1 Kag karon natabo ini nga may nagtililipon nga dako nga kadam-an, sang katawhan ni Nefi, sa palibot sang templo nga yara sa duta nga Bugana; kag nagadayaw sila kag nagakatingala ang isa kag isa, kag ginatudlo sa isa kag isa ang dalagko kag dalayawon nga pagbag-o nga natabo.

2 Kag nagaistoryahanay man sila parte sining Jesucristo nga tuhoy sa iya ang tanda ginhatag parte sa iya kamatayon.

3 Kag natabo ini nga samtang yara sila sa amo nga pag-istoryahanay, nakabati sila sang tingug nga daw naghalin ini sa langit; kag naglantaw sila sa palibot, kay wala nila mahangpi ang tingug nga ila nabatian; kag indi ini matigdas nga tingug, kag indi man mabaskog nga tingug; apang, kag bisan pa nga isa ini ka diutay nga tingug nagdulut ini sa tagipusuon nila nga nakabati, sa bagay nga wala sing bahin sang ila lawas nga wala mapauyog sini; huo, nagdulut ini sa ila kalag mismo, kag nagpadabadaba sang ila mga tagipusuon.

4 Kag natabo ini nga sa liwat nabatian nila ang tingug, kag wala nila mahangpi ini.

5 Kag sa liwat sa ika-tatlo nga tion nabatian nila ang tingug, kag ginbuksan ang ila mga dulunggan agud mabatian ini; kag ang ila mga mata natuon sa ginhalinan sang tingug; kag nagtulok sila sing deretso sa langit kon sa diin naghalin ang tingug.

6 Kag tan-awa, sa ika-tatlo nga tion nahangpan na nila ang tingug nga ila nabatian; kag nagsiling ini sa ila:

7 Tan-awa ang akon Hinigugma nga Anak, nga sa iya nahamuot ako, nga sa iya ginhimaya ko ang akon ngalan—pamatii ninyo sia.

8 Kag natabo ini, sang mahangpan nila gintuon nila liwat ang ila mga mata sa langit; kag tan-awa, nakita nila ang isa ka Lalaki nga nagapanaog halin sa langit; kag nasul-oban sia sang puti nga panapton; kag nagpanaog sia kag nagtindog sa tunga nila; kag ang mga mata sang bug-os nga kadam-an natuon sa iya, kag wala sila nangisog sa pagbukas sang ila mga baba, bisan sa isa kag isa, kag wala nakahibalo kon ano ang kahulugan sini, kay naghunahuna sila nga isa ka anghel ang nagpakita sa ila.

9 Kag natabo ini nga gin-untay niya ang iya kamot kag naghambal sa katawhan nga nagasiling:

10 Tan-awa, ako si Jesucristo nga ang mga propeta nagpamatuod nga magaabot sa kalibutan.

11 Kag tan-awa, ako ang kasanag kag ang kabuhi sang kalibutan; kag nag-inom ako halin sa sinang mapait nga ilimnan nga ginhatag sa akon sang Amay, kag ginhimaya ang Amay sa pagdala sa akon kaugalingon sang mga sala sang kalibutan, nga sa sini gin-antos ko ang kabubut-on sang Amay sa tanan nga butang halin sa ginsuguran.

12 Kag natabo ini nga sang nahambal ni Jesus ining mga pulong ang bug-os nga kadam-an nagkalatumba sa duta; kay nadumduman nila nga ginpropesiya sa ila nga si Cristo magapakita sang iya kaugalingon sa ila pagkatapos sang iya pagkayab sa langit.

13 Kag natabo ini nga ang Ginuo naghambal sa ila nga nagasiling:

14 Bangon kag magpalapit sa akon, agud makab-ot ninyo sang inyo mga kamot ang akon kilid, kag agud mahikap ninyo ang mga agi sang mga lansang sa akon mga kamot kag sa akon mga tiil, agud mahibal-an ninyo nga ako ang Dios sang Israel, kag ang Dios sang bug-os nga duta, kag ginpatay tungod sang mga sala sang kalibutan.

15 Kag natabo ini nga ang kadam-an nagpalapit, kag ginkab-ot ang ila mga kamot sa iya kilid, kag ginhikap ang mga agi sang mga lansang sa iya mga kamot kag sa iya mga tiil; kag ini ila ginhimo, nga nagapalapit sing tinag-isaisa tubtob nga ang tanan nakapalapit, kag nakita sang ila mga mata kag nahikap sang ila mga kamot, kag nahibal-an sing pat-od kag nagpamatuod, nga amo ini sia, nga ginsulat sang mga propeta, nga magakari.

16 Kag sang nakapalapit na sila tanan kag nakasaksi para sa ila mga kaugalingon, nagsinggit sila sing dulungan nga nagasiling:

17 Hosana! Bulahan ang ngalan sang Labing Mataas nga Dios! Kag naghalapa sila sa tiilan ni Jesus, kag nagsimba sa iya.

18 Kag natabo ini nga naghambal sia kay Nefi (kay si Nefi yara sa kadam-an) kag ginsugo niya sia nga magpalapit sia.

19 Kag si Nefi nagtindog kag nagpalapit, kag nagduko sa atubang sang Ginuo kag naghalok sa iya mga tiil.

20 Kag ginsugo sia sang Ginuo nga magbangon sia. Kag nagbangon sia kag nagtindog sa iya atubang.

21 Kag ang Ginuo nagsiling sa iya: Ginahatagan ko ikaw sing gahum nga bunyagan mo ining katawhan kon magkayab na ako liwat pa-langit.

22 Kag sa liwat ang Ginuo nagtawag sang iban pa, kag nagsiling sa ila sing amo man; kag ginhatagan niya sila sing gahum sa pagbunyag. Kag nagsiling sia sa ila: Sa amo sini nga paagi kamo magabunyag; kag mangin wala sing mga pagbinaisay sa tunga ninyo.

23 Sa pagkamatuod ginasiling ko sa inyo, nga kon sin-o man ang maghinulsol sang iya mga sala paagi sa inyo mga pulong, kag maluyag nga magpabunyag sa akon ngalan, sa sini nga paagi kamo magabunyag sa ila—Tan-awa, magalusong kamo kag magatindog sa tubig, kag sa akon ngalan pagabunyagan ninyo sila.

24 Kag karon tan-awa, amo ini ang mga pulong nga inyo ihambal, nga ginatawag sila sa ila ngalan nga nagasiling:

25 Sa awtoridad nga ginhatag sa akon ni Jesucristo, ginabunyagan ko ikaw sa ngalan sang Amay, kag sang Anak, kag sang Balaan nga Espiritu. Amen.

26 Kag dayon itugmaw ninyo sila sa tubig, kag ipabutwa liwat halin sa tubig.

27 Kag sa sini nga paagi magabunyag kamo sa akon ngalan; kay tan-awa, sa pagkamatuod ginasiling ko sa inyo, nga ang Amay, kag ang Anak, kag ang Balaan nga Espiritu isa; kag ako yara sa Amay, kag ang Amay yari sa akon, kag ang Amay kag Ako isa.

28 Kag suno sa akon ginsugo sa inyo sa amo nga paagi kamo magabunyag. Kag mangin wala sing mga pagbinaisay sa tunga ninyo pareho sang una; kag wala man sing mga pagbinaisay sa tunga ninyo parte sa mga bahin sang akon doktrina pareho sang una.

29 Kay sa pagkamatuod, sa pagkamatuod ginasiling ko sa inyo, sia nga may espiritu sang pagbinaisay indi akon, kundi iya sang yawa, nga amo ang amay sang pagbinaisay, kag ginasugyot niya ang mga tagipusuon sang mga tawo sa pagpakigbais nga may kaakig, ang isa batok sa isa.

30 Tan-awa, indi ini ang akon doktrina, nga sugyuton ang mga tagipusuon sang mga tawo sa kaakig, ang isa batok sa isa; kundi amo ini ang akon doktrina, nga ang amo nga mga butang dapat dulaon.

31 Tan-awa, sa pagkamatuod, sa pagkamatuod, ginasiling ko sa inyo, ipahayag ko sa inyo ang akon doktrina.

32 Kag amo ini ang akon doktrina, kag amo ini ang doktrina nga ginhatag sang Amay sa akon; kag nagapamatuod ako parte sa Amay, kag ang Amay nagapamatuod parte sa akon, kag ang Balaan nga Espiritu nagapamatuod parte sa Amay kag sa akon; kag nagapamatuod ako nga ginasugo sang Amay ang tanan nga tawo, bisan diin, nga maghinulsol kag magpati sa akon.

33 Kag kon sin-o man ang magapati sa akon, kag mabunyagan, ang amo man maluwas; kag amo ini sila ang magapanubli sang ginharian sang Dios.

34 Kag kon sin-o man ang indi magpati sa akon, kag wala mabunyagi, pagasilotan.

35 Sa pagkamatuod, sa pagkamatuod, ginasiling ko sa inyo, nga amo ini ang akon doktrina, kag ginapamatud-an ko nga ini halin sa Amay; kag kon sin-o man ang magpati sa akon magapati man sa Amay; kag sa iya ang Amay magapamatuod parte sa akon, kay bisitahan niya sia paagi sa kalayo kag paagi sa Balaan nga Espiritu.

36 Kag sa amo nga paagi ang Amay magapamatuod parte sa akon, kag ang Balaan nga Espiritu magapamatuod sa iya parte sa Amay kag sa akon; kay ang Amay, kag ako, kag ang Balaan nga Espiritu isa.

37 Kag sa liwat ginasiling ko sa inyo, kinahanglan gid kamo nga maghinulsol, kag mangin pareho sing isa ka bata nga diutay, kag magpabunyag sa akon ngalan, ukon indi gid kamo makabaton sining mga butang.

38 Kag sa liwat ginasiling ko sa inyo, kinahanglan gid kamo nga maghinulsol, kag magpabunyag sa akon ngalan, kag mangin pareho sing isa ka bata nga diutay, ukon indi gid kamo makapanubli sang ginharian sang Dios.

39 Sa pagkamatuod, sa pagkamatuod, ginasiling ko sa inyo, nga amo ini ang akon doktrina, kag kon sin-o man ang magpasad sa sini nagapasad sa akon bato, kag ang mga ganhaan sang impiyerno indi makapangibabaw batok sa ila.

40 Kag kon sin-o man ang magpahayag sing kapin ukon kulang sangsa sini, kag magpahamtang sini nga bilang akon doktrina, ina sia nagahalin sa malain, kag wala napasad sa akon bato; kundi nagpasad sia sa balason nga pundasyon, kag ang mga ganhaan sang impiyerno bukas agud batonon sia kon mag-abot ang mga baha kag ang mga hangin maghampak sa mga ini.

41 Gani, lakat sa sining katawhan, kag ipahayag ang mga pulong nga akon ginhambal tubtob sa mga punta sang kalibutan.