1 Ac inge, mwet sacohk wiyuck, nga riti ma inge tuh kowos in kuh in etuh ke wuhlweacng luhn Leum suc El olwelah nuh sin mwet Israel nuhkwewa—

2 Lah El sramsram nuh sin mwet Jew, ke oalin mwet pahluh muhtahl Lal, finne e ke muhtwacwacackiyac ah me, ke fihl nuh ke fihl, ne ke na pacl se ac tuhkuh tuh elos fah sifilpac fohlohkihnyuckyak nuh ke alu pwacye ac u luhn God; ke elos fah toweni nuh lohm selos nuh ke acn in usru selos, ac fah akwucki ke acn wihlwihl selos nuhkwewa.

3 Liye, mwet sacohk wiyuck, nga sramsram nuh suwos ke ma inge tuh kowos in kuh in kaksak, ac ngwetwack ne tok ma pahtpaht, ke srihpen mwe ahkinsewowo ma Leum God El fah acsot nuh sin tuhlihk nuhtuwos.

4 Tuh nga etuh lah kowos suk yohk, puhs suwos, in etuh ke ma suc ac fah tuhkuh; ohinge nga etuh lah kowos etuh lah mahnosr enenuh na in muhnahslah ac misac; ne ohinge, ke mahnosr kuht fah liye God.

5 Ahok, nga etuh lah kowos etuh lah ke mahno El fah ahkkahlwemyacl sifacna nuh selos suc oasr fin acn Jerusalem, ma kuht tuhkuh we me; tuh fal tuh ma inge in oasr inmahsrlolos; tuh ma inge fal sin Mwet Oraclah wo tuh El sifacna kweok in kuhlwacnsapuh mwet uh ke mahno suhkawihl, ac misac nuh sin mwet nuhkwewa, tuh mwet nuhkwewa in kuh in eklac in kuhlwacnsuhpwacl.

6 Tuh oacna ke misac uh ac sun mwet nuhkwewa, in ahkpwacyei plwacn in pahkotwen luhn Mwet Oraclah wo, enenuh in oasr sie kuh luhn sifilpac moulyak, ac sifilpac moulyak uh enenuh in tuhkuh nuh sin mwet uh ke srihpen puhtatlac sac; ac puhtatlac sac tuhkuh ke srihpen tahfonglac; ac ke srihpen mwet uh tuh puhtatlac elos lihsyucklac liki ye muhtuhn Leum.

7 Ohinge, enenuh se na in oasr sie iwaclah ma wacngihn sahflahiyac—sahyacn na enenuh in sie iwaclah ma wacngihn sahflahiyac, moul suhkawihl se inge tiac kuh in eklac nuh ke moul kawihl. Ohinge, nuhnuhnkuh se emet ma tuhkuh nuh fin sie mwet enenuh in oasr na ne tok ma pahtpaht. Ac fin ohinge, mahno se inge enenuh in likiyucki in kuhlawi ac in kuhlawi nuh infohk uh, in tiac sifil moulyak.

8 O lahlmwetmwet luhn God, pahkotwen ac luhng kuhlwacng Lal! Tuh liye, mahno uh fin tiac sifil moulyak nguhnasr enenuh in eklac in kuhlwacnsapuh lipufacn sac suc puhtatlac liki ye muhtuhn God Ma Pahtpaht, ac eklac devil, in tiac sifil moulyak.

9 Ac nguhnasr enenuh in oacna el, ac kuht eklac devil, lipufacn nuh sin sie devil, in lihsyucklac liki ye muhtuhn God lasr, ac in muhta na yurun pahpah tuhmwacn kikiacp, in ahsor, in oacna el sifacna; ahok, nuh sel suc kiyacpwelah ninac ac pahpah se emet kiyacsr ac tuhmwacsr, suc sifacna ekuhluhllah in oacna sie lipufacn luhn kahlwem, ac wakreack tuhlihk nuhtin mwet nuh ke u lukmac luhn ahkmas ac kain in orekma lukmac nuhkwewa luhn lohsr.

10 O fuhkah yohkiyacn wolacna luhn God lasr, suc ahkolah sie inkacnek nuh ke kahinglac lasr liki sruh luhn mwet arulacna koluk se inge; ahok, mwet koluk sac, misac ac hell, ma nga pahngon misac luhn mahno, ac oacyacpac misac luhn nguhn.

11 Ac ke srihpen inkacnek in molwelah luhn God lasr, El suc Muhtahl luhn Israel, misac se inge, suc nga sruhmuhn kac, pa misac suhkawihl se, fah sang mwet misac la; suc misac pa kuclyuck uh.

12 Ac misac se inge ma nga sramsramkihn, suc pa misac luhn nguhn, fah sang mwet misac la; suc misac luhn nguhn pa hell; ohinge, misac ac hell enenuh in sang mwet misac lalos, ac hell enenuh in sang nguhn srohoh la, ac kuclyuck uh enenuh in sang mahno srohoh la, ac mahno ac nguhn luhn mwet uh fah sifilpac fohlohkweni nuh sie; ac ma ke kuh ke sifilpac moulyak luhn El suc Muhtahl luhn Israel.

13 O fuhkah woiyacn plwacn luhn God lasr! Tuh ke lwacpo se sahyac uh, pacruhtais luhn God enenuh in sang nguhn luhn mwet suwohswohs, ac kuclyuck uh in sang monun mwet suwohswohs; ac nguhn ac mahno uh sifilpac sifacna fohlohkweni, ac mwet nuhkwewa suwohswohslah, ac moul kawihl, ac elos nguhn moul, etuh suwohs oacna kuht ke mahno, tuhsruhk etuh lasr uh ac fah suwohs.

14 Ohinge, kuht fah eis sie etuh suwohs ke ma koluk lasr, ac fohkfohk lasr, ac kohflohfohl lasr; ac mwet suwohswohs fah eis etuh suwohs ke engan lalos, ac suwohswohs lalos, nukumyuckyang ke nwacsnwacs, ahok, finne ke nuknuk luhn suwohswohs.

15 Ac ma inge fah sikyak ke mwet nuhkwewa fah misac som liki misac se emet inge nuh ke moul, yohkna oruh ke elos eklac nuh ke moul kawihl, elos enenuh in tu ye muhtuhn siyah in nuhnuhnkuh luhn El suc Muhtahl luhn Israel; ac na nuhnuhnkuh uh tuhkuh, ac na elos enenuh in nuhnuhnkweyuck fal nuh ke nuhnuhnkuh muhtahl luhn God.

16 Ac pwacyena, oacna ke Leum El moul, tuh Leum God El sruhmuhn ohinge, ac pa kahs ma pahtpaht Lal, ma tiac kuh in wacngihnlac, tuh elos suc suwohswohs fah srwackna suwohswohs, ac elos suc fohkfohk fah srwackna fohkfohk; ohinge, elos suc fohkfohk pa devil ac lipufacn lal; ac elos fah som nuh ke e ma pahtpaht, ma ahkoeyucklac nuh selos; ac kweok lalos oacna sie luhluh in e ac yot ngweng, ma fihrihr nuh lucng ne tok ma pahtpaht ac ne tok ac wacngihn sahflahiyac.

17 O wolacna ac nuhnuhnkuh suwohs luhn God lasr! Tuh El ahkpwacyeiyelah nohfohn kahs Lal, ac ma inge som liki Oaluhl, ac masap Lal enenuh in ahkpwacyeiyuck.

18 Tuhsruhk, liye, mwet suwohswohs, mwet luhlahlfongi luhn El suc Muhtahl luhn Israel, elos suc luhlahlfongi El suc Muhtahl luhn Israel, elos suc muhtwacnglah mwe kweok luhn facluh, ac koase in mwetyekihn, elos fah usrui tohkohsrahi luhn God, ma tuh ahkoeyucklac nuh selos liki pwelucng luhn facluh, ac engan lalos fah sesseslah ne tok ma pahtpaht.

19 O wolacna luhn pahkotwen luhn God lasr, El suc Muhtahl luhn Israel! Tuh El molwelah mwet luhlahlfongi Lal liki mwet arulacna koluk sac suc pa devil, ac misac, ac hell, ac luhluh in e ac yot ngweng, suc pa kweok wacngihn sahflahiyac.

20 O fuhkah yohkiyacn muhtahl luhn God lasr! Tuh El etuh ma nuhkwewa, ac tiac oasr sie ma suc El tiac etuh kac.

21 Ac El tuhkuh nuh facluh tuh Elan kuh in molwelah mwet nuhkwewa elos fin porongo Puhsrwacl; tuh liye, El kweokkihn kweok luhn mwet nuhkwewa, ahok, mwe kweok luhn ma moul nuhkwewa, kwewana mukul, muhtwacn, ac tuhlihk, suc ma ke sucu lal Adam.

22 Ac El kweokkihn ma inge tuh sifilpac moulyak uh kuh in ituckyang nuh sin mwet nuhkwewa, tuh mwet nuhkwewa kuh in tu ye Muhtahl ke lwen luhlahp ac lwen in nuhnuhnkuh.

23 Ac El sapkihn mwet nuhkwewa tuh elos enenuh in auliyak, ac pacptaislac ke Inel, in luhlahlfongi suwohs in El suc Muhtahl luhn Israel, kuh fin tiac elos tiac na kuh in moliyucklac ke tohkohsrahi luhn God.

24 Ac elos fin tiac auliyak ac luhlahlfongi ke Inel, ac pacptaislac ke Inel, ac muhtweng ne ke na sahflah, elos enenuh in kuhnausyucklac; tuh Leum God, El suc Muhtahl luhn Israel, sruhmuhn ma inge.

25 Ohinge, El sang sie masap; ac fin wacngihn masap ituckyang ac wacngihn kaiyuck; ac fin wacngihn kaiyuck ac wacngihn nuhnuhnkuh; ac fin wacngihn nuhnuhnkuh na pahkotwen luhn El suc Muhtahl luhn Israel eisaclos, ke srihpen iwaclah; tuh elos moliyucklac ke kuh Lal.

26 Tuh iwaclah sac ahkfalyelah ma enenweyuck ke nuhnuhnkuh suwohs Lal nuh selos nuhkwewa suc masap uh tiac na ituckyang nuh selos, tuh elos moliyucklac liki mwet arulacna koluk sac, misac ac hell, ac devil, ac luhluh in e ac yot ngweng, suc pa kweok ma wacngihn sahflahiyac; ac elos sifilpac fohlohkihnyucklac nuh sin God suc sang nuh selos momong, suc pa El suc Muhtahl luhn Israel.

27 Tuhsruhk we nuh sel suc eis masap, ahok, suc eis masap nuhkwewa luhn God, oacna kuht, ac suc kuhnahoslah masap inge, ac suc tohllah lusen lwen ke puhlan pacl in ahkolah moul lal, tuh ac arulacna koluk ohiyacl!

28 O plwacn kuhtasrihk se luhn mwet koluk sac! O wacngihn srihpac, ac muhnahs, ac lahlfon luhn mwet uh! Ke elos etwacack elos nuhnkuh muh elos lahlmwetmwet, ac elos tiac porongo kaiyuck luhn God, tuh elos fihliyac nuh sahyac, pahngon na muh elos etuh kaclos sifacna, ohinge, lahlmwetmwet lalos lahlfon ac tiac na kahsrelos. Ac elos fah misac.

29 Tuhsruhk etwacack uh wo elos fin porongo kaiyuck luhn God.

30 Tuhsruhk we nuh sin mwet kahsruhp, suc kahsruhp ke ma luhn facluh. Tuh ke srihpen elos kahsruhp elos koase mwet suhkahsruhp, ac elos kalyei mwet puhsisacl, ac insiaclos oan na ke mwe kahsruhp lalos; ohinge, mwe kahsruhp lalos pa god lalos. Ac liye, mwe kahsruhp lalos fah weluhlos na misac pac.

31 Ac we nuh sin mwet sohlohng kahs suc ac fah tiac lohng; tuh elos fah misac.

32 We nuh sin mwet kun suc fah tiac liye; tuh elos fah misac pac.

33 We nuh selos suc fohkfohk insiac, tuh etwacack ke ma koluk lalos fah kalyeilos ke lwen sahflah.

34 We nuh sin mwet kikiacp in sramsram, tuh el fah tolyucklac nuh ten nuh ke hell.

35 We nuh sin mwet ahkmas suc oruh na in oacyac, tuh el fah misac.

36 We nuh selos suc kosro, tuh elos fah tolyucklac nuh ten nuh ke hell.

37 Ahok, we nuh selos suc alu nuh sin ma sruhlwaclah, tuh devil luhn devil nuhkwewa el engan selos.

38 Ac, in ahkkahlwemye, we nuh selos nuhkwewa suc misac ke ma koluk lalos; tuh elos fah fohlohk nuh yurun God, ac liye Muhtahl, ac muhta na ke ma koluk lalos.

39 O, mwet sacohk wiyuck, esam kolukiyacn tahfonglac in lain God Muhtahl, ac oacyacpac kolukiyacn sruhflah ke srihfeyuck luhn mwet kuhtasrihk sac. Esam, in nuhnkuh ke ma luhn facluh pa misac, ac in nuhnkuh ke ma luhn nguhn pa moul ma pahtpaht.

40 O, mwet sacohk wiyuck, lohng kahs luhk. Esam wolacna luhn El suc Muhtahl luhn Israel. Nikmet fahk muh nga sramsramkihn ma upac lain kowos; tuh kowos fin oruh, kowos fah akuhkuhin lain ma pwacye; tuh nga sruhmuhn kahs luhn Mwet Orekowoslac. Nga etuh lah kahs pwacye uh lain upac ma fohkfohk nuhkwewa; tuhsruhk mwet suwohswohs tiac sahngweng kac, tuh elos luhngse ma pwacye ac tiac rarrarack.

41 O na, mwet sacohk wiyuck, tuhkuh nuh yurun Leum, El suc Muhtahl. Esam lah inkacnek Lal suwohswohs. Liye, inkacnek luhn mwet uh ohsrihksrihk, tuhsruhk oan na ke soko inkacnek suwohs ye muhtahl, ac mwet karihngihn muhtuhnpot uh pa El suc Muhtahl luhn Israel; ac wacngihn mwet kuhlwacnsap Lal we; ac wacngihn inkacnek sahyac liki na muhtuhnpot uh; tuh El tiac na kuh in kiyacpweyucklac, tuh Leum God pa Inel.

42 Ac el suc tongohlwack, nuh sel El fah ikacslah; ac mwet lahlmwetmwet, ac mwet yohk etuh la, ac elos suc kahsruhp, suc insefuhlwactyak ke srihpen etwacack lalos, ac lahlmwetmwet lalos, ac kahsruhp lalos—ahok, elos pa mwet El koase; ac liki na elos in tohllah ma inge, ac motkoaclos sifacna muh mwet lahlfon ye muhtuhn God, ac isyucki nuh ten ke mongfihsrwacsr yohk, El fah tiac ikacslah nuh selos.

43 Tuhsruhk ma luhn mwet lahlmwetmwet ac mwet etuh in liyacacng uh fah wihkihnyucklac luhkwelos ne tok ma pahtpaht—ahok, engan se ma ahkoeyucklac nuh sin mwet luhlahlfongi.

44 O, mwet sacohk wiyuck, esam kahs luhk uh. Liye, nga sahruhklah nuknuk luhk, ac nga osroklah ye motowos; nga pruhe tuh God in molwelah luhk tuh Elan liyeyuc ke muhtahl in suk ke ma nuhkwewa; ohinge, kowos fah etuh ke lwen sahflah, ke mwet nuhkwewa fah nuhnuhnkweyuck ke orekma lalos, tuh God luhn Israel El lohoh kac lah nga osroklah ma koluk lowos liki nguhnihk, ac lah nga tu nwacsnwacs ye Muhtahl, ac nga sukohsohklah liki srah lowos.

45 O, mwet sacohk wiyuck, forlah liki ma koluk lowos; osroklah mwe kapihr luhn el suc ac sa in kaprikowosi; tuhkuh nuh yurun God suc El pa yot luhn molwelah lowos.

46 Ahkolah nguhnuwos nuh ke lwen wolacna se ke nuhnuhnkuh suwohs ac fah orek nuh sin mwet suwohswohs, finne lwen in nuhnuhnkuh, tuh kowos in tiac lokweni ke sahngweng upac; tuh kowos in tiac esam ke ma koluk lowos ke suwohs, ac kolyuck in fahk: Muhtahl, muhtahl nuhnuhnkuh Lom, O Leum God Kuhlacna—tuhsruhk nga etuh ma koluk luhk; nga kuhnahoslah masap Lom, ac tahfonglac luhk uh ma luhk; ac devil el sruokyucwi, tuh nga sie mwet srohoh nuh ke ahsor koluk lal.

47 Tuhsruhk liye, mwet wiyuck, yac fal tuh nga in okaskowosyak nuh ke sie ohiyac koluk ke ma inge? Yac nga ac ahkolah nguhnuwos fin nuhnak lowos an nwacsnwacs? Yac ngwac sramsram in kahlwem nuh suwos in oacna kahlwemiyacn ma pwacye kowos fin sukohsohklah liki ma koluk uh?

48 Liye, kowos fin muhtahl ngwac sramsram nuh suwos ke ma muhtahl; tuhsruhk ke kowos tiac na muhtahl, ac kowos ngwet nuh sihk in oacna sie mwet luti, enenuh se na tuh nga in luti kowos ke mwacta luhn ma koluk.

49 Liye, nguhnihk sruhnga ma koluk, ac insiyuck engan ke ma suwohswohs; ac nga fah kaksakihn ine muhtahl luhn God luhk.

50 Fahsruh, mwet wiyuck, mwet nuhkwewa suc maluh, kowos fahsruh nuh ke kof uh; ac el suc wacngihn mani la, fahsruh moli ac mongo; ahok, fahsruh moli wine ac mil finne wacngihn mani ac wacngihn molo.

51 Ohinge, nikmet sislah mani ke ma suc wacngihn srihpac, kuh kowos in orekma ke ma suc tiac kuh in luhngkihnyuck. Oaru in lohngyuc, ac esam kahs ma nga sramsramkihn; ac tuhkuh nuh yurun El suc Muhtahl luhn Israel, ac kang ma suc tiac kuh in koluklac, kuh tiac kuh in ahkkolukyeyucklac, ac lwelah nguhnuwos in engan ke luhpah yohk.

52 Liye, mwet sacohk wiyuck, esam kahs luhn God lowos; pruhe nuh Sel pacl nuhkwewa ke lwen, ac sang kuloh nuh ke ine muhtahl Lal ke fong uh. Lwelah insiowos in engan.

53 Ac liye wolacnaiyacn wuhlweacng luhn Leum, ac fuhkah wolacnaiyacn oactui Lal nuh sin tuhlihk nuhtin mwet; ac ke srihpen wolacna Lal, ac luhng kuhlwacng ac pahkotwen Lal, El tuh olwelah nuh sesr lah fihtac lasr uh fah tiac kuhnausyucklac nohfohn, oacna nuh ke mahno, tuhsruhk tuh El fah molweloslac; ac ke fihl ke pacl fahsruh elos fah eklac sie lah suwohswohs nuh sin mwet Israel.

54 Ac inge, mwet wiyuck, nga kena ahkyohkye in sramsram nuh suwos; tuhsruhk litu nga fah fahk nuh suwos tahfweyacn kahs luhk uh. Amen.