1 Tan-awa, karon natabo ini nga sang nahambal ni Jesus ining mga pulong nagtulok sia liwat palibot sa kadam-an, kag nagsiling sia sa ila: Tan-awa, ang akon tion malapit na.

2 Nahangpan ko nga maluya kamo, nga indi ninyo mahangpan ang tanan ko nga pulong nga ginsugo sa akon sang Amay nga ihambal sa inyo sa sini nga tion.

3 Gani, magpalauli kamo sa inyo mga puluy-an, kag binag-binagon ang mga butang nga akon ginsiling, kag magpangayo sa Amay, sa akon ngalan, agud mahangpan ninyo, kag ihanda ang inyo mga kaisipan para sa buwas, kag magakari ako liwat sa inyo.

4 Apang karon makadto ako sa Amay, kag agud ipakita man ang akon kaugalingon sa nagkaladula nga mga tribo sang Israel, kay wala sila nadula sa Amay, kay nakahibalo sia kon diin niya sila gindala.

5 Kag natabo ini nga sang nakahambal si Jesus sini, nagtulok sia liwat palibot sa kadam-an, kag nakita nga may mga luha sila, kag nagatulok sa iya nga daw ginapangayo nila sa iya nga magtinir sing diutay pa nga tion upod sa ila.

6 Kag nagsiling sia sa ila: Tan-awa, ang akon tagipusuon napuno sing kaluoy para sa inyo.

7 May mga masakiton bala dira sa inyo? Dal-a sila diri. May mga lupog bala kamo, ukon bulag, ukon piang, ukon baldado, ukon aruon, ukon mga naitos, ukon mga bungol, ukon nagaantos sa ano man nga paagi? Dal-a sila diri kag paayohon ko sila kay naluoy ako sa inyo; ang akon tagipusuon napuno sang kaluoy.

8 Kay nahangpan ko nga luyag ninyo nga ipakita ko sa inyo ang akon ginhimo sa inyo mga kauturan sa Jerusalem, kay nakita ko nga ang inyo pagtuo tuman na agud paayohon ko kamo.

9 Kag natabo ini nga sang nakahambal sia sini, ang bug-os nga kadam-an, dulungan nga nagpalapit, upod ang ila mga masakiton kag ang ila mga nagaantos, kag ang ila mga lupog, kag upod ang ila mga bulag, kag upod ang ila mga apa, kag upod sila tanan nga nagaantos sa ano man nga paagi; kag ginpaayo niya sila ang tagsa-tagsa nga gindala sa iya.

10 Kag sila tanan, sila nga mga ginpaayo kag sila nga mga wala sing masakit, nagduko kag nagluhod sa iya tiilan, kag nagsimba sa iya; kag ang tanan nga makapalapit bisan pa sa kadamuon sang tawo naghalok sa iya mga tiil, sa bagay nga ginpaliguan nila ang iya mga tiil sang ila mga luha.

11 Kag natabo ini nga nagsugo sia nga ang ila magagmay nga kabataan dal-on sa iya.

12 Gani gindala nila ang ila magagmay nga kabataan kag ginbutang sila sa duta palibot sa iya, kag si Jesus nagtindog sa tunga; kag ang kadam-an naghatag sing alagyan tubtob sila tanan nadala sa iya.

13 Kag natabo ini nga sang nadala na sila tanan, kag si Jesus nagtindog sa tunga, ginsugo niya ang kadam-an nga magluhod sila sa duta.

14 Kag natabo ini nga sang nakaluhod na sila sa duta, si Jesus naghibubun-ot sa iya kaugalingon, kag nagsiling: Amay, natublag ako tungod sang kalainan sang katawhan sang panimalay ni Israel.

15 Kag sang nasiling niya ining mga pulong, sia man mismo nagluhod sa duta; kag tan-awa nagpangamuyo sia sa Amay, kag ang mga butang nga iya ginpangamuyo indi masulat, kag ang kadam-an nagpamatuod nga nakabati sa iya.

16 Kag sa amo nga paagi sila nagpamatuod: Halin sang una, wala pa gid nakita sang mata, kag wala man nabatian sang dulunggan ang sa pagkadako kag makadalayaw nga mga butang nga amon nakita kag nabatian nga ginhambal ni Jesus sa Amay;

17 Kag wala sing dila nga makahambal, kag indi man mahimo nga isulat sang bisan sin-o nga tawo, kag indi man mapanghunahuna sang mga tagipusuon sang mga tawo ang amo kadako kag makadalayaw nga mga butang nga amon nakita kag nabatian nga ginpanghambal ni Jesus; kag wala sing isa nga makatungkad sang kalipay nga nagpuno sang amon mga kalag sa tion nga nabatian namon sia nga nagapangamuyo sa Amay para sa amon.

18 Kag natabo ini nga sang nakatapos si Jesus sa pagpangamuyo sa Amay, nagtindog sia; apang sa pagkadako sang kalipay sang kadam-an nga nadaug sila sang ila balatyagon.

19 Kag natabo ini nga si Jesus naghambal sa ila, kag ginpangabay sila nga magtindog.

20 Kag nagtindog sila halin sa duta, kag nagsiling sia sa ila: Bulahan kamo tungod sang inyo pagtuo. Kag karon tan-awa, nalubos ang akon kalipay.

21 Kag sang nasiling niya ining mga pulong, naghibi sia, kag ang kadam-an nagpamatuod sini, kag ginkuha niya ang ila magagmay nga kabataan, sing isa-isa, kag ginpakamaayo sila, kag nagpangamuyo sa Amay para sa ila.

22 Kag sang nahimo na niya ini naghibi sia liwat;

23 Kag naghambal sia sa kadam-an, kag nagsiling sa ila: Tan-awa ang inyo magagmay nga kabataan.

24 Kag samtang nagatulok sila sa ila magagmay nga kabataan gintuon nila ang ila mga mata sa langit, kag nakita nila ang kalangitan nga nabuksan, kag nakita nila ang mga anghel nga nagapanaog halin sa langit nga daw yara sa tunga sang kalayo; kag nagpanaog sila kag ginpalibutan ang magagmay nga kabataan, kag napalibutan sila sang kalayo; kag ang mga anghel nag-alagad sa ila.

25 Kag ang kadam-an nakakita kag nakabati kag nagpamatuod; kag nakahibalo sila nga ang ila pamatuod pat-od kay sila tanan nakakita kag nakabati, ang tagsa ka tawo para sa iya kaugalingon; kag yara sila sa kadamuon nga mga duha ka libo kag lima ka gatos ka tawo; kag nagalakip ini sang mga lalaki, mga babayi, kag mga kabataan.