1 Kag natabo ini nga samtang ang mga disipulo ni Jesus nagapanglakaton kag nagawali sang mga butang nga ila pareho nga nabatian kag nakita, kag nagapangbunyag sa ngalan ni Jesus, natabo ini nga ang mga disipulo nagtililipon kag nagkaisa sa hugot nga pagpangamuyo kag pagpuasa.

2 Kag si Jesus nagpakita liwat sang iya kaugalingon sa ila kay nagapangamuyo sila sa Amay sa iya ngalan; kag si Jesus nag-abot kag nagtindog sa tunga nila, kag nagsiling sa ila: Ano bala ang inyo luyag nga ihatag ko sa inyo?

3 Kag nagsiling sila sa iya: Ginuo, luyag namon nga sugiran mo kami sang ngalan nga itawag namon sa sini nga simbahan; kay may mga pagbinaisay sa tunga sang katawhan parte sini nga bagay.

4 Kag ang Ginuo nagsiling sa ila: Sa pagkamatuod, sa pagkamatuod, ginasiling ko sa inyo, ngaa bala magkinumod ang katawhan kag magbinaisay tungod sini nga butang?

5 Wala bala sila nakabasa sang balaan nga mga kasulatan nga nagasiling nga kinahanglan gid nga dal-on ninyo ang ngalan ni Cristo nga amo ang akon ngalan? Kay paagi sa sini nga ngalan pagatawgon kamo sa katapusan nga adlaw;

6 Kag kon sin-o man ang nagadala sa iya kaugalingon sang akon ngalan, kag magapadayon tubtob sa katapusan, ang amo man maluwas sa katapusan nga adlaw.

7 Gani, ang bisan ano nga inyo himuon, himuon ninyo ini sa akon ngalan; gani tawgon ninyo ang simbahan sa akon ngalan; kag magapanawag kamo sa Amay sa akon ngalan agud pakamaayohon niya ang simbahan tungod sa akon.

8 Kag paano ini nga mangin akon simbahan luwas lang nga pagatawgon ini sa akon ngalan? Kay kon ang simbahan ginatawag sa ngalan ni Moises gani simbahan ini ni Moises; kag kon ginatawag ini sa ngalan sing isa ka tawo gani simbahan ini sing isa ka tawo; apang kon ginatawag ini sa akon ngalan gani akon ini simbahan kon napasad ang mga ini sa akon ebanghelyo.

9 Sa pagkamatuod ginasiling ko sa inyo, nga napasad kamo sa akon ebanghelyo; gani pagatawgon ninyo ang bisan ano nga butang nga inyo tawgon sa akon ngalan; gani kon nagapanawag kamo sa Amay, para sa simbahan, kon ini sa akon ngalan pamatian kamo sang Amay;

10 Kag kon ang simbahan napasad sa akon ebanghelyo gani ipakita sang Amay ang iya kaugalingon nga mga buhat sa sini.

11 Apang kon wala ini napasad sa akon ebanghelyo, kag napasad sa mga buhat sang tawo, ukon sa mga buhat sang yawa, sa pagkamatuod ginasiling ko sa inyo, may kalipay sila sa ila mga buhat sa malip-ot nga panahon, kag dugay-dugay magaabot ang katapusan, kag sikwayon sila kag idap-ong sa kalayo, nga halin didto indi na makabalik pa.

12 Kay ang ila mga binuhatan nagasunod sa ila kay tungod ini sa ila mga binuhatan nga ginsikway sila; gani dumduma ang mga butang nga ginsugid ko sa inyo.

13 Tan-awa ginhatag ko sa inyo ang akon ebanghelyo, kag amo ini ang ebanghelyo nga ginhatag ko sa inyo—nga nagkari ako sa kalibutan agud tumanon ang kabubut-on sang akon Amay tungod ginpadala ako sang akon Amay.

14 Kag ginpadala ako sang akon Amay agud ilansang ako sa krus; kag pagkatapos nga nalansang ako sa krus, agud madala ko ang tanan nga tawo palapit sa akon, agud pareho nga ginbayaw ako sang mga tawo sa amo man nga ang mga tawo pagabayawon sang Amay, agud magtindog sa akon atubang, agud hukman ang ila mga binuhatan, kon ang mga ini maayo ukon ang mga ini malain—

15 Kag sa amo nga kabangdanan ako ginlansang sa krus; gani, paagi sa gahum sang Amay dal-on ko ang tanan nga tawo palapit sa akon agud mahukman sila suno sa ila mga binuhatan.

16 Kag matabo ini nga kon sin-o man ang maghinulsol kag mabunyagan sa akon ngalan pagapun-on; kag kon magpadayon sia tubtob sa katapusan, tan-awa, kabigon ko sia nga wala’y sala sa atubang sang akon Amay sa sina nga adlaw kon magtindog ako agud hukman ang kalibutan.

17 Kag sia nga indi magpadayon tubtob sa katapusan, sia ang amo man nga pagasikwayon kag idap-ong sa kalayo, nga halin didto indi na sila makabalik pa, tungod sang hustisya sang Amay.

18 Kag amo ini ang pulong nga iya ginhatag sa mga mga anak sang katawhan. Kag sa sini nga kabangdanan ginatuman niya ang mga pulong nga iya ginhatag, kag wala sia nagabutig, kundi ginatuman ang tanan niya nga pulong.

19 Kag wala sing mahigko nga butang nga makasulod sa iya ginharian; gani wala sing bisan ano nga makasulod sa iya palahuwayan luwas lang sa inang mga nakapanghugas sang ila mga biste sa akon dugo, tungod sang ila pagtuo, kag sang paghinulsol sang tanan nila nga sala, kag sang ila katampad tubtob sa katapusan.

20 Karon ini ang kasugoan: Maghinulsol, tanan kamo nga yara sa mga punta sang kalibutan, kag magpalapit sa akon kag magpabunyag sa akon ngalan, agud mapakabalaan kamo paagi sa pagbaton sang Balaan nga Espiritu, agud makatindog kamo nga wala’y mantsa sa akon atubang sa katapusan nga adlaw.

21 Sa pagkamatuod, sa pagkamatuod, ginasiling ko sa inyo, amo ini ang akon ebanghelyo; kag nakahibalo kamo sang mga butang nga kinahanglan gid ninyo nga himuon sa akon simbahan; kay ang mga buhat nga nakita ninyo nga ginahimo ko, ina amo man ang himuon ninyo; kay inang nakita ninyo nga ginahimo ko, bisan ina man ang himuon ninyo;

22 Gani, kon himuon ninyo ining mga butang bulahan kamo kay pagabayawon kamo sa katapusan nga adlaw.

23 Isulat ang mga butang nga inyo nakita kag nabatian luwas lang sinang mga ginadilian.

24 Isulat ang mga buluhaton sining katawhan sa palaabuton, bisan pareho sang mga nasulat na parte sinang mga mga nahimo na sang nagligad.

25 Kay tan-awa, halin sa mga libro nga nasulat na, kag mga pagasulaton pa, ining katawhan pagahukman, kay paagi sa mga ini ang ila mga binuhatan mahibal-an sang mga tawo.

26 Kag tan-awa, ang tanan nga butang ginapasulat sang Amay; gani halin sa mga libro nga pagasulaton ang kalibutan pagahukman.

27 Kag nakahibalo kamo nga mangin mga hukom kamo sining katawhan suno sa paghukom nga ihatag ko sa inyo nga mangin makatarongan. Gani, ano nga klase sang mga tawo kamo mangin dapat? Sa pagkamatuod ginasiling ko sa inyo, bisan pareho sa akon.

28 Kag karon makadto ako sa Amay. Kag sa pagkamatuod ginasiling ko sa inyo, kon ano man ang inyo pangayuon sa Amay sa akon ngalan ihatag ini sa inyo.

29 Gani, magpangayo, kag magabaton kamo; magpanuktok, kag pagabuksan ini sa inyo; kay sia nga nagapangayo, magabaton; kag sa iya nga nagapanuktok, pagabuksan ini.

30 Kag karon, tan-awa, dako ang akon kalipay, bisan pa tubtob sa pagkalubos, tungod sa inyo, kag pati man sining henerasyon; huo, kag bisan ang Amay nagakasadya, kag pati man ang tanan nga balaan nga mga anghel, tungod sa inyo kag sa sining henerasyon; kay wala sing isa sa ila nga nadula.

31 Tan-awa, luyag ko nga mahangpan ninyo; kay ang buot ko silingon sila nga buhi subong sa sining henerasyon; kag wala sing isa sa ila nga nadula; kag sa ila nalubos ang akon kalipay.

32 Apang tan-awa, nagakasubo ako tungod sang ika-apat nga henerasyon halin sa sining henerasyon, kay ginadala sila sa pagkabihag niya nga bisan pareho sa anak sang kalaglagan; kay ibaligya nila ako kabaylo sang pilak kag bulawan, kag sa sinang maut-ot sang mga sipit kag sa sinang mabungkal kag makawat sang mga makawat. Kag sa sina nga adlaw pagabisitahan ko sila, bisan sa pagbalik sang ila mga binuhatan sa ila kaugalingon nga mga ulo.

33 Kag natabo ini nga sang nakatapos si Jesus sining mga ginpanudlo nagsiling sia sa iya mga disipulo: Magsulod kamo sa mapiot nga ganhaan; kay mapiot ang ganhaan, kag makitid ang dalan nga nagapadulong sa kabuhi, kag diutay lang ang mga nakatultol sini; apang masangkad ang ganhaan, kag malapad ang dalan nga nagapadulong sa kamatayon, kag madamo ang mga nagaagi diri, tubtob nga mag-abot ang gab-i, nga kon san-o wala na sing tawo nga makapangabudlay.