1 Kag natabo ini nga ginsugo niya sila nga isulat nila ang mga pulong nga ginhatag sang Amay kay Malaquias, nga iya ipahayag sa ila. Kag natabo ini nga pagkatapos nga nasulat ang mga ini ginpaathag niya ang mga ini. Kag amo ini ang mga pulong nga ginpahayag niya sa ila nga nagasiling: Amo ini ang ginsiling sang Amay kay Malaquias—Tan-awa, ipadala ko ang akon mensahero, kag ihanda niya ang akon alagyan, kag ang Ginuo nga inyo ginapangita magakari sing hinali sa iya templo, bisan ang mensahero sang kasugtanan, nga inyo ginakahamut-an; tan-awa, magakari sia, siling sang Ginuo sang mga Kasoldadohan.

2 Apang sin-o bala ang makabatas sang adlaw sang iya pagkari, kag sin-o bala ang makatindog kon magpakita sia? Kay pareho sia sang kalayo sang manugtunaw, kag pareho sang habon sang manuglaba.

3 Kag magapungko sia bilang manugtunaw kag manugpaputli sang pilak; kag pagaputlion niya ang mga anak ni Levi, kag tinloan sila pareho sang bulawan kag pilak agud makahalad sila sa Ginuo sang halad sa pagkamatarong.

4 Dayon ang halad sang Juda kag Jerusalem mangin makahamuot sa Ginuo pareho sang dumaan nga panahon, kag pareho sang mga tinuig sadto.

5 Kag magapalapit ako sa inyo sa paghukom; kag mangin isa ako ka maabtik nga saksi batok sa mga manughiwit, kag batok sa mga makilahion, kag batok sa mga manuglapas sang panumpa, kag batok sinang mga nagapigos sang trabahador sa iya mga sweldo, sang balo nga babayi kag sang ilo, kag sa mga nagawahig sang mga pangayaw, kag wala nahadlok sa akon, siling sang Ginuo sang mga Kasoldadohan.

6 Kay ako ang Ginuo, wala ako nagaliwat; gani kamo nga mga anak ni Jacob wala naupos.

7 Bisan halin pa sang mga adlaw sang inyo mga amay nagpalayo na kamo sa akon mga ordinansa, kag wala nagsunod sa mga ini. Balik kamo sa akon kag magabalik ako sa inyo, siling sang Ginuo sang mga Kasoldadohan. Apang nagasiling kamo: Sa diin bala kami mabalik?

8 Magapangawat bala ang tawo sa Dios? Apang ginkawatan ninyo ako. Apang nagasiling kamo: Sa diin bala kami nagapangawat sa imo? Sa mga ika-pulo kag mga halad.

9 Ginasumpa kamo sing isa ka sumpa kay ginkawatan ninyo ako, bisan ining bilog nga nasyon.

10 Dal-a ninyo ang bug-os nga mga ika-pulo sa balay-talagoan, agud may kalan-on sa akon balay; kag tilawi ako karon sa sini, siling sang Ginuo sang mga Kasoldadohan, kon indi ko pagbuksan sa inyo ang mga bintana sang langit, kag ibubo sa inyo ang pagpakamaayo nga mangin wala na sing lugar nga sarang masudlan sini.

11 Kag sawayon ko ang manuglamon tungod sa inyo, kag indi niya paghalitan ang mga bunga sang inyo duta; kag indi man mahulog ang bunga sang inyo ubas nga wala pa ang tion sa mga kapatagan, siling sang Ginuo sang mga Kasoldadohan.

12 Kag ang tanan nga nasyon magatawag sa inyo nga bulahan kay mangin isa kamo ka duta nga makalilipay, siling sang Ginuo sang mga Kasoldadohan.

13 Ang inyo mga pulong nangin matigdas batok sa akon, siling sang Ginuo. Apang nagasiling kamo: Ano bala ang ginhambal namon batok sa imo?

14 Nagsiling kamo: Wala sing kapuslanan ang mag-alagad sa Dios, kag ano bala ang pulos nga ginasunod naton ang iya mga ordinansa kag naggawi kita sing masinulub-on sa atubang sang Ginuo sang mga Kasoldadohan?

15 Kag karon ginatawag naton nga malipayon ang bugalon; huo, sila nga nagabuhat sang kalainan ginapauswag; huo, sila nga nagasulay sa Dios ginahilway pa gani.

16 Dayon sila nga nagakahadlok sa Ginuo naghinambalanay sing masami sa isa kag isa, kag ang Ginuo nagdungog kag nagpamati; kag isa ka libro sang handumanan ang ginsulat sa iya atubang para sa ila nga nagakahadlok sa Ginuo, kag nagadumdum sa iya ngalan.

17 Kag mangin akon sila, siling sang Ginuo sang mga Kasoldadohan, sa sina nga adlaw kon maghimo ako sang akon mga hiyas; kag kaluoyan ko sila pareho sang tawo nga nagakaluoy sa iya kaugalingon nga anak nga nagaalagad sa iya.

18 Dayon magabalik kamo kag mahibaloan ang kinalain sang matarong sa malain, ang kinalain sa iya nga nagaalagad sa Dios kag sa iya nga wala nagaalagad sa iya.