden. Ac ma nuhkwewa ma oreklac ah ac oacna ke ohiyac sacpacna tukun ma inge oreklac ah; ac luhkuhn ma inge enenuh na in oan ne tok ma pahtpaht, ac wacngihn sahflahiyac.

23 Ac luhkuhn wacngihn tuhlihk nahtuhlos; ohinge luhkuhn elos srwackna muhta na ke sie ohiyacn moul ma wacngihn mwacta, wacngihn engan, ke srihpen elos tiac etuh suhpwacr; tiac oruh ma wo, ke srihpen elos tiac etuh ma koluk.

24 Tuhsruhk liye, ma nuhkwewa oreklac ke lahlmwetmwet luhn El suc etuh ma nuhkwewa.

25 Adam el puhtatlac tuh mwet uh in kuh in moul; ac mwet uh in moul, tuh elos in kuh in engan.

26 Ac Messiah El tuhkuh ke fohnlah luhn pacl uh, tuh Elan kuh in molwelah tuhlihk nuhtin mwet liki puhtatlac sac. Ac ke srihpen elos moliyucklac liki puhtatlac sac elos eklac sukohsohklah ne tok ma pahtpaht, etuh ma wo liki ma koluk; in sifacna orekma kaclos ac in tiac orekmakihnyuck, sahyacn na kaiyuck luhn masap ke lwen yohk ac sahflah sac, in oacna nuh ke masap ma God El use.

27 Ohinge, mwet uh sukohsohk in fal nuh ke mahno; ac ma nuhkwewa ituckyang nuh selos ma fal nuh sin mwet uh. Ac elos sukohsohk in sulaclah moul sukohsohk ac moul ma pahtpaht, ke Mwet Iwe wo luhn mwet nuhkwewa, kuh in sulaclah srohoh ac misac, in fal nuh ke srohoh ac kuh luhn devil; tuh el suk tuh mwet nuhkwewa in kuh in suhpwacr oacna el sifacna.

28 Ac inge, wen nuhtihk, nga kena tuh kowos in ngwet nuh sin Mwet Iwe wo, ac porongo masap wo Lal; ac oaru nuh ke kahs Lal, ac sulaclah moul ma pahtpaht, in oacna nuh ke luhngse luhn Nguhn Muhtahl Lal.

29 Ac tiac sulaclah misac ma pahtpaht, in oacna nuh ke luhngse luhn mahno ac ma koluk ma oasr kac, ma sang kuh nuh ke nguhn luhn devil in sruokyac, in iskowi nuh ten nuh hell, tuh elan kuh in kol fowos ke tohkohsrahi lal sifacna.

30 Nga sruhmuhn kahs puh inge nuh suwos kwewa, wen nuhtihk, ke lwen sahflah ke puhlan pacl in srihkeyuck luhk; ac nga sulaclah ip wo kac, in oacna nuh ke kahs luhn mwet pahluh. Ac wacngihn srihpac sahyac luhk sahyacn na ohiyac wo ma pahtpaht luhn nguhnuwos. Amen.