1 Ac inge, nga, Nephi, sramsram ke kahs in pahluh ma pahpah tuhmuhk el fahk, kacl Joseph, suc utucklac nuh Egypt.

2 Tuh liye, pwacyena lah el tuh palye ke fihtac lal nuhkwewa. Ac kahs in pahluh ma el suhmuhslah, wacngihn ma yohk oacna. Ac el palye kacsr, ac fihl lasr ke pacl fahsruh uh; ac ma inge sihmihsyucklac fin plwet prahs.

3 Ohinge, tukun pahpah tuhmuhk el ahksahfyelah sramsram lal ke kahs in pahluh kacl Joseph, el pahngon tuhlihk nahtuhl Laman, wen nahtuhl, ac acn nahtuhl, ac fahk nuh selos: Liye, wen nuhtihk, ac acn nuhtihk, suc pa wen ac acn nuhtin wounse nuhtihk, nga kena tuh kowos in lohng ke insrewos ke kahs luhk.

4 Tuh Leum God El fahk lah: Yohkna ke kowos ac liyacacng masap Luhk kowos fah kapkapwack fin acn uh; ac yohkna ke kowos ac tiac liyacacng masap Luhk kowos fah lihsyucklac liki ye Muhtuhk.

5 Tuh liye, wen nuhtihk ac acn nuhtihk, nga tiac kuh in som nuh ten nuh in kuclyuck luhk ne ke na nga likiyac sie mwe insewowo nuh fowos; tuh liye, nga etuh lah kowos fin tuhfweyucklac ke inkacnek ma kowos enenuh in fahsr kac kowos fah tiac som liki.

6 Ohinge, kowos fin selngawiyucki, liye, nga likiyac mwe insewowo luhk nuh fowos, tuh selnga se inge in kuh in itucklac liki kowos ac ituckyang nuh fin sifen ninac kiowos ac pahpah tomowos.

7 Ohinge, ke srihpen mwe insewowo luhk Leum God El fah tiac lwelah kowos in kuhnausyucklac; ohinge, El fah pahkotwen nuh suwos ac fihtac lowos ne tok ma pahtpaht.

8 Ac tukun ma inge tukun pahpah tuhmuhk el ahksahfyelah sramsram lal nuh sin wen ac acn nahtuhl Laman, el oruh tuh wen ac acn nahtuhl Lemuel in utuckuh nuh yohrohl.

9 Ac el sramsram nuh selos, fahk: Liye, wen nuhtihk ac acn nuhtihk, suc pa wen ac acn nuhtin wen ahkluo nuhtihk; liye nga fihliyac yuruwos sie mwe insewowo oacpacna ma nga fihliyac yurun wen ac acn nahtuhl Laman; ohinge, kowos ac tiac kuhnausyucklac; tuhsruhk ke sahflahiyac fihtac lowos ac fah ahkinsewowoyeyuck.

10 Ac tukun ma inge ke pahpah tuhmuhk el ahksahfye in sramsram nuh selos, liye, el sramsram nuh sin wen nahtuhl Ishmael, ahok, finne mwet nuhkwewa in lohm sel.

11 Ac tukun el ahksahfyelah in sramsram nuh selos, el sramsram nuh sel Sam, fahk: Insewowo nuh sum, ac fihtac lom; tuh kom fah usrui acn uh oacna tuhlihk mukul wiyom Nephi. Ac fihtac lom ac fah oacwaclah inmahsrlon fihtac lal; ac kom ac fah oacna tuhlihk mukul wiyom, ac fihtac lom ac fah oacna fihtac lal; ac kom fah ahkinsewowoyeyuck ke lusen lwen in moul lom nohfohn.

12 Ac tukun ma inge tukun pahpah tuhmuhk, Lehi, el sramsram nuh sin sucu lal nohfohn, oacna puhla luhn insiacl ac Nguhn luhn Leum ma oan in el, el muhnahslah. Ac tukun ma inge el misac, ac puckpucki.

13 Ac tukun ma inge ke lwen na ekahsr tukun misac lal, Laman ac Lemuel ac wen nahtuhl Ishmael elos kasrkuhsrak sihk ke srihpen kaiyuck luhn Leum.

14 Tuh nga, Nephi, tuh kolyuck in sramsram nuh selos, in fal nuh ke kahs Lal; tuh nga fahk ma pucspucs nuh selos, ac oacyacpac pahpah tuhmuhk, met liki misac lal; kahs pucspucs inge sihmlac ke plwet sahyac luhk; nuh ke ip luhn sramsram mahtuh ma sihmlac fin plwet sahyac luhk.

15 Ac fin ma inge nga suhmuhslah ma luhn nguhnihk, ac puhs sin ma suhmuhslah inge ma taflweyucklac fin plwet prahs. Tuh nguhnihk engan ke ma suhmuhslah, ac insiyuck motko ma inge, ac sihmlac ma inge nuh ke etwacack ac kapkapwack luhn tuhlihk nuhtihk.

16 Liye, nguhnihk engan ke ma luhn Leum; ac insiyuck motko pacl nuhkwewa ke ma ma nga liye ac lohng.

17 Ne ohinge, wolacna luhn Leum finne yohk, in ahkkahlwemye nuh sihk orekma yohk ac wolacna Lal, insiyuck wowoyak: O nga sie mwet na suhpwacr! Ahok, insiyuck ahsor ke srihpen monuk; nguhnihk kweoklacna ke srihpen ma koluk luhk.

18 Nga rauniyucklac, ke srihpen mwe sruhf ac ma koluk ma arulacna fihsrwacsr in ahkkolukyeyuc.

19 Ac ke pacl nga kena in engan, insiyuck tuhng ke srihpen ma koluk luhk; ne ohinge, nga etuh lah suc nga luhlahlfongi kac uh.

20 God luhk El mwe ahkkweye luhk; El kolyuc ke kweok luhk yen mwesis; ac El moliyuclac fin kof in meoa uh.

21 El nwekyuclac ke luhngse Lal, finne nuh ke monuk nohfohn.

22 El ahkfohsyeack mwet lokoalok luhk, in oruh elos in rarrar ye muhtuhk.

23 Liye, El lohng pruhe luhk ke lwen, ac el use nuh sihk etwacack ke aruhruhma ke fong.

24 Ac ke lwen nga pruhe puhlaiklac ye muhtahl; ahok, nga suhpwacack puhsrwek nuh lucng; ac lipufacn tuhkuh nuh ten ac lutiyuc.

25 Ac fin mwe sohksohk luhn Nguhn Lal monuk utucklac nuh finohl na fuhlwact. Ac muhtuhk liye ma yohk, ahok, finne ahluhkwelah ma yohk nuh sin mwet uh; ohinge sapkihnyuck nuh sihk tuh nga in tiac sihmihs ma inge.

26 O na, nga fin liye ma na yohk, Leum El fin ke puhsisacl Lal nuh sin tuhlihk nuhtin mwet uh El tuhkuh nuh yurun mwet uh ke pahkotwen yohk, efuh kuh insiyuck tuhng ac nguhnihk muhta na ke infahlfahl in ahsor, ac monuk koluklac, ac kuh luhk srihkeni, ke srihpen kweok luhk?

27 Ac efuh nga enenuh in puhtatyang nuh ke ma koluk, ke srihpen monuk? Ahok, efuh nga enenuh in sruhflah ke mwe sruhf, tuh oasr acn ke mwet koluk sac insiyuck el in kuhnahoslah mislac luhk ac ahkkweokye nguhnihk? Efuh nga kasrkuhsrak ke srihpen mwet lokoalok luhk?

28 Muhtwaclihk, nguhnihk! Nikmet sifilpac puhtatyang nuh ke ma koluk. Enganwack, O insiyuck, ac nikmet sifilpac ikacslah acn nuh sin mwet lokoalok luhn nguhnihk.

29 Nikmet sifilpac kasrkuhsrak ke srihpen mwet lokoalok luhk. Nikmet ahkmuhnahsye kuhiyuck ke srihpen kweok luhk.

30 Enganwack, O insiyuck, ac pruhe nuh sin Leum, ac fahk: O Leum, nga ac fah kaksakihn Kom ne tok ma pahtpaht; ahok, nguhnihk ac fah kaksakihn Kom, God luhk, ac yot in molwelah luhk.

31 O Leum, yac Kom kuh in molwelah nguhnihk? Yac Kom kuh in moliyuclac liki poun mwet lokoalok luhk? Yac Kom kuh in oruh tuh nga in rarrar ke liyeyacn ma koluk?

32 Lwelah tuh muhtuhnpot nuh ke hell in kauli pacl nuhkwewa met likiyuc, ke srihpen insiyuck muhsahllah ac nguhnihk toasr! O Leum, yac Kom kuh in tiac kaliyac muhtuhnpot in suwohswohs Lom met likiyuc, tuh nga in kuh in fahsr ke inkacnek ke infahlfahl puhsisacl, tuh nga in kuh in muhta na ke inkacnek kahlwem!

33 O Leum, yac Kom kuh in nukumyucyang ke nuknuk in suwohswohs Lom! O Leum, yac Kom kuh in oraclah sie inkacnek in kahinglac ah luhk met liki mwet lokoalok luhk! Yac Kom kuh in oraclah inkacnek luhk in suwohs met likiyuc! Yac Kom kuh in tiac likiyac mwe ahktikuclkucl ke inkacnek luhk—tuhsruhk tuh Kom in ahkmwesahsyelah inkacnek luhk uh met likiyuc, ac tiac kohsraclah inkacnek luhk, tuhsruhk tuh inkacnek luhn mwet lokoalok luhk.

34 O Leum, nga luhlahlfongi Kom, ac nga ac fah luhlahlfongi Kom ne tok ma pahtpaht. Nga ac fah tiac fihliyac luhlahlfongi luhk nuh in poun mwet uh; tuh nga etuh lah selngawi el suc fihliyac luhlahlfongi lal nuh in poun mwet uh. Ahok, selngawi el suc fihliyac luhlahlfongi lal nuh in mwet kuh oruh tuh mahno pa in mwe karihngihnyuck lal.

35 Ahok, nga etuh tuh God El ac fah mwesahs in sang nuh sel suc siyuck. Ahok, God luhk El ac fah use nuh sihk, nga fin siyuck ke pwacye; ohinge nga fah sruhkwack puhsrwek nuh Sum; ahok, nga ac fah pruhe nuh Sum, God luhk, yot in suwohswohs luhk. Liye, puhsrwek ac fah sowack ma pahtpaht nuh yurum, yot luhk ac God luhk ma pahtpaht. Amen.