1 Kag natabo ini nga ginsugo niya ang kadam-an nga mag-untat sila sa pagpangamuyo, kag amo man ang iya mga disipulo. Kag ginsugo niya sila nga indi sila mag-untat sa pagpangamuyo sa ila mga tagipusuon.

2 Kag ginsugo niya sila nga magbangon sila kag magtindog sa ila mga tiil. Kag nagbangon sila kag nagtindog sa ila mga tiil.

3 Kag natabo ini nga nagsipad-sipad sia liwat sang tinapay kag ginbendisyonan ini, kag ginhatag sa mga disipulo agud kaunon.

4 Kag sang nakakaon na sila ginsugo niya sila nga magsipad-sipad sila sang tinapay, kag ipanghatag sa kadam-an.

5 Kag sang nakapanghatag na sila sa kadam-an ginhatagan man niya sila sang bino nga imnon, kag ginsugo sila nga ipanghatag nila sa kadam-an.

6 Karon, wala sing tinapay, kag wala man sing alak, nga gindala ang mga disipulo, kag wala man ang kadam-an;

7 Apang matuod gid nga naghatag sia sa ila sing tinapay nga kaunon, kag bino man nga imnon.

8 Kag nagsiling sia sa ila: Sia nga magakaon sining tinapay magakaon sang akon lawas sa iya kalag; kag sia nga magainom sining bino magainom sang akon dugo sa iya kalag; kag ang iya kalag indi gid paggutumon ukon pag-uhawon, kundi nga mabusog.

9 Karon, sang nakakaon kag nakainom na ang tanan nga kadam-an, tan-awa, napuno sila sang Espiritu; kag nagsinggit sila sa isa ka tingug, kag naghatag sing pagdayaw kay Jesus nga ila pareho nga nakita kag nabatian.

10 Kag natabo ini nga sang nakahatag na sila tanan sing pagdayaw kay Jesus, nagsiling sia sa ila: Tan-awa natapos ko ang kasugoan nga ginsugo sa akon sang Amay parte sining katawhan nga nagkalabilin sang panimalay ni Israel.

11 Madumduman ninyo nga naghambal ako sa inyo, kag nagsiling nga kon ang mga pulong ni Isaias matuman—tan-awa nasulat ang mga ini, yara ang mga ini sa inyo atubang, gani usisaa ang mga ini—

12 Kag sa pagkamatuod, sa pagkamatuod, ginasiling ko sa inyo, nga kon matuman ang mga ini dayon amo ina ang tion sang katumanan sang kasugtanan nga ginhimo sang Amay sa iya katawhan, O panimalay ni Israel.

13 Kag dayon ang mga nagkalabilin, nga magalinapta sa ibabaw sang duta, pagatiponon halin sa este kag halin sa weste, kag halin sa sur kag halin sa norte; kag pagadal-on sila sa ihibalo parte sa Ginuo nga ila Dios nga nagtubos sa ila.

14 Kag ang Amay nagsugo sa akon nga ihatag ko sa inyo ini nga duta, bilang inyo palanublion.

15 Kag ginasiling ko sa inyo, nga kon ang mga Gentil indi maghinulsol pagkatapos sang pagpakamaayo nga ila pagabatonon, pagkatapos nga napalapta nila ang akon katawhan—

16 Dayon kamo, nga nagkalabilin sang panimalay ni Jacob, magasimpon sa ila; kag mangin sa tunga kamo nila nga mangin madamo; kag sa tunga nila mangin pareho kamo sing isa ka leon sa mga kasapatan sang lasang, kag pareho sa isa ka bataon nga leon sa mga panong sang mga carnero, nga, kon makalusot sia magatasak kag magagusnit sa mga tinipik, kag wala sing bisan sin-o nga makaluwas.

17 Ang imo kamot pagaalsahon batok sa imo mga kaaway, kag ang tanan mo nga mga kaaway magakalamatay.

18 Kag pagatiponon ko ang akon katawhan pareho sing isa ka tawo nga nagatipon sang iya mga binugkos pasulod sa linasan.

19 Kay himuon ko ang akon katawhan kon kay sin-o ang Amay nakighisugot, huo, himuon ko nga salsalon ang imo sungay, kag himuon ko nga saway ang imo mga kuko. Kag dugmukon mo ang madamo nga katawhan; kag ikonsagrar ko ang ila kaayohan sa Ginuo, kag ang ila pagkabutang sa Ginuo sang bug-os nga duta. Kag tan-awa, ako amo sia nga magahimo sini.

20 Kag matabo ini, siling sang Amay, nga ang espada sang akon hustisya magabitay sa ibabaw nila sa sina nga adlaw; kag luwas lang nga maghinulsol sila magatupa ini sa ila, siling sang Amay, huo, bisan sa tanan nga nasyon sang mga Gentil.

21 Kag matabo ini, nga ipahamtang ko ang akon katawhan, O panimalay ni Israel.

22 Kag tan-awa, ining katawhan ipahamtang ko sa sini nga duta tuhoy sa katumanan sang kasugtanan nga akon ginhimo upod sa inyo amay nga si Jacob; kag mangin isa ini ka Bag-ong Jerusalem. Kag ang mga gahum sang langit mangin sa tunga sining katawhan; huo, bisan ako mangin sa tunga ninyo.

23 Tan-awa, ako amo sia nga ginahambal ni Moises nga nagasiling: Isa ka propeta ang pagabangonon sa inyo sang Ginuo nga inyo Dios halin sa inyo mga kauturan pareho sa akon; sia inyo pamatian sa tanan nga butang kon ano man ang iya isiling sa inyo. Kag matabo ini, nga ang tagsa ka tawo nga indi mamati sa sina nga propeta pagasikwayon halin sa katawhan.

24 Sa pagkamatuod ginasiling ko sa inyo, huo, kag ang tanan nga propeta halin kay Samuel kag yadtong mga nagsunod pagkatapos, ang tanan nga naghambal, nagpamatuod parte sa akon.

25 Kag tan-awa, mga anak kamo sang mga propeta; kag kamo iya sang panimalay ni Israel; kag kabahin kamo sang kasugtanan nga ginhimo sang Amay upod sa inyo mga amay nga nagasiling kay Abraham: Kag sa imo kaliwatan ang tanan nga kaliwat sang duta pagapakamaayohon.

26 Ang Amay nagbangon sa akon sa pagbisita una gid sa inyo, kag nagpadala sa akon agud pakamaayohon kamo sa pagtalikod sang tagsa sa inyo sa iya mga kalainan; kag ini tungod mga anak kamo sang kasugtanan—

27 Kag pagkatapos nga ginpakamaayo kamo dayon pagatumanon sang Amay ang kasugtanan nga ginhimo niya upod kay Abraham nga nagasiling: Sa imo kaliwatan ang tanan nga kaliwat sang duta pagapakamaayohon—sa pagbubo sang iya Balaan nga Espiritu paagi sa akon sa mga Gentil, nga ang amo nga bugay sa mga Gentil magahimo sa ila nga gamhanan labaw sa tanan, tubtob sa pagpalapta sang akon katawhan, O panimalay ni Israel.

28 Kag mangin silot sila sa katawhan sang sini nga duta. Apang, kon makabaton na sila sang kabug-osan sang akon ebanghelyo, dayon kon patig-ahon nila ang ila mga tagipusuon batok sa akon ibalik ko ang ila mga kalainan sa ila kaugalingon nga mga ulo, siling sang Amay.

29 Kag pagadumdumon ko ang kasugtanan nga akon ginhimo sa akon katawhan; kag nakighisugot ako sa ila nga pagatiponon ko sila sa akon kaugalingon nga natalana nga tion, agud ihatag ko liwat sa ila ang duta sang ila mga amay bilang ila palanublion, nga amo ang duta sang Jerusalem, nga amo ang duta nga ginpanaad sa ila sa wala’y katapusan, siling sang Amay.

30 Kag matabo ini, nga ang tion magaabot, nga ang kabug-osan sang akon ebanghelyo igawali sa ila;

31 Kag magapati sila sa akon, nga ako si Jesucristo, ang Anak sang Dios, kag magapangamuyo sa Amay sa akon ngalan.

32 Dayon ang ila mga manugbantay magaalsa sang ila tingug, kag sa tingug nga tingob makinanta sila; kay makakita sila sa ila kaugalingon nga mata.

33 Dayon ang Amay magatipon sa ila liwat, kag ihatag sa ila ang Jerusalem bilang duta nga ila palanublion.

34 Dayon magahinugyaw sila sa kalipay—Dungan nga magkinanta, kamo nga nalaglag nga mga lugar sang Jerusalem; kay ginpasulhay sang Amay ang iya katawhan, gintubos niya ang Jerusalem.

35 Ginhublasan sang Amay ang iya balaan nga butkon sa mga mata sang tanan nga nasyon; kag ang tanan nga yara sa mga punta sang kalibutan makakita sang kaluwasan sang Amay; kag ang Amay kag ako isa.

36 Kag dayon ipahanabo inang nasulat: Magbugtaw, magbugtaw liwat, isul-ob ang imo kusog, O Sion; isul-ob ang imo matahum nga mga biste, O Jerusalem, ang balaan nga siyudad; kay sugod subong indi na magsulod sa imo ang mga wala natuli kag ang mga mahigko.

37 Itaktak ang yab-ok halin sa imo kaugalingon; magbangon, magpungko, O Jerusalem; palosi ang imo kaugalingon sang mga gapos sa imo liog, O bihag nga anak nga babayi sang Sion.

38 Kay amo ini ang siling sang Ginuo: Ginbaligya ninyo ang inyo kaugalingon nga wala sing bili, kag gawaron kamo nga wala sing kwarta.

39 Sa pagkamatuod, sa pagkamatuod, ginasiling ko sa inyo, nga ang akon katawhan makakilala sang akon ngalan; huo, sa sina nga adlaw mahibal-an nila nga ako amo sia nga nagahambal.

40 Kag nian magasiling sila: Daw ano katahum sa mga bukid ang mga tiil niya nga nagadala sang maayong balita sa ila, nga nagabantala sang paghidaet; kag nagadala sang maayong balita sang kaayohan sa ila, nga nagabantala sang kaluwasan; nga nagasiling sa Sion: Ang imo Dios nagahari!

41 Kag dayon isa ka singgit ang magaguob: Halin kamo, halin kamo, gwa kamo dira, indi magtandog sa sinang mahigko; gwa kamo sa tunga niya; mangin matinlo kamo nga nagadala sang mga gamit sang Ginuo.

42 Kay indi kamo maggwa nga nagadali-dali ukon maglakat nga nagapalagyo; kay ang Ginuo magauna sa inyo, kag ang Dios sang Israel ang mangin sa likod ninyo.

43 Tan-awa, ang akon alagad magapakigbagay sing maalamon; pakataason sia kag pasidunggan kag mangin mataas gid.

44 Pareho nga madamo ang natingala sa imo—ang iya nawong nasamaran sing tuman, labaw pa sangsa bisan sin-o nga tawo, kag ang iya dagway labaw pa sangsa mga anak sang katawhan—

45 Gani pagawiskan niya ang madamo nga nasyon; ang mga hari magakipot sang ila mga baba tungod sa iya, kay inang mga wala nasugid sa ila makita nila; kag inang mga wala nila mabatii ila binag-binagon.

46 Sa pagkamatuod, sa pagkamatuod, ginasiling ko sa inyo, ining tanan nga butang pat-od gid nga matabo pareho sang ginsugo sa akon sang Amay. Dayon ining kasugtanan nga ginpakighisugot sang Amay sa iya katawhan matuman; kag dayon ang Jerusalem pagapuy-an liwat sang akon katawhan, kag ini mangin duta nga ila palanublion.