Ko te
Pukapuka a Moromona

Nā reira, he whakarāpopototanga ia nō te tuhituhinga a te iwi o Nīwhai, me ngā Rāmana anō hoki—i tuhia atu ki ngā Rāmana, ko rātou nei he mōrehu nō te whare o Iharaira; ki te Hūrai, ki te Tauiwi anō hoki: i tuhia mā runga i te whakahaunga, mā runga anō i te wairua o te poropititanga me te whakakitenga. I tuhia, i hīria ake, i hunaia ake anō ki te Ariki, kia kaua e whakangaromia—kia puta mai ai i runga i te takohatanga me te kaha o te Atua hei whakamāramatanga i aua mea—i hīria e te ringa o Moronai, i hunaia ake anō ki te Ariki kia puta mai ai i tōna wā mā te ringa o ngā Tauiwi—Ko tōna whakamāoritanga mā roto i te takohatanga a te Atua.

He whakarāpopototanga i tangohia mai i te Pukapuka a Ētere anō hoki; he tuhinga ia nō te iwi o Iarere; i whakamararatia atu rā i te wā i whakapōauautia ai e te Ariki te reo o te iwi, i a rātou e hanga ana i tētahi pourewa e tae ai ki te rangi; he mea tēnei hei whakaatu ai ki ngā mōrehu o te whare o Iharaira i ngā mea nunui i mea ai te Ariki mō ō rātou mātua: ā, e mōhio ai hoki rātou ki ngā kawenata a te Ariki, arā, e kore rātou e makaia atu mō ake tonu atu—Ā, tae atu ana ki te whakapakepaketanga i te Hūrai me te Tauiwi ko Ihu te Karaiti, te Atua Ora Tonu, e whakakite atu ana i a ia anō ki ngā iwi katoa—Ā, ināianei, mehemea he hē, he hapa ērā nō te tangata; nā reira, kei whakahē i ngā mea a te Atua, kia kitea kohakorehia ai koutou i te nohoanga-whakawā o te Karaiti.