1 Kag karon tan-awa, natabo ini nga ang tanan nga katawhan sang kadutaan nakabati sining mga pahayag, kag nagsaksi parte sini. Kag pagkatapos sining mga pahayag may kalinong sa kadutaan sa sulod sang madamo nga inoras;

2 Kay sa pagkadako sang kakibot sang katawhan nga nag-untat sila sa pagpanalambiton kag pagtangis tungod sang pagkadula sang ila mga paryente nga nagkalamatay; gani may kalinong sa bug-os nga kadutaan sa sulod sang madamo nga inoras.

3 Kag natabo ini nga may nag-abot liwat nga tingug sa katawhan, kag ang tanan nga katawhan nakabati, kag nakasaksi sini nga nagasiling:

4 O kamo nga katawhan sining dalagko nga mga siyudad nga nalaglag, nga mga kaliwat ni Jacob, huo, nga iya sang panimalay ni Israel, daw ano kasunson ko kamo nga gintipon pareho sang munga nga nagatipon sang iya mga piso sa idalom sang iya mga pakpak, kag ginsagod kamo.

5 Kag sa liwat, daw ano kasunson nga buot ko kuntani nga tiponon kamo pareho sang munga nga nagatipon sang iya mga piso sa idalom sang iya mga pakpak, huo, O kamo nga katawhan sang panimalay ni Israel, nga nalaglag; huo, O kamo nga katawhan sang panimalay ni Israel, kamo nga nagpuyo sa Jerusalem, nga pareho sa inyo nga nalaglag; huo, daw ano kasunson nga buot ko kuntani nga tiponon kamo pareho sang munga nga nagatipon sang iya mga piso, kag indi kamo.

6 O kamo nga iya sang panimalay ni Israel nga akon ginkaluoyan, daw ano kasunson nga tiponon ko kamo pareho sang munga nga nagatipon sang iya mga piso sa idalom sang iya mga pakpak, kon maghinulsol kamo kag magbalik sa akon nga may bug-os nga tinutuyo sang tagipusuon.

7 Apang kon indi, O panimalay ni Israel, ang mga lugar nga inyo mga ginapuy-an mangin mamingaw tubtob sa tion sang pagkatuman sang kasugtanan sa inyo mga amay.

8 Kag karon natabo ini nga pagkatapos nga nabatian sang katawhan ining mga pulong, tan-awa, nagsugod sila sa paghibi kag pagtangis liwat tungod sang pagkadula sang ila mga paryente kag mga kaabyanan.

9 Kag natabo ini nga nagligad ang tatlo ka adlaw. Kag natabo ini sa aga, kag ang kadudulman nadula halin sa ibabaw sang kadutaan, kag ang duta nag-untat sa pagkurog, kag ang mga bato nag-untat sa pagkalapihak, kag ang makahaladlok nga pag-inugayong nag-untat, kag ang tanan nga tuman kagalong nga ginahod nag-untat na.

10 Kag ang duta nagtinapik liwat, nga nagpadayon ini; kag ang pagkalisud, kag ang paghibi, kag ang pagtangis sang katawhan nga naluwas nga buhi nag-untat; kag ang ila pagkalisud nabaylohan sang kalipay, kag ang ila mga panalambiton nangin pagdayaw kag pagpasalamat sa Ginuong Jesucristo, nga ila Manunubos.

11 Kag tubtob sa sini nga tion ang balaan nga mga kasulatan natuman nga ginpanghambal sang mga propeta.

12 Kag ang mas matarong nga bahin sang katawhan amo ang naluwas, kag amo ini sila ang nagbaton sang mga propeta kag wala nagpangbato sa ila; kag amo ini sila ang wala nagpaagay sang dugo sang mga santos, nga naluwas—

13 Kag ginkaluoyan sila kag wala ginlugdang kag ginlubong sa duta; kag wala sila nagkalalumos sa kaidadalman sang dagat; kag wala sila nasunog sang kalayo, kag wala man sila natumbahan kag nagkaladugmok tubtob sa kamatayon; kag wala sila nahakop sang buhawi; kag wala man sila nadaug sang usbong sang aso kag sang kadudulman.

14 Kag karon, kon sin-o man ang nagabasa, ipahangop sa iya; sia nga may balaan nga mga kasulatan, ipausisa sa iya ang mga ini, kag tan-awon kag tamdon kon ining tanan nga kamatayon kag mga kalaglagan paagi sa kalayo, kag paagi sa aso, kag paagi sa mga unos, kag paagi sa mga buhawi, kag paagi sa pagbuka sang duta agud lamunon sila, kag ining tanan nga butang indi katumanan sang mga propesiya sang madamo nga balaan nga mga propeta.

15 Tan-awa, ginasiling ko sa inyo, Huo, madamo ang nagpamatuod parte sining mga butang sa pagkari ni Cristo, kag ginpamatay tungod nagpamatuod sila parte sining mga butang.

16 Huo, ang propeta nga si Zenos nagpamatuod parte sining mga butang, kag si Zenoc naghambal man parte sining mga butang tungod nagpamatuod sila ilabi na gid parte sa aton nga mga nagkalabilin sang ila kaliwatan.

17 Tan-awa, ang aton amay nga si Jacob nagpamatuod man parte sa nagkalabilin sang kaliwatan ni Jose. Kag tan-awa, indi bala kita mga nagkalabilin sang kaliwatan ni Jose? Kag ining mga butang nga nagasaksi parte sa aton, wala bala nasulat ang mga ini sa mga lamina nga saway nga gindala sang aton amay nga si Lehi halin sa Jerusalem?

18 Kag natabo ini nga sa hingapusan sang ika-treinta’y kwatro nga tuig, tan-awa, ipakita ko sa inyo nga ang katawhan ni Nefi nga naluwas, kag amo man inang ginatawag nga mga Lamanhon, nga naluwas, may dalagko nga mga pagpakamaayo nga ginpakita sa ila, kag dalagko nga mga bugay nga ginbubo sa ila mga ulo, sa bagay nga sa wala madugay pagkatapos sang pagkayab ni Cristo sa langit matuod gid nga nagpakita sia sa ila—

19 Nga ginpakita ang iya lawas sa ila, kag nag-alagad sa ila; kag ang kasaysayan sang iya pag-alagad ang ihatag pagkatapos sini. Gani sa sini nga tion ginatapos ko ang akon mga ginapanghambal.