1 Kag karon natabo ini nga sang nahambal ni Jesus ining mga pulong nag-atubang sia liwat sa kadam-an, kag nagbukas liwat sang iya baba sa ila nga nagasiling: Sa pagkamatuod, sa pagkamatuod, ginasiling ko sa inyo, Indi maghukom, agud indi kamo paghukman.

2 Kay sa paagi nga kamo nagahukom, kamo pagahukman; kag sa talaksan nga inyo gintaksan, kamo pagatakson.

3 Kag ngaa bala ginatan-aw mo ang puling nga yara sa mata sang imo utod, apang wala mo ginasapak ang puling nga daw troso kadako nga yara sa imo kaugalingon nga mata?

4 Ukon anhon mo pagsiling sa imo utod: Tugoti ako nga kuhaon ko ang puling sa imo mata—kag tan-awa, may puling nga daw troso kadako sa imo kaugalingon nga mata?

5 Ikaw nga hipokrito, kuhaa anay ang puling nga daw troso kadako sa imo kaugalingon nga mata; kag dayon makakita ka sing maathag sa pagkuha sang puling sa mata sang imo utod.

6 Indi pag-ihatag inang balaan sa mga ido, kag indi man pag-ipilak ang inyo mga perlas sa atubang sang mga baboy, kay basi tasakon nila ang mga ini sang ila mga tiil, kag atubangon kag usngabon kamo.

7 Magpangayo, kag ihatag ini sa inyo; magpangita, kag makakita kamo; magpanuktok, kag pagabuksan ini sa inyo.

8 Kay ang tagsa-tagsa nga nagapangayo, magabaton; kag sia nga nagapangita, makakita; kag sa iya nga nagapanuktok, pagabuksan ini.

9 Ukon ano nga sari sang tawo ang yara sa inyo, nga, kon ang iya anak mangayo sing tinapay, hatagan sia sang bato?

10 Ukon kon mangayo sia sang isda, hatagan bala niya sia sang man-og?

11 Kon kamo, bisan gani nga malain, nakahibalo maghatag sing maayo nga mga dulot sa inyo mga anak, daw ano pa gid kamaayo nga mga butang ang ihatag sang inyo Amay nga yara sa langit sa ila nga nagapangayo sa iya?

12 Gani, ang tanan nga butang kon ano man nga buot ninyo nga himuon sang mga tawo sa inyo, amo man ang inyo himuon sa ila kay amo ini ang layi kag ang mga propeta.

13 Magsulod kamo sa mapiot nga ganhaan; kay masangkad ang ganhaan, kag malapad ang dalan nga nagapadulong sa kalaglagan, kag madamo sila nga nagasulod dira;

14 Kay mapiot ang ganhaan, kag makitid ang dalan, nga nagapadulong sa kabuhi, kag diutay lang ang nakatultol sini.

15 Mag-andam sa di-matuod nga mga propeta, nga nagapalapit sa inyo sa panapton sang carnero, apang sa sulod manunukob nga mga lobo sila.

16 Makilala ninyo sila sa ila mga bunga. Nagapuksi bala ang mga tawo sang ubas sa tunukon nga mga tanom, ukon sang mga higuera sa mga hilamon?

17 Sa amo man ang tagsa ka maayo nga kahoy nagadala sang maayo nga bunga; apang ang malain nga kahoy nagadala sang malain nga bunga.

18 Ang maayo nga kahoy indi makadala sing malain nga bunga, kag ang malain nga kahoy indi man makadala sing maayo nga bunga.

19 Ang tagsa ka kahoy nga wala nagadala sing maayo nga bunga ginatapas, kag ginadap-ong sa kalayo.

20 Gani, sa ila mga bunga makilala ninyo sila.

21 Indi tanan nga nagasiling sa akon, Ginuo, Ginuo, makasulod sa ginharian sang langit; kundi sia nga nagahimo sang kabubut-on sang akon Amay nga yara sa langit.

22 Madamo ang magasiling sa akon sa sina nga adlaw: Ginuo, Ginuo, wala bala kami nagpropesiya sa imo ngalan, kag sa imo ngalan nagpanabog sang mga yawa, kag sa imo ngalan naghimo sang madamo nga buhat nga makadalayaw?

23 Kag dayon ipahayag ko sa ila: Wala gid ako nakakilala sa inyo; magpalayo kamo sa akon, kamo nga nagahimo sang kalainan.

24 Gani, kon sin-o man ang nagapamati sa sining mga sugo nakon kag nagahimo sang mga ini, ipaanggid ko sia sa isa ka tawo nga mahinalungon nga nagtukod sang iya balay sa ibabaw sing isa ka bato—

25 Kag nagbundak ang ulan, kag nag-abot ang mga baha, kag naghuyop ang mga hangin, kag naghampas sa sina nga balay; kag wala ini natumba, kay natukod ini sa ibabaw sing isa ka bato.

26 Kag ang tagsa-tagsa nga nagapamati sa sining mga sugo nakon kag wala nagahimo sang mga ini ipaanggid sa isa ka tawo nga buang-buang nga nagtukod sang iya balay sa balas—

27 Kag nagbundak ang ulan, kag nag-abot ang mga baha, kag naghuyop ang mga hangin, kag naghampas sa sina nga balay; kag natumba ini, kag grabe ang pagkatumba sini.