१ अनि साँचै नै, साँचै नै, म तिमीहरूसामु भन्दछु कि मसँग अन्य भेडा छन्, जुन यो भूमिका होइनन्, न त यरुशलेमको भूमिका, न त त्यो भूमि वरिपरिका कुनै भागका हुन् जहाँ म सेवा गर्न गएको छु।

२ किनकि तिनीहरू जसका बारेमा म बोल्दछु उनीहरू हुन् जसले मेरो आवाज अझै सुनेका छैनन्; न त कुनै समयमा म आफैँ उनीहरूसामु प्रकट भएको छु।

३ तर मैले पिताबाट आज्ञा प्राप्त गरेको छु कि म उनीहरूसामु जानुपर्दछ र उनीहरूले मेरो आवाज सुन्नेछन् र मेरा भेडामाझ गनिनेछन्, कि त्यहाँ एक बथान र एक गोठालो हुनेछ; त्यसकारण म आफैँलाई उनीहरूसामु देखाउन जान्छु।

४ अनि म तिमीहरूलाई आज्ञा दिन्छु कि तिमीहरूले यी कुराहरू म गइसकेपछि लेख्नु पर्दछ, कि यदि त्यस्तो भयो कि यरुशलेमका मेरा जनले, उनीहरूले जसले मलाई देखेका छन् र मेरो सेवामा मसँग थिए, पितासँग मेरो नाउँमा अनुरोध गर्दैनन् भने, कि उनीहरूले पवित्र आत्माद्वारा तिमीहरूको र उनीहरूले नजानेका अन्य कूलहरूका बारेमा ज्ञान प्राप्त गरून्, कि यी कुराहरू जुन तिमीहरूले लेख्नेछौ त्यो लुकाइनेछ र गैह्र यहुदीहरूसामु प्रकट गरिनेछ, कि गैह्र यहुदीहरूको पूर्णतामार्फत्, उनीहरूका सन्ततिका अवशेष, जो उनीहरूको अविश्वासका कारण पृथ्वीको सतहमा छरपष्ट पारिनेछन्, उनीहरूलाई ल्याउन सकियोस्, अथवा म, उनीहरूको उद्धारकर्ताको ज्ञानमा ल्याउन सकियोस्।

५ अनि तब म उनीहरूलाई पृथ्वीका चारै दिशाबाट भेला गराउनेछु; अनि तब म करार पूरा गर्नेछु जुन पिताले इस्राएलका घरानाका सबै जनसामु गर्नुभएको छ।

६ अनि गैह्र यहुदीहरू आशीषित छन्, उनीहरूको ममाथिको विश्वासका कारण, पवित्र आत्मामा र उनीबाटको, जुनले उनीहरूसामु मेरो र पिताको गवाही दिन्छन्।

७ हेर, उनीहरूको ममाथिको विश्वासका कारण, पिता भन्नुहुन्छ र तिमीहरूको अविश्वासका कारण, हे इस्राएलका घराना, पछिल्ला दिनहरूमा सत्यता गैह्र यहुदीहरूसामु आउनेछ, कि यी कुराहरूको परिपूर्णता उनीहरूलाई अवगत गराइनेछ।

८ तर धिक्कार छ विश्वास नगर्ने गैह्र यहुदीहरूलाई, पिता भन्नुहुन्छ—किनकि त्यस्तो हुँदाहुँदै पनि कि उनीहरू यो भूमिको सतहमा आएका छन् र मेरा जन जो इस्राएलका घरानाका हुन् तिनीहरूलाई छरपष्ट पारेका छन् र मेरा जन जो इस्राएलका घरानाका हुन् तिनीहरूलाई आफू माझबाट निकाला गरेका छन् र उनीहरूद्वारा पाउमुनि कुल्चिएको छ;

९ अनि पिताको गैह्र यहुदीहरूप्रतिका कृपाहरूका र पिताको मेरा जन जो इस्राएलका घरानाका हुन् तिनीहरूमाथिको न्यायका कारण, साँचै नै, साँचै नै म तिमीहरूसामु भन्दछु, कि यो सबै पछि, मैले मेरा जन जो इस्राएलका घरानाका हुन् तिनीहरूमाथि प्रहार गराउन र कष्ट दिन र बध गराउन र उनीहरूमाझबाट निकाला गराउन, उनीहरूद्वारा घृणा गराउन र निन्दा र उखानको पात्र बनाउन अह्राएको छु—

१० अनि यसरी पिताले आज्ञा दिनुहुन्छ कि मैले तिमीहरूसामु भन्नुपर्दछ: त्यो दिनमा जब गैह्र यहुदीहरूले मेरो सुसमाचार विरुद्ध पाप गर्नेछन् र मेरो सुसमाचारको परिपूर्णतालाई अस्वीकार गर्नेछन् र आफ्ना हृदयको घमण्डमा अरु राष्ट्रहरू र सारा पृथ्वीका सबै जनमाथि उचालिनेछन् र सबै प्रकारका झुट र छलकपट र उपद्रव र सबै प्रकारका ढोँग र हत्या र पाखण्ड र वेश्यावृत्ति र गोप्य संयोजनले भरिनेछन् र यदि उनीहरूले ती सबै कुराहरू गर्नेछन् र मेरो सुसमाचारका पूर्णतालाई अस्वीकार गर्नेछन् भने, हेर, पिता भन्नुहुन्छ, म मेरो सुसमाचारका पूर्णतालाई उनीहरूका माझबाट झिक्नेछु।

११ अनि तब म मेरो करारलाई सम्झनेछु जुन मैले मेरा जनसामु गरेको छु, हे इस्राएलका घराना र म मेरो सुसमाचार उनीहरूसामु लैजानेछु।

१२ अनि म तिमीलाई देखाउनेछु, हे इस्राएलका घराना, कि गैह्र यहुदीहरूसँग तिमीहरूमाथि शक्ति हुनेछैन; तर म तिमीहरूसँगको मेरा करार सम्झनेछु, हे इस्राएलका घराना र तिमीहरू मेरो सुसमाचारको परिपूर्णताको ज्ञानमा आउनेछौ।

१३ तर यदि गैह्र यहुदीहरूले पश्चात्ताप गर्नेछन् र मकहाँ फर्कनेछन् भने, पिता भन्नुहुन्छ, हेर, उनीहरूलाई मेरा जनमाझ गणना गरिनेछ, हे इस्राएलका घराना।

१४ अनि म मेरा जनलाई, जो इस्राएलका घरानाका हुन्, तिनीहरूमाझ जान र तिनीहरूमाथि कुल्चिन दिइनेछैन, पिता भन्नुहुन्छ।

१५ तर यदि तिनीहरू मकहाँ फर्केनन् र मेरो आवाजलाई सुनेनन् भने, म उनीहरूलाई दिनेछु, हो, म मेरा जनलाई दिनेछु, हे इस्राएलका घराना, कि उनीहरू तिनीहरू भएमाझ जानेछन् र तिनीहरूमाथि कुल्चिनेछन् र तिनीहरू स्वाद हराएको नुनजस्तै हुनेछन्, जुन फ्याँकिन र मेरा जनका पाउमुनि कुल्चिनबाहेक केहीका लागि पनि उपयोगी छैन, हे इस्राएलका घराना।

१६ साँचै नै, साँचै नै, म तिमीहरूसामु भन्दछु, पिताले मलाई यसरी आज्ञ दिनुभएको छ—कि मैले यी जनलाई यो भूमि उनीहरूको रिक्थका निम्ति दिनुपर्दछ।

१७ अनि तब यशैया अगमवक्ताका वचनहरू पूरा हुनेछन्, जसले भन्दछन्:

१८ तिम्रा चौकीदारहरूले आवाज उच्च पार्ने छन्; एकै स्वरमा उनीहरूले गाउनेछन्, किनकि जब परमप्रभुले पुन: सियोन ल्याउनुहुन्छ, उनीहरूले आफ्नै आँखाले देख्नेछन्।

१९ एकाएक हर्षित होओ, यरुशलेमका भग्नावशेषहरू तिमीहरू एकसाथ गाओ; किनकि परमप्रभुले उहाँका जनलाई शान्त्वना दिनुभएको छ, उहाँले यरुशलेमलाई उद्धार गर्नुभएको छ।

२० सारा राष्ट्रहरूका आँखाहरूमा परमप्रभुले आफ्ना पवित्र बाहु प्रदर्शन गर्नुभएको छ; अनि पृथ्वीका पल्लो छेउसम्मका सबैले परमेश्वरको मुक्ति देख्नेछन्।