1 Ngkai e a koro bukina bwa Aramwa e a waaki n taekina ana taeka te Atua nakoia aomata, te moan tai n te aba are Taraemera, ao ma ikanne ni kabuta te aba.

2 Ao aikai taeka ake e taekin nakoia aomata n te ekaretia are e kateaki n te kaawa are Taraemera, ni kaineti ma oin ana rongorongo, ni kangai:

3 Ngai, Aramwa I a tia ni katabuaki iroun tamau, Aramwa bwa te ibonga ae rietata iaon ana ekaretia te Atua, ngaia ae bon iai irouna te mwaaka ao te kariaiakaki mai iroun te Atua bwa e na karaoi bwaai aikai, nooria, I taku nakoimi bwa e waaki ni katea te ekaretia n te aba are e mena n tian te aba are Nibwaai; eng, te aba ae aranaki bwa aban Moomon; eng, ao e bon bwabetitoia tarina n te ran ae Moomon.

4 Ao nooria, I taku nakoimi, a bon kainaomataki mai nanoni baia ana aomata te uea are Noa, man ana nanoanga ao mwaakan te Atua.

5 Ao nooria, i mwin anne, a bon uotaki nakon te tautoronaki ni baia Reimwanaite i nanon te rereua; eng, I taetae nakoimi, a boni mena n te kabureaki, ao te Uea e a manga kainaomataia man te tautoronaki ni mwaakan ana taeka, ao ti a uotaki nakon te aba aio, ao ikai are ti a waaki ni katea ana ekaretia te Atua ni kabuta naba te aba aio.

6 Ao ngkai nooria, I taetae nakoimi, taari, ngkami aika kam kaaina te ekaretia aio, kam a tia ni kataua kawakinan uringan kabureakia tamami? Eng, ao kam a tia ni kataua kawakinan uringan ana nanoanga ma ana taotaonannano nakoia? Ao ai moaraara riki, kam a tia ni kataua kawakinan uringan are e a tia ni kainaomatai tamneia mai moone?

7 Nooria, e bita nanoia; eng, e kautia man te matuunako, ao a uti nakon te Atua. Nooria, a mena i nukan te roo; ma e ngae n anne, tamneia a bon kaotaaki n ootan te taeka ae aki totoki; eng, a bon otabwaniniaki n ana kabaebae te mate, ao taurekereken moone, ao te urubwai ae aki totoki e tataningaiia.

8 Ao ngkai I titirakiningkami, taari, a kamaunaki? Nooria, I taku nakoimi, Tiaki, a bon aki.

9 Ao I titiraki riki, a uruakaki ana kabaebae te mate, ao taurekereken moone are e otabwaninia, a kabwaranakoaki? I taku nakoimi, Eng, a kabwaranakoaki, ao a kimwareirei tamneia, ao a anenea kunan te tangira ni kabomwi. Ao I taku nakoimi bwa a kamaiuaki.

10 Ao ngkai I titirakiningkami bwa tera bukin are a kamaiuaki iai? Eng, Tera bukin are a kantaninga iai te kamaiuaki? Tera ae karika kainaomatakia man ana kabaebae te mate, eng, ao ana taurekereke naba moone?

11 Nooria, I kona n tuangingkami—e aki kakoauai taeka, tamau ae Aramwa ake a taekinaki mai wiin Abinataai? Ao tiaki ngaia te burabeti ae tabu? E aki taekin ana taeka te Atua, ao tamau ae Aramwa e kakoauai?

12 Ao ni kaineti ma ana onimaki bon iai te bitaki ae korakora ae riki i nanona, Nooria I taku nakoimi bwa a boni koaua aikai ni kabane.

13 Ao nooria, e tataekina te taeka nakoia tamami, ao te bitaki ae korakora e riki naba inanoia, ao a kananorinanoia ma ni katuka aia onimaki iroun te Atua ae koaua ma ni maiu. Ao nooria, a kakaonimaki niua te toki; mangaia are a kamaiuaki.

14 Ao ngkai nooria, I titirakiningkami, tariu n te ekaretia, kam a tia ni bungiaki n te tamnei mai iroun te Atua? Kam a tia ni karekea tein tarakina i moami? Kam a tia n rinanon te bitaki ae korakora aio inanomi?

15 Kam kamwakura ami onimaki n te kaboaki iroun are e karikingkami? Kam taratara ma te kantaninga ma te mata n onimaki, ma n nooria n ami iango te rabwata aio ae maamate ae kateirakeaki nakon te aki maamate, ao te mka aio e kateirakeaki nakon te aki mka, bwa e na tei imatan te Atua bwa e na motikaki taekana ni kaineti ma mwakuri ake a tia ni karaoaki n te rabwata ae maamate.

16 I taku nakoimi, kam kona n iangoia i bon iroumi bwa kam ongo bwanan te Uea ae taku nakoimi, n te bong arei: Nakomai ngkami aika kam kakabwaiaki, bwa nooria, ami mwakuri boni mwakuri aika a raoiroi iaon te aba?

17 Ke kam iango iroumi bwa kam kona ni kewe nakon te Uea n te bong arei, ma n taku—Te Uea, ara mwakuri bon mwakuri aika a raraoi iaon te aba—ao bwa e na kamaiungkami?

18 Ke tao teuana, kam kona n iangoingkami bwa kam uotaki nako matan ana tarabunare te Atua ma tamneimi ae onrake n te namakin ae buakaka ibukin ami bure ao te nanokawaki, eng, uringakin ami buakaka ni kabane, eng, te ururing ae kamenai ngkami ni kaitara ana tua te Atua?

19 I taku nakoimi, kam kona n tararake nakon te Atua n te bong arei ma te nano ae e itiaki ao baimi aika a itiaki? I taku nakoimi, kam kona n tararake, ma katotongan te Atua ae toka iaon moami?

20 I taku nakoimi, kam kona n iangoia bwa kam na kamaiuaki ngkana kam a tia n anga ngkami bwa ana aomata te riaboro?

21 I taku nakoimi, kam na ataia bwa n te bong arei kam aki kona ni kamaiuaki; bwa akea te aomata ae e kona ni kamaiuaki ma ti ngkana a tebokaki ni kamainainaaki ana kunnikai, eng a riai ni kaitiakaki ana kunnikai ni karokoa ae a itiaki raoi man te memea ni kabane, rinanon raraan teuare e a tia n taekinaki irouia ara bakatibu, bwa e na roko ni kabooia ana aomata man aia bure.

22 Ao ngkai I titirakiningkami, taari, teraa ami namakin, ngkana kam tei imatan ana tabo ni motikitaeka te Atua, ma kunnikaimi aika a memea n te raraa ma aekakin kammaira nako? Nooria teraa ae a na kaota koauana bwaai aikai ni kaaitarako?

23 Nooria tiaki bwa a na tataekina te koaua are ngkami taan tiritiri, eng, ao bwa kam namakina ae kam bure n aekan bure nako?

24 Nooria, tariu, kam taku i nanomi bwa iai te aekaki n aomata aei ae e kona n iai ana tabo n tekateka n uean te Atua, ma Aberaam, ma Itaaka, ao Iakobwa, ma burabeti aika a tabu ni kabane, aika itiaki aia kunikai ma n akea memeaia teutana, a itiaki ao a mainaina?

25 I taku nakoimi, Tiaki; ti ngkana kam karaoa ara Tia Karikibwai bwa te tia kewe mai moana, ke kam taku inanomi bwa te tia kewe mai moana, kam aki kona n taku inanomi bwa e na reke nneia aekaki aikai n abanuean karawa; ma ana teweaki nako bwa ngaia natin abanuean te riaboro.

26 Ao ngkai nooria, I taku nakoimi, tariu, ngkana kam a tia n rinanon te bitaki n nano, ao ngkana kam a tia n namakina te kan anenea kunan te tangira ni kabomwi, I kan titirakiningkami, kam kona n namakinna ngkai?

27 Kam a tia n nakonako, ni kawakiningkami bwa kam na aki reke n te bure imatan te Atua? Kam kona n taekinna, ngkana kam a weteaki nakon te mate n te tai aio, inanomi, bwa kam a tia n nanorinano n ae tau? Bwa ami kunnikai a tia ni kaitiakaki ma ni kamainainaki rinanon raraan Kristo, are e na roko ni kabooia ana aomata man aia bure?

28 Nooria, e a tia n nako te kainikatonga mai iroumi? I taku nakoimi, ngkana e tuai ao kam tuai n tauraoi ni kaitibo ma te Atua. Nooria kam na katauraoi n te tai ae waekoa; bwa abanuean karawa e a kan roko, ao te aomata ae aekakin aei e aki reke irouna te maiu ae akea tokina.

29 Nooria, I taku, iai temanna i buakomi ae e aki nako te bakantang mai irouna? I taku nakoimi bwa te aomata ae aekakin aei e aki tauraoi, ao I kariaa bwa e na katauraoia n te tai ae e waekoa, bwa e a kaan te aoa, ao e aki ataia bwa e na roko n ningai te tai; bwa te aekaki n aomata aei e aki kuneaki bwa akea ana bure.

30 Ao I taku riki nakoimi, iai temanna mai buakomi ae e waningarea tarina, ke ae e kauataoi i aona bwainikirinana?

31 Ke e reke kain te aomata ae te aekaki aei, bwa e aki tauraoi, ao e a kaan te tai bwa e na riai n rairananona bwa e rawa n aki kamaiuaki!

32 Eng, ke e reke kaia naba ni kabane taan mwakuria te buakaka, rairinanomi, rairinanomi, bwa e a tia n taekinna te Uea ae te Atua!

33 Nooria, e kanakoa te kakao nakoia aomata, bwa te bai n nanoanga e aroraki nakoia, ao e taku: Rairinanomi, ao N na butimwaeingkami.

34 Eng, e taku: nakomai nakoiu ao kam na kana uaan te kai ni kamaiu; eng, kam na kanna ma ni mooi n te kariki ao n te ran ni kamaiu n akea tukami.

35 Eng, nakomai nakoiu ao waakini mwakuri aika a raraoi, ao kam na aki koreaki ma n teweaki nako nanon te ai—

36 Bwa nooria, e a kaan te tai are ane e kariki uaa aika aki raraoi, ke ane e karaoi mwakuri aika tiaki mwakuri aika a raraoi, e riai bwa e na tang n takarua ma n nanokawaki.

37 O taan mwakuria te buakaka, ngkami aika kam onrake ni bwain te aonaba ae akea bonganaia, ngkami aika kam taekinna bwa kam ataa kawain te raoiroi ma e ngae n anne kam a tia ni bua, n aroia tiibu aika akea aia tia kaawakin tiibu, e ngae ngke te tia kaawakin tiibu e wewetei ngkami ao e bon waaki naba ni wewetei ngkami, ma kam aki ongo ni bwanaana.

38 Nooria, I taku nakoim, bwa te tia kaawakin tiibu ae raoiroi e bon weteingkami; eng, ao n oin arana e bon weteingkami, are bon te ara ae Kristo; ao ngkana kam aki ongo nakon bwanan te tia kawakin tiibu ae e raoiroi, nakon te ara are kam weteaki iai, nooria, ngkami tiaki ana tiibu te tia kaawakin tiibu ae e raoiroi.

39 Ao ngkai ngkana tiaki ngkami ana tiibu te tia kaawakin tiibu ae raoiroi, kaain te nanai ra ngkami? Nooria, I taku nakoimi, bwa te riaboro ami tia kaawakin tiibu, ao ngkami kaain ana nanai; ao ngkai, antai ae kona ni kakewea aei? Nooria, I taku nakoimi, ane e kakewea aio bon te tia kewe ao natin te riaboro.

40 Bwa I taku nakoimi bwa te bwai ae raoiroi e roko mai iroun te Atua, ao te bwai ae buakaka e roko mai iroun te riaboro.

41 Mangaia ae, ngkana te aomata e karaoi mwakuri aika a raraoi e ongo nakon bwanan te tia kaawakin tiibu ae raoiroi, ao e bon iriria, ma te aomata ae karaoi mwakuri aika a bubuaka, te aomata anne e bon riki bwa natin te riaboro, bwa e ongo nakon bwanaana, ao e iriria.

42 Ao anne e karaoa aio e riai ni karekea boona mai irouna, mangaia are, ibukin boona e karekea te mate, ao ni kaineti ma bwaai nakon te raraoi, te mate nakon mwakuri aika a raraoi.

43 Ao ngkai, taari, I tangiringkami bwa kam na ongo irou, bwa I taetae ma korakoran nanou; bwa nooria, I a tia n taetae nakoimi n te aro ae maataata bwa kam aonga n aki kairua, ke I a tia n taetae ni kaineti ma ana tua te Atua.

44 Bwa I a tia ni weteaki bwa N na taetae n te aro aei, ni kaineti ma ana botaki ae tabu te Atua, are e mena iroun Kristo Iesu; eng, I anganaki te tua bwa N na tei ma ni kaotiota koauaia nakoia aomata aikai bwaai ake a tia n taekinaki irouia ara bakatibu ni kaineti ma bwaai aika a na roko.

45 Ao tiaki ti aio. Kam aki taku bwa I atai bwaai aikai I bon irou? Nooria, I kaotiota te koaua nakoimi bwa I bon atai bwaai aikai are I taekini bwa a koaua. Ao kam kanga n taku bwa I atai koauaia?

46 Nooria, I taku nakoimi bwa a kaotaki koauaia nakoiu iroun Tamnein te Atua ae Tabu. Nooria, I a tia n aki mamatam ao n tataro i nanon boong aika a mwaiti bwa I aonga n atai bwaai aikai I bon irou. Ao ngkai I bon atai irou bwa a koaua; bwa te Uea ae te Atua e a tia ni kaoti nakoiu iroun Tamneina ae Tabu; ao aio tamnein te kaotioti are e mena inanou.

47 Ao i rarikin anne, I taku nakoimi bwa e a bon tia ni kaotaki nakoiu, bwa taian taeka ake a tia n taekinaki irouia ara bakatibu a bon koaua, ao anne are bon man tamnein te taetae ni burabeti are e mena irou, are bon mai iroun naba te kaotioti iroun Tamnein te Atua.

48 I taku nakoimi, bwa I ataia I bon irou bwa te bwai are N na taekin nakoimi, are kaineti ma te bwai are e na roko, e boni koaua; ao I taku nakoimi, bwa I ataia bwa Iesu Kristo e na roko, eng, te Nati, ae te Rikitemanna iroun te Tama, ae e onrake n te akoi ao te nanoanga, ao te koaua. Ao nooria, bon ngaia are e na roko n anaa buren te aonaba, eng, aia bure aomata ni kabane ake a teimatoa ni kakoaua arana.

49 Ao ngkai I taku nakoimi bwa aio te karinan are I a tia ni weteaki iai, eng, bwa N na reirei nakoia tariu aika a tangiraki, eng ao nakoia ni kabane ake a maeka n te aba; eng, bwa N na reirei nakoia ni kabane, ake a kara ao ake a uarereke, ake a kabaeaki ao ake a inaomata, eng, I taetae nakoimi kaara, ao nakoia rorobuaka, ao nakon te roro ae tabe n rikirake, eng n tang nakoia bwa a riai n rairinanoia ao ni manga bungiaki kaua.

50 Eng, e taku te Tamnei: Rairinanomi, ngkami kaain tabon te aonaba ni kabane, bwa e a kaan roko uean karawa; eng, Natin te Atua e na roko ma mimitongina, korakorana, mwaakana, ao ueana. Eng, tariu aika kam tangiraki, I taku nakoimi, bwa te Tamnei e taku: Noora mimitongin Uean te aonaba ni kabane; ao Uean karawa naba e na bon waekoa n oota nako i buakoia natiia aomata ni kabane.

51 Ao e taku naba te Tamnei nakoiu, eng, n tang nakoiu ma te bwanaa ae korakora n taku: Waaki nako ao tuangiia aomata—Rairinanomi, bwa ti ngkana kam rairinanomi ao a na bon akea te anga ae kam na kona iai ni karekea abanuean karawa.

52 Ao I taku nakoimi riki, e taku te Tamnei: Nooria, e kaweneaki te tanai i wakaan te kai; mangaia ae kaai ni kabane ake aki kariki uaa aika a raoiroi a na bon ereaki man teweaki nako i nanon te ai, eng, te ai ae aki kona ni kamateaki, te ai ae aki kona n tiringaki. Nooria, ao uringnga, bwa e a tia Teuare e Tabu n taekinna.

53 Ao ngkai tariu aika kam tangiraki, I taetae nakoimi, kam kona n totokoi taeka aikai; eng, kam kona n aki tabeakini bwaai aikai, ma n toubeka Teuare e Tabu i aan waemi, eng, e kona n ae e a rang onrake nanomi n te kainikatonga; eng, kam na kona n teimatoa ni bwain kunnikai aika a bobuaka ma ni katikui nanomi iaon bwain te aonaba ae akea bonganaia, iaon kaubwaimi?

54 Eng, kam na teimatoa n taku bwa kam raoiroi riki nakoia tabemwaang, eng, kam na teimatoa ni waaki ni bwainikirinia tarimi, ake a kananorinanoia man nakonako ni kawain ana botaki ae tabu te Atua, are ngaia are a uotaki nako nanon te ekaretia n tia ni kaitiakaki iroun te Tamnei ae Tabu, ao a karaoi mwakuri aika a riai ibukin te rairannano—

55 Eng, ao kam na teimatoa ni katannakoia Taan Mamata mai irouia aika a raarikin ma ni kainnano, ao ma n rawa n anga ami bwai nakoia?

56 Ao te kabane, ngkami ni kabane aika kam teimatoa i nanon ami buakaka, I taku nakoimi bwa bon naakai aika a na ereaki ni kabwakaki ma n teweaki nako nanon te ai ti ngkana a waekoa n rairinanoia.

57 Ao ngkai I taku nakoimi, ngkami ni kabane ake iai nanoia n ira bwanaan te tia kaawakin tiibu ae raoiroi, otinako man te buakaka, ao kaokoroingkami, ao tai riing aia bwai aika a bareka; ao nooria, e na kamaunaki araia, bwa araia aika a buakaka a na aki warekaki i buakon araia aika a raoiroi, bwa ana taeka te Atua e na kakoroaki bukina, are e taku: Araia aika a buakaka a na aki ikotaki ma araia au aomata.

58 Bwa araia aika a raoiroi a na koreaki i nanon te boki ni maiu, ao a na bwaibwai n angataiu. Ao ngkai, tariu, teraa ami taeka ni kaitaraa aio? I taku nakoimi, ngkana kam taetae ni kaitaraa aio, e aoria, bwa ana taeka te Atua e na kakoroaki bukina.

59 Bwa antai ae te tia kaawakin tiibu i buakomi ae e mwaiti ana tiibu ao e aki tataraia, bwa a na aki rin kameaanti ma ni kana ana nanai? Ao nooria, ngkana te kameaanti e rin i buakon ana nanai tiaki bwa e na kakioa nako? Eng, ao n tokina, ngkana e konaa, e na kamatea.

60 Ao ngkai I taku nakoimi bwa te tia kaawakin tiibu ae raoiroi e bon weteiko; ao ngkana kam ongo bwanaana e na bon kairingkami nakon ana nanai, ao ngkami ana tiibu; ao e tua bwa kam na aki kariaia bwa te kameaanti ae tiritiri e na rin i buakomi, bwa kam na aki tiringaki.

61 Ao ngkai, Aramwa, I tuangko n ana taetae teuare e anga te tua nakoiu, bwa kam riai ni karaoi nanon taeka ake I a tia n taekinna nakoimi.

62 Ao I taetae bwa te tua nakoia ake a kaaina te ekaretia; ao nakoia ake aki kaaina te ekaretia I taetae bwa te kakao, ni kangai: Nakomai ao bwabetitoaki nakon te rairannano, bwa kam aonga naba n riki bwa taan kana uaan te kai ni kamaiu.