1 Kag karon natabo ini nga sang natapos ni Jesus ining mga ginpanudlo nagtulok sia palibot sa kadam-an, kag nagsiling sa ila: Tan-awa, inyo nabatian ang mga butang nga akon ginpanudlo antes ako nagkayab sa akon Amay; gani, kon sin-o man ang makadumdum sining mga sugo nakon kag nagahimo sang mga ini, sia akon pagabangonon sa katapusan nga adlaw.

2 Kag natabo ini nga sang nasiling ni Jesus ining mga pulong nabatyagan niya nga may pila sa ila nga nagdayaw, kag natingala kon ano ang luyag niya nga ila himuon parte sa layi ni Moises; kay wala nila mahangpi ang pulong nga ang daan nga mga butang naglabay na, kag ang tanan nga butang nangin bag-o.

3 Kag nagsiling sia sa ila: Indi matingala nga nagsiling ako sa inyo nga ang daan nga mga butang naglabay na, kag ang tanan nga butang nangin bag-o.

4 Tan-awa, ginasiling ko sa inyo nga ang layi natuman na nga ginhatag kay Moises.

5 Tan-awa, ako amo sia nga naghatag sang layi, kag ako amo sia nga nakighisugot sa Israel nga akon katawhan; gani, ang layi natuman na sa akon, kay nagkari ako agud matuman ang layi; gani natapos na ini.

6 Tan-awa, wala ko ginaguba ang mga propeta, kay kon ano kadamo ang wala pa natuman sa akon, sa pagkamatuod ginasiling ko sa inyo, ang tanan matuman.

7 Kag tungod nagsiling ako sa inyo nga ang daan nga mga butang naglabay na, wala ko ginaguba inang ginpanghambal parte sa mga butang nga magaabot.

8 Kay tan-awa, ang kasugtanan nga akon ginhimo upod sa akon katawhan wala pa natuman tanan; kundi ang layi nga ginhatag kay Moises natapos na sa akon.

9 Tan-awa, ako ang layi, kag ang kasanag. Magtulok sa akon, kag magpadayon tubtob sa katapusan, kag magakabuhi kamo; kay sa iya nga nagapadayon tubtob sa katapusan akon ihatag ang kabuhi nga wala’y katapusan.

10 Tan-awa, nahatag ko na sa inyo ang mga kasugoan; gani tumana ang akon mga kasugoan. Kag amo ini ang layi kag ang mga propeta kay matuod gid nga nagpamatuod sila parte sa akon.

11 Kag karon natabo ini nga sang nahambal ni Jesus ining mga pulong, nagsiling sia sa sinang dose nga iya ginpili:

12 Mga disipulo ko kamo; kag kamo ang suga sa sining katawhan nga nagkalabilin sang panimalay ni Jose.

13 Kag tan-awa, amo ini ang duta nga inyo palanublion; kag ginhatag ini sang Amay sa inyo.

14 Kag bisan san-o wala naghatag sa akon sing kasugoan ang Amay nga isugid ko ini sa inyo mga kauturan sa Jerusalem.

15 Kag wala man bisan san-o naghatag sa akon sing kasugoan ang Amay nga isugid ko sa ila ang parte sa iban pa nga mga tribo sang panimalay ni Israel nga gindala sang Amay pagwa sa kadutaan.

16 Ini lamang ang ginsugo sang Amay sa akon nga isugid ko sa ila:

17 Nga may iban pa ako nga mga carnero nga wala sa sini nga panong; sila man kinahanglan gid nga akon dal-on, kag magapamati sila sa akon tingug; kag mangin may isa ka panong, kag isa ka manugpahalab.

18 Kag karon, tungod sang pagkabatinggilan kag pagkawala’y pagtuo wala nila mahangpi ang akon pulong; gani ginsugo ako sang Amay nga indi na maghambal pa parte sini nga butang sa ila.

19 Apang, sa pagkamatuod, ginasiling ko sa inyo nga ang Amay nagsugo sa akon, kag ginasugid ko ini sa inyo, nga nahamulag kamo halin sa ila tungod sang ila kalainan; gani tungod ini sang ila kalainan nga wala sila nakahibalo parte sa inyo.

20 Kag sa pagkamatuod, ginasiling ko liwat sa inyo nga may iban pa nga mga tribo nga ginhamulag sang Amay halin sa ila; kag ini tungod sang ila kalainan nga wala sila nakahibalo parte sa ila.

21 Kag sa pagkamatuod ginasiling ko sa inyo, nga kamo amo sila nga akon ginasiling: May iban pa ako nga mga carnero nga wala sa sini nga panong; sila man kinahanglan gid nga akon dal-on, kag magapamati sila sa akon tingug; kag mangin may isa ka panong, kag isa ka manugpahalab.

22 Kag wala nila ako mahangpi kay naghunahuna sila nga mga Gentil yadto; kay wala nila mahangpi nga ang mga Gentil dapat hayluhon paagi sa ila pagpangwali.

23 Kag wala nila ako mahangpi sang nagsiling ako nga magapamati sila sa akon tingug; kag wala nila ako mahangpi nga ang mga Gentil indi makabati sang akon tingug bisan san-o—nga indi ako magpakita sang akon kaugalingon sa ila luwas lang kon paagi sa Balaan nga Espiritu.

24 Apang tan-awa, nakabati kamo sang akon tingug, kag nakakita sa akon; kag kamo akon mga carnero, kag naisip kamo sa sinang mga ginhatag sang Amay sa akon.