1 Kag natabo ini nga may tingug nga nabatian sang tanan nga pumuluyo sang duta, sa tanan nga ibabaw sining kadutaan nga nagasinggit:

2 Kalisud, kalisud, kalisud sa sining katawhan; kalisud sa mga pumuluyo sang bug-os nga duta luwas lang kon maghinulsol sila; kay ang yawa nagakadlaw, kag ang iya mga anghel nagakasadya, tungod sang nagkalamatay nga maanyag nga mga anak nga lalaki kag mga anak nga babayi sang akon katawhan; kag ini tungod sang ila kalainan kag mga kangil-aran nga nagkalamatay sila!

3 Tan-awa, inang dako nga siyudad sang Zarahemla ginsunog ko sa kalayo, kag ang mga pumuluyo sini.

4 Kag tan-awa, inang dako nga siyudad sang Moroni ginpahanabo ko nga maglugdang sa kaidadalman sang dagat, kag ang mga pumuluyo sini nga magkalalumos.

5 Kag tan-awa, inang dako nga siyudad sang Moronias gintabunan ko sang duta, kag ang mga pumuluyo sini, agud taguon ang ila mga kalainan kag ila mga kangil-aran halin sa akon atubang, agud ang dugo sang mga propeta kag sang mga santos indi na maglab-ot pa sa akon batok sa ila.

6 Kag tan-awa, ang siyudad sang Gilgal ginpahanabo ko nga maglugdang, kag ang mga pumuluyo sini nga malubong sa kaidadalman sang duta;

7 Huo, kag ang siyudad sang Onias kag ang mga pumuluyo sini, kag ang siyudad sang Mocum kag ang mga pumuluyo sini, kag ang siyudad sang Jerusalem kag ang mga pumuluyo sini; kag ang mga tubig ginpahanabo ko nga magsaka sa lugar sang mga ini, agud taguon ang ila kalainan kag mga kangil-aran halin sa akon atubang, agud ang dugo sang mga propeta kag sang mga santos indi na maglab-ot pa sa akon batok sa ila.

8 Kag tan-awa, ang siyudad sang Gadiandi, kag ang siyudad sang Gadiomnas, kag ang siyudad sang Jacob, kag and siyudad sang Gimgimno, ini tanan ginpahanabo ko nga maglugdang, kag naghimo sang mga bungyod kag mga patag sa mga lugar sini; kag ang mga pumuluyo sini ginlubong ko sa kaidadalman sang duta, agud taguon ang ila kalainan kag mga kangil-aran halin sa akon atubang, agud ang dugo sang mga propeta kag mga santos indi na maglab-ot pa sa akon batok sa ila.

9 Kag tan-awa, inang dako nga siyudad sang Jacobugat, nga ginapuy-an sang katawhan ni haring Jacob, ginpahanabo ko nga masunog sa kalayo tungod sang ila mga sala kag sang ila kalainan, nga labaw pa sa tanan nga kalainan sang bug-os nga duta, tungod sang ila sekreto nga mga pagpamatay kag mga pagkunsabo; kay sila ang nagguba sang paghidaet sang akon katawhan kag sang gobyerno sang kadutaan; gani ginpahanabo ko nga masunog sila, agud laglagon sila halin sa akon atubang, agud ang dugo sang mga propeta kag sang mga santos indi na maglab-ot pa sa akon batok sa ila.

10 Kag tan-awa, ang siyudad sang Laman, kag ang siyudad sang Jos, kag ang siyudad sang Gad, kag ang siyudad sang Kiskumen, ginpahanabo ko nga masunog sa kalayo, kag ang mga pumuluyo sini, tungod sang ila kalainan sa pagpanabog sang mga propeta, kag sa pagbato sadtong akon ginpadala agud magpahayag sa ila parte sa ila kalainan kag sa ila mga kangil-aran.

11 Kag tungod ginpanabog nila sila tanan, nga wala na sing matarong sa ila, nagpadala ako sang kalayo kag ginlaglag sila, agud ang ila kalainan kag mga kangil-aran matago halin sa akon atubang, agud ang dugo sang mga propeta kag sang mga santos nga akon ginpadala sa ila indi na magsinggit sa akon halin sa duta batok sa ila.

12 Kag madamo nga dalagko nga mga kalaglagan ang ginpahanabo ko nga magtupa sa sini nga kadutaan, kag sa sining katawhan tungod sang ila kalainan kag sang ila mga kangil-aran.

13 O tanan kamo nga naluwas tungod mas matarong kamo sangsa ila, indi bala kamo subong magbalik sa akon, kag maghinulsol sang inyo mga sala, kag mahaylo agud nga mapaayo ko kamo?

14 Huo, sa pagkamatuod ginasiling ko sa inyo, kon magpalapit kamo sa akon makaangkon kamo sang kabuhi nga wala’y katapusan. Tan-awa, ang akon butkon sang kaluoy nauntay sa inyo, kag kon sin-o man ang magpalapit, sia akon pagabatonon; kag bulahan inang mga magpalapit sa akon.

15 Tan-awa, ako si Jesucristo nga Anak sang Dios. Gintuga ko ang mga langit kag ang duta, kag ang tanan nga butang nga yara sa mga ini. Kaupod ako sang Amay halin sa ginsuguran. Ako yara sa Amay, kag ang Amay sa akon; kag sa akon ginhimaya sang Amay ang iya ngalan.

16 Nagkari ako sa akon kaugalingon nga natawhan, kag ang akon kaugalingon nga katawhan wala nagbaton sa akon. Kag ang balaan nga mga kasulatan parte sa akon pagkari natuman na.

17 Kag ang tanan nga nagbaton sa akon, sa ila ginhatag ko nga mangin mga anak sang Dios; kag sa amo man ihatag ko sa tanan nga magpati sa akon ngalan, kay tan-awa, paagi sa akon ang pagtubos magaabot, kag sa akon ang layi ni Moises natuman na.

18 Ako ang kasanag kag ang kabuhi sang kalibutan. Ako ang Alfa kag ang Omega, ang ginsuguran kag ang katapusan.

19 Kag indi na kamo maghalad sa akon sang pagpaagay sang dugo; huo, ang inyo mga halad kag inyo mga halad-nga-sinunog pagadulaon na kay wala na ako sing batonon pa sang inyo mga halad kag sang inyo mga halad-nga-sinunog.

20 Kag magahatag kamo bilang halad sa akon sing isa ka masinulub-on nga tagipusuon kag mahinulsulon nga espiritu. Kag kon sin-o man ang magpalapit sa akon nga may masinulub-on nga tagipusuon kag mahinulsulon nga espiritu, sia pagabunyagan ko sa kalayo kag sa Balaan nga Espiritu, bisan pareho sang mga Lamanhon, nga tungod sang ila pagtuo sa akon sa tion sang ila pagkahaylo, ginbunyagan sa kalayo kag sa Balaan nga Espiritu, kag wala nila mahibal-i ini.

21 Tan-awa, nagkari ako sa kalibutan agud magdala sang pagtubos sa kalibutan, agud luwason ang kalibutan halin sa sala.

22 Gani, kon sin-o man ang maghinulsol kag magpalapit sa akon pareho sang diutay nga bata, sia akon pagabatonon, kay ang ginharian sang Dios ila sang mga kaangay nila. Tan-awa, para sa ila ginhatag ko ang akon kabuhi, kag nabaton ko ini liwat; gani maghinulsol, kag magpalapit sa akon kamo nga yara sa mga punta sang kalibutan, kag maluwas.