1 Ac inge nga, Nephi, ahksahfye pahluh luhk nuh suwos, mwet sacohk wiyuck. Ac nga tiac kuh in sihmihs tuhsruhk kuhtuh na ke ma, suc nga etuh muh enenuh in sikyak; nga tiac pac kuh in sihmihs tuhsruhk kuhtuh na ke kahs luhn tamuhlwel wiyuck Jacob.

2 Ohinge, ma suc nga suhmuhslah fal nuh sihk, sahyacn na kahs puh ma nga enenuh in sruhmuhn ke mwe luti luhn Kraist; ohinge, nga fah sramsram nuh suwos in kahlwem, in fal nuh ke kahlwemiyacn pahluh luhk.

3 Tuh nguhnihk engan ke ma kahlwem; tuh tukun ohiyac se inge Leum God El orekma inmahsrlon tuhlihk nuhtin mwet. Tuh Leum God El sang kahlwem nuh ke etatwen; tuh El sramsram nuh sin mwet in fal nuh ke kahs lalos, nuh ke etatwen lalos.

4 Ohinge, nga kena tuh kowos in esam lah nga sramsram nuh suwos kacn mwet pahluh suc Leum El ahkkahlwemye nuh sihk, suc ac pacptaiselah Lahm luhn God, suc ac eislah ma koluk luhn facluh.

5 Ac inge, fin Lahm luhn God, El suc muhtahl, El enenuh in pacptaislac ke kof, in ahkpwacyeiye suwohswohs nuhkwewa, O na, fuhkah luhpan enenuh pac lasr, ma tiac muhtahl, in pacptaislac, ahok, finne ke kof!

6 Ac inge, nga kena siyuck suwos, mwet sacohk wiyuck, yac Lahm luhn God El tuh ahkpwacyeiye suwohswohs nuhkwewa ke El pacptaislac ke kof?

7 Yac kowos tiac etuh lah El muhtahl? Tuhsruhk finne El muhtahl, El ahkkahlwemye nuh sin tuhlihk nuhtin mwet lah, in oacna nuh ke mahno El ahkpuhsisaclyacl sifacna ye muhtuhn Pahpah, ac loh kac nuh sin Pahpah lah El ac ahkostwen nuh Sel in liyacacng masap Lal.

8 Ohinge, tukun El pacptaislac ke kof Nguhn Muhtahl tuhwi nuh Facl ke luhmahn sie wule.

9 Ac sifilpac, ac ahkkahlwemye nuh sin tuhlihk nuhtin mwet suwohswohsiyacn inkacnek uh, ac ohsrihksrihkiyacn muhtuhnpot uh, ma elos fah ilyak kac, El oakiyac mwe srihkasrak met luhkwelos.

10 Ac El fahk nuh sin tuhlihk nuhtin mwet: Kowos fahsr Tukuk. Ohinge, mwet sacohk wiyuck, yac kuht kuh in fahsr tukun Jisus fin kuht insese in liyacacng masap luhn Pahpah?

11 Ac Pahpah El fahk: Kowos auliyak, kowos auliyak, ac pacptaislac ke inen Wen Kuloh Nuhtihk.

12 Ac oacyacpac, puhsren Wen tuhkuh nuh yuruk, fahk: El suc pacptaislac ke Inek, Pahpah El fah sang Nguhn Muhtahl nuh sel, oacna nuh Sihk; ohinge, fahsr Tukuk, ac oruh ma suc kowos liye Nga oruh.

13 Ohinge, mwet sacohk wiyuck, nga etuh lah kowos fin fahsr tukun Wen, ke inse pwacye, tiac mukwikwi in wosounkacs ac tiac kikiacp ye muhtuhn God, tuhsruhk ke inse pwacye, auliyak ke ma koluk lowos, loh nuh sin Pahpah lah kowos insese in eis nuh fowos inen Kraist, ke pacptais—ahok, ke kowos fahsr tukun Leum lowos ac Mwet Lahngo lowos nuh ten nuh ye kof uh, in oacna nuh ke kahs Lal, liye, na fah kowos eis Nguhn Muhtahl; ahok, na tuhkuh pacptais luhn e ac luhn Nguhn Muhtahl; ac na kowos kuh in sramsram ke loun lipufacn, ac wowoyak kaksakihn El suc Muhtahl luhn Israel.

14 Tuhsruhk, liye, mwet sacohk wiyuck, ohinge tuhkuh puhsren Wen nuh sihk, fahk: Tukun kowos auliyak ke ma koluk lowos, ac loh nuh sin Pahpah lah kowos insese in liyacacng masap Luhk, ke pacptaislac ke kof, ac eis pacptais ke e ac luhn Nguhn Muhtahl, ac kuh in sramsram ke soko lohoh sasuc, ahok, finne ke loun lipufacn, ac tukun ma se inge in lahfwekihnyuc, ac tuh wo liki na nuh suwos kowos fin tiac etweyuc.

15 Ac nga lohng sie puhsra sin Pahpah, fahk: Ahok, kahs luhn Kuloh Luhk pwacye ac suwohs. El suc muhtweng ne ke sahflah, el fah moliyucklac.

16 Ac inge, mwet sacohk wiyuck, nga etuh ke ma inge lah fin sie mwet fah tiac muhtweng ne ke sahflah, ke mwe srihkasrak tahklac luhn Wen nuhtin God moul, el tiac kuh in moliyucklac.

17 Ohinge, oruh ma suc nga fahk nuh suwos muh nga tuh liye ma Leum lowos ac Mwet in Molwelah lowos enenuh in oruh; tuh, ke srihpac se inge ma inge ahkkahlwemyeyuck nuh sihk, tuh kowos in kuh in etuh ke muhtuhnpot ma kowos in ilyak kac. Tuh muhtuhnpot se ma kowos enenuh in ilyak kac uh pa auliyak ac pacptaislac ke kof; ac na fah tuhkuh iyucklac luhn ma koluk lowos ke e ac ke Nguhn Muhtahl.

18 Ac na kowos oasr ke inkacnek suwohs ac ohsrihksrihk soko inge ma kol nuh ke moul ma pahtpaht; ahok, kowos ilyak ke muhtuhnpot; kowos oruh fal nuh ke masap luhn Pahpah ac Wen; ac kowos eis Nguhn Muhtahl, suc loh kacn Pahpah ac Wen, in ahkpwacyeiye wuhlweacng ma El tuh oraclah, tuh kowos fin utyak ke inkacnek uh kowos fah eisyuck.

19 Ac inge, mwet sacohk wiyuck, tukun kowos ilyak nuh ke inkacnek suwohs ac ohsrihksrihk soko inge, ngac siyuck fin ma nuhkwewa oreklac? Liye, nga fahk nuh suwos, Moh; tuh kowos tiacna tuhkuh loesuhlah sahyacn na ke kahs luhn Kraist ke luhlahlfongi kuh in El, fungyang nohfohn nuh ke ohiyac wo Lal suc kuh in molwelah.

20 Ohinge, kowos enenuh in ahkwot nuh met ke luhlahlfongi kuh in Kraist, in oasr kahlwem suwohs luhn finsrak, ac luhngse God ac mwet nuhkwewa. Ohinge, kowos fin ahkwot nuh met, mongo ke kahs luhn Kraist, ac muhtweng ne ke na sahflah, liye, ohinge Pahpah El fahk: Kowos fah moul ma pahtpaht.

21 Ac inge, liye, mwet sacohk wiyuck, pa inge inkacnek; ac wacngihn kuhtwena inkacnek sahyac kuh ine utuckuh ye kuhsrao ma mwet uh kuh in moliyucklac ke tohkohsrahi luhn God. Ac inge, liye, pa inge mwe luti luhn Kraist, ac mwe luti sefanna ac pwacye luhn Pahpah, ac luhn Wen, ac luhn Nguhn Muhtahl, suc sie God, wacngihn sahflahiyac. Amen.