1 Kag karon natabo ini nga suno sa amon kasulatan, kag nakahibalo kami nga ang amon kasulatan matuod, kay tan-awa, isa ka matarong nga tawo ang nagtipig sang kasulatan—kay matuod gid nga naghimo sia sang madamo nga milagro sa ngalan ni Jesus; kag wala sing bisan sin-o nga tawo nga makahimo sang milagro sa ngalan ni Jesus luwas lang kon natinloan sia sa tagsa ka tinipik sang iya kalainan—

2 Kag karon natabo ini, kon wala sing sayop nga nahimo ini nga tawo sa pag-isip sang amon tion, ang ika-treinta’y tres nga tuig nagligad na;

3 Kag ang katawhan nagsugod sa pagbantay sing may tuman nga kaseryoso sa tanda nga ginhatag sang propeta nga si Samuel, ang Lamanhon, huo, sa tion nga mangin may kadulom sa sulod sang tatlo ka adlaw sa ibabaw sang kadutaan.

4 Kag nagsugod nga may dako nga mga pagpangduhaduha kag pagbinaisay sa tunga sang katawhan, sa pihak sang sa pagkadamo nga tanda nga ginhatag.

5 Kag natabo ini, sa ika-treinta’y kwatro nga tuig, sa una nga bulan, sa ika-apat nga adlaw sang bulan, may nagtuhaw nga dako nga bagyo nga wala pa gid naagihan halin sadto sa bug-os nga kadutaan.

6 Kag may isa man ka dako kag makakululba nga unos; kag may makakululba nga daguob, sa bagay nga gin-uyog sini ang bug-os nga duta nga daw nagahana na ini nga magkalapihak.

7 Kag may tuman katalom nga mga pangilat nga wala pa gid nakita halin sadto sa bug-os nga kadutaan.

8 Kag ang siyudad sang Zarahemla nagsugod sa pagkalayo.

9 Kag ang siyudad sang Moroni naglugdang sa kaidadalman sang dagat, kag ang mga pumuluyo sini nagkalalumos.

10 Kag gintabunan sang duta ang siyudad sang Moronias, nga sa lugar sang siyudad nangin may isa ka dako nga bukid.

11 Kag may dako kag makakululba nga kalaglagan sa kadutaan pa-sur.

12 Apang tan-awa, may mas dako pa gid kag makakululba nga kalaglagan sa duta pa-norte; kay tan-awa, ang bug-os nga ibabaw sang kadutaan nagbag-o, tungod sang unos kag sang mga buhawi, kag sang mga panaguob kag sang mga pangilat, kag sang tuman kabaskog nga pagkurog sang bug-os nga duta;

13 Kag ang mayor nga mga dalanon nagkalaguba, kag ang patag nga mga alagyan nagkalawasak, kag madamo nga matapan nga mga lugar ang nagkudol-kudol.

14 Kag madamo nga dalagko kag bantug nga mga siyudad ang nagkalalugdang, kag madamo ang nagkalasunog, kag madamo ang nag-uloyog tubtob nga ang mga bilding sini nagkalarumpag sa duta, kag ang mga pumuluyo sini nagkalamatay, kag ang mga lugar napabay-an nga mamingaw.

15 Kag may pila ka mga siyudad nga nagkalabilin; apang ang mga kahalitan sini tuman kadalagko, kag may madamo sa mga ini nga nagkalamatay.

16 Kag may pila nga ginhakop palayo sang buhawi; kag kon diin sila naglab-ot wala sing tawo nga nakahibalo, luwas lang nga nahibal-an lang nila nga ginpanghakop sila palayo.

17 Kag gani ang ibabaw sang bug-os nga duta naliwat tungod sang mga unos, kag sang mga panaguob, kag sang mga pangilat, kag sang pagkurog sang duta.

18 Kag tan-awa, ang mga bato nagkalapihak; nagkalabuka ang mga ini sa ibabaw sang bug-os nga duta, sa bagay nga makita nga may buka nga mga tinipik, kag may mga tinabuan kag may mga litik sa tanan nga ibabaw sang kadutaan.

19 Kag natabo ini nga sang nag-untat ang mga panaguob, kag ang mga pangilat, kag ang bagyo, kag ang unos, kag ang mga pagkurog sang duta—kay tan-awa, naglawig ang mga ini sa sulod sang mga tatlo ka oras; kag ginasiling sang pila nga ang tion mas malawig; apang, ang tanan sining dako kag makakululba nga mga butang nahimo sa sulod sang mga tatlo ka oras—kag dayon tan-awa, may kadulom sa ibabaw sang kadutaan.

20 Kag natabo ini nga may tuman nga kadudulman sa tanan nga ibabaw sang kadutaan, sa bagay nga ang mga pumuluyo sini nga wala nagkalamatay makabatyag sang usbong sang kadudulman;

21 Kag wala gid sing kasanag tungod sang kadulom, kag wala man mga kandila, kag wala man mga sulo; kag wala man sing kalayo nga madabokan paagi sa ila maayo kag tama kalaya nga kahoy, sa bagay nga wala gid sing bisan ano man nga kasanag;

22 Kag wala gid sing nakita nga kasanag, kag wala man sing kalayo, ukon igpat, kag wala man sing adlaw, ukon bulan, ukon mga bituon, kay sa pagkadako sang mga panganod sang kadudulman nga yara sa ibabaw sang kadutaan.

23 Kag natabo ini nga naglawig ini sa sulod sang tatlo ka adlaw nga wala sing kasanag nga makita; kag may dako nga pagkalisud kag pagtangis kag paghinibi sang tanan nga katawhan sing dalayon; huo, dako ang mga pag-inugayong sang katawhan, tungod sang kadudulman kag sang dako nga kalaglagan nga nag-abot sa ila.

24 Kag sa isa ka lugar nabatian sila nga nagasinggit nga nagasiling: O kon nakahinulsol lamang kami antes sining dako kag makakululba nga adlaw, kag naluwas kuntani ang amon mga kauturan, kag wala kuntani sila nasunog sa sinang dako nga siyudad sang Zarahemla.

25 Kag sa isa pa ka lugar nabatian sila nga nagsinggit kag nagakalisud nga nagasiling: O kon nakahinulsol lamang kami antes sining dako kag makakululba nga adlaw, kag wala ginpamatay kag ginpangbato ang mga propeta, kag ginpanabog sila; gani ang amon mga iloy kag ang amon maanyag nga mga anak nga babayi, kag ang amon mga kabataan naluwas kuntani, kag wala matabuni sa sinang dako nga siyudad sang Moronias. Kag gani ang mga pagtangis sang katawhan dako kag tuman kagrabe.