१ अनि अब यस्तो हुन गयो कि जब येशूले यी भनाइहरूको अन्त्य गर्नुभएको थियो उहाँले आफ्ना आँखाहरू भीडतिर डुलाउनुभयो र उनीहरूसामु भन्नभयो: हेर, तिमीहरूले यी कुराहरू सुनेका छौ जुन मैले म मेरा पितासामु आरोहण गर्नुभन्दा पहिले सिकाएँ; त्यसकारण, जसले मेरा यी भनाइहरूलाई सम्झन्छ र पालना गर्छ, उसलाई म अन्तिम दिनमा उठाउनेछु।

२ अनि यस्तो हुन गयो कि जब येशूले यी कुराहरू भन्नुभएको थियो उहाँले सोच्नुभयो कि उनीहरूमध्ये केही थिए जसले मोशाको व्यवस्थाका बारेमा के गर्ने हो भनी विस्मय र आश्चर्य गरे; किनकि उनीहरूले त्यो भनाइलाई बुझेनन् कि पुराना कुराहरू बितिसकेका थिए र सबै कुराहरू नयाँ बनेका थिए।

३ अनि उहाँले उनीहरूसामु भन्नुभयो: विस्मय नगर कि मैले तिमीहरूसामु भनेँ कि प्राचीन कुराहरू बितिसकेका थिए र सबै कुराहरू नयाँ बनेका थिए।

४ हेर, म तिमीहरूसामु भन्दछु कि व्यवस्था पूरा भएका छन् जुन मोशालाई दिइएको थियो।

५ हेर, म उही हुँ जसले व्यवस्था दियो र म उही हुँ जसले मेरा जन इस्राएलसँग करार गऱ्यो; त्यसकारण ममा व्यवस्था पूरा भएको छ, किनकि म व्यवस्था पूरा गर्न आएको हुँ; त्यसकारण यसको अन्त्य छ।

६ हेर, म अगमवक्ताहरूको विनाश गर्दिनँ, किनकि जति ममा पूरा भएका छैनन्, साँचै नै म तिमीहरूसामु भन्दछु, सबै पूरा हुनेछन्।

७ अनि किनभने मैले तिमीहरूसामु भनेँ कि प्राचीन कुराहरू बितिसकेका छन्, म तिनको विनाश गर्दिनँ जुन आउने कुराहरूका बारेमा बोलिएका छन्।

८ किनकि हेर, मैले मेरा जनसँग गरेको करार सबै पूरा भएका छैनन्; तर मोशालाई दिइएको व्यवस्था ममा अन्त्य हुन्छन्।

९ हेर, म नै व्यवस्था र प्रकाश हुँ। मलाई हेर र अन्त्यसम्म सह र तिमीहरू जिउनेछौ; किनकि जसले अन्त्यसम्म सहन्छ उसलाई म अनन्त जीवन दिनेछु।

१० हेर, मैले तिमीहरूलाई आज्ञाहरू दिएको छु; त्यसकारण मेरा आज्ञाहरू पालना गर। अनि यो नै व्यवस्था र अगमवाणीहरूको सारांश हो, किनकि तिनले मेरा बारेमा गवाही दिए।

११ अनि अब यस्तो हुन गयो कि जब येशूले यी वचनहरू बोल्नुभएको थियो, उहाँले ती बाह्रसामु भन्नुभयो जसलाई उहाँले चुन्नुभएको थियो:

१२ तिमीहरू मेरा शिष्यहरू हौ; तिमीहरू यी जनसामु ज्योति हौ र जो योसेफको घरानाका अवशेष हुन्।

१३ अनि हेर, यो तिमीहरूको रिक्थको भूमि हो; र पिताले तिमीहरूलाई यो दिनुभएको छ।

१४ अनि कुनै पनि समयमा पिताले मलाई आज्ञा दिनुभएन कि मैले यो तिमीहरूका यरुशलेमका बन्धुहरूलाई भन्नुपर्छ।

१५ न त कुनै पनि समयमा पिताले मलाई आज्ञा दिनुभएको छ कि मैले उनीहरूलाई इस्राएलका घरानाका अन्य कूलहरूका बारेमा भन्नुपर्छ, जसलाई पिताले भूमिबाट बाहिर अगुवाइ गर्नुभएको छ।

१६ पिताले यति आज्ञा दिनुभयो, कि मैले उनीहरूलाई भन्नुपर्छ:

१७ कि अन्य भेडा मसँग छन् जुन यो बथानका होइनन्; उनीहरूलाई पनि मैले ल्याउनु पर्दछ र उनीहरूले मेरो आवाज सुन्नेछन्; र त्यहाँ एक बथान र एक गोठालो हुनेछ।

१८ अनि अब, हठीपना र अविश्वासका कारण उनीहरूले मेरो वचनलाई बुझेनन्, त्यसकारण मलाई पिताद्वारा यो कुराको बारेमा उनीहरूलाई अरु नभन्न आज्ञा दिइएको थियो।

१९ तर, साँचै नै, म तिमीहरूसामु भन्दछु कि पिताले मलाई आज्ञा दिनुभएको छ र म तिमीहरूसामु यो भन्दछु, कि तिमीहरूलाई उनीहरूको दुष्टताका कारण उनीहरूमाझबाट अलग्याइएको थियो; त्यसकारण यो उनीहरूको दुष्टताका कारण हो कि उनीहरूलाई तिमीहरूका बारेमा थाहा छैन।

२० अनि साँचै नै, म तिमीहरूसामु फेरि भन्दछु कि अन्य कूलहरूलाई पिताले उनीहरूबाट अलग्याउनुभएको छ; र यो उनीहरूको दुष्टताका कारण हो कि उनीहरूलाई तिनीहरूका बारेमा थाहा छैन।

२१ अनि साँचै नै म तिमीहरूसामु भन्दछु, कि तिमीहरू उनीहरू हौ जसका बारेमा मैले भनेँ: अन्य भेडा मसँग छन् जुन यो बथानका होइनन्; उनीहरूलाई पनि मैले ल्याउनु पर्दछ र उनीहरूले मेरो आवाज सुन्नेछन्; र त्यहाँ एक बथान र एक गोठालो हुनेछन्।

२२ अनि उनीहरूले मलाई बुझेनन्, किनकि उनीहरूले अनुमान गरे यी गैह्र यहुदीहरू थिए; किनकि उनीहरूले बुझेनन् कि गैह्र यहुदीहरू उनीहरूका प्रवचनमार्फत् परिवर्तित हुनुपर्दछ।

२३ अनि उनीहरूले मलाई बुझेनन् कि मैले भनेँ उनीहरूले मेरो आवाज सुन्नेछन्; र उनीहरूले मलाई बुझेनन् कि गैह्र यहुदीहरूले कुनै पनि समयमा मेरो आवाज सुन्ने छैनन्—कि म आफैँ उनीहरूसामु पवित्र आत्माद्वारा बाहेक प्रकट हुनेछैन।

२४ तर हेर, तिमीहरूले मेरो आवाज सुनेका छौ र मलाई देखेका पनि छौ; र तिमीहरू मेरा भेडा हौ र तिमीहरूलाई तीमाझ गणना गरिन्छ जसलाई पिताले मलाई दिनुभएको छ।