1 Sa pagkamatuod, sa pagkamatuod, ginasiling ko nga luyag ko nga maghatag kamo sang inyo limos sa mga imol; apang andami nga ang inyo paglimos indi sa atubang sang mga tawo agud makita nila; indi gani wala kamo sing padya halin sa inyo Amay nga yara sa langit.

2 Gani, kon maghatag kamo sang inyo limos indi magpatunog sang trumpeta sa inyo atubang pareho sang ginahimo sang mga hipokrito sa mga sinagoga kag sa mga dalanon agud dayawon sila sang mga tawo. Sa pagkamatuod ginasiling ko sa inyo, may yara sila sang ila padya.

3 Apang kon maghatag kamo sang limos indi pag-ipahibalo sa inyo wala nga kamot kon ano ang ginahimo sang inyo tuo nga kamot;

4 Agud ang inyo paglimos mahimo nga matago; kag ang inyo Amay nga nagatan-aw sa tago, sia mismo ang magapadya sa inyo sing hayag.

5 Kag kon magpangamuyo kamo indi ninyo paghimuon pareho sang mga hipokrito, kay maluyagon sila magpangamuyo nga nagatindog sa mga sinagoga kag sa mga kilid sang mga dalanon agud makita sila sang mga tawo. Sa pagkamatuod ginasiling ko sa inyo, may yara sila sang ila padya.

6 Apang kamo, kon magpangamuyo kamo, magsulod sa inyo gamay nga kwarto, kag kon nasira na ninyo ang inyo puwertahan, magpangamuyo sa inyo Amay nga yara sa tago; kag ang inyo Amay, nga nagatan-aw sa tago, magapadya sa inyo sing hayag.

7 Apang kon magpangamuyo kamo, indi maggamit sang wala’y pulos nga mga pagsulit-sulit, pareho sang mga pagano, kay nagahunahuna sila nga pamatian sila tungod sang ila madamo nga ginahambal.

8 Gani indi kamo magpareho sa ila, kay ang inyo Amay nakahibalo kon ano nga mga butang ang inyo kinahanglan antes kamo magpangayo sa iya.

9 Gani sa sini nga paagi kamo magpangamuyo: Amay namon nga yara sa langit, pakabalaanon ang imo ngalan.

10 Matuman ang imo kabubut-on sa duta amo man sang sa langit.

11 Kag patawara kami sang amon mga utang, pareho nga ginapatawad namon ang mga nakautang sa amon.

12 Kag indi kami pag-itugyan sa pagsulay, kundi luwason kami halin sa malain.

13 Kay imo ang ginharian, kag ang kagamhanan, kag ang himaya, sa wala’y katapusan. Amen.

14 Kay, kon patawaron ninyo ang mga tawo sang ila mga sala ang inyo Amay nga langitnon magapatawad man sa inyo;

15 Apang kon indi ninyo pagpatawaron ang mga tawo sang ila mga sala indi man ang inyo Amay magpatawad sang inyo mga sala.

16 Dugang pa sina, kon magpuasa kamo indi magpareho sa mga hipokrito, nga masinulub-on ang nawong, kay ginapasubo nila ang ila mga nawong agud makita sang mga tawo nga nagapuasa sila. Sa pagkamatuod ginasiling ko sa inyo, may yara sila sang ila padya.

17 Apang kamo, kon magpuasa kamo, haplasi ang inyo ulo, kag hilam-usi ang inyo nawong;

18 Agud indi makita sang mga tawo nga nagapuasa kamo, kundi sang inyo Amay, nga yara sa tago; kag ang inyo Amay, nga nagatan-aw sa tago, magapadya sa inyo sing hayag.

19 Indi magtipon para sa inyo mga kaugalingon sang mga manggad sa duta, nga sa diin ang mga sipit kag tuktok nagaut-ot, kag ang mga makawat nagabungkal kag nagapangawat;

20 Kundi magtipon para sa inyo mga kaugalingon sang mga manggad sa langit, nga sa diin wala sing sipit ukon tuktok nga magaut-ot, kag sa diin ang mga makawat indi makabungkal ukon makapangawat.

21 Kay kon diin ang inyo manggad, didto man ang inyo tagipusuon.

22 Ang suga sang lawas amo ang mata; gani, kon ang inyo mata tampad, ang inyo bilog nga lawas mangin puno sang kasanag.

23 Apang kon ang inyo mata malain, ang inyo bilog nga lawas mangin puno sang kadudulman. Gani, kon ang kasanag nga yara sa inyo mangin kadudulman, daw ano kadako sina nga kadudulman!

24 Wala sing tawo nga makaalagad sa duha ka amo; kay iya kaugtan ang isa kag palanggaon ang isa, ukon indi gani mangin tampad sia sa isa kag tamayon ang isa. Indi kamo makaalagad sa Dios kag sa Manggad.

25 Kag karon natabo ini nga sang nahambal ni Jesus ining mga pulong gintulok niya ang dose nga iya ginpili, kag nagsiling sa ila: Dumduma ang mga pulong nga akon ginhambal. Kay tan-awa, kamo inang akon mga ginpili nga mag-alagad sa sining katawhan. Gani ginasiling ko sa inyo, indi pagkabalak-i ang parte sa inyo kabuhi, kon ano ang inyo kaunon, ukon kon ano ang inyo imnon; ukon bisan pa gani ang parte sa inyo lawas, kon ano ang inyo suksukon. Indi bala ang kabuhi labaw pa sangsa pagkaon, kag ang lawas sangsa panapton?

26 Tan-awa ang kapispisan sang kahanginan, kay wala sila nagasab-og, kag wala man sila nagaani ukon nagapanipon sa mga balay-talagoan; apang ang inyo Amay nga langitnon nagapakaon sa ila. Indi bala nga labaw pa kamo nga malahalon sangsa ila?

27 Sin-o bala sa inyo sa pagkabalaka makadugang sing isa ka maniko sa iya kataason?

28 Kag ngaa bala nga magkabalaka kamo sang bayuon? Himutari ninyo ang mga lirio nga bulak sang kapatagan kon paano sila nagatubo; wala sila nagapangabudlay, kag wala man sila nagahabol;

29 Apang ginasiling ko sa inyo, nga bisan si Solomon, sa iya bug-os nga himaya, wala naadornohan sing pareho sa isa sang mga ini.

30 Gani, kon ginabistehan sang Dios ang hilamon sa kapatagan, nga yara karon nga adlaw, kag buwas igatong sa hurno, sa amo man pagabistehan niya kamo kon indi kamo diutay sing pagtuo.

31 Gani indi magkabalaka nga nagasiling, Ano ang aton kaunon? ukon, Ano ang aton imnon? ukon, Ano ang aton suksukon?

32 Kay ang inyo Amay nga langitnon nakahibalo nga nagakinahanglan kamo sining tanan nga butang.

33 Apang pangitaa anay ninyo ang ginharian sang Dios kag ang iya pagkamatarong, kag ining tanan nga butang idugang sa inyo.

34 Gani indi magkabalaka parte sa buwas kay ang buwas ang magakabalaka sang mga butang para sa iya kaugalingon. Bastante na ang adlaw sa kalainan sini.