1. Na bono, inche Nephi naikire ase omoerio bw’okobana kwane ase more, inwe abanchwa bane. Na tinkorika naende korende ayare amake, aria imanyete arache gose aria amake igoro ya oyominto Yakobo.

2. Aseigo, ebinto narikire biang’isanire, gotatiga aria amake imbwenerete inkwane igoro ya amorokererio a Kristo; aseigo, nimbe ingokwana ase more maiso marore, koreng’ana nobokeene bw’okobana kwane.

3. Omoyo one nigo ore asekeene ase engencho ya aya Omonene Nyasae agokora egati ya abana ba mwanyabanto. Ekiagera Omonene Nyasae nigo akorwa oborabu ase okomanya; ekiagera nigo agokwana ase abanto koreng’ana nomonwa obo, asengencho yokomanya.

4. Aseigo nigo nagania ng’a momanye ng’a nabeire ngokwana ase more igoro ya ababani baria Omonene anyorogetie, nga mbabatise emanwa ya Nyasae, eyio erasibie ebibe biense.

5. Na bono, onye emanwa ya Nyasae, ere enchenu, yaganetie ebatiswe ase amache, goikerania obochenu bwonsi, o inee inaki tore nokogania okonene, aba tore abatari abachenu, ase okobatiswa, nonya na amache!

6. Na bono, nimbaborie inwe, abanchwa bane, ing’ai emanwa yabete egoikerania obochenu bwonsi ase okobatiswa namache?

7. Timomanyeti ng’a nigo arenge omochenu? Korende mokana ng’a tari omochenu, nigo aorogetie abana ba mwanyabanto ng’a koreng’ana nomobere agekora omwororo ase ise, nakomworokia ise ng’a nabe okoyaigwera amachiko aye na koyarenda.

8. Erio ekero abatiswa ime ase amache Omoika Omochenu ogacha igoro ase are ase omobwekano bw’eriruma.

9. Naende, nigo ekworokia ase abana bamwanyabanto ase enchera endonge.

10. Erio akabatebia abana ba mwanyabanto imbwatie inwe. Aseigo inwe abanchwa bane, inee ntonyare komobwatia Yeso onye ntori ang’e koyarenda amachiko a Tata?

11. Erio Tata akabatebia: Angama inwe, angama inwe, nakobatiswa ase erieta ri’omwana One Omwanchwa.

12. Erio boigo eriogi ri’omwana rigacha ase inde, nagontebia ng’a: oria obatisirwe ase erieta riane buna inche; nakombwatia, nagokora aria mwarorire ngokora.

13. Inwe abaminto abanchwa, nigo imanyete ng’a kamoramobwatie Omwana, nomoyo bwonsi, motari aban’gainereria na abatari abarimo ase Nyasae, korende ase omoyo bwonsi, na koangama ebibe biaino, nagoteba ase Tata ng’a more ang’e ase okoribogoria erieta ria Kristo, ase ebatiso – – ekeene ase okomobwatia Omonene oino na omotoria oino, goika ase amache, koreng’ana nering’ana riaye, rigereria erio imonyore Omoika Omochenu; erio nebe ebatiso y’omorero na eyomoika Omochenu; na erio imobe mogokwa na ase chimeme na omonwa bw’amaraika, nakotogia ase eriogi ere oria ore Omochenu O Israel.

14. Korende rigereria inwe abaminto, nigo ringicherete eriogi ri’Omonene nagoteba: Nyuma ekero mwaangamire ebibe biaino nakorwa oborori ase Tata ng’a nigo more nomoyo ase okoyarenda amachiko ane, ase okobatiswa ase amache, na koyenyora ebatiso yomorero na ey’Omoika Omochenu, nagokwana ase oromeme oroiyia, nonya nase chimeme chiamaraika, na nyuma ya aya mbankana, nigo ere kanga mbuya nonya motare komanya.

15. Inkaigwa erio korwa ase Tata, na gontebia: Amang’ana ya abanchwa bane nigo bare abeekene na abegenwa. Oria oraremererie goika Omoerio, oyo nabe ogotoreka.

16. Na bono, inwe abanchwa bane, nigo imanyete ng’a goika omonto abe okoremereria goika omoerio na kobwatia omogwekano bw’omwana o’Nyasae ore moyo, takonyara gotoreka.

17. Ase ebinto nabeire inkobatebia narorire ng’a Omonene oino na omoboria oino nayakore; ase engencho eye kanya abeire akonyorokigwa, ng’a nario moramanye egeita moranyare goeta. Na egeita moranyare goetera nase okoangama na kobatiswa ase amache; nakwaberwa ebibe biaino ase omorero na Omoika Omochenu.

18. Inee noo more ase enchera eye enyerere na endonge eyio ekoraa goika ase obogima bwakare nare; mwasoire ase egeita ime; na nigo mwakorire aya koreng’ana namachiko a Tata na Omwana Oye; na mwabeire mokonyora Omoika Omochenu; oyio okoorokia igoro ya Tata na Omwana, ase ogoikerania eira yaye eria abegete, ng’a kamorasoe ase enchera eye imoyanyore.

19. Na bono, inwe abaminto abanchwa, nyuma ekero mwaetire ase enchera eye ere enyerere, nimborie erio gose mwayakorire aya? Rigereria nabatebirie; yaya; timocheti onye etare ase ring’ana ria Kristo amo nokwegena koria gotari konyegerigwa kore ime yaye ase oria ore Omonene ase ogotoria.

20. Aseigo goika mogenderere ase Kristo more abakong’u more nobokeene bw’oborabu ase okoremereria, na obwanchani bwa Nyasae naende ase abanto bonsi. Aseigo komoragenderere ase igoro y’amang’ana aya a Kristo, na koremereria goika omoerio, rigereria otebire Tata: imonyore obogima bwa kare na kare.

21. Na bono, rigereria inwe abanchwa bane, eye nero enchera; na ende teri gose erieta rirure riranyare koraa omonto goika ase oborwoti bwa Nyasae. Nabono, rigereria aya naro amorokererio a Kristo, ayio are amorokererio yekeene na ayaboronge a Nyasae, na ay’omwana na ay’Omoika Omochenu, oyio ore Nyasae oyomo na otari na omoerio. Amina.